Oblahii Kɛ Oblayei—Nyɛhaa nyɛfɔlɔi ayea abuaa nyɛ kɛbua nyɛtsui He!

MƐƐ naagba ni hiɛdɔɔ yɔɔ he osusuɔ akɛ meele kudɔlɔi kɛkpeɔ? Ani no ji ŋshɔ ni bua shi babaoo lɛ ni amɛaatsɔ mli shweshweeshwe lɛ? Bei pii lɛ jeee no. Hei ni lɛji fɔɔ shishamɔ yɛ ji ŋshɔnaa, jeee yɛ ŋshɔ lɛ teŋgbɛ. Yɛ anɔkwale mli lɛ, meele kpelekemɔ kɛmiiba lɛjiadaamɔhe baanyɛ afee nɔ ni yɔɔ oshara waa po fe kɔɔyɔŋ lɛlɛ ko kudɔmɔ kɛmiiba kɔɔyɔŋ lɛjiadaamɔhe. Mɛni hewɔ?

Dani meele kudɔlɔ ko baanyɛ akudɔ meele kɛba lɛjiadaamɔhe ko shweshweeshwe lɛ, esaaa akɛ etsɔmɔɔ hei fɛɛ ni osharai yɔɔ yɛ lɛjiadaamɔhe pɔtɛɛ ko lɛ ahe kɛhoɔ. Esa akɛ esusu hewalɛ ni nu lɛ tswaa kɛyaa kɛbaa yɛ ŋshɔ lɛ shishi lɛ he ni eha gbɛ agbo akã ekɛ meelei krokomɛi ni mamɔ shi ni ekudɔɔ emeele lɛ kɛtsɔɔ amɛhe lɛ teŋ. Esa akɛ ekudɔ meele lɛ kɛtsɔmɔ shia gɔji bibii, tɛi, loo nibii krokomɛi ni yɔɔ nu lɛ shishi ni baanyɛ aha esha shi lɛ hu ahe. Ni nɔ ni fiteɔ sane lɛ fe fɛɛ ji akɛ, ekolɛ no ji eklɛŋklɛŋ be ni eyaa nakai lɛjiadaamɔhe lɛ.

Kɛji akɛ meele kudɔlɔ ni yɔɔ nilee lɛ aaaye ahe kɛjɛ naagbai nɛɛ ahe lɛ, ekolɛ ehe baahia ni ebi ŋaawoo kɛjɛ meele kudɔlɔ nukpa ko ni le bɔ ni jɛmɛ nu lɛ shikãmɔ yɔɔ ha lɛ ŋɔɔ. Kudɔlɔ nukpa lɛ damɔɔ meele kudɔlɔ lɛ masɛi kpaakpa ni ekɛ gbɛtsɔɔmɔi ni nilee yɔɔ mli haa. Amɛfeɔ ekome kɛsusuɔ osharai ni baanyɛ aba lɛ ahe ni amɛkudɔɔ meele lɛ kɛtsɔmɔɔ hei ni yɔɔ fintɔ̃ɔ kɛbaa lɛjiadaamɔhe lɛ.

Kudɔlɔ nukpa lɛ hesaai ni nɔ bɛ lɛ feɔ yelikɛbuamɔ ni hi jogbaŋŋ ni Kristofoi oblahii kɛ oblayei ni esa akɛ amɛto amɛshihilɛ he gbɛjianɔ kɛtsɔmɔ shihilɛi ni mli wawai amli lɛ yɔɔ lɛ he mfoniri. Mɛni ji nɛkɛ yelikɛbuamɔ nɛɛ? Mɛni hewɔ enɛ he hiaa oblahii kɛ oblayei?

Nyɛhaa wɔtsaa meele he mfonirifeemɔ lɛ nɔ. Kɛji oji oblanyo loo oblayoo lɛ, otamɔ meele kudɔlɔ lɛ ejaakɛ yɛ naagbee lɛ ebaabi ni obu bo diɛŋtsɛ owala he akɔntaa. Ni ofɔlɔi yɛ gbɛnaanii ko tamɔ kudɔlɔ nukpa lɛ nɔ lɛ pɛpɛɛpɛ be mli ni amɛbɔɔ mɔdɛŋ koni amɛkudɔ bo kɛtsɔmɔ shihilɛi komɛi ni mli wawai ni okɛbaakpe yɛ owala shihilɛ mli lɛ amli lɛ. Shi kɛlɛ, ekolɛ ebaafee nɔ ni wa waa kɛha bo yɛ obalahiiaŋ loo oblayeiaŋ afii lɛ amli akɛ oookpɛlɛ ŋaawoi ni ofɔlɔi kɛhaa bo lɛ anɔ. Mɛni hewɔ ebaa lɛ nakai?

Bei pii lɛ naagba lɛ kɔɔ tsui lɛ he. Mfonirifeemɔ tsui lɛ baanyɛ atsirɛ bo ni oshwe nibii gbohii loo ni eha ote shi owo ofɔlɔi yɛ nibii komɛi ni amɛbaatsĩ onaa yɛ he lɛ amli. Biblia lɛ kɛɔ akɛ: “Gbɔmɔ tsuiŋ jwɛŋmɔ lɛ efɔŋ ji kɛjɛ egbekɛbiiashi.” (1 Mose 8:21) Yehowa feɔ lɛ faŋŋ kɛhaa bo akɛ shihilɛi ni mli wawai yɛ ni kã ohiɛ. Eebɔ bo kɔkɔ akɛ: “Tsui lakaa mɔ fe nii fɛɛ ni ekpãlaa mɔ fe nɔ fɛɛ nɔ.” (Yeremia 17:9, Rotherham) Kɛfata susumɔi fɔji ni oblanyo loo oblayoo tsui baanyɛ etɛo lɛ he lɛ, tsui lɛ baanyɛ alaka lɛ hu ni esusu akɛ ele nii fe efɔlɔi, eyɛ mli akɛ amɛyɛ niiashikpamɔi babaoo fe lɛ. Kɛlɛ, yiŋtoi kpakpai yɛ ni obaanyɛ odamɔ nɔ obi yelikɛbuamɔ kɛjɛ ofɔlɔi adɛŋ be mli ni otsɔmɔɔ oblahiiaŋ kɛ oblayeiaŋ afii ni mli wawai lɛ amli lɛ.

Mɛni Hewɔ Esa akɛ Obo Ofɔlɔi Atoi?

Nɔ ni fe fɛɛ lɛ, Yehowa, ni ji weku shishitolɔ lɛ, miikɛɛ bo ni obo ofɔlɔi agbɛtsɔɔmɔi atoi. (Efesobii 3:15) Akɛni Nyɔŋmɔ ehala ofɔlɔi koni amɛkwɛ onɔ hewɔ lɛ, ekɛ ŋaawoo nɛɛ miiha bo akɛ: “Gbekɛbii, nɔ ni sa akɛ nyɛfee ji ni nyɛbo nyɛfɔlɔi atoi akɛ mɛi ni Nuŋtsɔ lɛ ehala ni amɛkwɛ nyɛnɔ.” (Efesobii 6:1-3, Phillips; Lala 78:5) Akɛni ekolɛ oyɛ ogbekɛbiiashi afii amli hewɔ lɛ, eji sɔ̃ ni kã ofɔlɔi anɔ lolo akɛ amɛkudɔ bo, ni eji ogbɛnaa nii akɛ ofee toiboo oha amɛ. Beni bɔfo Paulo ŋma akɛ bii afee toiboo amɛha amɛfɔlɔi lɛ, ekɛ Hela wiemɔ ko ni baanyɛ akɔ bii ni eye afii srɔtoi ahe lɛ tsu nii. Ákɛ nɔkwɛmɔnɔ lɛ, Yesu wie Yerusalembii lɛ ahe taakɛ aŋma yɛ Mateo 23:37 lɛ akɛ ‘bii,’ eyɛ mli akɛ amɛteŋ mɛi fã kpotoo ji onukpai.

Anɔkwafoi babaoo ni hi shi yɛ blema beaŋ lɛ tee nɔ amɛfee toiboo amɛha amɛfɔlɔi afii babaoo be mli ni amɛdara sɛɛ. Eyɛ mli akɛ Yakob ji mɔ ko ni eda moŋ, shi enu shishi akɛ esa akɛ efee toiboo eha etsɛ fãmɔ akɛ ekɛ yoo ko ni jeee Yehowa jálɔ akahi shi lɛ. (1 Mose 28:1, 2) Ŋwanejee ko bɛ he akɛ, Yakob na bɔ ni efɔlɔi atsui kumɔ waa ha beni enyɛmi nuu lɛ kpɛ eyiŋ ni ekɛ Kanaan yoo wɔŋjalɔ hi shi lɛ hu.—1 Mose 27:46.

Yɛ nitsumɔ ni Nyɔŋmɔ kɛwo ofɔlɔi ni ji Kristofoi lɛ adɛŋ koni amɛkɛ gbɛtsɔɔmɔi aha bo lɛ sɛɛ lɛ, amɛji mɛi komɛi hu ni he esa fe fɛɛ ni baanyɛ awo bo ŋaa. Nakai eji ejaakɛ amɛle bo jogbaŋŋ ni ŋwanejee ko bɛ he akɛ amɛjie suɔmɔ ni pɛsɛmkunya bɛ mli kpo amɛtsɔɔ bo afii babaoo. Taakɛ meele kudɔlɔ nukpa lɛ ji lɛ, ofɔlɔi wieɔ kɛjɛɔ niiashikpamɔi ni amɛná lɛ amli. Amɛ hu amɛkɛ “oblahiiaŋ sɛɛdii” nibii kpe. Ni ákɛ anɔkwa Kristofoi lɛ, amɛ diɛŋtsɛ amɛna sɛɛnamɔi ni jɛɔ Biblia shishitoo mlai ni akɛtsuɔ nii lɛ mli kɛbaa lɛ.—2 Timoteo 2:22.

Be mli ni onáa yelikɛbuamɔi ni jɛ niiashikpamɔi amli ni tamɔ nɛkɛ lɛ, eyeɔ ebuaa bo ni onyɛɔ otsuɔ shihilɛi ni mli wawai fe fɛɛ lɛ po ahe nii yɛ omanyeyeli mli. Ákɛ nɔkwɛmɔnɔ lɛ, susumɔ okɛ mɛi krokomɛi ni esoro amɛbɔɔ su ni akɛ amɛ bɔɔ lɛ he okwɛ. Mɛɛ gbɛ nɔ fɔlɔi ni ji Kristofoi baanyɛ amɛkudɔ bo yɛ sane ni hiɛdɔɔ yɔɔ he waa nɛɛ mli?

Suɔmɔ ni Anáa Ahaa Mɛi ni Esoro Amɛbɔɔ Su

Kudɔlɔ nukpai woɔ meele kudɔlɔi aŋaa koni amɛha gbɛ agbo akã meele lɛ kɛ shia gɔji ni yɔɔ nu lɛ shishi ni amɛkudɔɔ meele lɛ kɛtsɔɔ amɛhe lɛ teŋ. Shia gɔji waaa shi amɛhe yɛ oshara hu ejaakɛ amɛnyɛɔ amɛtsiɔ amɛhe kɛjɛɔ he kome kɛyaa he kroko. Nakai nɔŋŋ ofɔlɔi baasumɔ ni otsi ohe kɛjɛ shihilɛi ni baanyɛ amɛkɛ ohenumɔi awo oshara mli lɛ ahe. Ákɛ nɔkwɛmɔnɔ lɛ, fɔlɔi le akɛ henumɔ ni anáa ahaa mɔ kroko ni esoro ebɔɔ su lɛ mli nyɛɔ ewaa ni anyɛɛɛ naa atsɔɔ po. Shi kɛji atee henumɔi nɛɛ ashi lɛ, ebaanyɛ ekɛ bo awo oshara mli.

Dina nɔkwɛmɔnɔ lɛ feɔ oshara ni yɔɔ nibii ni baanyɛ amɛkɛ oshara aba lɛ ahe ni aaabɛŋkɛ lɛ he mfoniri. Ekolɛ nibii babaoo ni Dina taoɔ akɛ ele kɛ miishɛɛ ni esumɔɔ ni ená lɛ ji nɔ ni tsirɛ lɛ ni ekɛ Kanaan oblayei, ni ŋwanejee ko bɛ he akɛ amɛjeŋba ehiii lɛ yabɔ naanyo. Nɔ ni tsutsu ko lɛ etamɔ shwɛmɔ ni oshara ko nyɛŋ ajɛ mli kɛba lɛ batsɔ niiashikpamɔ ni yɔɔ gbeyei—oblanyo ni “abuɔ lɛ fe . . . fɛɛ” yɛ maŋ lɛ mli lɛ to lɛ kabonaa.—1 Mose 34:1, 2, 19.

Osharai ni tamɔ nɛkɛ lɛ miiya nɔ eefa babaoo yɛ bei ni wɔyɔɔ mli ni awoɔ bɔlɛnamɔ he hewalɛ waa yɛ mli nɛɛ amli. (Hoshea 5:4) Ekolɛ oblahii kɛ oblayei babaoo baafee amɛnii tamɔ nɔ ni miishɛɛ ni akɛ mɛi krokomɛi ni esoro amɛbɔɔ su lɛ aaaná lɛ ji miishɛɛ nɔ̃ fe fɛɛ ni yɔɔ. Ekolɛ obaanu he akɛ mɔ ko ni he feɔ bo fɛo waa lɛ ni akɛ lɛ baahi he ko banee lɛ baaha omii ashɛ ohe. Shi fɔlɔi ni yɔɔ suɔmɔ lɛ baabɔ mɔdɛŋ ni amɛbu ohe kɛjɛ oblahii kɛ oblayei ni amɛjieee bulɛ kpo amɛhaaa tɛi ni Nyɔŋmɔ efolɔ eshwie shi lɛ ahe.

Laura kpɛlɛ nɔ akɛ nibii babaoo ni ataoɔ akɛ ale baanyɛ atsĩ oblahii kɛ oblayei agbɛ ni amɛkayoo osharai ni yɔɔ. “Beni gbekɛbii yei ni yɔɔ miklas lɛ kɛɛ mi akɛ amɛkɛ gbekɛbii hii komɛi ni he yɔɔ fɛo waa lɛ jo aahu kɛbote jenamɔ mli lɛ, amɛwie he tamɔ nɔ ni eji niiashikpamɔ ko ni hiɛ kpaŋ nɔ kɔkɔɔkɔ. Miyɔse akɛ, bei pii lɛ amɛwoɔ nii ahe, shi fɛɛ sɛɛ lɛ misumɔɔ ni male nibii amli babaoo ni misusuɔ akɛ ekolɛ miishɛɛ babaoo miiŋmɛɛ mi. Mile akɛ mifɔlɔi asane ja akɛ amɛhaaa maya hei ni tamɔ nakai moŋ, shi kɛlɛ ebafeɔ kaa kɛhaa mi.”

Nɔ ko bɛ ni haa meele ni hiɛ foi lɛ waa edamɔɔ shi, no hewɔ lɛ eheɔ lɛ be kpalaŋŋ dani ewaa edamɔɔ shi. Fɔlɔi le akɛ akɔnɔ tamɔ nakai nɔŋŋ. Abɛi awolo lɛ kɛ mɔ ko ni nyɛɛɛ aye ekɔnɔ nɔ lɛ toɔ tsina ko ni aakpala lɛ kɛmiiya ayagbe lɛ lɛ he. (Abɛi 7:21-23) Osumɔŋ ni nɔ ko ni tamɔ nakai ní kɛ ohenumɔi kɛ omumɔŋ shidaamɔ baawo oshara mli aba onɔ. Ofɔlɔi baanyɛ ayɔse kɛji akɛ otsui bɔi bo kudɔmɔ kɛmiiya nɛkɛ he nɛɛ, ni ekolɛ amɛkɛ ŋaawoi ni sa baaha bo. Ani okɛ nilee baabo amɛ toi bɔni afee ni oye ohe kɛjɛ amanehulu mli?—Abɛi 1:8; 27:12.

Ofɔlɔi ayelikɛbuamɔ hu he baahia bo be mli ni ehe hiaa ni okpee tipɛŋfoi anɔnyɛɛ naa lɛ. Mɛɛ gbɛ nɔ amɛbaaye amɛbua bo yɛ?

Hewalɛ ni Yɔɔ Nigii ni Otipɛŋfoi Baanyɛ Aná yɛ Onɔ

Ŋshɔke wulu baanyɛ aha meele akpalaŋ kɛjɛ gbɛ ni enyiɛ nɔ lɛ nɔ. Kɛji meele lɛ baanyɛ ŋshɔke wulu lɛ naa adamɔ lɛ, no lɛ ebaabi ni akudɔ meele lɛ kɛya afã kroko. Nakai nɔŋŋ hewalɛ ni yɔɔ nigii ni oblahii kɛ oblayei krokomɛi baanyɛ aná yɛ onɔ lɛ baanyɛ akpalaŋ bo yɛ mumɔŋ, ja ofee nɔ ko ni okɛkpee naa.

Taakɛ Dina niiashikpamɔ lɛ feɔ he nɔkwɛmɔnɔ lɛ, ‘kɛ́ okɛ kwashiai bɔɔ lɛ, obaana amane.’ (Abɛi 13:20) Kaimɔ akɛ yɛ Biblia lɛ mli lɛ, wiemɔ “kwashia” lɛ damɔ shi kɛha mɔ ko ni leee Yehowa loo mɔ ni kpooɔ akɛ eeenyiɛ yɛ egbɛ̀i lɛ anɔ.

Shi kɛlɛ, ekolɛ ebafeŋ nɔ ni yɔɔ mlɛo akɛ oookpoo oklasbii lɛ asusumɔi loo amɛnifeemɔi. María José tsɔɔ mli akɛ: “Misumɔɔ akɛ oblahii kɛ oblayei krokomɛi akpɛlɛ minɔ. Akɛni misumɔɔɔ ni amɛsusu akɛ miyɛ srɔto hewɔ lɛ, mikase amɛ jogbaŋŋ bɔ ni manyɛ.” Otipɛŋfoi baanyɛ aná onɔ hewalɛ ni oyɔseee—yɛ lalai ni ohalaa mli, yɛ atadei ni obaasumɔ ni owo, loo yɛ bɔ ni owieɔ ohaa lɛ po amli. Ekolɛ, omii shɛɔ ohe be mli ni okɛ oblahii kɛ oblayei ni ji otipɛŋfoi bɔɔ lɛ. Nakai eji yɛ adebɔɔ su naa, shi amɛbaanyɛ amɛná onɔ hewalɛ yɛ gbɛ ni waaa ni baanyɛ afite nii nɔ.—Abɛi 1:10-16.

Caroline kaiɔ naagbai ni ekɛkpe afii fioo komɛi ni eho nɛɛ lɛ akɛ: “Minanemɛi yei ni mikɛbɔɔ lɛ babaoo ná hemɛi beni amɛye afii 13, ni ebafee nɔnyɛɛ ni naa wa waa kɛha mi akɛ manyiɛ amɛ nɔkwɛmɔnɔ lɛ sɛɛ. Shi kɛlɛ, minyɛ awo kudɔ mi kɛtsɔmɔ nɛkɛ bei ni mli wawai nɛɛ amli. Eheɔ ŋmɛlɛtswai babaoo ni ekɛboɔ mi toi, ekɛ mi susuɔ saji ahe, ni eyeɔ ebuaa mi koni mana hiamɔ ni yɔɔ he akɛ mamɛ kɛyashi mada dani mikɛ mihe awo mɛi kɛ bɔɔ ni tamɔ nakai lɛ amli.”

Taakɛ Caroline nyɛ ji lɛ, ekolɛ ofɔlɔi baanu he akɛ eji amɛsɔ̃ akɛ amɛbɔ bo kɔkɔ yɛ tipɛŋfoi anɔnyɛɛ he loo amɛtsĩ onaa po yɛ nifeemɔi komɛi loo nanemɛi komɛi ni okɛbɔɔ lɛ ahe. Nathan kaiɔ naataamɔi srɔtoi ni ba ekɛ efɔlɔi ateŋ yɛ saji nɛɛ ahe lɛ. Etsɔɔ mli akɛ: “Bei pii lɛ, minanemɛi lɛ fɔ̃ɔ nine amɛtsɛɔ mi koni mikɛ amɛ aje kpo, shi mifɔlɔi sumɔɔɔ ni mikɛ mihe awo henaabuamɔi wuji ni onukpa ko kwɛɛɛ nɔ lɛ amli. Yɛ nakai be lɛ mli lɛ, minuuu nɔ hewɔ ni mɛi krokomɛi afɔlɔi ŋmɛɔ amɛgbɛ yɛ nibii babaoo amli fe mifɔlɔi lɛ shishi.”

Kɛlɛ, sɛɛ mli lɛ, Nathan banu shishi faŋŋ. Ekpɛlɛ nɔ akɛ: “Yɛ migbɛfaŋ lɛ, mile akɛ ‘buulufeemɔ kpɛtɛ gbekɛ tsui he.’ Etamɔ nɔ ni buulufeemɔ nɛɛ jeɔ kpo yɛ gbɛ ni waaa nɔ be mli ni gbekɛbii hii ebua amɛhe naa. Mɔ kome jeɔ nɔ fɔŋ ko shishi, mɔ kroko feɔ nɔ ni mli wa fe nakai, ni mɔ ni ji etɛ lɛ haa emli woɔ wu kwraa. Etsɛɛɛ ni awoɔ mɛi krokomɛi ni eshwɛ lɛ hewalɛ koni amɛkɛ amɛhe awo mli. Oblahii kɛ oblayei ni kɛɔ akɛ amɛsɔmɔɔ Yehowa lɛ po baanyɛ agbee nɛkɛ tsɔne nɛɛ mli.”—Abɛi 22:15.

Ehe bahia ni Nathan kɛ María José fɛɛ akudɔ amɛtsuii be mli ni amɛfɔlɔi eŋmɛɛɛ amɛ gbɛ ni amɛfee nibii ni amɛtipɛŋfoi lɛ jieɔ yi lɛ. Kɛlɛ, amɛfee toiboo, ni yɛ sɛɛ mli lɛ, amɛmii shɛ amɛhe akɛ amɛfee nakai. Abɛbua ko kɛɔ akɛ: “Ba otoi shi, ní onu nilelɔi awiemɔi, ni okɛ otsui afɔ minilee lɛ nɔ.”—Abɛi 22:17.

Amɛsa Woo

Ewa akɛ aaakudɔ meele ko ni ekpa afã, ni kɛji akɛ ekpa afã fe nine lɛ, ewaaa akɛ eeebutu. Akɛni wɔyeee emuu hewɔ lɛ, wɔ fɛɛ wɔkɛ wɔhe fɔɔ pɛsɛmkunya nibii kɛ nibii ni esaaa anɔ. Yɛ shihilɛi ni nyɛɔ ebaa nɛɛ fɛɛ sɛɛ lɛ, gbekɛbii baanyɛ aye omanye kɛji akɛ amɛfee toiboo jogbaŋŋ amɛha amɛfɔlɔi agbɛtsɔɔmɔi.

Ákɛ nɔkwɛmɔnɔ lɛ, ofɔlɔi baanyɛ amɛye amɛbua bo koni ojie susumɔ akɛ gbɛ ko yɛ ni kã agbó fintɔ̃ɔ ni kɛ mɔ yaa naanɔ wala lɛ kɛ agbó lɛkɛtɛɛ ni kɛ mɔ yaa hiɛkpamɔ mli lɛ teŋgbɛ lɛ kɛjɛ ojwɛŋmɔ mli. (Mateo 7:13, 14) Nilee bɛ mli akɛ ooosusu akɛ obaanyɛ oná esha fioo ko mli ŋɔɔmɔ ni okuuu Nyɔŋmɔ mla mli, tamɔ nɔ ni okɛ esha “miisa onaa” ni omiii. Mɛi ni bɔɔ mɔdɛŋ ni amɛkɔ gbɛ ni tamɔ nɛkɛ lɛ, ‘miididaŋ yɛ saji enyɔ teŋ’—Yehowa ni amɛaasɔmɔ kɛyashi he ko kɛ suɔmɔ ni amɛaaná amɛha je lɛ kɛ emli nibii lɛ—ni ebaanyɛ ekɛ amɛ awo oshara mli yɛ mumɔŋ. (1 Maŋtsɛmɛi 18:21; 1 Yohane 2:15) Mɛni hewɔ ebaa lɛ nakai? Yɛ wɔ esha fɔmɔsu lɛ hewɔ.

Akɔnɔi fɔji ni jɛɔ emuu ni wɔyeee lɛ mli kɛbaa lɛ amli waa kɛji akɛ wɔŋmɛɛ wɔhe wɔha ni wɔfeee he nɔ ko. Esha bibioo ni wɔkɛaasa wɔnaa lɛ egbeŋ akɔnɔ ni wɔ ‘kutumpɔo tsui’ lɛ ená lɛ. Ebaasumɔ ni ená babaoo. (Yeremia 17:9) Kɛji wɔbɔi kpalaŋmɔ yɛ mumɔŋ lɛ, je lɛ baaya nɔ ená wɔnɔ hewalɛ babaoo. (Hebribii 2:1) Ekolɛ oyɔseŋ akɛ ookpalaŋ yɛ mumɔŋ, shi ofɔlɔi ni ji Kristofoi lɛ baanyɛ ayɔse. Eji anɔkwale akɛ amɛnyɛŋ amɛkase kɔmpiuta nɔ nibii oya tamɔ bɔ ni obaanyɛ okase lɛ, shi amɛle kutumpɔo tsui lɛ he nii babaoo fe bɔ ni ole. Ni amɛmiisumɔ ni amɛye amɛbua bo ni “oha otsui anyiɛ gbɛ” ni baanyɛ ekɛ bo aya wala mli lɛ “nɔ tɛ̃ɛ.”—Abɛi 23:19.

Yɛ anɔkwale mli lɛ, kaakpa gbɛ akɛ ofɔlɔi baatsu saji ahe nii yɛ gbɛ ni yeɔ emuu nɔ be mli ni ebiɔ ni amɛkɛ gbɛtsɔɔmɔi aha bo yɛ nibii ni naagba yɔɔ he lɛ amli, tamɔ lala, hiɛtserɛjiemɔ, kɛ hesaamɔ nɛkɛ. Ekolɛ ofɔlɔi naŋ nilee in tamɔ Salomo nɔ lɛ loo tsuishiŋmɛɛ ni tamɔ Hiob nɔ lɛ eko. Taakɛ meele kudɔlɔ nukpa lɛ ji lɛ, ekolɛ bei komɛi lɛ amɛbaatɔ̃ yɛ be mli ni amɛkɛ kɔkɔbɔɔi haa bo lɛ. Shi kɛlɛ, kɛji ofee toiboo oha ‘otsɛ tsɔsemɔi lɛ ni oshɛɛɛ onyɛ mla lɛ ofɔɔɔ’ lɛ, no lɛ amɛ gbɛtsɔɔmɔi lɛ ahe baaba sɛɛnamɔ babaoo kɛha bo.—Abɛi 1:8, 9.

Ekolɛ oblahii kɛ oblayei krokomɛi baanyɛ awie amɛfɔlɔi ahe bɔ ni esaaa. Kɛlɛ, kɛji akɛ ofɔlɔi miibɔ mɔdɛŋ koni amɛkɛ Ŋmalɛi lɛ atsu nii lɛ, no lɛ amɛbaaye amɛbua bo, yɛ shihilɛ fɛɛ shihilɛ mli, be fɛɛ be, kɛ shihilɛi ni mli wawai amli. Taakɛ bɔ ni kudɔlɔ nukpa lɛ kɛ ŋaawoi ni jɛ niiashikpamɔi amli haa meele kudɔlɔ lɛ, nakai nɔŋŋ ehe miihia ni ofɔlɔi akudɔ bo, ni amɛnyiɛ ohiɛ kɛya nilee gbɛ lɛ nɔ. Jɔɔmɔi babaoo diɛŋtsɛ baajɛ mli kɛba.

“Ejaakɛ ŋaalee aaabote otsui mli ni nilee aaaŋɔɔ osusuma naa; jwɛŋmɔ aaabaa oyi jogbaŋŋ, sane shishinumɔ aaabu ohe, ní ejieo kɛjɛ gbɛ fɔŋ nɔ, kɛjɛ mɛi ni wieɔ nibii kɔ̃ɔdɔ̃ji lɛ adɛŋ, mɛi hu ni shiɔ jalɛ tempɔŋi lɛ, ni amɛyanyiɛɔ dujiaŋ gbɛi anɔ lɛ . . . Ejaakɛ mɛi ni ja lɛ aaahi shikpɔŋ lɛ nɔ, ni mɛi ni eye emuu lɛ aaashwɛ yɛ nɔ.”—Abɛi 2:10-13, 21.

[Mfoniri ni yɔɔ baafa 22]

Hewalɛ ni oblahii kɛ oblayei krokomɛi náa yɛ onɔ lɛ baanyɛ eha okpalaŋ yɛ mumɔŋ

[Mfoniri ni yɔɔ baafa 23]

Kaimɔ Dina niiashikpamɔ lɛ

[Mfoniri ni yɔɔ baafa 24]

Esa akɛ oblahii kɛ oblayei abi gbɛtsɔɔmɔi kɛjɛ amɛfɔlɔi adɛŋ taakɛ meele kudɔlɔ biɔ ŋaawoo kɛjɛɔ kudɔlɔ nukpa ni yɔɔ niiashikpamɔ dɛŋ lɛ

[He ni Mfoniri ni yɔɔ baafa 24 lɛ Jɛ]

Mfoniri: www.comstock.com