Yitso 3
Nɔ ni Maŋtsɛyeli lɛ Tsɔɔ Kɛha Wɔ Shikpɔŋ Lɛ
1, 2. Maŋtsɛyeli lɛ baa tsɔɔ akɛ Nyɔŋmɔ susuɔ shikpɔŋ lɛ kɛ gbɔmɛi ni yɔɔ nɔ lɛ ahe yɛ mɛɛ gbɛ nɔ?
YESU sɔlemɔ he nɔkwɛmɔ nɔ lɛ yaa nɔ kɛ nɛkɛ wiemɔi nɛɛ: “Ha omaŋtsɛyeli lɛ aba. Ha afee nɔ ni osumɔɔ yɛ shikpɔŋ nɛɛ nɔ hu, taakɛ afeɔ yɛ ŋwɛi lɛ.” (Mateo 6:10, NW) Nyɔŋmɔ susuɔ wɔ shikpɔŋ nɛɛ, kɛ mɛi fɛɛ ni yɔɔ nɔ kɛ mɛi ni ehi nɔ pɛŋ lɛ ahe waa. No hewɔ ni Maŋtsɛyeli lɛ baa lɛ, koni “[e]bafite mɛi ni fiteɔ shikpɔŋ lɛ,” ni eto gbɛjianɔ kɛha mɛi ni egboi lɛ ashitee, ni ejie henyɛlɔ ni ji gbele kɛya ni eha wɔ shikpɔŋ kutruku lɛ atsɔ miishɛɛ kɛ toiŋjɔlɛ shia kɛha adesai ni amɛhi mli.—Kpojiemɔ 11:15, 18; 21:1, 3, 4.
2 Belɛ kwɛ bɔ ni esa akɛ wɔkɛ ekaa babaoo asɔle kɛ nakai wiemɔi lɛ, akɛ, “Ha omaŋtsɛyeli lɛ aba”! Enɛ ji Nyɔŋmɔ Maŋtsɛyeli ni yɔɔ e-Bi, Nuŋtsɔ Yesu Kristo dɛŋ lɛ. No nɔ abaatsɔ ni abaafee Yehowa, ni lɛ diɛŋtsɛ lɛ eji “naanɔi a-Maŋtsɛ” lɛ suɔmɔnaa nii lɛlɛŋ yɛ shikpɔŋ nɛɛ nɔ. Susumɔ nɔ ni no baatsɔɔ aha gbɔmɛi ni jɛ jeŋmaji fɛɛ mli lɛ he okwɛ:
“TOIŊJƆLƐ LUMƆ” LƐ MIIYE MAŊTSƐ
3, 4. (a) Mɛɛ gbalɛ wiemɔi Jeŋmaji Ekomefeemɔ lɛ eŋɔ eha ehe shi kɛlɛ enine enyɛ shi, ni mɛni hewɔ? (b) Mɛɛ gbɛjianɔtoo pɛ baanyɛ ekɛ toiŋjɔlɛ ni hiɔ shi daa aba, ni kɛtsɔ mɛni nɔ?
3 Beni ekpaa Kristo Maŋtsɛyeli nɔyeli lɛ gbɛ lɛ, Nyɔŋmɔ gbalɔ lɛ tsɛ lɛ akɛ “Toiŋjɔlɛ Lumɔ,” ni ekɛfata he akɛ, “Elumɔyeli lɛ shweremɔ kɛ toiŋjɔlɛ lɛ sɛɛ efoŋ.” Nakai gbalɔ lɛ nɔŋŋ maa nɔ mi kɛhaa wɔ akɛ: “Amɛkɛ amɛklantei aaasɔ̃ kɔii, ni amɛkɛ amɛkpɔlɔi hu aaasɔ̃ adedai: jeŋmaŋ ko woŋ klante nɔ eshiŋ jeŋmaŋ ko, ni amɛkaseŋ tawuu hu dɔŋŋ.” Eyɛ mli akɛ aŋmala naagbee wiemɔi nɛɛ yɛ Jeŋmaji Ekomefeemɔ lɛ gwabɔɔ hé lɛ gbogbo ni yɔɔ gbɛ lɛ sɛɛ lɛ he moŋ, shi jeee nakai majimaji ateŋ kuu ni béi egbala amɛmli lɛ baaha nakai gbalɛ lɛ aba mli. Ejaakɛ Jeŋmaji Ekomefeemɔ lɛ nine enyɛ shi waa akɛ gbɛjianɔtoo kɛha toiŋjɔlɛ kɛ shweshweeshwe shihilɛ namɔ yɛ jeŋmaji lɛ ateŋ.—Yesaia 2:4, AV; 9:6, 7, NW.
4 Anɔkwa toiŋjɔlɛ ni hiɔ shi daa lɛ biɔ ni jalɛsaneyeli ahi shi aha mɔ fɛɛ mɔ, jalɛ kɛ nitsumɔ diɛŋtsɛ. “Toiŋjɔlɛ Lumɔ” lɛ Maŋtsɛyeli lɛ pɛ baanyɛ akwɛ ni enɛ aba mli; ‘aaaha ema shi shiŋŋ ni aaawo lɛ hewalɛ kɛtsɔ jalɛ nɔ.’ Hɛɛ, nakai Maŋtsɛyeli lɛ ji nɔ ni Nyɔŋmɔ baatsɔ nɔ eha “toiŋjɔlɛ aba shikpɔŋ lɛ nɔ kɛha gbɔmɛi ni yɔɔ tsuijurɔ lɛ.”—Yesaia 9:7; 32:17; Luka 2:14, NW.
5. Mɛɛ nibii ni yɔɔ naakpɛɛ Maŋtsɛyeli lɛ baanyɛ atsu, yɛ toiŋjɔlɛ diɛŋtsɛ ni ekɛaama shi lɛ mli?
5 Mɛɛ gbɛ nɔ Maŋtsɛyeli lɛ baatsɔ afee enɛ? Ebaafee enɛ yɛ gbɛ krɛdɛɛ nɔ, kɛtsɔ Nyɔŋmɔ Maŋtsɛyeli ni ‘baa’ yɛ “[e]-Toiŋjɔlɛ Lumɔ” lɛ shishi, ni baate shi ashi jeŋmaji ni kɛ amɛhe wuuɔ ta lɛ nɔ. Lala 46:9, 10 fɔ̃ɔ wɔ nine akɛ: “Nyɛbaa nyɛbakwɛa Yehowa nitsumɔ lɛ, nɔ hiɛkpatamɔ ni eha eba shikpɔŋ lɛ nɔ lɛ! Ehaa tai asɛɛ foɔ kɛyaa shikpɔŋ lɛ naagbee hei lɛ, ekuɔ gãi mli, ni efoɔ akpɔlɔ mli, ta shwiilii lɛ hu eshaa kɛ la.” Maŋtsɛyeli lɛ baawo mla eshi tawuu nibii fɛɛ. Nɔ ni fe nakai lɛ, eŋmɛŋ awuiyelɔi yiwalɔi kɛ kaabonaatolɔi agbɛ ni amɛwo mɛi ahe gbeyei yɛ gbɛjegbɛi anɔ, ejaakɛ “mɛi ni he jɔ lɛ, shikpɔŋ lɛ aaatsɔ amɛnɔ, ni amɛmii aaashɛ amɛhe yɛ hejɔlɛ babaoo mli,” yɛ Nyɔŋmɔ Maŋtsɛyeli lɛ shishi.—Lala 37:9-11.
GBALƐ MLI NƆKWƐMƆ NƆ KO
6. Mɛɛ mlibaa ni yɔɔ nyam Biblia gbalɛ ko ná yɛ afii ohai ekpaa D.Ŋ.B. mli?
6 Biblia mli gbalɛi lɛ babaoo kɔɔ blema Israel nomŋɔɔ lɛ he. Beni amɛyasɔmɔ Babilon afii 70 sɛɛ lɛ, Israel shwɛɛnii anɔkwafoi komɛi ku amɛsɛɛ kɛba amɛ diɛŋtsɛ amɛshikpɔŋ nɔ yɛ afi 537 D.Ŋ.B. Nakai afii lɛ amli fɛɛ lɛ, amɛshikpɔŋ lɛ ka shi amaŋfɔ, ŋã ni gbɔmɛi bɛ nɔ. Shi agbɛnɛ, akɛni Yehowa jɔɔmɔ yɛ ewebii anɔ hewɔ lɛ, tsakemɔ ko ni sa kadimɔ waa eba. Gbalɛ ni aŋma afɔ shi afii ohai abɔ kɛtsɔ hiɛ lɛ baná emlibaa ni yɔɔ nyam, akɛ:
“Ŋa kpataa kɛ shikpɔŋ gbiŋ lɛ aaanya, ŋa kplanaa lɛ hu mli aaafili lɛ, ni eeegba afofro tamɔ fɔfɔi. Eeegba afofro babaoo ni emli aaafili lɛ, ni emli aaafili lɛ kɛ miishɛɛ kɛ nyamɔ sɔŋŋ; aaaŋɔ Lebanon anunyam lɛ aha lɛ, kɛ Karmel kɛ Sharon wulamɔ lɛ hu. Amɛaana Yehowa anunyam lɛ, kɛ wɔ-Nyɔŋmɔ lɛ wulamɔ lɛ hu.”—Yesaia 35:1, 2; kwɛmɔ Yesaia 65:18-25; Mika 4:4 hu.
7. Belɛ, mɛni wɔbaanyɛ wɔkpa gbɛ kɛha wɔ shikpɔŋ nɛɛ, kɛji Nyɔŋmɔ Maŋtsɛyeli lɛ ‘ba’?
7 Taakɛ yinɔsane yeɔ he odase lɛ, nɛkɛ gbalɛi nɛɛ na amɛ mlibaa ni yɔɔ naakpɛɛ yɛ Nyɔŋmɔ webii ni asaa akɛ amɛ ba amɛmaŋ ekoŋŋ lɛ agbɛfaŋ yɛ afii oha ni nyiɛ amɛkpɔmɔ kɛjɛ Babilon sɛɛ lɛ mli. Ni kɛ Nyɔŋmɔ Maŋtsɛyeli lɛ ‘ba’ kɛha Nyɔŋmɔ bii fɛɛ ni yɔɔ shikpɔŋ nɛɛ nɔ lɛ ajɔɔmɔ lɛ, ani nɔ ko baashwɛ yɛ paradeiso shihilɛi ni eeesaa ekɛba wɔ shikpɔŋ nɛɛ nɔ ekoŋŋ lɛ he ni enyɛŋ etsu? Hetoo ni nɔmimaa yɔɔ he waa ji, Dabi! Maŋtsɛyeli lɛ baakwɛ koni Nyɔŋmɔ shishijee famɔ ni ekɛha adesai akɛ ‘amɛye shikpɔŋ lɛ nɔ,’ ni amɛha he fɛɛ he atsɔ Eden paradeiso lɛ aba mli lɛlɛŋ kɛmɔ shi.—1 Mose 1:28; 2:8-14; Yesaia 45:18.
JEŊ MUU FƐƐ PARADEISO
8. Mɛni baaba yɛ niyenii kɛ mu ni anaa hewalɛ kɛjɛɔ mli lɛ agbɛfaŋ yɛ Maŋtsɛyeli lɛ shishi, ni enɛ baaba mli nakai yɛ mɛɛ mla kɛ nitsumɔ hewɔ?
8 Kɛ Nyɔŋmɔ Maŋtsɛyeli lɛ ‘ba’ lɛ, hɔmɔ kɛ nibii ajara ni waa babaoo lɛ fɛɛ sɛɛ baafo, ejaakɛ “shikpɔŋ lɛ nɔ aaaba abele babaoo kɛyashwie gɔji lɛ ayiteaŋ.” Wɔ-Tsɛ ni yɔɔ suɔmɔ lɛ baaha “shikpɔŋ lɛ aba niyenii, kɛ wein ni haa adesa tsui nyɔɔ emli, kɛ mu ni haa ehiɛ kpɛɔ, kɛ aboloo ni woɔ gbɔmɔ tsui hewalɛ.” (Lala 72:16; 104:14, 15) Anaŋ naagba ko yɛ niyenii ni aaaja aha jeŋmaji lɛ gbɛfaŋ, ni niyenii he esɛ̃ŋ ni eeebi ni aja daa gbi, ni atoŋ liamɔi srɛnɛɛ kɛha pɛtrol hemɔ. Hiɛjoolɔi ni naa mɛi ahe sɛɛ bɛ dɔŋŋ. Adesai fɛɛ baaye mla wulu fe fɛɛ, ni kɛɔ akɛ “Suɔmɔ onaanyo taakɛ bɔ ni osumɔɔ bo diɛŋtsɛ ohe” lɛ nɔ, ni amɛkɛ amɛhe baaja nɔ fɛɛ nɔ yɛ bɔ ni hiamɔ lɛ ji lɛ naa.—Yakobo 2:8.
9. Mɛɛ nɔmimaa wɔyɔɔ akɛ nɔ ko kwraa yeŋ gbɔmɛi adesai awui yɛ nakai beaŋ?
9 Kɛfata he hu lɛ, wɔbaanyɛ wɔkpa gbɛ akɛ Maŋtsɛyeli lɛ baakudɔ adebɔɔ mli hewalɛi ni nyɛɔ eteɔ shi lɛ, tamɔ shikpɔŋhosomɔi kɛ ahum nɛkɛ. Yesu tsɔɔ bɔ ni aaanyɛ afee enɛ aha beni eha “ahum babaoo” ko kpa tswaa lɛ. Enɛ ha ekaselɔi lɛ yoo akɛ “kɔɔyɔɔ kɛ ŋshɔ tete boɔ lɛ toi.” (Marko 4:37-41) Nɔ ko kwraa ehiŋ shi yɛ Nyɔŋmɔ Maŋtsɛyeli lɛ nɔyeli he ni yɔɔ shikpɔŋ nɔ lɛ fɛɛ mli ni pilaa mɔ, aloo eyeɔ mɔ awui aloo efiteɔ nii.—Okɛto Yesaia 11:6-9 he.
10. Mɛni naakpɛɛ nii ni Yesu fee lɛ tsɔɔ yɛ Maŋtsɛyeli lɛ he?
10 Ehe ehiaŋ dɔŋŋ ni ana helatsamɔ hei wuji ni abaatsĩ mɛi ni yeɔ gbɔmɔtsoŋ kɛ jwɛŋmɔŋ helai lɛ anaa yɛ jɛmɛ. Abaajie tsui helai, kansa kɛ helai krokomɛi ni kumɔɔ mɔ lɛ kwraa kɛya, ejaakɛ Tsofafeelɔ Nukpa, Yesu Kristo kɛ ekpɔmɔ afɔleshaa lɛ jarawalɛ lɛ baatsu nii ‘kɛtsa jeŋmaji lɛ.’ Naakpɛɛ nibii pii ni Yesu fee beni eyɔɔ shikpɔŋ nɛɛ nɔ, ni ji helai ni etsa kɛ gbohii ni etee amɛ shi lɛ ji nibii ni ebaatsu kɛtsɔ e-Maŋtsɛyeli ni yɔɔ hewalɛ lɛ nɔ lɛ he okadi bibioo ko pɛ. Abaajie adesai agbele shihilɛ ni amɛna kɛjɛ fɔmɔ mli lɛ po kɛya kwraa, ejaakɛ amaa nɔ mi ahaa wɔ akɛ “gbele bɛ dɔŋŋ.”—Kpojiemɔ 21:4; 22:1, 2; Mateo 11:2-5; Marko 10:45; Romabii 5:18, 19.
11. Mɛɛ miishɛɛ baateke fɛɛ yɛ Yesu Maŋtsɛyeli nɔyeli lɛ mli?
11 Ni miishɛɛ mli miishɛɛ!—gɔɔ fiteee shikpɔŋ lɛ shikamɔ fɛfɛo lɛ dɔŋŋ, ejaakɛ no mli lɛ ajie mɛi ni yɔɔ mli lɛ fɛɛ kɛjɛ mli momo. Gbohiiashitee lɛ mli “klɛŋklɛŋ yibii,” ni ji Yesu kaselɔi anɔkwafoi 144,000 lɛ kɛ lɛ baafee ekome yɛ ŋwɛi akɛ ehefatalɔi yɛ emaŋtsɛyeli lɛ mli. Yesu shiwoo ni yɔɔ nyam ni tsɔɔ akɛ gbohii ni eshwɛ “ni yɔɔ gbohii abui lɛ amli lɛ aaanu egbee, ni amɛaaje kpo . . . [kɛba] wala mli” lɛ hu baaba mli. Mɛnɛɛmɛi baana hegbɛ ni yɔɔ miishɛɛ akɛ akɛ amɛ aaaba adesa emuuyeli mli akɛ Maŋtsɛyeli lɛ shishibii yɛ shikpɔŋ nɛɛ nɔ.—Yohane 5:28, 29; Kpojiemɔ 14:1-5; 20:4-6, 11, 12.
12. (a) Mɛni hewɔ obaasumɔ ni ohi shi kɛya naanɔ yɛ paradeiso mli lɛ? (b) Taakɛ Yohane 17:3 tsɔɔ lɛ, mɛni esa akɛ wɔfee koni wɔnyɛ wɔyashɛ jɛmɛ?
12 Ani oosumɔ ni ofee mɛi ni baahi shi ni amɛna be mli ni abaatsuu shikpɔŋ nɛɛ he ni ajie efɔŋ feemɔ kɛjɛ nɔ, ni atsake lɛ afee lɛ miishɛɛ paradeiso lɛ ateŋ mɔ ko? Ani oosumɔ ni ohi shi yɛ shikpɔŋ nɛɛ nɔ ni ohere gbohii ni abaatee amɛ shi kɛba wala mli lɛ atuu? Ani obaasumɔ ni ohi shi kɛya naanɔ yɛ shikpɔŋ ni awula lɛ fɛfɛo nɔ—he ni mɔ ko gbɔjɔɔɔ yɛ gbɔlɛ hewɔ aloo miishɛɛ ni anaa yɛ daa gbii shihilɛ mli lɛ ejeee mɔ tsine lɛ? Onine baanyɛ ashɛ nɔ, kɛji onyiɛ Nyɔŋmɔ taomɔ nii kɛha walanamɔ lɛ sɛɛ. Yesu wie he kuku, beni ekɛɛ e-Tsɛ yɛ sɔlemɔ mli lɛ akɛ: “Enɛ ji naanɔ wala lɛ, akɛ amɛaana bo, anɔkwa Nyɔŋmɔ kome lɛ, kɛ Yesu Kristo, mɔ ni otsu lɛ lɛ he nilee.” (Yohane 17:3, NW) Mɛɛ hegbɛ eeeji nɛkɛ, akɛ ooohi shi kɛya naanɔ yɛ paradeiso mli, beni “shikpɔŋ lɛ nɔ aaayi tɔ kɛ Yehowa anunyam lɛ lee, tamɔ nu ha ŋshɔ shishi lɛ”!—Habakuk 2:14.
“ŊMƐNƐ WƆ DAA ŊMAA”
13. Mɛni hewɔ wɔbaanyɛ wɔkɛ hekɛnɔfɔɔ asɔle wɔbi “ŋmɛnɛ wɔ daa ŋmaa” lɛ?
13 Shi, wɔ mɛi ni wɔyɔɔ ŋmɛnɛ lɛ susuɔ wɔ amrɔ nɛɛ hiamɔ nii ahe waa. Yɛ wɔteŋ mɛi pii agbɛfaŋ lɛ, daaŋ ŋmaa namɔ kɛ hiamɔ nii ni wɔɔna wɔha wɔwekui lɛ ebatsɔ kaa diɛŋtsɛ eha wɔ. No hewɔ lɛ, jeee Tsɛ lɛ gbɛi kpeteŋkpele lɛ pɛ ehe hiaa ni wɔsɔle ni etse he, ni eha afee esuɔmɔnaa nii yɛ shikpɔŋ nɛɛ nɔ kɛtsɔ e-Maŋtsɛyeli lɛ baa nɔ; ehe miihia ni wɔsɔle wɔbi Nyɔŋmɔ wɔ daa gbi hiamɔ nii hu, kɛha “wɔ ŋmɛnɛ wɔ daa ŋmaa.” Ni wɔbaanyɛ wɔfee enɛ kɛ hekɛnɔfɔɔ kwraa akɛ, kɛ wɔbɔ mɔdɛŋ ni wɔhi shi yɛ Nyɔŋmɔ jalɛ shishitoo mlai lɛ anaa ni wɔha emaŋtsɛyeli lɛ he nibii ye klɛŋklɛŋ gbɛhe yɛ wɔshihilɛi amli lɛ, Nyɔŋmɔ baatsu egbɛfaŋ nɔ akɛ Nihalɔ Kpeteŋkpele lɛ. Etamɔ bɔ ni Yesu yaa nɔ ekɛɔ wɔ lɛ pɛpɛɛpɛ, akɛ: “Nyɛkahaoa nyɛhe nyɛkɛa akɛ: ‘Mɛni wɔɔye, aloo mɛni wɔɔnu, mɛni hu wɔɔŋɔha wɔhe?’ Ejaakɛ nii nɛɛ fɛɛ sɛɛ jeŋmajiaŋbii lɛ diɔ. Shi nyɛ-Tsɛ lɛ ni yɔɔ ŋwɛi lɛ le akɛ nii nɛɛ fɛɛ he miihia nyɛ. Shi nyɛtaoa Nyɔŋmɔ maŋtsɛyeli lɛ kɛ ejalɛ lɛ tsutsu, ni akɛ nii nɛɛ fɛɛ aaafata he aha nyɛ.”—Mateo 6:11, 31-33.
“OKƐ WƆNYƆJI LƐ AKE WƆ”
14, 15. (a) Kɛji wɔkɛ wiemɔi ni yɔɔ Mateo 6:12 lɛ miisɔle lɛ, te esa akɛ wɔfee klalo akɛ wɔɔfee wɔnii wɔha tɛŋŋ? (b) Mɛɛ nɔkwɛmɔ nii kpele wɔbaanyɛ wɔkase yɛ enɛ gbɛfaŋ?
14 Kɛji wɔmiitswa wɔkɛ wɔ-Tsɛ lɛ teŋ wekukpaa ni bɛŋkɛ kpaakpa wɔma shi lɛ, no lɛ ehe miihia ni wɔkɛ heshibaa ayoo nyɔmɔ ni wɔhiɛ lɛ lɛ, ni wɔkpɛlɛɔ tɔmɔi ni wɔtɔ Nyɔŋmɔ kɛ wɔnanemɛi gbɔmɛi anɔ lɛ nɔ. No hewɔ lɛ esa jogbaŋŋ akɛ wɔɔsɔle wɔha Nyɔŋmɔ akɛ: “Okɛ wɔnyɔji lɛ ake wɔ, tamɔ bɔ ni wɔ hu wɔkɛkeɔ mɛi ni hiɛ wɔ nyɔji lɛ.”—Mateo 6:12.
15 Ákɛ mlihilɛ kpojiemɔ kpele, ní wɔsaaa mɛi ni nine shɛɔ nɔ kwraa lɛ, Nyɔŋmɔ tsu e-Bi, Yesu kɛba je lɛ mli, koni “eŋɔ esusuma lɛ eha yɛ [wɔ adesai ateŋ] mɛi pii akpɔmɔ hewɔ.” Enɛ bafeɔ nɔdaamɔ nɔ kɛha wɔhe eshai lɛ ni akɛaake wɔ. (Mateo 20:28) Kwɛ bɔ ni Nyɔŋmɔ mɔbɔnalɛ ni ejie kpo etsɔɔ adesai eshafeelɔi lɛ da ha! Belɛ, mɛɛ yiŋtoo ni mli wa wɔ hu wɔyɔɔ nɛkɛ, ni wɔɔdamɔ nɔ wɔku wɔhiɛ wɔshwie wɔnanemɛi adesai agbɔjɔmɔi anɔ! Esa akɛ wɔfee klalo akɛ wɔɔfee babaoo po fe nakai: akɛ wɔkɛ eshai ni mli wa ni afee ashi wɔ lɛ po aaake. Yɛ nɛkɛ gbɛ nɔ lɛ, wɔbaanyɛ wɔjie nakai suɔmɔ ni mli wa ni Yesu wie akɛ no baafee anɔkwa Kristofoi akadimɔ nii lɛ kpo wɔtsɔɔ mɛi krokomɛi hu.—Yohane 13:35; Kolosebii 3:13; 1 Petro 1:22.
“JIEMƆ WƆ KƐJƐ MƆ FƆŊ LƐ DƐŊ”
16, 17. (a) Te esa akɛ wɔnu wiemɔi “Okɛ wɔ akaya kaa lɛ mli” lɛ shishi wɔha tɛŋŋ? (b) Te esa akɛ wɔfee wɔnii tɛŋŋ koni ekɛ sɔlemɔ ni wɔsɔleɔ ni ‘ajie wɔ kɛjɛ mɔ fɔŋ lɛ mli’ lɛ akpa gbee?
16 Yɛ naagbee lɛ, Yesu fãa wɔ ni wɔsɔle wɔha Nyɔŋmɔ akɛ: “Okɛ wɔ akaya kaa lɛ mli, shi jiemɔ wɔ kɛjɛ mɔ fɔŋ lɛ dɛŋ.” (Mateo 6:13, NW) Nyɛkahaa wɔsusua akɛ Nyɔŋmɔ kɛ kaai shwieɔ wɔgbɛ nɔ, ni ehaa wɔgbeɔ shi. Shi moŋ, Satan, nakai mumɔ fɔŋ ni etse atua eshi Nyɔŋmɔ lɛ ji mɔ ni taoɔ egbala wɔ kɛjɛ Nyɔŋmɔ he.
17 Shi kɛlɛ, Tsɛ lɛ wulaa wɔ koni “[wɔ]nyɛ Abonsam ŋaatsɔɔi lɛ anaa [wɔ]damɔ,” hɛɛ, koni wɔnyɛ wɔkɛ lɛ kɛ mumɔi fɔji akuu ni ekudɔɔ lɛ fɛɛ awuu yɛ omanyeyeli mli. Nyɔŋmɔ eha wɔ tawuu nii sɔrɔtoi lɛ eko fɛɛ eko ni wɔbaanyɛ wɔwo, bɔni afee ni ekaha ‘wɔyaje kaa mli.’ Bɔfo Paulo tsɔɔ mli jogbaŋŋ yɛ Efesobii 6:10-18. Beni wɔdamɔɔ shi shiŋŋ yɛ nɛkɛ tawuu nibii ni Nyɔŋmɔ kɛha wɔ nɛɛ kɛ nitsumɔ mli, ni wɔyaa nɔ yɛ sɔlemɔ mli lɛ, Tsɛ lɛ hu baakwɛ koni ‘akɛ wɔ akawo kaa mli,’ shi moŋ ‘ajie wɔ kɛjɛ mɔ fɔŋ lɛ dɛŋ.’—1 Petro 5:6-9.
18. Yɛ naamuu mli lɛ, mɛɛ nibii yɔɔ Sɔlemɔ he Nɔkwɛmɔ Nɔ lɛ mli?
18 Eba akɛ etsɛŋ ni aaatse Yehowa gbɛi ni yɔɔ nyam lɛ he kɛtsɔ ‘emaŋtsɛyeli lɛ baa lɛ nɔ.’ Eba akɛ aaafee esuɔmɔnaa nii yɛ shikpɔŋ nɔ kɛtsɔ efɔŋ fɛɛ ni aaajie kɛya kwraa, kɛ agbɛnɛ kɛtsɔ shikpɔŋ lɛ ni aaaha etsɔ jeŋ muu fɛɛ paradeiso kɛwo ehiɛ nyam lɛ hu nɔ. Bei abɔ ni amrɔ nɛɛ nibii agbɛjianɔtoo fɔŋ nɛɛ yɔɔ lolo lɛ, eba akɛ wɔ ŋwɛi Tsɛ ni yɔɔ suɔmɔ lɛ aaaha wɔ shihilɛ mli hiamɔ nii fɛɛ, ni eye ebua wɔ ni wɔhiɛ wɔkɛ mɛi krokomɛi ateŋ wekukpaa kpakpa mli daa, ni ejie wɔ kɛjɛ Satan dɛŋ hu. Enɛɛmɛi ji nibii ni Yesu tsɔɔ wɔ akɛ wɔsɔle wɔbi lɛ. Fɛɛ yɛ esɔlemɔ he nɔkwɛmɔ nɔ lɛ mli.
[Akrabatsa ni yɔɔ baafa 25]
NIBII NI NYƆŊMƆ MAŊTSƐYELI LƐ BAAFEE
● Ebaafi maŋtsɛ ni Yehowa ji lɛ sɛɛ, ekɛ Satan nɔyeli baaba naagbee.
● Ebaajie amale jamɔ kɛ nɔyelɔi yiwalɔi kɛjɛ shikpɔŋ nɔ.
● Ekɛ Kristo nɔyeli baaba akɛ “Toiŋjɔlɛ Lumɔ.”
● Ebaaha shikpɔŋ lɛ fɛɛ agba afofro tamɔ paradeiso ni yɔɔ nyam.
● Ebaajie wɔɔhei, niyenii, kɛ pɛtrol ni anaaa fɛɛ kɛya.
● Ebaato shihilɛ shishi ema naanyo suɔmɔ nɔ.
● Ebaakudɔ shikpɔŋ lɛ mli adebɔɔ hewalɛi lɛ, ebaatsi osharai anaa.
● Ebaajie nɔnyɛɛi, haomɔi, hewaa, piŋmɔi, kɛ gbɔlɛ kɛya.
● Ebaakpata henyɛlɔ ni ji gbele, hela kɛ awerɛho fɛɛ hiɛ.
● Ebaatee gbohii akpekpei akpei abɔ shi, ni amɛhi shi kɛya naanɔ yɛ shikpɔŋ nɔ.