Nyɔŋmɔ Kojomɔ Ni Ekɛbaashi Kristendom Amale Gbalɔi Lɛ
1, 2. (a) Mɛɛ kaa nibii kpakpai ni baaba lɛ ahe gbalɛ ni bɛ nɔdaamɔnɔ lɛ kɛfɔ̃ɔ wɔhiɛ? (b) Mɛɛ sanebimɔ kpele biɔ hetoohamɔ bianɛ, ni mɛni kɛ sane lɛ ba?
1 YƐ FƆMƆSU naa lɛ, wɔ fɛɛ wɔsumɔɔ ni wɔbo gbalɛi ni kɔɔ nibii kpakpai ni baaba yɛ be kukuoo mli yɛ wɔwalashihilɛ mli lɛ toi. Enɛ kɛ kaa kpele ko bafɔɔ wɔhiɛ. Ekolɛ wɔbaasumɔ ni wɔŋɔ nibii ni agbaa lɛ eko akɛ eji anɔkwale akɛni wɔsumɔɔ hewɔ shi jeee ni eyɔɔ shishitoo kpakpa aloo ni ejɛ nɔyelihe ko hewɔ. Enɛ baanyɛ akɔne wɔyiŋ ni wɔfee nɔ ko ni kɛ oshra baaba wɔnɔ. Enɛ bafeɔ anɔkwale kɛji ekɔɔ wɔnaanɔ wɔsɛɛ he. Nakai pɛpɛɛpɛ ji bɔni sane lɛ yɔɔ BIANƐ! Mɛni hewɔ?
2 Nɔhewɔ ji akɛ sanebimɔ kpele ni biɔ hetoohamɔ lɛ kã adesa weku lɛ fɛɛ hiɛ tuuŋtu bianɛ. Nakai sanebimɔ lɛ ji akɛ, Namɔ baaye je lɛ nɔ? Jeee mpleshii ni sɛɛ efooo ni kãmɔ guɔyeli maji niiatsɛmɛi kɛ Kɔminist maji lɛ ateŋ ji nɔni kɛ sane kpele nɛɛ ba. Shi moŋ, shiɛmɔ ni Yehowa odasefoi Kristofoi eshiɛ yɛ E-maŋtsɛyeli ni yɔɔ Kristo dɛ lɛ ji nɔni kɛ sane lɛ ba. Nakai maŋtsɛyeli lɛ sa nɔyeli kɛjɛ beni Jeŋmaji Abei lɛ ba naagbee yɛ 1914 lɛ.
3. (a) Nohewɔ lɛ eji sɔ̃ ni ka mɛi lɛ anɔ akɛ amɛhala shidaamɔhe yɛ mɛɛ sanebimɔ mli? (b) Mɛni hewɔ esani Jeŋmaji lɛ aŋmɛɛ amɛmaŋtsɛyeli lɛ he amɛha Yehowa?
3 Mɛi ni nu Maŋtsɛyeli shiɛmɔ lɛ yɛ wiemɔi ni naa shɛɔ 190 mli yɛ jeŋ muu fɛɛ lɛ enu sɔ̃ lɛ he akɛ esani amɛhala heni amɛbaadamɔ. Ani amɛdamɔ shi bianɛ kɛha Yehowa jalɛ nɔyeli ni yɔɔ Kristo dɛ lɛ, aloo dabi? Shikpɔŋ ni wɔyɔɔ nɔ nɛɛ ji e-Bɔlɔ lɛ nɔ shi jeee wɔ ni ji bɔɔnii lɛ anɔ. Yɛ be akɔntaabuu yɛ Bɔlɔ lɛ wolo, Biblia lɛ mli naa lɛ, be ni ekɛha ni shikpɔŋ nɔ maji kɛ Kristendom maji lɛ aye je lɛ nɔ lɛ ba naagbee yɛ 1914 gbobe mra mli. Te Ekadi nakai Jeŋmaji Abei lɛ naagbee lɛ eha tɛɛŋ? Kɛtsɔ “ehewalɛ, lɛ kpeteŋkpele” ni eŋɔ koni eye Maŋtsɛ kɛ e-Bi, Yesu Kristo ni yɔɔ ŋwɛi ni ekɛfataa jeŋ nɔyeli ni jɛ ŋwɛi he lɛ nɔ. (Kpoj. 11:15-18) Nohewɔ lɛ e-Bi lɛ miiye maŋtsɛ bianɛ. (Ezek. 21:30-32) Be eshɛ agbɛnɛ ni esani Jeŋmaji lɛ aŋmɛɛ amɛmaŋtsɛyeli lɛ he amɛha Yehowa.
4, 5. (a) Mɛɛ oshra yɔɔ kɛha Tengbɛ Bokagbɛ lɛ yɛ sɛɛ afi 614 .Ŋ.B. lɛ mli? (b) No mli lɛ mɛni eba Yerusalem sɔlemɔwe lɛ mli krɔŋkrɔŋ nibii lɛ anɔ, ni ja mɛni eha dani Hanania gbalɛ ni kɔɔ amɛhe lɛ baaba mli?
4 Yɛ sɛɛ mli afi 614 D.Ŋ.B. mli lɛ, nibii ni tamɔ nakai Iɛ pɛpɛɛpɛ ba yɛ Yuda Maŋtsɛyeli lɛ mli. No mli lɛ oshra ko yɛ je lɛ mli! Nɛɛgbɛ ejɛ? Ejɛ nɔni Nyɔŋmɔ tsɛ akɛ “kooyigbɛ maŋtsɛyelii” lɛ ŋɔɔ. Enɛ ji Babilon Jeŋ Hewalɛ ni baafã kɛjɛ kooyigbɛ ebatua Teŋgbɛ Bokãgbɛ lɛ. (Yer. 1:13-15; 25:9, 26) Teŋgbɛ Bokãgbɛ lɛ yɛ Babilon Maŋtsɛ Nebukadnezar nɔyeli shishi momo. Enɛ ji anɔkwale, titri lɛ kɛjɛ afi 620 D.Ŋ.B., beni Yerusalem maŋtsɛ Yehoiakim abafee Babilon maŋtsɛfioo lɛ. Enyɛminuu Zedekia bafee maŋ krɔŋkrɔŋ lɛ nɔ naagbee maŋtsɛfioo ni Nebukadnezar kɛta sɛi lɛ nɔ beni ebilɛ akɛ ekɛ heshibaa, bulɛ kɛ woo ahalɛ yɛ kitãkamɔ mli lɛ sɛɛ. Beni Nebukadnezar shi Yerusalem etee emaŋ lɛ, ekɛ maŋtsɛ Yehoiakin ni akpalɛ yɛ sɛi nɔ lɛ kɛ Yuda hiɛnaanɔbii lɛ tee nomŋɔɔ mli. Eloo krɔŋkrɔŋ nibii lɛ hu kɛjɛ Yehowa sɔlemɔwe lɛ kɛyashwie amale nyɔŋmɔi ni yɔɔ Babilon lɛ ashiai. Kɛyashi mɛɛbe esani nakai krɔŋkrɔŋ nibii lɛ kɛ nibii krokomɛi ni jara wa ni akɛjɛ Yerusalem ni akpatã hiɛ lɛ baahi Babilon? Sanebimɔ nɛɛ he naataamɔ ko ba yɛ Zedekia nɔyeli afi ni ji ejwɛ lɛ mli.
5 Amale gbalɔ ko ni atsɛɔlɛ Hanania, Asur bi lɛ shi etsitsi akɛ ebaawie yɛ Yehowa gbɛi amli, ni etsɔɔ “biɛ afii enyɔ.” Kɛji abutu Babilon yɛ nakai be mli ni Mizraim ku sɛɛ eba jeŋ hewalɛ mli ekoŋ lɛ, no dani enɛ baanyɛ aba mli. Hanania gbalɛ ni ekɛshi Babilon lɛ miitsɔɔ akɛ eefĩ mɛi ni kpɛlɛɔ nɔ akɛ jeŋmaji lɛ ate shi ashi Babilon maŋtsɛ Nebukadnezar lɛ asɛɛ. Nohewɔ lɛ enɛ teɔ shi eshiɔ Yehowa akpɔ ni ewo tamɔ bɔni Yeremia jaje kɛtsɔ hiɛ lɛ.
6. Yɛ Yeremia 28:8, 9 wiemɔ naa lɛ, te Hanania gbalɛ lɛ yɔɔ sɔrɔto yɛ gbalɔi ni tsɔ Yeremia diɛŋtsɛ hiɛ nɔ Iɛ he tɛɛŋ?
6 Akɛni Hanania kɛ hiɛnɔkamɔ foji woɔ Yuda maŋ lɛ mli hewɔ lɛ Yeremia mu ehetoo wiemɔi lɛ naa yɛ osɔfoi lɛ kɛ maŋ lɛ fɛɛ hiɛ yɛ sɔlemɔtsu lɛ mli akɛ: “Gbalɔi ni tsɔ mikɛo fɛɛ hiɛ kɛjɛ teteete lɛ, amɛgba yɛ tai kɛ nɔfɔŋ kɛ gbelehela hewɔ amɛshi shikpɔji babaoo kɛ maŋtsɛyeli wuji, gbalɔ ni gbaa hejɔlɛ lɛ, kɛji gbalɔ lɛ wiemɔ lɛ na ba mli lɛ, no dani aleɔ gbalɔ lɛ akɛ Yehowa tsulɛ lɛɛlɛŋ!”—Yer. 28:1-9.
7. Mɛni Yesu Kristo gba eto yɛ wɔ be lɛ he kɛjɛ afi 1914, ni mɛɛ sanebimɔ ni kɔɔ mɛi ni wieɔ anɔkwale he Iɛ ete shi ŋmɛnɛ?
7 Yehowa gbalɔ kpele, Yesu Kristo gba tai, hɔji, gbelehelai, shikpɔŋhosomɔi kɛ oshrai krokomɛi yɛ wɔ bei lɛ he kɛjɛ 1914, ni enɛɛmɛi fɛɛ baakpe naa shi yɛ “amanehulu kpeteŋkpele” ni enɔ bɛ yɛ adesa yinɔsane ni eho fɛɛ mli lɛ mli. (Mat. 24:4-22) Ŋmɛnɛ lɛ, Yehowa Odasefoi etsɔɔ ‘bɔni Yesu gbalɛ lɛ eba mli kɛjɛ 1914 lɛ. Egbaaa naanɔ toiŋjɔlɛ ko kɛhaaa jeŋ nɛɛ yɛ wɔsɛɛ be kukuoo ni baaba yɛ yinɔ nɛɛ amli lɛ mli. Belɛ namɛi Yehowa etsu, ni namɛi wieɔ yɛ egbɛi mli lɛ, Kristendom osɔfoi ni gbaa nɔ kroko lɛ, aloo ŋmɛnɛŋmɛnɛ Yeremia kuu lɛ? Nibii ni baaba wɔsɛɛ lɛ baatsɔɔ mɛi ni wieɔ anɔkwale lɛ.
8. Yɛ Yeremia hetoohamɔ lɛ sɛɛ lɛ, mɛɛ okadi nifeemɔ Hanania fee, ni mɛɛ be he gbalɛ egba?
8 Ekolɛ amale gbalɔ Hanania ná hekɛnɔfɔɔ akɛ jeŋmaji lɛ tuamɔ ni amɛbaatua Yehowa “tsulɔ” lɛ baaye omanye; ejaakɛ efee okadi agbɛnɛ:
“Hanania . . . jie kɔŋtso lɛ kɛjɛ gbalɔ Yeremia kuɛ, ni ekumɔ mli; ni Hanania kɛɛ yɛ maŋ muu lɛ fɛɛ hiɛ akɛ: Bɔni Yehowa kɛɛ nɛ: Nɛkɛ pɛ mibakumɔ Nebukadnezar, Babel maŋtsɛ lɛ, apã lɛ kɛjɛ jeŋmaji fɛɛ akuɛ biɛ afii enyɔ!”—Yer. 28:10, 11
9. Agbɛnɛ mɛni Yehowa kɛɛ Yeremia akɛ ekɛɛ yɛ apãi ahe, ni mɛni hewɔ?
9 Shi ani nakai gbalɛ lɛ baaba mli anɔkwale akɛni agba yɛ Yehowa gbɛi mli lɛ kɛkɛ hewɔ? Dabida! Yehowa nyɛŋ efee nɔni Hanania gba lɛ, ni yɛ nakai be mli nɔŋŋ lɛ eha Yeremia gbalɛ ni teɔ shi woɔ no lɛ aba mli. Nohewɔ lɛ jeŋmaji atuatsemɔ ni amɛkɛshi Yehowa “tsulɔ” ni ajaje atsɔɔ lɛ fee yaka! Sɛɛ mli lɛ Yehowa kɛɛ Yeremia akɛ: “Yaa ni oyakɛɛ Hanania akɛ: Bɔni Yehowa kɛɛ nɛ: Okumɔ tso kɔŋtsei lɛ, shi obaafee dade kɔŋtsei oto najiaŋ! Ejaakɛ bɔni Yehowa Zebaot, Israel Nyɔŋmɔ lɛ, kɛɛ nɛ: Mikɛ dade apã efɔ nɛkɛ jeŋmaji nɛɛ fɛɛ akuɛ, ni amɛsɔmɔ Nebukadnezar, Babel maŋtsɛ lɛ, ni amɛ-aasɔmɔlɛ hu, ni mikɛ jwɛiaŋ kooloi tete ehalɛ.” (Yer. 28:12-14) Nohewɔ lɛ, jeŋmaji ayinɔkpaŋmɔ ni Hanania fĩ sɛɛ lɛ eko eko yeee omanye. Agbɛnɛ bɔni afee ni Yehowa kɛ “jwɛiaŋ kooloi tete” awo Nebukadnezar dɛ lɛ, ekɛ maji ni kpaŋɔ eyinɔ lɛ fɛɛ ashikpɔji lɛ baahalɛ.
Jamɔ Mli Hiɛnyiɛlɔ Lɛ Nine Eshɛ Edaaŋjiemonii Lɛ Nɔ
10. Mɛni aha Yeremia kuu lɛ hewalɛ akɛ amɛfee yɛ osɔfoi ni fĩɔ Jeŋmaji ayinɔkpaŋmɔ ni amɛkɛshiɔ Yehowa tamɔ Hanania lɛ ahe?
10 Ŋmɛnɛ lɛ, Kristendom osɔfo gbalɔi lɛ egba mli kpo akɛ amɛfiɔ jeŋmaji ayinɔkpãŋmɔ ni amɛkɛshiɔ Yehowa maŋtsɛyeli ni yɔɔ Kristo dɛ lɛ sɛɛ. Ahako Yehowa Odasefoi lɛ hewalɛ akɛ amɛbu mɛnɛɛmɛi ateŋ mɔ ko mɔ ko gbele fɔ. Shi amɛbaanyɛ amɛkɛ Yehowa wiemɔ ni jɛ mumɔŋ lɛ atsu nii kɛshi amale gbalɔi osɔfoi ni akɛ kuu lɛ Hanania fee amɛhe mfoniri lɛ. Nohewɔ lɛ nyɛhaa wɔkanea Yeremia gbalɛ mli nifeemɔ lɛ agbɛnɛ:
“Ni gbalɔ Yeremia kɛɛ gbalɔ Hanania akɛ: Bo toi ko, Hanania! Yehowa tsukoo; shi bo oha nɛkɛ maŋ nɛɛ ŋɔ amɛhiɛ amɛfɔ amale nɔ nɛɛ; hewɔ lɛ bɔni Yehowa kɛɛ nɛ: Naa, mibaha oje shikpɔŋ lɛ nɔ: afi nɛɛ obaagbo; ejaakɛ owie atuatsemɔ wiemɔ oshi Yehowa!”—Yer. 28:15, 16.
11. (a) Be enyiɛ Hanania kɛhi shi yɛ no sɛɛ? (b) Mɛni he fɔ Kristendom osɔfoi lɛ hu eye tamɔlɛ, nohewɔ Iɛ mɛni esa akɛ Yeremia kuu lɛ ajie kpo atsɔɔ?
11 Hanania, mɔni fi sɛɛ akɛ jeŋmaji yinɔkpalɔi lɛ ate shi awo Yehowa lɛ, hi shi nyɔji enyɔ pɛ yɛ no sɛɛ. “Ni gbalɔ Hanania gbo yɛ nakai afi lɛ nɔŋŋ nɔ [614 D.Ŋ.B.] nyɔɔŋ ni ji kpawo lɛ nɔ.” (Yer. 28:17, 1) Yɛ blema gbalɛ mli nifeemɔ nɛɛ shishinumɔ naa lɛ, mɛni abaanyɛ akɛɛ yɛ Kristendom osɔfoi amale gbalɔi lɛ ahe ŋmɛnɛ? Amɛfiɔ maŋkwramɔŋ nɔyelɔi lɛ asɛɛ ni amɛkpɛlɛɛɛ ni amɛkɛ amɛkɔji woɔ Yehowa Tsulɔ-Maŋtsɛ ni je agbo saŋŋ fe blema Nebukadnezar lɛ apã lɛ shishi. Yeremia kuu lɛ nyɛŋ amɛkɛ osɔfoi lɛ afee ekome yɛ enɛ feemɔ mli. Esani amɛya nɔ amɛtsɔɔ oshra mli ni osɔfoi lɛ kpalaa mɛi lɛ kɛyaa lɛ.
12. Mɛɛ shɛɛ Yeremia ná kɛjɛ Yehowa ŋɔɔ ni kɔɔ amale gbalɔ Ahab kɛ Zedekia he eha Yudafoi ni ji nomii yɛ Babilon lɛ?
12 Yɛ nakai blema bei amli maŋkwramɔŋ basabasafeemɔ ni ba yɛ Teŋgbɛ Bokãgbɛ lɛ mli lɛ, amale gbalɔi yɛ Yudafoi ni atswa amɛnaneshi tu kɛtee Babilon lɛ ateŋ. Nyɔŋmɔ kɛ shɛɛ nɛɛ tsɔ Yeremia nɔ yaha amale gbalɔi ni kɛ hiɛnɔkamɔ folo woɔ Yudafoi nomii ni yɔɔ Nebukadnezar shikpɔŋ nɔ lɛ mli lɛ akɛ:
“Shi nyɛ lɛ, nyɛboa Yehowa wiemɔ toi, nyɛ nomii fɛɛ ni miha nyɛje Yerusalem kɛtee Babel lɛ! Bɔni Yehowa Zebaot, Israel Nyɔŋmɔ lɛ, kɛɛ yɛ Ahab, Kolaia bi lɛ, kɛ Zedekia, Maaseia bi lɛ, ni gbaa amale gbalɛ haanyɛ yɛ migbɛi anɔ lɛ, he nɛ: Naa, maŋɔamɛ mawo Nebukadnezar, Babel maŋtsɛ lɛ dɛŋ, ni eeegbe amɛ yɛ nyɛhiɛ; koni Yuda nomii fɛɛ ni yɔɔ Babel lɛ, aŋɔamɛ alomɔ mɔ akɛ: Yehowa aaafeo tamɔ Zedekia kɛ Ahab, mɛi ni Babel maŋtsɛ lɛ shi yɛ la nɔ lɛ! ejaakɛ amɛfee hiɛgbejianii yɛ Israel, ni amɛkɛ amɛnanemɛi aŋamɛi fite gbala, ni amɛwie amale wiemɔ yɛ migbɛi anɔ, nɔni mifãkoamɛ! Shi mi ji mɔni le, ni ji odasefonyo, Yehowa kɛɛ.”—Yer. 29 :20-23.
Ŋwanejee ko bɛ he akɛ maŋkwramɔŋ jwɛŋmɔ kpakpa ko hewɔ Yehowa “Tsulɔ” Nebukadnezar shi Zedekia kɛ Ahab yɛ la mli lɛ, ejaakɛ akɛ nɔni teɔ shi woɔ Yehowa akpɔ lɛ amɛwó amɛhe nɔ amɛshi Babilon maŋtsɛyeli gbɛjianɔtooi lɛ.
13. Ani esani Yuda nomii lɛ akpa kpɔ̃mɔ gbɛ mra kɛjɛ Babilon, nohewɔ lɛ mɛni Yeremia wolo lɛ kɛɛ amɛ akɛ amɛfee?
13 Wiemɔi ni atsɛ yɛ yiteŋgbɛ nɛɛ ji wolo ni Yeremia jɛ Yerusalem ekɛmaje onukpai, osɔfoi, gbalɔi kɛ nomii ni yɔɔ shɔŋŋ yɛ Babilon lɛ fã ko, ni ekɛ Elasa, Safan bi lɛ, kɛ Gemaria, Hilkia bi lɛ fee wolo lɛ he bɔfoi yɛ be mli ni Yerusalem Maŋtsɛ Zedekia tsu bɔfoi enyɔ nɛɛ kɛtee Babilon Maŋtsɛ Nebukadnezar ŋɔɔ lɛ. (Yer. 29:1-3) Yɛ Yeremia wolo lɛ mli lɛ Yehowa kɛɛ nomii lɛ akɛ amɛkakwɛ gbɛ akɛ amɛbaaná kpɔ̃mɔ mra kɛjɛ Babilon, shi amɛhi jɛmɛ ni amɛkɛ yei ahia shi ni amɛwo shwiei. Nɔ najiaŋ ni nyɛaaakpãŋ kɛha atuatsemɔ lɛ, “nyɛtaoa hejɔlɛ nyɛhaa maŋ lɛ ni [mi Yehowa] miha aŋɔnyɛ nom kɛtee mli lɛ, ni nyɛkpaa Yehowa fai nyɛhaalɛ; ejaakɛ kɛ ehe jɔlɛ lɛ, no nyɛ hu nyɛhe aaajɔnyɛ! Ejaakɛ bɔni Yehowa kɛɛ nɛ: Kɛ afii nyɔŋmaikpawo shɛ ha Babel lɛ, mabasaranyɛ ni maha miwiemɔ kpakpa ni miwie yɛ nyɛhe, akɛ maha nyɛku nyɛsɛɛ kɛba biɛnɛɛ lɛ, aba mli!”—Yer. 29:4-10.
14. Tamɔ blema gbalɔ lɛ, mɛni Yeremia kuu lɛ ewo Kristofoi ni abaptisi amɛ Iɛ ŋaa akɛ amɛfee yɛ he fɛɛ he ni amɛyɔɔ?
14 Akɛ Yeremia henɔ pɛpɛɛpɛ lɛ, Yeremia kuu ni yɔɔ ŋmɛnɛ lɛ woɔ Yehowa odasefoi ni ejɔɔ amɛhe nɔ lɛ fɛɛ ŋaa akɛ amɛfee amɛhe mlanɔyelɔi kɛ mɛi ni he jɔ yɛ maji anɔ ni amɛji “gbɔi kɛ mɛikpɔji” yɛ mumɔ mli yɛ lɛ. (1 Pet. 2:11-15) Kɛtsɔ heshibaa ni sa ni amɛkɛhaa “hegbɛi ni yeɔ nɔ” lɛ nɔ lɛ, toiŋjɔlɛ hiɔ amɛ kɛ Nyɔŋmɔ hu teŋ.—Rom. 13:1-4.
15. Mɛni Shemaia, amale gbalɔ ni yɔɔ Babilon lɛ fee, ni mɛni ekɛɛ Yerusalem sɔlemɔwe lɛ “nɔkwɛlɔ” lɛ?
15 Dani aŋma Yeremia wolo lɛ kɛmaje lɛ, no mli lɛ amale gbalɔ ko ni yɔɔ nomŋɔɔ mli yɛ Babilon ni atsɛɔlɛ Shemaia, Nehelamnyo lɛ kɛ woji emaje Zefania, Maaseia bi ni ji Yerusalem sɔlemɔwe lɛ “nɔkwɛlɔ” lɛ. Nohewɔ lɛ, yɛ Yeremia wolo ni ekɛyaha Babilon nomii lɛ mli lɛ Yehowa wie wolo nɛɛ he ni etee nɔ ekɛɛ akɛ:
“Asaŋ Shemaia, Nehelamnyo lɛ, kɛɛmɔlɛ akɛ: Bɔni Yehowa Zebaot, Israel Nyɔŋmɔ lɛ, kɛɛ nɛ: Akɛni okɛ woji maje maŋ muu lɛ fɛɛ ni yɔɔ Yerusalem lɛ, kɛ Zefania, Maaseia bi, ni ji osɔfo lɛ, kɛ osɔfoi lɛ fɛɛ yɛ bodiɛŋtsɛ ogbɛi anɔ akɛ: Yehowa ewoó osɔfo yɛ osɔfo Yehoiada najiaŋ, koni nyɛtsɔmɔ nɔkwɛlɔi yɛ Yehowa we lɛ nyɛha mɔ fɛɛ mɔ ni eye sɛkɛ ni efeɔ ehe gbalɔ, ni obɔlɛ apã ni owolɛ gbokɛlɛ lɛ: mɛɛba okãaa Yeremia, Anatotnyo lɛ, ni feɔ ehe gbalɔ ehaanyɛ lɛ? Ejaakɛ etsu aba wɔ ŋɔɔ yɛ Babilon abakɛɛ: Esɛɛ baatsɛ! nyɛmamɔa tsui ni nyɛhia mli, ni nyɛfea tromii ni nyɛyea amɛ mli yibii!”—Yer. 29:24-28; kɛto Yeremia 29:4-6 he.
16. Mɛni sɔlemɔwe lɛ “nɔkwɛlɔ” lɛ kɛ Shemaia woji Iɛ fee, ni mɛni akɛ mumɔ tsirɛ Yeremia akɛ egba yɛ Shemaia he?
16 Shi beni osɔfo Zefania nine shɛ Shemaia wolo lɛ nɔ lɛ, ákɛ sɔlemɔwe lɛ “nɔkwɛlɔ” lɛ, ebɔɔɔ Yeremia apã ni ewooolɛ gbokɛlɛi. Klɛŋklɛŋ lɛ ekane wolo lɛ etsɔɔ Yeremia. (Yer. 29:29) Agbɛnɛ mɛni ba?
“Kɛkɛ ni Yehowa wiemɔ ba Yeremia ŋɔɔ akɛ: Tsu aya nomii lɛ fɛɛ ŋɔɔ ayakɛɛ: Bɔni Yehowa kɛɛ yɛ Shemaia, Nehelamnyo lɛ, he nɛ: Akɛni Shemaia gba ehanyɛ, ni mitsukolɛ, ni eha nyɛŋɔ nyɛhiɛ nyɛfɔ amale nɔ hewɔ lɛ, bɔni Yehowa kɛɛ nɛ: Naa, mawo Shemaia, Nehelamnyo lɛ, kɛ eseshi Iɛ nyɔmɔ; enaŋ nuu ko ni aaahi maŋ nɛɛ teŋ, ni asaŋ enaŋ ejurɔ ni mibafee mimaŋ lɛ, Yehowa kɛɛ; ejaakɛ ewie atutsemɔ wiemɔ eshi Yehowa.”—Yer. 29:30-32.
17. Mɛni hewɔ atua ni atse ashi Babilon tamɔ bɔni Shemaia wo hewalɛ akɛ afee lɛ ji Yehowa hu hiɛ atuatsemɔ?
17 Nɔni Shemaia gba ni eŋma lɛ tsɔɔ akɛ eewo Yerusalem Maŋtsɛ Zedekia hewalɛ yɛ e-tuatsemɔ lɛ mli, ni Mizraim ni teɔ shi woɔ Babilon Jeŋ Hewalɛ lɛ maŋtsɛ Farao fi esɛɛ. Shi jeee Babilon kɛkɛ he nakai atuatsemɔ lɛ sa. Etsɔɔ hu akɛ aatse atua aashi Yehowa, mɔni kɛ Babilon maŋtsɛ lɛ tsuɔ nii yɛ nakai be mli akɛ ‘etsulɔ’ lɛ. Nohewɔ lɛ Yehowa ji Babilon maŋtsɛ lɛ ŋwɛi Nuŋtsɔ lɛ. Enɛ hewɔ lɛ, atua ni aaatse ashi Babilon lɛ baafee Yehowa hiɛ atuatsemɔ klɛŋklɛŋ.
Mɛɛ Yehowa Yɛ Kristofoi Ahe Ni Amɛkɛwooo Maŋsaji Amli Lɛ Mli
18. Te Shemaia bɔ mɔdɛŋ akɛ etsɔ Yehowa hiɛ tɛɛŋ, ni mɛni enɛ kɛba lɛ diɛŋtsɛ kɛ eshwiei lɛ anɔ?
18 Shemaia sumɔɔɔ ni emɛ Yehowa yɛ Babilon ni ekɛ kpɔ̃mɔ abaha Yudafoi nomii ni efata amɛhe lɛ. Eheee Yesaia 44:28 kɛbashi 45:4 gbalɛ ni tsɔ hiɛ ni kɔɔ Khoresh aloo Koresh, Pershianyo ni baabutu Babilon koni ekpale Yuda nomii lɛ kɛya amɛjaku shikpɔŋ nɔ lɛ he lɛ eyeee. Yɛ enɛ hewɔ lɛ, Shemaia sumɔ ni etsɔ Yehowa hiɛ. Eto eyiŋ akɛ eto yiwalaheremɔ he gbɛjianɔ eha lɛ diɛŋtsɛ ehe kɛ enanemɛi nomii lɛ yɛ lɛ diɛŋtsɛ egbɛ naa. Efi nifeemɔ ko ni kɛ Babilon maŋtsɛ lɛ “dade apã” baafɔ Yuda Maŋtsɛyeli fioo lɛ kuɛ lɛ sɛɛ. (Yer. 28:13, 14) Nohewɔ lɛ kpɔ̃mɔ ko kwraa baa kɛhaaa Shemaia, atuatselɔ lɛ. Abaakpata eshwiei lɛ ahiɛ ni amɛnaŋ hegbɛ yɛ Israel kpɔ̃mɔ lɛ mli!
19. Mɛɛ gbɛ Shemaia henɔ ni yɔɔ ŋmɛnɛ lɛ ekɔ kɛjɛ afi 1914?
19 Esani wɔ mɛi ni yɔɔ ŋmɛnɛ lɛ abo ŋaawoo ni aha yɛ Yeremia wolo lɛ mli tamɔ bɔni aŋma yɛ Yeremia 29:8, 9 lɛ toi. Kɛ wɔfee enɛ lɛ, belɛ wɔnyiɛɛɛ Shemaia, Nehelamnyo, blemanyo ni wo hewalɛ kɛha Yehowa gbɛjianɔtoo lɛ hiɛ atuatsemɔ henɔ ni yɔɔ ŋmɛnɛ lɛ sɛɛ. Kristendom osɔfoi ni booo Yeremia kuu lɛ toi kɛjɛ Jeŋmaji Abei lɛ naagbee yɛ afi 1914 lɛ ejie amɛhe kpo bianɛ akɛ amɛtamɔ “agbamii shaji ni ehiii yeli yɛ hi ni amɛhiii sɔŋŋ naa.” Agbala osɔfoi lɛ ajwɛŋmɔ kɛtee ‘okadii’ ni Yesu Kristo wie he ni amɛba mli kɛjɛ afi 1914 lɛ nɔ; enɛɛmɛi ji ta he “klante” ni baafee jeŋ fɛɛ ta po, kɛ “hɔji” ni baakpata mɛi ahiɛ kɛ “gbelehela” ni anyɛɛɛ naa amɔ kɛ gbɔmɛi ayifalɛ ni gbɛɔ shwaa ni anyɛɛɛ he nɔ ko afee, yɛ Kristendom po ni shiɔ etsitsi akɛ eji Kristofonyo lɛ mli. (Yer. 29:16-19; Mat 24:4-20) Osɔfoi lɛ jieɔlɛ kpo lolo akɛ amɛheee “okadi” lɛ mlitsɔɔmɔ ni Ŋmalɛi lɛ kɛhaa lɛ amɛyeee, nohewɔ lɛ amɛtsirɛɛɛ jeŋmaji lɛ ayisɛɛ akɛ amɛkɛ amɛmaŋtsɛyelii lɛ aha Yehowa Tsulɔ-Maŋtsɛ, Yesu Kristo ni yeɔ maŋtsɛ amrɔ nɛɛ, mɔni kɛ e-ŋwɛi Tsɛ naa gbɛfaŋnɔ yɛ “je nɛŋ maŋtsɛyeli” ni je agbo fe Nebukadnezar, Babilon Maŋtsɛyeli lɛ mli lɛ. Moŋ lɛ, osɔfoi lɛ ekpɛlɛ adesai agbɛjianɔ toi lɛ anɔ ni amɛfiɔ Jeŋmaji Ekomefeemɔ lɛ sɛɛ shi jeee Nyɔŋmɔ nɔyeli lɛ.
20. Mɛɛ toigbalamɔ ni sa akɛhaa mɛi ni tseɔ atua amɛshiɔ nɔyeli lɛ, nohewɔ Iɛ te wɔbaafee tɛɛŋ wɔna naanɔ yiwalaheremɔ?
20 Yɛ jeŋmaji lɛ amli ŋmɛnɛ lɛ, agbeɔ mɛi ni tseɔ atua amɛshiɔ nɔyeli ni ato lɛ. Nakai nɔŋŋ atua ni aaatse ashi Yehowa kɛ e-Tsulɔ Maŋtsɛ lɛ kɛ hiɛkpatamɔ baaba jamɔi ahiɛnyiɛlɔi ni atsɛɔ amɛ “Kristofoi” ni wieɔ atuatsemɔ wiemɔ amɛshiɔ Yehowa’ lɛ anɔ. (Yer. 29:32) Akɛ hiɛkpatamɔ ni akɛba amale gbalɔ Shemaia kɛ eseshibii ni enaaa “ekpakpa” ni Yehowa to akɛ ebaafee eha emaŋbii nomii lɛ ateŋ heshibalɔi lɛ nɔ lɛ fee hiɛkpatamɔ ni baaba amɛnɔ lɛ he mfoniri. Nohewɔ lɛ ejeee wɔnitsumɔ akɛ wɔtsɔ adesai agbɛjianɔtoi anɔ ni wɔtsu wɔdiɛŋtsɛ wɔyiwalaheremɔ ni wɔɔna amrɔ nɔŋŋ lɛ he nii. Wɔ-naanɔ yiwalaheremɔ ni wɔbaana lɛ damɔ hekɛnɔfɔɔ ni wɔkɛ aaamɛ Yehowa yɛ tsuishiŋmɛɛ mli kɛha yiwalaheremɔ ni wɔɔna kɛtsɔ “tsulɔ” ko ni da fe Khoresh aloo Koresh, Pershianyo, ni ji Yesu Kristo nɔ lɛ nɔ.
21. Mɛɛ gbɛ Yehowa wie he yɛ Yeremia 29:12-14 ni kɔɔ nomii heshibalɔi ahe esani wɔkɔ ŋmɛnɛ?
21 Mɔdɛŋ ni wɔɔɔbɔ akɛ wɔye oyai kɛtsɔ Yehowa hiɛ lɛ kɛ yiwalaheremɔ ni wɔshweɔ waa lɛ baaa kɔkɔɔkɔ. Nɔ najiaŋ ni wɔɔɔtsɔ wɔsɛɛ wɔha Yehowa ni wɔhiɛ akpa enɔ lɛ, ebaahi akɛ wɔkase mɛi ni na Yehowa yiwalaheremɔ lɛ ni ekpale amɛ kɛtee amɛjaku shikpɔŋ nɔ yɛ lɛ diɛŋtsɛ ebe ni eto mli lɛ. Yehowa gba amɛgbɛ ni esa akɛ wɔkase lɛ eto yɛ wiemɔi nɛɛ amli akɛ: “Ni nyɛaaatsɛmi, ni nyɛaaatee nyɛyakpami fai, ni mabonyɛ toi; ni nyɛaaataomi, ni nyɛaaanami, kɛji nyɛtao misɛɛgbɛ kɛ nyɛtsui fɛɛ lɛ; ni maha nyɛnami.”—Yer. 29:12-14.
22. Yɛ Yehowa “duromɔ afi” Iɛ hewɔ lɛ, mɛɛ wɔsɛɛ hiɛnɔkamɔ he nii esani wɔtsu?
22 Wɔbɛŋkɛ “Yehowa duromɔ afi” lɛ naagbee bianɛ. (Yes. 61:2) Nohewɔ lɛ ewiemɔi nɛɛ kɔɔ wɔ he lolo yɛ wɔsɛɛnamɔ hewɔ akɛ: “Shi mi lɛ mile jwɛŋmɔi ni mijwɛŋɔ yɛ nyɛhe, Yehowa kɛɛ: hejɔlɛ jwɛŋmɔi ni, shi jeee efɔŋ nɔ ni, koni mikɛ naagbee ni nyɛhiɛ kã nɔ lɛ ahanyɛ!” (Yer. 29:11) Kɛji wɔba wɔhe shi wɔha Yehowa jeŋ fɛɛ maŋtsɛyeli kɛtsɔ e-Maŋtsɛ-Tsulɔ, Yesu Kristo nɔ ni naanɔ wala kɛ toiŋjɔlɛ, kpɔomɔ kɛ miishɛɛ yɔɔ mli lɛ, belɛ “naagbee” ni Yehowa eto eha wɔ lɛ ji nɔni hi fe fɛɛ kɛha wɔ. Enɛ ji hiɛnɔkamɔ ni Yehowa kɛfɔ̃ wɔhiɛ. Nyɛhaa wɔkɛ hiɛsɔɔ ni yeɔ emuu atsu he nii bɔni sa.a
[Shishigbɛ niŋmai]
a Ajie kɛje November 1, 1979 Blɔfo Buu-Mɔɔ lɛ mli.