Sanebimɔhe
◼ Mɛni esa akɛ wɔha ehi wɔjwɛŋmɔŋ kɛ́ wɔmiisumɔ ni akɛ nibii fɛɛ ni wɔyɔɔ loo ekomɛi aha Yehowa asafo lɛ beni wɔgbo lɛ?
Kɛ́ adesai gboi lɛ, amɛbɛ amɛnibii anɔ hewalɛ ko dɔŋŋ. (Jaj. 9:5, 6) No hewɔ lɛ, mɛi babaoo tsɔɔ hiɛ amɛfeɔ shamaŋsheo kɛtsɔɔ bɔ ni kɛ́ amɛgbo lɛ ajara amɛnibii lɛ aha. (2 Maŋ. 20:1) Bei pii lɛ, yɛ shamaŋsheo lɛ mli lɛ, mɔ lɛ tsɔɔ mɔ tuuntu ni baakwɛ enibii lɛ anɔ, loo mɔ ni baakwɛ koni atsu nibii fɛɛ ni eŋmala yɛ shamaŋsheo lɛ mli lɛ ahe nii. Yɛ maji babaoo anɔ lɛ, kɛ́ mɔ ko efeee shamaŋsheo dani egbo lɛ, nɔyelɔi lɛ tsɔɔ bɔ ni esa akɛ ajara mɔ lɛ nibii aha. No hewɔ lɛ, kɛji wɔmiisumɔ ni kɛ́ wɔgbo lɛ, aja wɔnibii lɛ yɛ gbɛ pɔtɛɛ ko nɔ, ekolɛ akɛ eko loo fɛɛ aha Yehowa asafo lɛ, ehe miihia ni wɔfee enɛ faŋŋ yɛ shamaŋsheo lɛŋ, ni wɔkɛ hiɛshikamɔ ahala mɔ ni baakwɛ nibii lɛ anɔ loo ebaakwɛ koni atsu nibii fɛɛ ni wɔŋmala yɛ mli lɛ ahe nii.
Sɔ̃ ni tsii bakãa mɔ ni baakwɛ nibii lɛ anɔ loo ebaatsu nibii fɛɛ ni aŋmala yɛ shamaŋsheo lɛ mli lɛ ahe nii lɛ nɔ. Gboshinii lɛ naabuamɔ kɛ ejaa baanyɛ abi ni atsu nibii babaoo ahe nii, ni ebaanyɛ ehe be hu, shi sɔ̃ ni bakãa mɔ ni baajara nibii lɛ anɔ lɛ baadamɔ gboshinii lɛ falɛ nɔ. Kɛfata he lɛ, bei pii lɛ nɔyelɔi lɛ yɛ gbɛtsɔɔmɔi ni esa akɛ anyiɛ sɛɛ. Jeee mɔ fɛɛ mɔ ni yɔɔ asafo lɛ mli lɛ baanyɛ akwɛ onibii lɛ anɔ, loo etsu nibii fɛɛ ni oŋmala lɛ ahe nii. Esa akɛ wɔhala mɔ ni wɔle akɛ ebaanyɛ etsu nitsumɔ nɛɛ, wɔbaanyɛ wɔmu wɔfɔ̃ enɔ, ni ebaasumɔ ni etsu nibii fɛɛ ni wɔŋmala lɛ ahe nii.—Kwɛmɔ sane ni ji “The Wisdom and Benefits of Estate Planning,” ni je kpo yɛ December 8, 1998, Awake! lɛ mli lɛ.
Kɛ́ Abi ni Okwɛ Nibii lɛ Anɔ loo Otsu Shamaŋsheo lɛŋ Nibii lɛ Ahe Nii: Kɛ́ mɔ ko bi akɛ obaasumɔ ni kɛ́ egbo lɛ okwɛ enibii anɔ lo lɛ, susumɔ sɔ̃ ni no kɛbaafɔ̃ onɔ lɛ he jogbaŋŋ, ni okɛ sɔlemɔ apɛi omli okwɛ akɛ obaanyɛ otsu sɔ̃ lɛ he nii lo. (Luka 14:28-32) Mɔ lɛ gbele sɛɛ lɛ, ehe baahia ni oha mɛi fɛɛ ni atsĩ amɛgbɛ́i tã akɛ gboshiniyelɔi lɛ ale. Enɛ sɛɛ lɛ, eji osɔ̃ akɛ oja nibii lɛ bɔ ni mla biɔ ni afee lɛ, ni esa akɛ oja lɛ bɔ pɛ ni atsɔɔ yɛ shamaŋsheo lɛŋ lɛ. Esa akɛ oha ehi ojwɛŋmɔŋ akɛ, kɛ́ gboshinii lɛ fa jio, efaaa jio lɛ, esaaa ni otsakeɔ shamaŋsheo lɛ hiɛ. Nibii fɛɛ ni abaatsĩ tã akɛ akɛha Watch Tower Bible and Tract Society of Ghana lɛ bafeɔ nibii ni akɛha Yehowa asafo lɛ kwraa.—Luka 16:10; 21:1-4.