Kwɛmɔ ni Mlijɔlɛ Yɔɔ Mli he Miihia Yehowa Tooi Lɛ
“Nyɛnaa nyɛlea akɛ, Yehowa lɛ, lɛ ji Nyɔŋmɔ! . . . emaŋ kɛ elɛɛ he lɛ tooi ji wɔ.”—LALA 100:3.
1. Te Yehowa kɛ ewebii yeɔ ehaa tɛŋŋ?
YEHOWA ji Tookwɛlɔ Kpeteŋkpele lɛ. Kɛ wɔji etsuji lɛ, ebuɔ wɔ akɛ etooi ji wɔ ni ekɛ mlijɔlɛ kwɛɔ wɔ. Wɔŋwɛi Tsɛ lɛ shɛjeɔ wɔ mii ni ehaa wɔtsui nyɔɔ wɔmli, ni enyiɛɔ wɔhiɛ “kɛtsɔɔ jalɛ gbɛi anɔ yɛ egbɛi lɛ ahewɔ.” (Lala 23:1-4) Tookwɛlɔ Kpakpa, Yesu Kristo, sumɔɔ wɔ babaoo akɛ ekɛ esusuma ŋmɛ shi yɛ wɔ hewɔ.—Yohane 10:7-15.
2. Mɛɛ shihilɛ mli Nyɔŋmɔ webii naa amɛhe yɛ?
2 Akɛ mɛi ni nine shɛɔ kwɛmɔ ni mlijɔlɛ yɔɔ mli nɔ lɛ, wɔbaanyɛ ni wɔkɛ lalatsɛ lɛ awie akɛ: “Nyɛsɔmɔa Yehowa kɛ miishɛɛ, nyɛbaa ehiɛ kɛ nyamɔ lala! Nyɛnaa nyɛlea akɛ, Yehowa lɛ, lɛ ji Nyɔŋmɔ! Lɛ efee wɔ, ni lɛ enii ji wɔ, emaŋ kɛ elɛɛ he lɛ tooi ji wɔ.” (Lala 100:2, 3) Hɛɛ, wɔyɛ miishɛɛ ni wɔyɛ shweshweeshwe. Etamɔ nɔ ni wɔje kooloi awuiyelɔi fɔji adɛŋ ni wɔyɛ tooi atsu ni yɔɔ gbogboi ni wa ni akɛ tɛi tswa mli.—4 Mose 32:16; 1 Samuel 24:3; Zefania 2:6.
Tooi lɛ Akwɛlɔi ni Yɔɔ He Suɔmɔ
3. Te Kristofoi onukpai ni ahala amɛ lɛ kɛ Nyɔŋmɔ tooi lɛ yeɔ amɛhaa tɛŋŋ?
3 Akɛ Nyɔŋmɔ tooi lɛ, wɔyɛ miishɛɛ ni enɛ bɛ naakpɛɛ! Onukpai ni ahala amɛ yɛ wɔteŋ lɛ nyiɛɔ hiɛ. Amɛfeee ‘amɛhe lumɛi,’ amɛyeee wɔ nɔ nuntsɔmɛi asane, loo ni amɛaabɔ mɔdɛŋ amɛye wɔ hemɔkɛyeli lɛ nyɔ̃ŋ. (4 Mose 16:13; Mateo 20:25-28; 2 Korintobii 1:24; Hebribii 13:7) Yɛ no najiaŋ lɛ, amɛji tookwɛlɔi ni yɔɔ suɔmɔ ni kɛ bɔfo Petro ŋaawoo nɛɛ tsuɔ nii: “Nyɛlɛa Nyɔŋmɔ asafoku ni yɔɔ nyɛteŋ lɛ, nyɛkwɛa nɔ, jeee nɔnyɛɛ naa, shi moŋ yɛ suɔmɔ naa; asaŋ jeee sɛɛnamɔ ni yɔɔ hiɛgbele hewɔ, shi moŋ tsuijurɔ naa; asaŋ jeee akɛ mɛi ni yeɔ asafoi lɛ anɔ nuntsɔmɛi asane, shi moŋ mɛi ni toɔ okadii amɛhaa asafoku lɛ.” (1 Petro 5:2, 3) Bɔfo Paulo kɛɛ nanemɛi onukpai lɛ akɛ: “Nyɛlea nyɛhe nɔkwɛmɔ kɛ tooiku lɛ fɛɛ ni Mumɔ krɔŋkrɔŋ lɛ ewo nyɛ amɛ nɔkwɛlɔi lɛ, koni nyɛlɛ Nyɔŋmɔ asafo lɛ ni ekɛ lɛ diɛŋtsɛ (e-Bi lɛ, NW) la he lɛ.” Ni kwɛ bɔ ni tooi lɛ daa shi amɛhaa akɛ nɛkɛ hii nɛɛ ni mumɔ krɔŋkrɔŋ hala amɛ lɛ ‘kɛ mlijɔlɛ kwɛɔ tooi lɛ’!—Bɔfoi lɛ Asaji 20:28-30.
4. Mɛɛ wekukpaa ni ka Charles T. Russell kɛ asafoku lɛ teŋ ale jogbaŋŋ?
4 Yesu kɛ ‘gbɔmɛi ateŋ nikeenii’ ha, mɛi komɛi akɛ “nɔkwɛlɔi,” loo tookwɛlɔi, ni kɛ Yehowa tooi lɛ yeɔ yɛ mlijɔlɛ naa. (Efesobii 4:8, 11; King James Version) Hii nɛɛ ateŋ mɔ kome ji Charles T. Russell, Buu Mɔɔ Asafo lɛ klɛŋklɛŋ sɛinɔtalɔ lɛ. Atsɛ lɛ Pastor Russell yɛ enitsumɔi ni suɔmɔ kɛ musuŋtsɔlɛ yɔɔ mli ni ekɛkwɛ tooi lɛ ni yɔɔ Tookwɛlɔ Nukpa, Yesu Kristo shishi lɛ anɔ lɛ hewɔ. Ŋmɛnɛ, Yehowa Odasefoi a-Nɔyeli Kuu lɛ halaa Kristofoi onukpai, ni amɛkwɛɔ jogbaŋŋ koni amɛkɛ wiemɔi tamɔ “nɔkwɛlɔ,” “onukpa,” loo “tsɔɔlɔ” akatsu nii akɛ sabalai. (Mateo 23:8-12) Ni kɛlɛ, ŋmɛnɛŋmɛnɛ beaŋ onukpai lɛ tsuɔ nɔkwɛmɔ, loo tookwɛmɔ nitsumɔ kɛhaa Yehowa lɛɛ he tooi lɛ asɛɛnamɔ.
5. Mɛni hewɔ esa akɛ mɛi heei lɛ ale onukpai ni ahala amɛ yɛ Kristofoi asafo lɛ mli lɛ?
5 Akɛ tookwɛlɔi lɛ, onukpai lɛ tsuɔ nitsumɔ ko ni sa kadimɔ yɛ mɛi heei lɛ amumɔŋ nɔyaa mli. No hewɔ lɛ, wolo hee lɛ, Nilee Ni Kɛ Mɔ Yaa Naanɔ Wala Mli lɛ kɛɔ yɛ baafa 168 akɛ: “Esa akɛ ole onukpai ni ahala amɛ ni yɔɔ asafo lɛ mli lɛ. Amɛyɛ niiashikpamɔ babaoo yɛ Nyɔŋmɔ nilee lɛ kɛ nitsumɔ mli, ejaakɛ ana hesaai kɛha nɔkwɛlɔi taakɛ eyɔɔ Biblia lɛ mli lɛ yɛ amɛhe. (1 Timoteo 3:1-7; Tito 1:5-9) Kaashashao shi akɛ oooya amɛteŋ mɔ ko ŋɔɔ, kɛ́ mumɔŋ yelikɛbuamɔ he miihia bo koni oye jeŋba loo su ko ni kɛ Nyɔŋmɔ taomɔ nii kpaaa gbee lɛ nɔ kunim lɛ. Obaana akɛ onukpai lɛ nyiɛɔ Paulo ŋaawoo nɛɛ sɛɛ: ‘Nyɛshɛjea mɛi ni tsui faa lɛ amii; nyɛherea mɛi ni feɔ gbedee lɛ; nyɛtoa nyɛtsui shi nyɛhaa mɛi fɛɛ.’—1 Tesalonikabii 2:7, 8; 5:14.”
Beni Mɛi Heei lɛ Sumɔɔ ni Amɛshiɛ
6. Mɛni ji gbɛ ni atsɔɔ nɔ, kɛ Biblia kaselɔ miisumɔ ni etsɔ Maŋtsɛyeli shiɛlɔ?
6 Beni Biblia kaselɔ ena nilee, ni eba kpeei yɛ be saŋŋ mli lɛ, ebaasumɔ ni efee Maŋtsɛyeli shiɛlɔ, sanekpakpa shiɛlɔ. (Marko 13:10) Kɛji nakai ni lɛ, esa akɛ Odasefonyo ni kɛ lɛ feɔ Biblia mli nikasemɔ lɛ ana onukpai asɛinɔtalɔ lɛ, ni ebaato gbɛjianɔ koni onukpai ni sɔmɔɔ akɛ Asafoŋ Sɔɔmɔ Ajinafoi akuu lɛ ateŋ mɔ kome kɛ onukpa kroko kɛ Biblia kaselɔ lɛ kɛ etsɔɔlɔ lɛ akpe. Sanegbaa lɛ baadamɔ Organized to Accomplish Our Ministry wolo lɛ baafai 98 kɛ 99 nɔ. Kɛji akɛ onukpai enyɔ nɛɛ na akɛ mɔ hee lɛ heɔ shishijee Biblia mli tsɔɔmɔi lɛ eyeɔ ni ehiɔ shi yɛ Nyɔŋmɔ shishitoo taomɔ nii anaa lɛ, abaakɛɛ lɛ akɛ, esa mɔ ni naa maŋ sɔɔmɔ nitsumɔ lɛ mli gbɛfaŋnɔ.a Kɛ ebu esɔɔmɔ nitsumɔ he akɔntaa kɛtsɔ eshiɛmɔ he akɔntaabuu ni ekɛhaa lɛ nɔ lɛ, abaaŋma awo Congregation Publisher Record wolo ni egbɛi yɔɔ nɔ lɛ nɔ. Mɔ hee nɛɛ baanyɛ abu eshiɛmɔ nitsumɔ lɛ he akɔntaa efata mɛi krokomɛi akpekpei abɔ ni kɛ miishɛɛ ‘jajeɔ Nyɔŋmɔ wiemɔ lɛ’ anɔ̃ lɛ he. (Bɔfoi lɛ Asaji 13:5) Abaatswa adafi atsɔɔ asafo lɛ akɛ eji shiɛlɔ ni abaptisiko lɛ.
7, 8. Mɛɛ gbɛi anɔ aaatsɔ akɛ yelikɛbuamɔ ni he hiaa shiɛlɔ ni abaptisiko lɛ lɛ aha lɛ yɛ sɔɔmɔ lɛ mli?
7 Onukpai lɛ kɛ Kristofoi krokomɛi ni amɛdara yɛ mumɔŋ lɛ ayelikɛbuamɔ he baahia shiɛlɔ ni abaptisiko lɛ lɛ. Akɛ nɔkwɛmɔ nɔ lɛ, emumɔŋ nɔyaa baafee sane ni Asafo Woloŋ Nikasemɔ ni eyaa lɛ nɔkwɛlɔ lɛ baanya he. Shiɛlɔ hee lɛ baana akɛ ewa kɛha lɛ akɛ eeeshiɛ jogbaŋŋ yɛ shia kɛ shia nitsumɔ lɛ mli. (Bɔfoi lɛ Asaji 20:20) No hewɔ lɛ, ebaasumɔ ni ena yelikɛbuamɔ, titri lɛ kɛjɛ mɔ ni kɛ lɛ feɔ Biblia mli nikasemɔ yɛ Nilee wolo lɛ mli lɛ ŋɔɔ. Yelikɛbuamɔ ni akɛtsɔɔ mɔ nii ni tamɔ nɛkɛ sa, ejaakɛ Yesu Kristo saa ekaselɔi lɛ kɛha sɔɔmɔ lɛ.—Marko 6:7-13; Luka 10:1-22.
8 Kɛ wɔ sɔɔmɔ nitsumɔ lɛ baafee nɔ ni mɔɔ shi lɛ, hesaamɔ kpakpa ni atsɔɔ hiɛ afeɔ he miihia. No hewɔ lɛ, shiɛlɔi enyɔ lɛ baasumɔ ni klɛŋklɛŋ lɛ amɛkpe, koni amɛkase gbɛ ni amɛbaatsɔ nɔ amɛkɛ shiɛmɔi ni awoɔ he ŋaa yɛ daa nyɔŋ nɔ Wɔ Maŋtsɛyeli Sɔɔmɔ lɛ mli lɛ aha. Kɛ amɛje amɛ sɔɔmɔ nitsumɔ lɛ shishi lɛ, mɔ ni he esa jogbaŋŋ lɛ baawie yɛ klɛŋklɛŋ shinaa loo shinaai enyɔ naa. Beni akɛ naanyobɔɔ ekpa wiemɔ lɛ hiɛ lɛ, shiɛlɔi enyɔ lɛ fɛɛ baanyɛ ana odaseyeli lɛ mli gbɛfaŋnɔ. Nɔ ni baajɛ mɛi enyɔ ni tsuɔ nii yɛ sɔɔmɔ lɛ mli nɛkɛ lɛ mli aba ji sɛɛsaramɔi kpakpai, kɛ shia Biblia mli nikasemɔ po yɛ Nilee Ni Kɛ Mɔ Yaa Naanɔ Wala Mli wolo lɛ mli. Shiɛlɔ ni he esa babaoo lɛ baakwɛ nikasemɔ lɛ nɔ kɛyashi be ko, kɛkɛ lɛ ekɛwo Maŋtsɛyeli jajelɔ hee lɛ dɛŋ. Kwɛ miishɛɛ ni shiɛlɔi enyɔ lɛ fɛɛ baana, kɛ mɔ ni kaseɔ Biblia lɛ jie hiɛsɔɔ kpo kɛha Nyɔŋmɔ he nilee!
9. Mɛɛ gbɛjianɔ atoɔ kɛ shiɛlɔ ko miisumɔ ni abaptisi lɛ?
9 Beni shiɛlɔ ni abaptisiko lɛ lɛ yaa ehiɛ yɛ mumɔŋ lɛ, ekolɛ ebaajɔɔ ehe nɔ eha Nyɔŋmɔ yɛ sɔlemɔ mli, ni ebaasumɔ ni abaptisi lɛ. (Okɛto Marko 1:9-11 he.) Esa akɛ eha asafo lɛ mli onukpai asɛinɔtalɔ ale bɔ ni eshweɔ baptisimɔ lɛ, ni ebaato gbɛjianɔ koni onukpai lɛ kɛ shiɛlɔ lɛ ati sanebimɔi ni yɔɔ Organized to Accomplish Our Ministry wolo baafai 175 kɛyashi 218 lɛ mli. Kɛ aaahi lɛ, onukpai sɔrɔtoi etɛ kɛ mɔ lɛ baakpe shii etɛ ni amɛbote sanebimɔi lɛ ni ajara mli afee lɛ fãi ejwɛ lɛ mli. Kɛ amɛkpɛlɛ nɔ akɛ shiɛlɔ ni abaptisiko lɛ lɛ yɛ Biblia tsɔɔmɔi ahe shishinumɔ ni sa, ni esa yɛ gbɛi krokomɛi anɔ lɛ, amɛbaakɛɛ lɛ akɛ abaanyɛ abaptisi lɛ. Yɛ ehenɔjɔɔmɔ kɛ baptisimɔ hewɔ lɛ, ebafeɔ mɔ ni ‘akadi’ kɛha yiwalaheremɔ.—Ezekiel 9:4-6.
Hiamɔ Nii Krɛdɛɛ he Nitsumɔ
10. Mɛɛ gbɛ nɔ mɔ ko aaatsɔ aha enilee yɛ Ŋmalɛ lɛ mli aya hiɛ, beni egbe enikasemɔ yɛ Nilee wolo lɛ mli lɛ naa ni abaptisi lɛ lɛ sɛɛ?
10 Beni mɔ ko egbe e-Biblia lɛ kasemɔ yɛ Nilee wolo lɛ mli lɛ naa ni abaptisi lɛ lɛ, ehe ebahiaŋ akɛ aaaje gbɛ akɛ lɛ akase wolo ni ji enyɔ, tamɔ Ekome ni Afee Kɛmiija Anɔkwa Nyɔŋmɔ Kome Lɛ.b Shi kɛlɛ, mɔ ni abaptisi lɛ etsɛko lɛ baakase nibii babaoo yɛ be mli ni esaa ehe kɛhaa Kristofoi akpeei ni eyaa daa lɛ. Agbɛnɛ hu, ebaana nilee efata he yɛ be mli ni anɔkwale lɛ he kumai ni yeɔ lɛ lɛ tsirɛɔ lɛ koni ekane ni ekase Kristofoi awoji yɛ teemɔŋ ni ekɛ nanemɛi heyelilɔi susuɔ Ŋmalɛ mli saji ahe lɛ. Shi kɛ hiamɔ nii krɛdɛɛ te shi hu?
11. (a) Priskila kɛ Akwila ye bua Apolo yɛ mɛɛ gbɛ nɔ? (b) Mɛɛ yelikɛbuamɔ abaanyɛ akɛha obalanyo loo obalayoo ni abaptisi lɛ etsɛko ni miisusu gbalashihilɛ he?
11 Apolo po, “ni yɔɔ hewalɛ yɛ ŋmalɛi lɛ amli,” ni tsɔɔ Yesu he nii yɛ gbɛ ni ja nɔ lɛ ná Priskila kɛ Akwila, ni ji Kristofoi ni he esa, ni “ŋɔ lɛ kɛba amɛŋɔɔ, ni amɛtsɔɔ lɛ Nyɔŋmɔ gbɛ lɛ fitsofitso” lɛ he sɛɛ. (Bɔfoi lɛ Asaji 18:24-26; okɛto Bɔfoi lɛ Asaji 19:1-7 he.) No hewɔ lɛ, ŋɔɔ lɛ akɛ, obalanyo loo obalayoo ni abaptisi lɛ etsɛko miisusu nyiɛmɔ ni tsɔɔ gbalashihilɛ hiɛ kɛ gbalashihilɛ he. Kristofonyo ni yɔɔ niiashikpamɔ babaoo baanyɛ aye abua lɛ koni ena saji ni kɔɔ enɛɛmɛi ahe yɛ Buu Mɔɔ Asafo lɛ woji amli. Akɛ nɔkwɛmɔ nɔ lɛ, saji ni yeɔ buaa ni kɔɔ enɛɛmɛi ahe jeɔ kpo yɛ Questions Young People Ask—Answers That Work wolo lɛ Fa 7 lɛ mli.c Shiɛlɔ ni kɛ lɛ fee Biblia mli nikasemɔ lɛ baanyɛ ni ekɛ mɔ hee lɛ asusu saji nɛɛ ahe, eyɛ mli akɛ enɛ kɔŋ daa nikasemɔ he.
12. Mɛɛ yelikɛbuamɔ abaanyɛ akɛha gbalashihilɛ mli hefatalɔi ni abaptisi amɛ ehee ni kɛ naagbai miikpe?
12 Susumɔ nɔkwɛmɔ nɔ kroko hu he. Ekolɛ gbalashihilɛ mli hefatalɔi ni abaptisi amɛ ehee lɛ kɛ naagbai miikpe yɛ shishitoo mlai ni Nyɔŋmɔ gbeyeishemɔ yɔɔ mli ni amɛkɛaatsu nii lɛ he. Amɛbaanyɛ amɛkɛ onukpa ko agba he sane, ni lɛ hu ekɛ amɛ baasusu Ŋmalɛi lɛ ahe be fioo yɛ gbɛkɛ-gbɛkɛ, ni egbala amɛjwɛŋmɔ kɛya saji ni anaa yɛ Buu Mɔɔ Asafo lɛ woji amli lɛ anɔ. Shi, onukpa lɛ kɛ hefatalɔi lɛ ejeŋ daa Biblia kasemɔ shishi ekoŋŋ.
Kɛ Mɔ Hee Tɔ̃
13. Mɛni hewɔ esa akɛ asafo mli onukpai lɛ ajie mɔbɔnalɛ kpo amɛtsɔɔ mɔ ni abaptisi lɛ ehee ni tɔ̃ shi eshwa ehe lɛ?
13 Onukpai kaseɔ Tookwɛlɔ Kpeteŋkpele, Yehowa, ni kɛɔ akɛ: “Mi diɛŋtsɛ malɛ mitooi lɛ, . . . nɔ ni epila lɛ, mafi maha lɛ; helatsɛ lɛ, mawaje lɛ.” (Ezekiel 34:15, 16; Efesobii 5:1) Yɛ nakai mumɔ lɛ kɛ gbeekpamɔ naa lɛ, kaselɔ Yuda wo hewalɛ akɛ ajie mɔbɔnalɛ kpo atsɔɔ Kristofoi ni afɔ amɛ mu lɛ ni yiŋ feɔ amɛ kɔshikɔshi loo amɛgbee esha mli lɛ. (Yuda 22, 23) Akɛni wɔkpaa babaoo gbɛ kɛjɛɔ Kristofoi ni yɔɔ niiashikpamɔ babaoo lɛ aŋɔɔ hewɔ lɛ, eyɛ faŋŋ akɛ, esa akɛ ajie mɔbɔnalɛ kpo atsɔɔ mɔ ni abaptisi lɛ ehee lɛ—toobi kɛkɛ—ni tɔ̃ɔ ni etsake etsui lɛ. (Luka 12:48; 15:1-7) No hewɔ lɛ, onukpai ni ‘kojoɔ kɛhaa Yehowa’ lɛ kɛ kwɛmɔ ni mlijɔlɛ yɔɔ mli haa tooi ni tamɔ nɛkɛ, ni amɛjajeɔ amɛ yɛ mlijɔlɛ mumɔ mli.—2 Kronika 19:6; Bɔfoi lɛ Asaji 20:28, 29; Galatabii 6:1.d
14. Mɛni esa akɛ afee kɛ shiɛlɔ ko ni abaptisi lɛ etsɛko fee esha ni hiɛdɔɔ yɔɔ mli, ni mɛɛ gbɛ nɔ aaatsɔ aye abua lɛ?
14 Ŋɔɔ lɛ akɛ agbɛnɛ shiɛlɔ ko ni abaptisi lɛ etsɛko yɛ daanumɔ he naagba ko yɛ tsutsu, ni eyagbee daanumɔ fe nine nɛɛ mli fioo shikome ko loo shii enyɔ ko. Aloo ekolɛ eye tawa su ko ni eka ehe yɛ be kakadaŋŋ mli lɛ nɔ kunim, shi eŋmɛɛ ehe eha kaa ni ha eshɛre eko yɛ teemɔŋ yɛ be ko mli loo shii enyɔ ko. Eyɛ mli akɛ wɔ nyɛmi nuu hee nɛɛ esɔle ebi Nyɔŋmɔ dɛŋ eshaifaa moŋ, shi esa akɛ etao yelikɛbuamɔ kɛjɛ onukpa ko dɛŋ, koni esha lɛ akafee nɔ ni efɔɔ feemɔ. (Lala 32:1-5; Yakobo 5:14, 15) Kɛ etsi etɔmɔ lɛ ta etsɔɔ onukpai lɛ ateŋ mɔ kome lɛ, esa akɛ nakai onukpa lɛ abɔ mɔdɛŋ ajaje mɔ hee lɛ yɛ mɔbɔnalɛ mli. (Lala 130:3) Ŋmalɛ mli ŋaawoo baanyɛ afee nɔ ni fa, koni eye ebua lɛ koni enyiɛ tɔrɔmɔɔ yɛ no sɛɛ. (Hebribii 12:12, 13) Onukpa nɛɛ kɛ asafo lɛ mli onukpai asɛinɔtalɔ lɛ baagba shihilɛ lɛ he sane ni amɛle nɔ yelikɛbuamɔ lolo ni esa akɛ akɛha.
15. Mɛni he baahia, kɛ mɔ ni abaptisi lɛ etsɛko fee esha?
15 Yɛ saji lɛ ekomɛi amli lɛ, babaoo he baahia. Kɛ sane lɛ egbɛ eshwa, eji oshara kɛha asafoku lɛ, aloo ekɔɔ naagbai komɛi ni hiɛdɔɔ yɔɔ mli he lɛ, onukpai akuu lɛ baahala onukpai enyɔ ni amɛbote sane lɛ mli. Kɛji akɛ onukpai nɛɛ na akɛ hiɛdɔɔ yɛ sane lɛ mli, ni saneyeli ajinafoi ahe miihia lɛ, esa akɛ amɛbɔ onukpai akuu lɛ amaniɛ. Kɛkɛ lɛ onukpai akuu lɛ baahala saneyeli ajinafoi ni amɛye amɛbua mɔ ni tɔ̃ɔ lɛ. Esa akɛ saneyeli ajinafoi lɛ kɛ lɛ aye yɛ mlijɔlɛ naa. Esa akɛ amɛbɔ mɔdɛŋ ni amɛkɛ Ŋmalɛi lɛ ajaje lɛ. Kɛ ekpɛlɛ mɔdɛŋ ni saneyeli ajinafoi lɛ bɔɔ yɛ mlihilɛ mli lɛ nɔ lɛ, amɛ amɛbaatsɔɔ kɛ sɛɛnamɔ yɛ nitsumɔ ni akɛ lɛ tsuŋ yɛ wielɔi akpoku lɛ nɔ yɛ Maŋtsɛyeli Asa lɛ nɔ, aloo kɛ esa akɛ aŋmɛ lɛ gbɛ ni ewie yɛ kpeei ashishi.
16. Mɛni onukpai lɛ baanyɛ afee koni amɛkɛye amɛbua mɔ ni tɔ̃ɔ lɛ?
16 Kɛ mɔ ni tɔ̃ɔ lɛ kpɛlɛ yelikɛbuamɔ lɛ nɔ lɛ, onukpa kome loo mɛi enyɔ ni sɔmɔ yɛ saneyeli ajinafoi akuu lɛ mli lɛ baanyɛ ato gbɛjianɔ ni amɛyasara lɛ kɛ yiŋtoo akɛ amɛkɛaawo ehemɔkɛyeli hewalɛ ni amɛtswa ehiɛsɔɔ kɛha Nyɔŋmɔ jalɛ taomɔ nii lɛ amɛma shi. Amɛteŋ mɔ fɛɛ mɔ baanyɛ ekɛ lɛ atsu nii yɛ sɔɔmɔ lɛ mli yɛ be kɛ bei amli. Ekolɛ amɛyɛ Ŋmalɛ mli saji fioo ni amɛkɛ lɛ baagba, ekolɛ amɛkɛ Buu-Mɔɔ lɛ kɛ Awake! mli saji ni sa baatsu nii, shi amɛtoŋ daa Biblia kasemɔ he gbɛjianɔ. Yɛ mlijɔlɛ kwɛmɔ ni tamɔ nɛkɛ hewɔ lɛ, ebaawo mɔ ni tɔ̃ɔ lɛ hewalɛ ni ete shi ewo helooŋ gbɔjɔmɔi yɛ gbii ni jwere ehiɛ lɛ amli.
17. Mɛni afeɔ kɛ efɔŋ feelɔ ni abaptisi lɛ lɛ tsakeee etsui koni eshi eshafeemɔ gbɛ lɛ?
17 Shi kɛlɛ, ni abaptisi mɔ ko etsɛko lɛ jeee naajiemɔ kɛha esha ni eeeya nɔ efee ni etsakeee etsui. (Hebribii 10:26, 27; Yuda 4) Kɛji efɔŋ feelɔ ko ni abaptisi lɛ lɛ tsakeee etsui ni eeeshi eshafeemɔ gbɛ lɛ, abaashwie lɛ kɛjɛ asafo lɛ mli. (1 Korintobii 5:6, 11-13; 2 Tesalonikabii 2:11, 12; 2 Yohane 9-11) Kɛ nifeemɔ ni tamɔ nɛkɛ he miihia lɛ, onukpai akuu lɛ baahala saneyeli ajinafoi akuu. Kɛ ashwie lɛ lɛ, akɛ adafitswaa kuku nɛɛ baaha: “Ashwie . . . kɛjɛ asafo lɛ mli.”e
Ye Obua Amɛ ni ‘Amɛfoŋ Kɛya Dalɛ Mli’
18. Mɛni hewɔ wɔbaanyɛ wɔna nɔmimaa akɛ Kristofoi ni abaptisi amɛ ehee lɛ kɛ mɛi krokomɛi baana nibii babaoo amɛkase yɛ Yehowa kɛ esuɔmɔnaa nifeemɔ he?
18 Nyɔŋmɔ tsuji lɛ ateŋ mɛi ni fa babaoo baahi asafoku lɛ mli. Nɔ ni yɔɔ miishɛɛ hu ji akɛ, wɔteŋ mɔ fɛɛ mɔ baanyɛ atsi abɛŋkɛ wɔŋwɛi Tsɛ lɛ he kpaakpa, ejaakɛ wɔbaanyɛ wɔkase ehe nii kɛ esuɔmɔnaa nifeemɔ he nii babaoo be fɛɛ be. (Jajelɔ 3:11; Yakobo 4:8) Eyɛ faŋŋ akɛ, gbɔmɛi akpei abɔ ni abaptisi amɛ yɛ Pentekoste afi 33 Ŋ.B. lɛ yɛ nibii pii ni amɛbaakase. (Bɔfoi lɛ Asaji 2:5, 37-41; 4:4) Nakai nɔŋŋ Jeŋmajiaŋbii ni bɛ Ŋmalɛ he nilee ko kwraa lɛ hu fee. Akɛ nɔkwɛmɔ nɔ lɛ, enɛ fee anɔkwale yɛ mɛi ni abaptisi amɛ yɛ Paulo shiɛmɔ yɛ Areopago ni yɔɔ Ateene lɛ sɛɛ lɛ ahe. (Bɔfoi lɛ Asaji 17:33, 34) Ŋmɛnɛ hu, mɛi ni abaptisi amɛ ehee lɛ yɛ babaoo ni amɛaakase, ni be kɛ yelikɛbuamɔ he miihia amɛ koni ewo amɛ faishitswaa akɛ amɛaaya nɔ amɛfee nɔ ni ja yɛ Nyɔŋmɔ hiɛ lɛ mli hewalɛ.—Galatabii 6:9; 2 Tesalonikabii 3:13.
19. Te aaafee tɛŋŋ aye abua mɛi ni abaptisiɔ amɛ lɛ koni ‘amɛfoŋ kɛya dalɛ mli’?
19 Abaptisiɔ gbɔmɛi akpei abɔ daa afi, ni yelikɛbuamɔ he hiaa amɛ koni amɛnyɛ ‘amɛfoŋ kɛya dalɛ mli.’ (Hebribii 6:1-3) Obaanyɛ otsɔ wiemɔ, nɔkwɛmɔ nɔ, kɛ yelikɛbuamɔ diɛŋtsɛ yɛ sɔɔmɔ lɛ mli lɛ nɔ oye obua mɛi komɛi ni amɛwo gbɔmɔ hee lɛ ni ‘amɛya nɔ amɛnyiɛ anɔkwale lɛ mli.’ (3 Yohane 4; Kolosebii 3:9, 10) Kɛ oji shiɛlɔ ni he esa lɛ, onukpai lɛ baafɔ nine amɛtsɛ bo koni oye obua naanyo heyelilɔ hee ko yɛ sɔɔmɔ nitsumɔ lɛ mli, aloo ni okɛ lɛ agba Ŋmalɛ mli saji otii komɛi ahe sane otsii fioo ko, bɔni afee ni okɛwaje hemɔkɛyeli ni eyɔɔ yɛ Nyɔŋmɔ mli, ehiɛsɔɔ kɛha Kristofoi akpeei, kɛ ekrokomɛi. Wekukpaa ni ka tookwɛlɔi lɛ kɛ tooi lɛ ateŋ lɛ tamɔ tsɛ nɔ̃ yɛ ŋaawoo mli, kɛ nyɛ nɔ̃ yɛ mlijɔlɛ mli. (1 Tesalonikabii 2:7, 8, 11) Ni kɛlɛ, onukpai kɛ asafoŋ sɔɔlɔi fioo lɛ kɛkɛ nyɛŋ atsu nɔ fɛɛ nɔ ni he hiaa yɛ asafo mli lɛ he nii. Wɔ fɛɛ wɔtamɔ weku ni emli bii baanyɛ aye abua amɛhe. Wɔteŋ mɔ fɛɛ mɔ baanyɛ afee nɔ ko ni ekɛye ebua wɔnanemɛi jálɔi lɛ. Bo diɛŋtsɛ lɛ obaanyɛ ni okɛ hewalɛwoo aha, ni oshɛje mɔ ni ehao lɛ mii, owaje mɔ ni egbede lɛ.—1 Tesalonikabii 5:14, 15.
20. Mɛni obaanyɛ ofee koni okɛgbɛ Nyɔŋmɔ he nilee lɛ oshwã, ni okɛ kwɛmɔ ni mlijɔlɛ yɔɔ mli aha Yehowa lɛɛ he lɛ tooi lɛ?
20 Nyɔŋmɔ he nilee he miihia adesai, ni akɛ Yehowa Odasefonyo lɛ, obaanyɛ ona egbɛɛ-kɛ-shwamɔ mli gbɛfaŋnɔ yɛ miishɛɛ mli. Kwɛmɔ yɛ mlijɔlɛ mli he miihia Yehowa tooi lɛ, ni obaanyɛ ona gbɛfaŋnɔ ni suɔmɔ yɔɔ mli yɛ yelikɛbuamɔ ni okɛaaha koni nine ashɛ nɔ lɛ mli. Yehowa ajɔɔ osɔɔmɔ lɛ nɔ, ni ewo bo nyɔmɔ yɛ mɔdɛŋ ni ojɛɔ otsui mli obɔɔ koni oye obua elɛɛ he lɛ tooi lɛ hewɔ.
[Shishigbɛ niŋmai]
a Mɔ hee nɛɛ baanyɛ ahe Organized to Accomplish Our Ministry wolo lɛ ekome yɛ he ni ashɛ nɛɛ.
b Mɛi ni fee ji Watchtower Bible and Tract Society of New York, Inc.
c Mɛi ni fee ji Watchtower Bible and Tract Society of New York, Inc.
d Atsɔɔ gbɛjianɔtoo ni tamɔ nɛkɛ kɛha shiɛlɔi ni abaptisiko amɛ lɛ mli yɛ sane, “Mɛi Krokomɛi ni Ayeɔ Abuaa Amɛ Koni Amɛja Nyɔŋmɔ,” ni je kpo yɛ November 15, 1988 Blɔfo Buu-Mɔɔ lɛ baafai 15-20 lɛ.
e Kɛ yiŋkpɛɛ lɛ ji abaashwie lɛ, ni ebi ni akwɛ esane lɛ mli ekoŋŋ lɛ, atswaŋ adafi lɛ dã. Kwɛmɔ Organized to Accomplish Our Ministry wolo lɛ ni Watchtower Bible and Tract Society of New York, Inc. fee lɛ baafai 147-8.
Te Obaaha Hetoo Oha Tɛŋŋ?
◻ Te Yehowa kɛ etooi lɛ yeɔ ehaa tɛŋŋ?
◻ Mɛni afeɔ kɛ mɛi heei miisumɔ ni amɛshiɛ?
◻ Mɛɛ gbɛ nɔ nanemɛi heyelilɔi aaatsɔ aye abua mɛi heei ni yɔɔ hiamɔ nii krɛdɛɛ lɛ?
◻ Mɛɛ yelikɛbuamɔ onukpai baanyɛ amɛkɛha mɛi ni tɔ̃ɔ shi amɛtsakeɔ amɛtsui lɛ?
◻ Mɛɛ gbɛ nɔ oootsɔ oye obua mɔ ni abaptisi lɛ ehee koni ‘efoŋ kɛya dalɛ mli’?
[Mfoniri ni yɔɔ baafa 16]
Ale Charles T. Russell jogbaŋŋ akɛ tooi lɛ akwɛlɔ ni yɔɔ suɔmɔ
[Mfoniri ni yɔɔ baafa 18]
Tookwɛlɔi ni yɔɔ musuŋtsɔlɛ kɛ Nyɔŋmɔ tooi lɛ yeɔ yɛ mlijɔlɛ naa