“Namɔ Po Gbeyei Mashe?”
“Kɛ́ ta te shi wo mi tete lɛ, no mli po lɛ maná ekãa.”—LALA 27:3.
YƐ ŊMALƐI NI NYIƐ SƐƐ NƐƐ ANAA LƐ, MƐNI BAAYE ABUA BO KONI ONÁ EKÃA?
1. Mɛɛ sanebimɔi Lala 27 lɛ baaye abua wɔ ni wɔnu shishi?
MƐNI hewɔ yɛ je lɛŋ shihilɛ ni mli woɔ wu lɛ fɛɛ sɛɛ lɛ, wɔshiɛmɔ nitsumɔ lɛ yaa nɔ eshwereɔ lɛ? Mɛni hewɔ wɔjɛɔ wɔsuɔmɔ mli wɔkɛ wɔbe kɛ wɔnyɛmɔ fɛɛ shiɛɔ beni mɛi babaoo miiná shika he naagba lɛ? Te wɔɔfee tɛŋŋ wɔya nɔ wɔfee ekãa beni mɛi babaoo miishe wɔsɛɛ be he gbeyei lɛ? Lala ko ni akɛ mumɔ tsirɛ Maŋtsɛ David ni efo, ní yɔɔ Lala 27 lɛ haa wɔnaa hetoi lɛ.
2. Mɛɛ hewalɛ hekpokpomɔ náa yɛ mɔ nɔ, shi mɛɛ hekɛnɔfɔɔ wɔyɔɔ?
2 David kɛ wiemɔi nɛɛ je lala nɛɛ shishi akɛ: “Yehowa ji mila kɛ miyiwalaheremɔ; namɔ po gbeyei mashe? Yehowa ji miwala hewalɛ; namɔ hiɛ po ni mihe aaakpokpo yɛ?” (Lala 27:1) Hekpokpomɔ baanyɛ aha mɔ ko agbɔjɔ aahu akɛ enyɛŋ efee nɔ ko nɔ ko. Shi esaaa akɛ gbeyeishemɔ ko kwraa haa Yehowa gbeyeishelɔ ko jijaa. (1 Pet. 3:14) Kɛ́ wɔkɛ Yehowa fee wɔmɔɔ ni wa lɛ, ‘wɔbaahi shi shweshweeshwe, ni wɔhe aaajɔ wɔ ní efɔŋ gbeyeishemɔ bɛŋ.’ (Abɛi 1:33; 3:25) Mɛni hewɔ?
“YEHOWA JI MILA KƐ MIYIWALAHEREMƆ”
3. Yɛ mɛɛ shishinumɔ naa Yehowa ji wɔla, shi mɛni esa akɛ wɔfee?
3 Wiemɔ ni akɛtsu nii akɛ “Yehowa ji mila” lɛ gbalaa jwɛŋmɔ kɛyaa anɔkwale ni eji akɛ Yehowa haa wɔleɔ anɔkwale lɛ, ni wɔyeɔ wɔhe kɛjɛɔ mumɔŋ duŋ mli lɛ nɔ. (Lala 27:1) La loo kane haa wɔnaa oshara loo gbɛtsii nii ko ni yɔɔ wɔgbɛ nɔ, shi ejieee yɛ jɛmɛ. Esa akɛ wɔkɛ nilee atsu nɔ ni wɔnaa lɛ he nii. Yɛ gbɛ ni tamɔ nakai nɔŋŋ nɔ lɛ, Yehowa haa wɔnuɔ nibii ni yaa nɔ yɛ je lɛŋ lɛ ashishi. Ehɛleɔ wɔ shi yɛ osharai ni yɔɔ nibii agbɛjianɔtoo nɛɛ mli lɛ ahe. Ekɛ Biblia mli shishitoo mlai ni yeɔ ebuaa wɔ be fɛɛ be lɛ haa wɔ, shi esa akɛ wɔkɛ nɔ ni wɔkaseɔ lɛ atsu nii. Kɛ́ wɔfee nakai lɛ, wɔbaanyɛ wɔfee wɔnii yɛ nilee mli fe wɔhenyɛlɔi loo wɔtsɔɔlɔi fɛɛ.—Lala 119:98, 99, 130.
4. (a) Mɛni hewɔ David nyɛ ekɛ nɔmimaa wie akɛ: “Yehowa ji . . . miyiwalaheremɔ” lɛ? (b) Mɛɛ be tuuntu Yehowa baatsɔ wɔyiwalaheremɔ?
4 David wiemɔi ni yɔɔ Lala 27:1 lɛ tsɔɔ akɛ ekolɛ ekai bɔ ni Yehowa kpɔ̃ lɛ, loo ehere lɛ yɛ bei ni eho lɛ amli lɛ. Ákɛ nɔkwɛmɔnɔ lɛ, Yehowa here lɛ “kɛjɛ jata kɛ oshishibrishi lɛ dɛŋ.” Yehowa ha eye nuu oblaŋ Goliat hu nɔ kunim. Sɛɛ mli lɛ, Maŋtsɛ Saul tao ni etsu David akpɔlɔ shii abɔ, shi be fɛɛ be lɛ Yehowa jieɔ lɛ kɛjɛɔ mli. (1 Sam. 17:37, 49, 50; 18:11, 12; 19:10) Ebɛ naakpɛɛ mɔ akɛ David wie kɛ nɔmimaa akɛ: “Yehowa ji . . . miyiwalaheremɔ”! Yehowa baabaa ewebii lɛ ayi taakɛ ebaa David yi lɛ. Yɛ mɛɛ gbɛ nɔ? Kɛtsɔ ejálɔi lɛ ayi ni eeebaa kɛtsɔ “amanehulu kpeteŋkpele” ni baa lɛ mli lɛ nɔ.—Kpoj. 7:14; 2 Pet. 2:9.
KAIMƆ GBƐI ANƆ NI YEHOWA ETSƆ EYE EBUA BO
5, 6. (a) Mɛɛ gbɛ nɔ nibii ni wɔkaiɔ lɛ yeɔ ebuaa wɔ ni wɔnáa ekãa? (b) Mɛɛ gbɛ nɔ bɔ ni Yehowa kɛ etsuji ye ha yɛ bei ni eho lɛ amli lɛ wajeɔ ekãa ni oyɔɔ lɛ?
5 Agbalaa wɔjwɛŋmɔ kɛbaa nɔ ko ni wɔbaanyɛ wɔfee koni wɔná ekãa lɛ nɔ yɛ Lala 27:2, 3. (Nyɛkanea.) David kai shihilɛi amli ni Yehowa here eyiwala yɛ lɛ. (1 Sam. 17:34-37) Nakai nibii lɛ ni ekai lɛ ha ená ekãa kɛdamɔ shihilɛi ni jaraa waa anaa. Ani okaiɔ niiashikpamɔi ni onáa lɛ yɛ gbɛ ni tamɔ nakai nɔŋŋ nɔ? Ákɛ nɔkwɛmɔnɔ lɛ, ani okɛ hiɛdɔɔ esɔle pɛŋ yɛ naagba ko ni miisu otsui he, ni ona bɔ ni Yehowa ha bo nilee kɛ nyɛmɔ kɛtsu nakai naagba lɛ he nii? Aloo okaiɔ bɔ ni Yehowa ye ebua bo ni otsu naagbai ni haaa okɛ miishɛɛ asɔmɔ lɛ lɛ he nii, loo bɔ ni egbele shinaa kpeteŋkpele ni nitsumɔ pii yɔɔ mli lɛ naa eha bo lɛ? (1 Kor. 16:9) Kɛ́ okai shihilɛi ni tamɔ nɛkɛ lɛ, te onuɔ he ohaa tɛŋŋ? Ani shihilɛi nɛɛ ni okaiɔ lɛ haa oyiŋ tsɔɔ akɛ Yehowa baanyɛ aye abua bo koni oye naagbai loo gbɛtsii nii ni dara nɔ loo okpee naa?—Rom. 5:3-5.
6 Ni kɛ́ nɔyeli ko ni yɔɔ hewalɛ waa kpaŋ akɛ ebaabule Yehowa Odasefoi ashishi akɛ gbɛjianɔtoo hu? Mɛi pii eka akɛ amɛbaafee nakai yɛ wɔbei nɛɛ amli, shi amɛyeee omanye. Kɛ́ wɔjwɛŋ bɔ ni Yehowa eye ebua ewebii lɛ yɛ bei ni eho lɛ amli lɛ he lɛ, ebaaha wɔná ekãa kɛkpee be ni kã wɔhiɛ lɛ naa.—Dan. 3:28.
NÁ SUƆMƆ OHA ANƆKWA JAMƆ
7, 8. (a) Taakɛ Lala 27:4 lɛ tsɔɔ lɛ, mɛni David bi kɛjɛ Yehowa dɛŋ? (b) Mɛni ji Yehowa mumɔŋ sɔlemɔtsu kpeteŋkpele lɛ, ni te ajáa lɛ yɛ jɛmɛ ahaa tɛŋŋ?
7 Nɔ kroko ni he hiaa waa ni baanyɛ aha oná ekãa ji suɔmɔ ni oyɔɔ kɛha anɔkwa jamɔ lɛ. (Nyɛkanea Lala 27:4.) Yɛ David gbii lɛ amli lɛ, “Yehowa we lɛ” ji kpee buu lɛ. David diɛŋtsɛ ji mɔ ni to gbɛjianɔ kɛha sɔlemɔtsu kpeteŋkpele ni ebi Salomo bama yɛ sɛɛ mli lɛ maa. Afii ohai abɔ sɛɛ lɛ, Yesu ha ale akɛ ehe ebahiaŋ ni ajá Yehowa yɛ sɔlemɔtsu kpeteŋkpele ko ni Nyɔŋmɔ ejɔɔ nɔ mli dani ekpɛlɛ jamɔ ni akɛhaa lɛ lɛ nɔ. (Yoh. 4:21-23) Bɔfo Paulo tsɔɔ yɛ Hebribii yitso 8 kɛyashi 10 lɛ mli akɛ mumɔŋ sɔlemɔtsu kpeteŋkpele ko ba shihilɛ mli beni abaptisi Yesu yɛ afi 29 Ŋ.B., beni ekɛ ehe ha akɛ ebaafee Yehowa suɔmɔnaa nii lɛ. (Heb. 10:10) Mumɔŋ sɔlemɔtsu kpeteŋkpele nɛɛ ji gbɛjianɔ ni Yehowa eto koni wɔtsɔ hemɔkɛyeli ni wɔyɔɔ yɛ Yesu kpɔ̃mɔ afɔleshaa lɛ mli lɛ nɔ wɔbɛŋkɛ Nyɔŋmɔ yɛ gbɛ ni ekpɛlɛɔ nɔ lɛ nɔ. Mɛɛ gbɛ nɔ wɔjáa lɛ yɛ jɛmɛ? Kɛtsɔ ‘anɔkwa tsui’ ni wɔkɛaasɔle ‘yɛ hemɔkɛyeli ni wɔyɔɔ hewalɛ yɛ nɔ lɛ mli’ lɛ nɔ; kɛtsɔ ekãa ni wɔkɛaajaje wɔhiɛnɔkamɔ lɛ faŋŋ; kɛ wɔhe ni wɔɔyɔseyɔsee, ni wɔwowoo wɔhe hewalɛ, wɔwowoo wɔhe ŋaa kɛ́ wɔkpe kutuu yɛ asafoŋ kpeei ashishi kɛ weku jamɔ ni wɔfeɔ lɛ nɔ. (Heb. 10:22-25) Suɔmɔ ni wɔyɔɔ kɛha gbɛjianɔ ni ato kɛha anɔkwa jamɔ lɛ wajeɔ wɔ yɛ nɛkɛ naagbee gbii ni jaraa nɛɛ amli.
8 Yɛ je lɛŋ fɛɛ lɛ, Yehowa anɔkwa tsuji kɛ amɛhe miiwo sɔɔmɔ nitsumɔ lɛ mli waa, amɛmiikase wiemɔi hei, ni amɛmiifã kɛmiiya hei ni Maŋtsɛyeli shiɛlɔi ahe miihia waa yɛ. Amɛnifeemɔ lɛ tsɔɔ akɛ nɔ koome pɛ amɛbiɔ yɛ Yehowa dɛŋ, taakɛ lalatsɛ lɛ fee lɛ. Amɛmiitao ní amɛnine ashɛ Yehowa mlihilɛ lɛ nɔ, ní amɛkɛ amɛhe awo jamɔ krɔŋŋ mli, ekɔɔɔ he eko nɔ ni baaba.—Nyɛkanea Lala 27:6.
OKƐ OHE AFƆ̃ NYƆŊMƆ YELIKƐBUAMƆ LƐ NƆ
9, 10. Mɛɛ nɔmimaa Lala 27:10 lɛ haa wɔnáa?
9 David tsɔɔ hekɛnɔfɔɔ diɛŋtsɛ ni eyɔɔ yɛ Yehowa yelikɛbuamɔ lɛ mli, beni ekɛɛ akɛ: “Kɛji mitsɛ kɛ minyɛ kwa mi tete lɛ, bo Yehowa ooobaa miyi” lɛ. (Lala 27:10, Ga Biblia hee) Yɛ 1 Samuel yitso 22 lɛ naa lɛ, wɔbaanyɛ wɔkɛɛ akɛ David fɔlɔi kwaaa lɛ. Shi ŋmɛnɛ lɛ mɛi babaoo afɔlɔi ekpoo amɛ kwraa. Kɛlɛ, mɛi babaoo ni akwa amɛ lɛ ená yelikɛbuamɔ kɛ hebuu kɛjɛ Kristofoi asafo ni suɔmɔ yɔɔ mli lɛ mli.
10 Akɛni Yehowa efee klalo akɛ kɛ́ mɛi krokomɛi kwa ewebii lɛ ebaaye ebua amɛ hewɔ lɛ, ani eyeŋ ebuaŋ amɛ kɛ́ amɛkɛ naagbai krokomɛi kpe? Ákɛ nɔkwɛmɔnɔ lɛ, kɛ́ bɔ ni wɔɔfee wɔha wɔweku lɛ amɛheloonaa hiamɔ nii lɛ haoɔ wɔ lɛ, ani wɔnyɛŋ wɔná nɔmimaa akɛ Yehowa baaye abua wɔ? (Heb. 13:5, 6) Enuɔ shihilɛi amli ni enɔkwa tsuji fɛɛ yɔɔ lɛ shishi, ni ele amɛhiamɔ nii hu.
11. Mɛɛ hewalɛ wɔhe ni wɔkɛfɔɔ Yehowa nɔ lɛ baanyɛ aná yɛ mɛi krokomɛi anɔ? Okɛ enɛ he nɔkwɛmɔnɔ aha.
11 Susumɔ Victoria, ni akɛ lɛ miikase Biblia lɛ ni yɔɔ Liberia lɛ nɔkwɛmɔnɔ lɛ he okwɛ. Beni eyaa ehiɛ kɛshɛɔ baptisimɔ he lɛ, nuu ni ekɛyɔɔ lɛ shi lɛ kɛ ebii etɛ lɛ. Eyɛ mli akɛ ebɛ wɔɔhe kɛ nitsumɔ moŋ, shi etee ehiɛ yɛ mumɔŋ. Yɛ Victoria baptisimɔ sɛɛ lɛ, ebiyoo ni eye afii 13 lɛ yato shika babaoo ko ahu. Akɛni amɛsumɔɔɔ ni shika lɛ kaa amɛ hewɔ lɛ, amɛkpɛ mli akɛ amɛkaneŋ kwraa. Moŋ lɛ, amɛtao asraafonyo ni shika elaaje lɛ oya nɔŋŋ. Nuu lɛ kɛɛ amɛ akɛ, eji mɛi fɛɛ yeɔ anɔkwa tamɔ Yehowa Odasefoi kulɛ, je lɛŋ shihilɛ baahi, ni toiŋjɔlɛ baahi he fɛɛ he. Victoria jɛ Biblia lɛ mli etsɔɔ asraafonyo lɛ shi ni Yehowa ewo kɛha jeŋ hee lɛ. Akɛni asraafonyo lɛ hiɛ sɔ anɔkwa ni Victoria ye lɛ hewɔ lɛ, eke lɛ shika pii kɛjɛ nɔ ni ekɛbaha lɛ lɛ mli. Hɛɛ, akɛni Yehowa Odasefoi kɛ amɛhe fɔ̃ɔ Yehowa nɔ kwraa akɛ ebaaha amɛ amɛhiamɔ nii hewɔ lɛ, amɛyeɔ anɔkwa, ni enɛ eha abuɔ amɛ waa.
12. Kɛ́ wɔtee nɔ wɔsɔmɔ Yehowa yɛ heloonaa nibii ni ŋmɛɔ wɔ lɛ fɛɛ sɛɛ lɛ, mɛni wɔkɛ no tsɔɔ? Okɛ enɛ he nɔkwɛmɔnɔ aha.
12 Aloo susumɔ miishɛɛ ni shiɛlɔ ko ni abaptisiko lɛ ni atsɛɔ lɛ Thomas, ni yɔɔ Sierra Leone lɛ ná lɛ he okwɛ. Ebɔi nitsɔɔmɔ yɛ sɛkɛndre skul ko, shi enine shɛɛɛ enyɔmɔwoo nɔ, nɔ ni miihe ashɛ afi. Mɛni ji nɔ ni ehe bahia ni Thomas afee dani enine ashɛ nyɔmɔ ni ahiɛ lɛ lɛ fɛɛ nɔ? Ehe bahia ni ekɛ skul nɔkwɛlɔ lɛ—ni eji osɔfo lɛ—akpe koni abibii lɛ saji. Osɔfo lɛ tsɔɔ mli akɛ skul lɛ ekpɛlɛɛɛ Yehowa Odasefoi ahemɔkɛyelii lɛ anɔ. Ekɛ nibii enyɔ shwie Thomas hiɛ ní ekɔ emli ekome, enitsumɔ lɛ loo ehemɔkɛyelii ni damɔ Biblia lɛ nɔ lɛ. Thomas kpa nitsumɔ lɛ, ni enyɔmɔwoo lɛ fɛɛ ŋmɛɛ lɛ, ni ebɔi redio kɛ mobail foŋ saamɔ. Taakɛ nɔkwɛmɔnɔ nɛɛ kɛ ekrokomɛi ni tamɔ nakai lɛ tsɔɔ lɛ, kɛ́ wɔyɛ hekɛnɔfɔɔ yɛ Yehowa mli lɛ, esaaa akɛ wɔsheɔ gbeyei akɛ wɔnaŋ shihilɛ mli nibii ni he hiaa lɛ, ejaakɛ wɔle akɛ Yehowa, mɔ ni bɔ nibii fɛɛ ni buɔ ewebii lɛ ahe be fɛɛ be lɛ, baakwɛ wɔ.
13. Mɛɛ gbɛ nɔ Maŋtsɛyeli shiɛmɔ nitsumɔ lɛ shwereɔ yɛ maji ni bɛ nɔ ko tsɔ lɛ amli?
13 Maŋtsɛyeli shiɛlɔi kɛ ekãa miishiɛ yɛ maji babaoo ni ohia yɔɔ jɛmɛ lɛ anɔ. Mɛni hewɔ? Nitsumɔhe nine ko ŋma akɛ: “Mɛi babaoo ni kpɛlɛɔ ni akɛ amɛ akase Biblia ji mɛi ni bɛ nitsumɔ, no hewɔ lɛ amɛnáa be babaoo yɛ gbi lɛ mli kɛha nikasemɔ lɛ. Nyɛmimɛi lɛ hu náa be babaoo kɛshiɛɔ. Ehe ehiaaa ni akɛɛ mɛi ni yɔɔ hei ni ohia lɛ mli wa yɛ lɛ akɛ wɔyɛ naagbee gbii lɛ amli; shihilɛ ni ebɔle amɛ lɛ diɛŋtsɛ yeɔ he odase.” Maŋsɛɛ sɔɔlɔ ko ni kɛ nɔ ni fe afii 12 esɔmɔ yɛ maŋ ko ní kɛ́ aja mli lɛ, shiɛlɔ fɛɛ shiɛlɔ feɔ Biblia mli nikasemɔ ni fa fe etɛ lɛ nɔ lɛ ŋma akɛ: “Akɛni shiɛlɔi lɛ ateŋ mɛi babaoo bɛ nɔ ko tsɔ, ni nibii fioo pɛ gbalaa amɛjwɛŋmɔ hewɔ lɛ, amɛnáa be babaoo kɛha shiɛmɔ nitsumɔ lɛ kɛ Biblia mli nikasemɔ feemɔ.”
14. Mɛɛ gbɛi anɔ Nyɔŋmɔ baabu asafo babaoo lɛ he?
14 Yehowa ewo shi akɛ ebaaye ebua wɔ, ebaabu wɔ he, ni ebaakpɔ̃ wɔ akɛ kuu yɛ heloo kɛ mumɔŋ fɛɛ, ni wɔheɔ lɛ wɔyeɔ. (Lala 37:28; 91:1-3) Anɔkwa, mɛi ni abaabaa amɛyi kɛfo “amanehulu kpeteŋkpele lɛ” ayi baafa waa. (Kpoj. 7:9, 14) No hewɔ lɛ, akɛ kuu lɛ, abaabu nakai asafo babaoo lɛ he koni mɔ ko akakpata amɛhiɛ yɛ nibii agbɛjianɔtoo nɛɛ naagbee lɛ mli. Abaaha amɛ nɔ fɛɛ nɔ ni he baahia amɛ koni amɛnyɛ amɛkpee jaramɔ shihilɛi anaa, ní amɛbaa amɛkɛ Yehowa teŋ wekukpãa lɛ yi. Ni Yehowa baabu ewebii lɛ ahe kɛfo amanehulu kpeteŋkpele lɛ.
“YEHOWA, TSƆƆMƆ MI OGBƐ LƐ”
15, 16. Kɛ́ wɔbo gbɛtsɔɔmɔ ni Nyɔŋmɔ kɛhaa wɔ lɛ toi lɛ, mɛɛ sɛɛ wɔnáa? Okɛ enɛ he nɔkwɛmɔnɔ aha.
15 Bɔni afee ni wɔya nɔ wɔfee ekãa lɛ, esa akɛ wɔha Nyɔŋmɔ atsɔɔ wɔ nii be fɛɛ be. Anaa enɛ faŋŋ yɛ David faikpamɔ lɛ mli akɛ: “Yehowa, tsɔɔmɔ mi ogbɛ lɛ, ni okpala mi kɛtsɔ tempɔŋ ni kã shi faŋŋ nɔ yɛ mɛi ni woɔ mi ka lɛ ahewɔ.” (Lala 27:11) Kɛ́ wɔbaahi shi yɛ sɔlemɔ nɛɛ naa lɛ, belɛ ebiɔ ni wɔbo Biblia mli gbɛtsɔɔmɔi fɛɛ ni wɔnine shɛɔ nɔ kɛjɛɔ Yehowa gbɛjianɔtoo lɛ mli lɛ toi ni wɔkɛtsu nii amrɔ nɔŋŋ. Mɛi babaoo baanyɛ aye he odase akɛ, ŋaawoo ni nilee yɔɔ mli ni akɛhaa akɛ awo nyɔji ni ahiɛ, ni aha shihilɛ afee mlɛo lɛ ni amɛkɛtsu nii lɛ ye ebua amɛ waa yɛ shika he naagba ko ni ba nyɛsɛɛ nɛɛ mli. Amrɔ nɛɛ ehe ehiaaa ni amɛtsu nii dɛŋdɛŋ kɛwo nibii ni he ehiaaa amɛ tsɔ lɛ ahe nyɔmɔ, ni enɛ eha amɛná be babaoo ni amɛkɛlɛɛ amɛsɔɔmɔ nitsumɔ lɛ mli. Ehi jogbaŋŋ akɛ wɔteŋ mɔ fɛɛ mɔ aaabi ehe akɛ: ‘Ani mikɛ nibii fɛɛ ni mikaneɔ yɛ Biblia lɛ kɛ woji fɛɛ ni tsulɔ anɔkwafo kɛ nilelɔ kuu lɛ kalaa lɛ mli lɛ tsuɔ nii amrɔ nɔŋŋ, kɛ́ ebaabi ni mikɛ nibii komɛi ashã afɔle po?’—Mat. 24:45.
16 Kɛ́ wɔŋmɛ gbɛ ni Yehowa tsɔɔ wɔ nii, ni wɔha etsɔɔ wɔ gbɛ kɛtee jalɛ gbɛi anɔ lɛ, wɔsheŋ nɔ ko nɔ ko gbeyei. Daa gbɛgbalɔ ko ni yɔɔ United States lɛ yabi ni aha etsu nitsumɔ ko yɛ enitsumɔhe lɛ ní baaha lɛ kɛ eweku lɛ fɛɛ ahi be fɛɛ sɔɔmɔ lɛ mli, shi nitsumɔ nɔkwɛlɔ lɛ kɛɛ lɛ akɛ enaŋ nakai nitsumɔ lɛ kɛ́ ehiɛɛɛ kɔleji digrii. Eji bo okɛ shihilɛ ni tamɔ nɛkɛ kpe kulɛ, ani obaashwa ohe akɛ okɛ ohe wo be fɛɛ sɔɔmɔ nitsumɔ lɛ mli moŋ fe ni oooya kɔleji loo yunivɛsiti? Otsii enyɔ sɛɛ lɛ, nakai nitsumɔ nɔkwɛlɔ lɛ nitsumɔ je edɛŋ, ni nitsumɔ nɔkwɛlɔ kroko bi nyɛmi nuu lɛ ní etsɔɔ lɛ otii ni ekɛmamɔ ehiɛ. Nyɛmi nuu lɛ kɛɛ lɛ akɛ ekɛ eŋa fɛɛ ji Yehowa Odasefoi ni kɛ amɛbe fɛɛ sɔmɔɔ, ni amɛmiisumɔ ni amɛtsa nɔ nakai. Dani nyɛmi nuu lɛ baatsa ewiemɔ lɛ nɔ lɛ, nɔkwɛlɔ lɛ wie akɛ: “Mile akɛ esoro bo kwraa! Beni eshwɛ fioo ni mitsɛ Ataa baagbo lɛ, Odasefoi enyɔ komɛi baa ni amɛbakaneɔ Biblia lɛ amɛhaa lɛ daa gbi. Miwo shi akɛ be fɛɛ be ni maná hegbɛ ni mikɛaaye mabua Yehowa Odasefonyo ko lɛ, mafee nakai.” Enɔ jetsɛremɔ lɛ, akɛ nitsumɔ ni tsutsu nɔkwɛlɔ lɛ sumɔɔɔ ni ekɛhaa nyɛmi nuu lɛ ha lɛ. Hɛɛ, kɛ́ wɔkɛ Maŋtsɛyeli lɛ he nibii ye klɛŋklɛŋ gbɛhe yɛ wɔshihilɛ mli lɛ, Yehowa baaye eshiwoo akɛ ehaŋ wɔheloonaa hiamɔ nii abɔ wɔ lɛ nɔ.—Mat. 6:33.
HEMƆKƐYELI KƐ HIƐNƆKAMƆ HE MIIHIA
17. Mɛni baaye abua wɔ koni wɔkɛ nɔmimaa akpee shihilɛ ni kã wɔhiɛ lɛ naa?
17 David ha wɔna bɔ ni hemɔkɛyeli kɛ hiɛnɔkamɔ he hiaa ha, beni ekɛɛ akɛ: “Shi kɛlɛ mihe miye akɛ mana Yehowa mlihilɛ lɛ yɛ hiɛkalɔi ashikpɔŋ lɛ nɔ!” (Lala 27:13) Eji wɔbɛ hiɛnɔkamɔ kɛ hiɛsɔɔ yɛ nibii ni awie he yɛ Lala 27 lɛ mli kulɛ, te wɔshihilɛ baafee tɛŋŋ? Belɛ, eba akɛ wɔbaaya nɔ wɔkɛ nɔmimaa asɔle koni Yehowa aha wɔ hewalɛ, ni ebaa wɔyi kɛfo Harmagedon.—Nyɛkanea Lala 27:14.
[Mfoniri ni yɔɔ baafa 23]
Beni David kai gbɛi anɔ ni Yehowa tsɔ ekpɔ̃ lɛ lɛ, no wo lɛ hewalɛ
[Mfoniri ni yɔɔ baafa 25]
Ani wɔnaa ohia shihilɛ ni yɔɔ he ko lɛ akɛ eji hegbɛ ni wɔbaanyɛ wɔkɛlɛɛ wɔsɔɔmɔ nitsumɔ lɛ mli?