Gbohiiashitee Lɛ Hãa Wɔnaa Nyɔŋmɔ Suɔmɔ, Ehiɛshikamɔ, Kɛ Etsuishitoo Lɛ

1. Mɛni hewɔ Yehowa bɔ nibii?

DANI Yehowa baabɔ nibii fɛɛ lɛ, no mli lɛ ekome eyɔɔ. Kulɛ ebaanyɛ ehi shi nakai ni ebɔɔɔ mɔ ko efataaa ehe, ejaakɛ jeee ja mɔ ko yɛ emasɛi dani ebaaná miishɛɛ. Shi suɔmɔ ni eyɔɔ lɛ hewɔ lɛ, ebɔ mɛi krokomɛi koni amɛ hu amɛba wala mli ni amɛná miishɛɛ.​—Lala 36:9; 1 Yoh. 4:19.

2. Te Yesu kɛ ŋwɛibɔfoi lɛ nu he amɛhã tɛŋŋ be ni amɛna nibii ni Yehowa ebɔ lɛ?

² Klɛŋklɛŋ lɛ, Yehowa bɔ e-Bi Yesu. No sɛɛ lɛ, etsɔ Yesu nɔ ebɔ ŋwɛibɔfoi akpekpei abɔ, kɛ “nibii krokomɛi fɛɛ.” (Kol. 1:16) Yesu ná miishɛɛ waa akɛ efata e-Tsɛ lɛ he kɛtsu nii akɛ “Ŋaalɔ Kpanaa.” (Abɛi 8:30) Be ni Yesu fata Yehowa he kɛbɔ ŋwɛi kɛ shikpɔŋ lɛ, ŋwɛibɔfoi lɛ hu ná miishɛɛ. Biblia lɛ kɛɔ akɛ, be ni abɔ shikpɔŋ lɛ, ‘amɛbolɔ kɛ miishɛɛ.’ Yehowa tee nɔ ebɔ nibii krokomɛi, ni naagbee kwraa lɛ, ebɔ adesai. Ŋwanejee ko bɛ he akɛ, enɛ hu hã ŋwɛibɔfoi lɛ amii shɛ amɛhe waa. (Hiob 38:7; Abɛi 8:31, shn.) Nibii ni Yehowa ebɔ lɛ ateŋ eko fɛɛ eko hãa wɔnaa akɛ, eyɛ suɔmɔ ni ehiɛ kã shi.​—Lala 104:24; Rom. 1:20.

3. Yɛ nɔ ni aŋma yɛ 1 Korintobii 15:21, 22 lɛ naa lɛ, mɛni Yesu kpɔmɔ afɔleshãa lɛ baahã adesai aná?

³ Yehowa to akɛ adesai aná miishɛɛ ni amɛhi shi yɛ shikpɔŋ lɛ nɔ kɛya naanɔ. Shi Adam kɛ Hawa fee esha amɛshi Yehowa, amɛ-Tsɛ ni sumɔɔ amɛ lɛ, ni enɛ hã esha kɛ gbele tsɛŋe amɛseshibii fɛɛ. (Rom. 5:12) Mɛni Yehowa fee yɛ he? Amrɔ nɔŋŋ lɛ, ewo shi akɛ ebaahere adesai. (1 Mo. 3:15) Yehowa to gbɛjianɔ koni e-Bi lɛ abagbo kɛkpɔ̃ Adam kɛ Hawa seshibii lɛ kɛje esha kɛ gbele mli, koni mɛi fɛɛ ni baasɔmɔ Lɛ lɛ ahi shi kɛya naanɔ.​—Yoh. 3:16; Rom. 6:23; kanemɔ 1 Korintobii 15:21, 22.

4. Mɛɛ sanebimɔi wɔbaasusu he yɛ nikasemɔ nɛɛ mli?

⁴ Saji pii yɛ ni ekolɛ wɔbaabi wɔhe yɛ gbohiiashitee lɛ he. Ekolɛ wɔbaabi wɔhe akɛ: Te abaato gbohiiashitee lɛ he gbɛjianɔ ahã tɛŋŋ? Ani wɔbaayoo wɔsuɔlɔi ni egboi lɛ kɛ́ atee amɛ shi? Mɛɛ gbɛ nɔ gbohiiashitee lɛ baahã wɔmii ashɛ wɔhe? Ni kɛ́ wɔhe be wɔjwɛŋ gbohiiashitee lɛ he lɛ, mɛɛ gbɛ nɔ ebaahã wɔna akɛ Yehowa sumɔɔ wɔ, ehiɛ kã shi, ni etoɔ etsui shi? Nyɛhãa wɔsusua sanebimɔi nɛɛ ahe ekomekomei.

TE ABAATO GBOHIIASHITEE LƐ HE GBƐJIANƆ AHÃ TƐŊŊ?

5. Mɛni hewɔ wɔbaanyɛ wɔkɛɛ akɛ ateŋ mɛi ni egboi lɛ fɛɛ shi shi kome lɛ?

⁵ Yehowa baatsɔ e-Bi Yesu nɔ etee mɛi akpekpei abɔ shi. Shi ani ebaatee amɛ fɛɛ shi shi kome? Etamɔ nɔ ni wɔbaanyɛ wɔkɛɛ akɛ efeŋ nakai. Mɛni hewɔ? Ejaakɛ kɛ́ atee amɛ fɛɛ shi shi kome lɛ, ekolɛ anyɛŋ ato amɛhe gbɛjianɔ jogbaŋŋ. Shi wɔle akɛ, Yehowa toɔ enɔ fɛɛ nɔ he gbɛjianɔ jogbaŋŋ, ni ebɛ basabasa. Ele akɛ, ja ato nibii ahe gbɛjianɔ jogbaŋŋ dani adesai baanyɛ ahi shi yɛ toiŋjɔlɛ mli. (1 Kor. 14:33) Yehowa Nyɔŋmɔ hiɛ kã shi ni etoɔ etsui shi, ni no hewɔ be ni ekɛ Yesu saa shikpɔŋ lɛ koni adesai anyɛ ahi nɔ lɛ, amɛfeee fɛɛ shi kome, shi moŋ amɛfee lɛ fiofio lɛ. Yɛ Kristo Afii Akpe Nɔyeli lɛ mli lɛ, Yesu baajie sui nɛɛ nɔŋŋ kpo be ni ekɛ mɛi fɛɛ ni baafo Harmagedon lɛ feɔ ekome kɛsaa shikpɔŋ lɛ nɔ amɛhãa mɛi ni abaatee amɛ shi lɛ.

6. Yɛ nɔ ni awie yɛ Bɔfoi 24:15 lɛ naa lɛ, namɛi hu Yehowa baatee amɛ shi?

⁶ Nɔ ni fe fɛɛ ni mɛi ni baafo Harmagedon lɛ baafee kɛye amɛbua mɛi ni abaatee amɛ shi lɛ ji, amɛbaatsɔɔ amɛ Nyɔŋmɔ Maŋtsɛyeli lɛ he nii kɛ bɔ ni Yehowa miisumɔ ni amɛhi shi amɛhã. Mɛni hewɔ? Ejaakɛ mɛi ni abaatee amɛ shi lɛ ateŋ mɛi babaoo baafee “mɛi ni ejaaa.” (Kanemɔ Bɔfoi 24:15.) Dani mɛi nɛɛ baaná Kristo kpɔmɔ afɔleshãa lɛ he sɛɛ lɛ, ehe baahia ni amɛfee tsakemɔi pii yɛ amɛshihilɛ mli. Ni dani amɛbaanyɛ amɛfee tsakemɔi nɛɛ, ehe baahia ni atsɔɔ amɛ Yehowa he nii, ejaakɛ amɛleee ehe nɔ ko kwraa. Enɛ ebafeŋ nitsumɔ bibioo, ejaakɛ amɛyi baafa waa! Ani akɛ amɛ fɛɛ baakase nii ekomekomei, tamɔ bɔ ni wɔkɛ mɛi feɔ Biblia mli nikasemɔ ŋmɛnɛ lɛ? Ani abaahã amɛ fɛɛ asafo ni atsɔse amɛ koni amɛtsɔɔ mɛi ni abaatee amɛ shi yɛ amɛsɛɛ lɛ nii? Be lɛ ashɛ ni wɔkwɛ. Kɛ̃lɛ, bɔ fɛɛ bɔ ni nibii baaya lɛ ahã lɛ, wɔle akɛ be ni Kristo Afii Akpe Nɔyeli lɛ baaba naagbee lɛ, ‘Yehowa he nilee eyi shikpɔŋ lɛ nɔ obɔ.’ (Yes. 11:9) Wɔnáŋ dekã kwraa yɛ afii akpe lɛ mli, shi wɔbaaná miishɛɛ waa!

7. Mɛni hewɔ Yehowa webii lɛ baanu he waa amɛhã mɛi ni abaatee amɛ shi lɛ be ni amɛtsɔɔ amɛ nii lɛ?

⁷ Yɛ Kristo Afii Akpe Nɔyeli lɛ mli lɛ, ehe baahia ni Yehowa tsuji fɛɛ ni yɔɔ shikpɔŋ lɛ nɔ lɛ afee tsakemɔi koni amɛsa ehiɛ. No hewɔ lɛ, amɛ fɛɛ amɛbaanu mɛi ni abaatee amɛ shi lɛ shishi, be ni amɛyeɔ amɛbuaa amɛ koni amɛtsake amɛsubaŋi gbohii lɛ ni amɛfee nɔ ni sa Yehowa hiɛ lɛ. (1 Pet. 3:8) Mɛi ni abaatee amɛ shi lɛ baana akɛ, Yehowa webii lɛ baa amɛhe shi, ni amɛmiimia amɛhiɛ lolo amɛmiifee tsakemɔi yɛ amɛshihilɛ mli koni amɛsa ehiɛ. Enɛ baahã amɛná he miishɛɛ akɛ amɛkɛ amɛ baafee ekome kɛjá Yehowa.​—Fip. 2:12.

ANI WƆBAAYOO WƆSUƆLƆI NI EGBOI LƐ KƐ́ ATEE AMƐ SHI?

8. Mɛni hewɔ wɔbaanyɛ wɔhe wɔye akɛ, kɛ́ atee wɔwekumɛi kɛ wɔnanemɛi ni egboi lɛ ashi lɛ, wɔbaayoo amɛ?

⁸ Wɔyɛ yiŋtoi pii ahewɔ ni wɔbaanyɛ wɔhe wɔye akɛ, kɛ́ atee wɔwekumɛi kɛ wɔnanemɛi ni egboi lɛ ashi lɛ, wɔbaayoo amɛ. Akɛ nɔkwɛmɔnɔ lɛ, kɛ́ wɔsusu mɛi ni Yehowa tee amɛ shi yɛ blema lɛ ahe lɛ, etamɔ nɔ ni wɔbaanyɛ wɔwie akɛ kɛ́ etee mɛi ashi lɛ, bɔ ni amɛyɔɔ, bɔ ni amɛwieɔ, kɛ bɔ ni amɛsusuɔ nii ahe amɛhãa lɛ tsakeee. Kɛ́ obaakai lɛ, Yesu kɛ gbele to wɔ he, ni ekɛ gbohiiashitee lɛ to bɔ ni atsĩɛɔ mɔ ko kɛjɛɔ wɔ mli lɛ he. (Mat. 9:18, 24; Yoh. 11:11-13) Kɛ́ mɛi te shi kɛjɛ wɔ mli lɛ, bɔ ni amɛyɔɔ kɛ bɔ ni amɛwieɔ dani amɛyawɔ lɛ tsakeee, ni amɛkaiɔ nibii ni tee nɔ dani amɛyawɔ lɛ. Nakai eji yɛ gbohiiashitee lɛ gbɛfaŋ, ni Lazaro sane lɛ maa enɛ nɔ mi. Dani Yesu baatee lɛ shi lɛ, no mli lɛ egbo gbii ejwɛ, ni egbɔmɔtso lɛ ebɔi fitemɔ. Shi be ni atee lɛ shi lɛ, enyɛmimɛi yei lɛ yoo lɛ amrɔ nɔŋŋ, ni ŋwanejee ko bɛ he akɛ, Lazaro hu hiɛ kpaaa mɛi ni amɛji lɛ nɔ.​—Yoh. 11:38-44; 12:1, 2.

9. Mɛni hewɔ wɔbaanyɛ wɔkɛɛ akɛ mɛi ni abaatee amɛ shi lɛ baŋ akɛ mɛi ni eye emuu?

⁹ Yehowa ewo shi akɛ, mɛi ni baahi shi yɛ Kristo nɔyeli lɛ shishi lɛ ateŋ mɔ ko mɔ ko ekɛŋ akɛ: “Mibɛ hewalɛ.” (Yes. 33:24; Rom. 6:7) No hewɔ lɛ, mɛi ni abaatee amɛ shi lɛ ateŋ mɔ ko mɔ ko baŋ akɛ helatsɛ loo kpajelɔ. Shi no etsɔɔɔ akɛ amɛbaaba ni amɛye emuu, kɛjeee nakai lɛ, amɛnanemɛi kɛ amɛwekumɛi yoŋ amɛ. Etamɔ nɔ ni yɛ Kristo Afii Akpe Nɔyeli lɛ shishi lɛ, adesai baaye emuu fiofio. Afii akpe lɛ naagbee dani Yesu kɛ Maŋtsɛyeli lɛ baahã e-Tsɛ ekoŋŋ. Ni tsɔɔ akɛ, nakai beiaŋ dani wɔbaanyɛ wɔwie kɛ nɔmimaa akɛ, Yesu etsɔ Maŋtsɛyeli lɛ nɔ ehã adesai fɛɛ eye emuu, ni etsu nibii krokomɛi fɛɛ ni Yehowa taoɔ akɛ etsɔ Maŋtsɛyeli lɛ nɔ etsu lɛ egbe naa.​—1 Kor. 15:24-28; Kpo. 20:1-3.

MƐƐ GBƐ NƆ GBOHIIASHITEE LƐ BAAHÃ WƆMII ASHƐ WƆHE?

10. Te gbohiiashitee lɛ baahã onu he ohã tɛŋŋ?

¹⁰ Kɛ́ atee owekunyo ko loo onaanyo ko ni osumɔɔ esane waa lɛ shi ni ona lɛ lɛ, te obaanu he ohã tɛŋŋ? Ekolɛ omii baashɛ ohe aahu akɛ ohiŋmɛiaŋ baakpala nu. Aloo ekolɛ miishɛɛ ni obaaná lɛ sɔŋŋ baahã owo lala. Bɔ fɛɛ bɔ ni sane lɛ ji lɛ, gbohiiashitee lɛ baahã ona akɛ, wɔsane kã wɔ-Tsɛ Yehowa tsui nɔ, ni e-Bi Yesu hu susuɔ wɔhe. Ŋwanejee ko bɛ he akɛ enɛ baahã osumɔ amɛ waa.

11. Yɛ Yesu wiemɔi ni yɔɔ Yohane 5:28, 29 lɛ naa lɛ, mɛɛ hegbɛ mɛi ni baahi shi yɛ Nyɔŋmɔ mlai kɛ eshishitoo mlai ni ja lɛ anaa lɛ baaná?

¹¹ Kɛ́ mɛi ni abaatee amɛ shi lɛ jie subaŋ momo lɛ yɛ amɛhe, ni amɛhi shi yɛ Nyɔŋmɔ mlai kɛ eshishitoo mlai ni ja lɛ anaa lɛ, amɛbaaná miishɛɛ waa. Mɛi ni baafee nakai lɛ baaná hegbɛ amɛhi shi kɛya naanɔ yɛ Paradeiso lɛ mli. Shi aŋmɛŋ mɛi ni baatse Nyɔŋmɔ hiɛ atua lɛ gbɛ ni amɛhi Paradeiso lɛ mli, kɛjeee nakai lɛ, amɛbaafite toiŋjɔlɛ ni yɔɔ jɛmɛ lɛ.​—Yes. 65:20; kanemɔ Yohane 5:28, 29.

12. Mɛɛ gbɛ nɔ Yehowa baajɔɔ mɛi fɛɛ ni baahi shikpɔŋ lɛ nɔ yɛ Paradeiso lɛ mli?

¹² Yɛ Kristo Afii Akpe Nɔyeli lɛ shishi lɛ, Nyɔŋmɔ webii lɛ fɛɛ baana akɛ nɔ ni awie yɛ Abɛi 10:22 lɛ ji anɔkwale diɛŋtsɛ. Jɛmɛ kɛɔ akɛ: “Yehowa jɔɔmɔ lɛ, no feɔ mɔ niiatsɛ, ni ekɛ piŋmɔ ko fataaa he.” Yɛ Yehowa mumɔ lɛ yelikɛbuamɔ naa lɛ, fiofio lɛ, Nyɔŋmɔ webii lɛ baaye emuu, ni amɛbaafee amɛnii tamɔ Kristo pɛpɛɛpɛ. (Yoh. 13:15-17; Efe. 4:23, 24) Gbi fɛɛ gbi kɛ́ amɛte shi lɛ, amɛbaanu he yɛ amɛkpɔiaŋ akɛ amɛyɛ hewalɛ fe gbi ni tsɔ hiɛ lɛ. Kwɛ miishɛɛ ni wɔbaaná yɛ nakai beiaŋ! (Hiob 33:25) Shi mɛɛ gbɛ nɔ kɛ́ wɔjwɛŋ gbohiiashitee lɛ he amrɔ nɛɛ, wɔbaaná he sɛɛ?

GBOHIIASHITEE LƐ HÃA WƆNAA AKƐ YEHOWA SUMƆƆ WƆ

13. Mɛɛ gbɛ nɔ Lala 139:1-4 lɛ tsɔɔ akɛ Yehowa le wɔ jogbaŋŋ? Ni mɛɛ gbɛ nɔ gbohiiashitee lɛ maa enɛ nɔ mi?

¹³ Tamɔ bɔ ni wɔna momo lɛ, kɛ́ Yehowa tee mɛi ni egboi lɛ ashi lɛ, amɛhiɛ kpaŋ nibii ni amɛle momo dani amɛgboi lɛ anɔ, ni sui ni wɔkɛle amɛ lɛ, no nɔŋŋ akɛbaatee amɛ shi. Enɛ tsɔɔ akɛ osane kã Yehowa tsui nɔ waa, ejaakɛ ele bɔ ni osusuɔ nii ahe ohãa, bɔ ni onuɔ he ohãa yɛ saji ahe, nibii ni owieɔ, kɛ nibii ni ofeɔ, ni ehiɛ kpaaa nɔ. No hewɔ lɛ, kɛ́ eba lɛ akɛ ebaatee bo shi lɛ, ewaŋ kwraa kɛhãŋ lɛ akɛ ebaatee bo shi bɔ ni mɛi ni le bo lɛ baayoo bo. Maŋtsɛ David wie akɛ, Yehowa le wɔteŋ mɔ fɛɛ mɔ jogbaŋŋ. (Kanemɔ Lala 139:1-4.) Te esa akɛ enɛ ni wɔle lɛ ahã wɔnu he wɔhã tɛŋŋ?

14. Kɛ́ wɔsusu bɔ ni Yehowa le wɔ jogbaŋŋ lɛ he lɛ, te esa akɛ ená wɔnɔ hewalɛ ehã tɛŋŋ?

¹⁴ Esaaa akɛ wɔsheɔ gbeyei akɛ, akɛni Yehowa le wɔ jogbaŋŋ hewɔ lɛ, ebaana wɔtɔmɔi lɛ ni egbala wɔtoi yɛ he. Moŋ lɛ, esa akɛ no ahã wɔna akɛ wɔsane kã etsui nɔ waa. Wɔteŋ mɔ fɛɛ mɔ jara wa hã lɛ. Ele nibii fɛɛ ni wɔtsɔmɔ mli yɛ wɔshihilɛ mli. Enɛ shɛjeɔ wɔmii waa, aloo jeee nakai? Esaaa akɛ wɔnuɔ he kɔkɔɔkɔ akɛ wɔbɛ mɔ ko. Yehowa kɛ wɔ yɛ be fɛɛ be, ni efee klalo akɛ ebaaye ebua wɔ.​—2 Kro. 16:9.

GBOHIIASHITEE LƐ HÃA WƆNAA AKƐ YEHOWA HIƐ KÃ SHI

15. Mɛɛ gbɛ nɔ gbohiiashitee he hiɛnɔkamɔ lɛ hãa wɔnaa akɛ Yehowa hiɛ kã shi?

¹⁵ Mɛi komɛi yɛ ni kɛ́ awo amɛhe gbeyei akɛ abaagbe amɛ lɛ, nɔ fɛɛ nɔ ni abaakɛɛ amɛ akɛ amɛfee lɛ, amɛbaafee. Mɛi ni Satan ená amɛnɔ hewalɛ lɛ kɛ enɛ tsuɔ nii kɛwoɔ mɛi ahe gbeyei koni amɛkpa yɛ amɛnanemɛi asɛɛ, loo amɛfee nibii ni amɛ diɛŋtsɛ amɛle akɛ esaaa akɛ amɛfeɔ. Shi kɛ́ amɛkɛ nakai ba wɔnɔ lɛ, amɛnine shɛŋ wɔnɔ, ejaakɛ wɔle akɛ, kɛ́ amɛgbe wɔ po lɛ, Yehowa baatee wɔ shi. (Kpo. 2:10) Wɔheɔ wɔyeɔ kɛ wɔtsui fɛɛ akɛ, nɔ ko nɔ ko bɛ ni amɛbaanyɛ amɛfee kɛtse wɔ kɛje Yehowa he. (Rom. 8:35-39) Yehowa hiɛ kã shi waa akɛ ehã wɔ gbohiiashitee he hiɛnɔkamɔ lɛ! Hiɛnɔkamɔ nɛɛ hewɔ lɛ, kɛ́ Satan kɛ ewebii lɛ wo wɔhe gbeyei akɛ amɛbaagbe wɔ po lɛ, wɔsheee gbeyei. Moŋ lɛ, wɔfeɔ ekãa ni wɔyeɔ Yehowa anɔkwa be fɛɛ be.

16. Mɛɛ saji obaanyɛ obi ohe? Ni mɛɛ gbɛ nɔ hetoo ni obaahã lɛ baahã ona kɛji okɛ ohiɛ fɔ̃ɔ Yehowa nɔ?

¹⁶ Kɛ́ Yehowa henyɛlɔi kɛɛ bo akɛ amɛbaagbe bo lɛ, ani okɛ ohiɛ baafɔ̃ enɔ akɛ ebaatee bo shi? Mɛni baahã ona kɛji okɛ ohiɛ baafɔ̃ enɔ lɛɛlɛŋ kɛ́ eba lɛ nakai? Naa sanebimɔi komɛi ni baanyɛ aye abua bo ni ona: Ani yiŋ ni okpɛɔ yɛ nibii bibii amli daa gbi lɛ tsɔɔ akɛ okɛ ohiɛ fɔ̃ɔ Yehowa nɔ? (Luka 16:10) Ani bɔ ni okɛ obe kɛ oshika tsuɔ nii ohãa lɛ hãa anaa faŋŋ akɛ, oheɔ shi ni Yehowa ewo akɛ kɛ́ otao Maŋtsɛyeli lɛ klɛŋklɛŋ lɛ, ebaadro bo nibii fɛɛ ni he hiaa bo lɛ oyeɔ? (Mat. 6:31-33) Kɛ́ onyɛ ohã sanebimɔi nɛɛ hetoo akɛ hɛɛ lɛ, no tsɔɔ akɛ okɛ ohiɛ fɔ̃ɔ Yehowa nɔ, ni obaanyɛ odamɔ kaa fɛɛ kaa ni baaba onɔ lɛ naa.​—Abɛi 3:5, 6.

GBOHIIASHITEE LƐ HÃA WƆNAA AKƐ YEHOWA TOƆ ETSUI SHI

17. (a) Mɛɛ gbɛ nɔ gbohiiashitee lɛ tsɔɔ akɛ Yehowa toɔ etsui shi? (b) Mɛni wɔbaanyɛ wɔfee kɛtsɔɔ akɛ eŋɔɔ wɔnaa waa akɛ Yehowa eto etsui shi?

¹⁷ Yehowa eto gbi kɛ be ni ebaakpãtã jeŋ fɔŋ nɛɛ hiɛ. (Mat. 24:36) Eyeŋ ehe oyai ni ekpãtã je lɛ hiɛ dani nakai be lɛ ashɛ. Eyɛ mli akɛ ená kulɛ etee gbohii lɛ ashi moŋ, shi eto etsui shi. (Hiob 14:14, 15) Eemɛ kɛyashi be ni sa, dani etee amɛ shi. (Yoh. 5:28) Eŋɔɔ wɔnaa waa akɛ Yehowa eto etsui shi. Bo lɛ susumɔ enɛ he okwɛ: Yehowa tsuishitoo lɛ hewɔ lɛ, mɛi babaoo, ni wɔ hu wɔfata he lɛ, ená hegbɛ akɛ ‘wɔbaatsake wɔtsui.’ (2 Pet. 3:9) Yehowa miisumɔ ni mɛi babaoo aná hegbɛ akɛ amɛbaahi shi kɛya naanɔ. No hewɔ lɛ, mɛni wɔbaanyɛ wɔfee kɛtsɔɔ akɛ eŋɔɔ wɔnaa waa akɛ eto etsui shi? Nyɛhãa wɔkɛ hiɛdɔɔ ataoa ‘mɛi ni yɔɔ anɔkwale lɛ ni baanyɛ ahã amɛná naanɔ wala lɛ he tsui kpakpa lɛ,’ ni wɔye wɔbua amɛ ni amɛsumɔ Yehowa ni amɛsɔmɔ lɛ. (Bɔf. 13:48) Kɛ́ wɔfee nakai lɛ, amɛbaaná Yehowa tsuishitoo lɛ he sɛɛ, tamɔ bɔ ni wɔ hu wɔná he sɛɛ lɛ.

18. Mɛni hewɔ esa akɛ wɔto wɔtsui shi wɔhã mɛi lɛ?

¹⁸ Yehowa baato etsui shi emɛ aahu kɛyashi afii akpe lɛ naagbee dani ebaakpa gbɛ akɛ wɔbaaye emuu. Shi kɛyashi nakai be lɛ baashɛ lɛ, Yehowa baaya nɔ ekɛ wɔhe eshai ake wɔ. No hewɔ lɛ, ani esaaa akɛ wɔ hu wɔtoɔ wɔtsui shi wɔhãa wɔnyɛmimɛi, ni wɔkɛ wɔjwɛŋmɔ maa sui kpakpai ni amɛyɔɔ lɛ anɔ? Susumɔ nyɛmi yoo ko niiashikpamɔ he okwɛ. Hela ko ni hãa mɔ haoɔ waa bamɔ ewu, ni ewu lɛ kpa asafoŋ kpeei yaa. Nyɛmi yoo lɛ wie akɛ: “Mináaa shihilɛ lɛ mlɛo kwraa. Nibii fɛɛ ni wɔto wɔyiŋ akɛ wɔbaafee lɛ, ehiii wɔ feemɔ.” Kɛ̃lɛ, nyɛmi yoo lɛ to etsui shi ehã ewu lɛ, ejaakɛ esumɔɔ lɛ waa. Ekɛ ehiɛ fɔ̃ Yehowa nɔ, ni ehãaa enijiaŋ aje wui. Yɛ nɔ najiaŋ ni ekɛ ejwɛŋmɔ baama naagba lɛ nɔ lɛ, ekase Yehowa, ni ekɛ ejwɛŋmɔ ma nibii kpakpai ni ewu lɛ feɔ lɛ moŋ anɔ. Ewie akɛ, “Miwu lɛ yɛ sui kpakpai pii, ni eetsu enaagba lɛ he nii fiofio.” Nyɛmi yoo lɛ sane lɛ hãa wɔnaa akɛ, ehe miihia waa ni wɔto wɔtsui shi wɔhã mɛi ni yɔɔ wɔweku lɛ loo wɔsafo lɛ mli ni kɛ naagbai wuji kpeɔ lɛ!  

19. Mɛni otswa ofai shi akɛ obaafee?

¹⁹ Be ni abɔ shikpɔŋ lɛ, Yesu kɛ ŋwɛibɔfoi lɛ ná miishɛɛ waa. No hewɔ lɛ, kwɛmɔ bɔ ni amɛbaaná miishɛɛ waa amɛhã kɛ́ amɛna akɛ shikpɔŋ lɛ nɔ eyi obɔ kɛ adesai ni eye emuu, ni sumɔɔ Yehowa ni miisɔmɔ lɛ! Kwɛmɔ bɔ ni mɛi ni kɛ Kristo baaye nɔ yɛ ŋwɛi lɛ hu baaná miishɛɛ amɛhã kɛ́ amɛna akɛ adesai miiná amɛnitsumɔ lɛ he sɛɛ. (Kpo. 4:4, 9-11; 5:9, 10) Kwɛmɔ bɔ ni wɔ hu wɔbaaná miishɛɛ be ni piŋmɔ, hela, awerɛhoyeli, kɛ gbele bɛ dɔŋŋ. (Kpo. 21:4) Kɛyashi nakai be lɛ baashɛ lɛ, tswaa ofai shi akɛ obaakase Yehowa, wɔ-Tsɛ ni sumɔɔ wɔ, ni hiɛ kã shi, ni toɔ etsui shi lɛ. Kɛ́ ofee nakai lɛ, omiishɛɛ etãŋ, ekɔɔɔ he eko naagbai ni okɛbaakpe. (Yak. 1:2-4) Eŋɔɔ wɔnaa waa akɛ Yehowa ewo shi akɛ, ‘ebaatee gbohii ashi’!​—Bɔf. 24:15.