15, 16. (a) Beni Hana tee sɔlemɔwe lɛ eyajá Yehowa, ni efɔse etsuiŋ saji eshwie ehiɛ lɛ, mɛɛ hewalɛ no ná yɛ enɔ? (b) Kɛ́ wɔkɛ haomɔi miikpe lɛ, mɛɛ gbɛ nɔ wɔbaanyɛ wɔkase Hana?

¹⁵ Beni Hana tee sɔlemɔwe lɛ eyajá Yehowa ni efɔse etsuiŋ eshwie ehiɛ lɛ, mɛɛ hewalɛ no ná yɛ enɔ? Amaniɛbɔɔ lɛ kaneɔ akɛ: “Yoo lɛ yiŋ etee, ni eyaye nii, ni ehiɛ efeee tɔtɔɔtɔ dɔŋŋ.” (1 Sam. 1:18) Enɛ tsɔɔ akɛ Hana hiɛ efeee mɔbɔmɔbɔ dɔŋŋ. Etsui nyɔ emli. Yɛ gbɛ ko nɔ lɛ, eshɛ ehenumɔŋ jatsu ni tsii lɛ efɔ̃ kɔŋ ko, ni ji eŋwɛi Tsɛ lɛ kɔŋ, ni lɛɛ ni yɔɔ hewalɛ kwraa fe enɔ̃ lɛ nɔ. (Nyɛkanea Lala 55:23.) Ani naagba ko yɛ ni Yehowa nyɛŋ atere? Dabi kwraa—jeee no beaŋ, jeee amrɔ nɛɛ, ni ebaŋ lɛ nakai hu kɔkɔɔkɔ!

¹⁶ Kɛ́ wɔnu he akɛ wɔnii efee mɔbɔ loo wɔtsui miisu yɛ haomɔ ko hewɔ lɛ, esa akɛ wɔkase Hana ni wɔha Mɔ ni Biblia lɛ tsɛɔ lɛ akɛ ‘sɔlemɔ Toibolɔ’ lɛ ale nɔ fɛɛ nɔ ni gbaa wɔnaa lɛ. (Lala 65:3) Kɛ́ wɔkɛ hemɔkɛyeli fee nakai lɛ, wɔ hu wɔbaana akɛ “Nyɔŋmɔ hejɔlɛ ni fe jwɛŋmɔi fɛɛ lɛ” baaye wɔhaomɔ lɛ najiaŋ.—Fil. 4:6, 7.

¹⁸ Mɛɛ be Penina yɔse akɛ enifeemɔ lɛ gbaaa Hana naa dɔŋŋ? Amaniɛbɔɔ lɛ etsɔɔɔ, shi wiemɔ ni ji ‘ehiɛ efeee tɔtɔɔtɔ dɔŋŋ’ lɛ tsɔɔ akɛ kɛjɛ no nɔ kɛyaa lɛ, Hana ná miishɛɛ ni efeee ehiɛ mɔbɔmɔbɔ dɔŋŋ. Bɔ fɛɛ bɔ ni sane lɛ ji lɛ, etsɛɛɛ ni Penina bayɔse akɛ esu gbonyo lɛ yeee omanye. Kɛjɛ no sɛɛ lɛ, Biblia lɛ etsĩii etã dɔŋŋ.