“Ŋshɔhiɛ Gbɛfãa Yɛ Ahum Tswaa Be Mli”

ANI obuŋ nɔ ko ni tamɔ nɛkɛ ni aaaka efeemɔ lɛ akɛ aafee yɛ be ni esaaa mli, kwashiafeemɔ, kɛ nɔ ni baanyɛ ekɛ oshara aba? Shi kɛlɛ, mɛi komɛi eshɛ amɛhe amɛwo shihilɛ ni tamɔ nakai mli yɛ mfonirifeemɔ gbɛ nɔ. Yɛ mɛɛ gbɛ nɔ? Afii ohai 17 lɛ mli Ŋleshi niŋmalɔ Thomas Fuller kɛɛ: “Kaafee nɔ ko kwraa beni omli ewo la. Etamɔ ŋshɔhiɛ gbɛfãa yɛ ahum tswaa be mli.”

Nifeemɔ gbɛ ko ni oootiu sɛɛ beni omli ewo la ni onyɛɛɛ oye ohe nɔ lɛ baanyɛ ekɛ naagbai ni yɔɔ oshara aba. Nifeemɔ ko ni aŋma yɛ Biblia lɛ mli lɛ maa enɛ nɔ mi. Simeon kɛ Levi, blematsɛ Yakob bihii lɛ fee nii kɛte shi amɛwo bulemɔ ni abule amɛnyɛmiyoo Dina lɛ kɛtsɔ bɔ ni amɛkɛ oyaiyeli kɛ yiwalɛ fee nii lɛ nɔ, koni amɛkɛtɔ owele beni amɛmli ewo la lɛ. Nɔ ni jɛ mli ba ji gbɔmɛi babaoo ni amɛgbe kɛ nibii babaoo ni amɛfite. Ebɛ naakpɛɛ kwraa akɛ Yakob bu amɛyitsoŋwalɛ nifeemɔ lɛ fɔ́, beni ekɛɛ akɛ: “Nyɛwo mi amane mli, ni nyɛha mihe eje fũ ewo shikpɔŋ lɛ nɔ bii” lɛ.​—⁠1 Mose 34:​25-30.

Yɛ nilee naa lɛ, Nyɔŋmɔ Wiemɔ ni ji Biblia lɛ jieɔ gbɛ kroko lɛ yi ehaa. Ekɛɛ akɛ: “Ha mlifu sɛɛ afo ni oshɛ mlila ofɔ̃; kaawo otsui la hu, efɔŋfeemɔ mli kɛkɛ ekɛ mɔ yaa.” (Lala 37:⁠8) Nakai ŋaawoo lɛ sɛɛnyiɛmɔ baanyɛ atsĩ eshai wuji anaa.​—⁠Jajelɔ 10:4; kwɛmɔ Abɛi 22:​24, 25 hu.