Daimonioi Lɛ Gbɔmɔgbelɔi Ni!

Satan kɛ daimonioi lɛ ayitseiaŋ wala ni amɛhe yɛ oshara hu. Yɛ mra be ko mli lɛ, Satan gbe anɔkwafo Hiob kooloi kɛ etsuji fɛɛ. No sɛɛ lɛ, egbe Hiob bii nyɔŋma lɛ hu fɛɛ kɛtsɔ “ahum kpele ko” ni eha ekumɔ shia ni amɛyɔɔ mli lɛ nɔ. Yɛ no sɛɛ lɛ Satan ha “asanei ni jaraa tsɛ̃rɛ̃ Hiob kɛjɛ enaneshi aahu kɛyashi eyiteŋ pampam.”—Hiob 1:7-19; 2:7.

Yɛ Yesu gbii amli lɛ, daimonioi lɛ ha mɛi komɛi tsɔmɔ mumui ni mɛi krokomɛi hu shwila. (Mateo 9:32, 33; 12:22) Amɛpiŋ nuu ko aahu akɛ amɛha ekɛ tɛi po folɔ ehe. (Marko 5:5) Amɛha gbekɛnuu ko hu bolɔ waa, ni amɛfɔ̃ɔ lɛ amɛtswaa shi, ni “ehaa eshɔ̃ɔ.”—Luka 9:42.

Satan kɛ daimonioi lɛ hã asanei fɔji tsɛ̃rɛ̃ Hiob, ni amɛhã mɛi gbee shi ni amɛshɔ̃ — Yɛ blema lɛ, daimonioi lɛ haa mɛi komɛi ahe yeɔ ni amɛhaa nɔ nyɔɔ mɛi krokomɛi anɔ ni amɛshɔ̃ɔ

Ŋmɛnɛ, Satan kɛ daimonioi lɛ miigbe gbɔmɛi tamɔ amɛfee be ko lɛ. Yɛ anɔkwale mli lɛ, amɛ nifɔjianii lɛ efa babaoo kɛjɛ be mli ni ashɛrɛ amɛ ashwie kɛjɛ ŋwɛi lɛ. Amaniɛbɔi ni anuɔ kɛjɛɔ je lɛŋ hei sɔrɔtoi fɛɛ lɛ yeɔ amɛyitsoŋwalɛ lɛ he odase. Amɛkɛ helai waa mɛi komɛi ayi. Mɛi krokomɛi hu, amɛwoɔ amɛhe gbeyei yɛ duŋ mli, ni amɛhaaa amɛwɔ aloo amɛhaa amɛlaa lamɔi ni yɔɔ gbeyei. Mɛi krokomɛi hu amɛkɛ amɛ naa bɔlɛ yɛ gbɛ fɔŋ nɔ. Ni mɛi krokomɛi hu amɛtsirɛɔ amɛ amɛwoɔ sɛkɛyeli, gbɔmɔgbee, aloo amɛ diɛŋtsɛ amɛhe gbee mli.

Daimonioi lɛ ehã nuu ko yitsoŋ ewa, ni amɛhã nuu ko miila lamɔi ni yɔɔ gbeyei yɛ nyɔɔŋ kɛmiihao lɛ — Ŋmɛnɛ, daimonioi lɛ haa mɛi komɛi ayitseiaŋ waa; amɛwoɔ mɛi krokomɛi hu ahe gbeyei yɛ duŋ mli, ni amɛhaa amɛlaa lamɔi ni yɔɔ gbeyei

Lintina, ni yɔɔ Suriname lɛ gba akɛ daimonio, loo mumɔ fɔŋ ko gbe eweku lɛ mlibii 16 ni daimonio lɛ wa lɛ yi aahu yɛ gbɔmɔtsoŋ kɛ jwɛŋmɔŋ fɛɛ afii 18 sɔŋŋ. Ejɛ nɔ ni lɛ diɛŋtsɛ ena lɛ mli egba akɛ daimonioi lɛ “naa miishɛɛ kɛ amɛmiiwa mɛi ni sumɔɔɔ akɛ amɛnine shɛɔ amɛnɔ lɛ yi aahu kɛyashiɔ gbele mli tete po.”

Shi Yehowa nyɛɔ ebuɔ etsuji ahe kɛjɛɔ Satan tutuamɔi amli.—Abɛi 18:10.