Mɛɛ Wɔsɛɛ Be Yɔɔ Kɛha Wɔ Shikpɔŋ Lɛ?

World Military and Social Expenditures 1996 lɛ wie akɛ: “Afii oha fɛɛ afii ohai he yinɔsane ni aŋmala ashwie shi lɛ eko kwraa bɛ ni kɛ afii ohai 20 lɛ yeɔ egbɔ yɛ maŋ awuiyeli nifeemɔi ni hiŋmɛigbelemɔ bɛ mli lɛ mli, yɛ tai abɔ ni awuu lɛ mli, yɛ abobalɔi babaoo ni ekɛba lɛ mli, yɛ mɛi akpekpei abɔ ni agbe yɛ tai amli lɛ mli, kɛ agbɛnɛ hu yɛ shika babaoo ni afiteɔ kɛha ‘hebuu’ lɛ mli.” Ani shihilɛ nɛɛ baatsake gbi ko?

Bɔfo Petro kai Kristofoi lɛ yɛ shi ko ni Nyɔŋmɔ wo yɛ afii ohai abɔ kɛtsɔ hiɛ lɛ mli akɛ: “Yɛ [Nyɔŋmɔ] shiwoo lɛ naa lɛ wɔmiikwɛ ŋwɛi hee kɛ shikpɔŋ hee ni jalɛ hiɔ mli lɛ gbɛ.” (2 Petro 3:13) Nakai wiemɔi lɛ fata klɛŋklɛŋ Yesaia gbalɛ lɛ he. (Yesaia 65:17; 66:22) Blema Israel na eklɛŋklɛŋ mlibaa beni aku sɛɛ ato maŋ lɛ ama eshiwoo shikpɔŋ lɛ nɔ ekoŋŋ yɛ be mli ni akɛ afii 70 eŋɔ amɛ nom yɛ Babilon lɛ sɛɛ. Kɛtsɔ “ŋwɛi hee kɛ shikpɔŋ hee” lɛ he shiwoo lɛ mlitii nɔ lɛ, Petro tsɔɔ akɛ gbalɛ lɛ baaná emlibaa yɛ gbɛ ni da nɔ—jeŋ muu fɛɛ!

Jalɛ shihilɛi ni akɛaaba jeŋ muu fɛɛ lɛ ji Nyɔŋmɔ suɔmɔnaa nii, ni ebaaba kɛtsɔ eŋwɛi Maŋtsɛyeli kɛ Kristo akɛ Maŋtsɛ lɛ nɔ. “Jeŋmaŋ ko woŋ klante nɔ eshiŋ jeŋmaŋ ko, ni amɛkaseŋ tawuu dɔŋŋ!” (Yesaia 2:4) Nakai toiŋjɔlɛ kɛ shweshweeshwe shihilɛ ni eye emuu yɛ shikpɔŋ nɔ lɛ ji nɔ ni Yesu tsɔɔ esɛɛnyiɛlɔi lɛ koni amɛkpa gbɛ, ni amɛsɔle yɛ nɔ ni afɔɔ lɛ tsɛmɔ akɛ Wɔ Tsɛ ni Yɔɔ Ŋwɛi, loo Nuntsɔ lɛ Sɔlemɔ, ni kɛɔ akɛ: “Omaŋtsɛyeli lɛ aba; áfee nɔ ni osumɔɔ yɛ shikpɔŋ lɛ nɔ, taakɛ afeɔ yɛ ŋwɛi lɛ.”—Mateo 6:9, 10.

Ani obaasumɔ ni ohi shi yɛ jeŋ ko ni jalɛ hiɔ mli taakɛ eyɔɔ yɛ ŋwɛi lɛ mli? No ji hiɛnɔkamɔ ni Biblia lɛ kɛhaa mɔ fɛɛ mɔ ni kɛ tsui muu fɛɛ taoɔ koni ele Nyɔŋmɔ ni ehi shi yɛ ejalɛ gbɛi anɔ lɛ.