ETSƐKO tsɔ ni Yesu kɛɛ akɛ “klɛŋklɛbii pii aaatsɔmɔ sɛɛkpelɔi, ni sɛɛkpelɔi aaatsɔmɔ klɛŋklɛŋbii.” Agbɛnɛ egba amɛ sane ko ni ekɛtsɔɔ wiemɔ nɛɛ mli. Eje shishi akɛ: “Ejaakɛ ŋwɛi maŋtsɛyeli lɛ tamɔ nuu shiatsɛ ko ni je kpo maŋkɛ mra eyabɔ nitsulɔi apaa kɛtee ewein trom mli.”

Shiatsɛ lɛ, loo wein trom lɛ nɔtsɛ ji Yehowa Nyɔŋmɔ, ni wein trom lɛ ji Israel maŋ lɛ. Nitsulɔi ni yɔɔ wein trom lɛ mli lɛ ji gbɔmɛi ni akɛ amɛ ba Mla kpaŋmɔ lɛ mli lɛ; amɛji nakai Yudafoi ni yɔɔ bɔfoi lɛ agbii lɛ amli lɛ pɔtɛɛ. Mɛi ni tsuɔ nii gbi muu fɛɛ lɛ pɛ akɛ amɛ fee nyɔmɔwoo he kpaŋmɔ lɛ. Nyɔmɔwoo lɛ ji denario kɛha gbi muu nitsumɔ. Akɛni ‘ŋmɛlɛtswaa ni ji etɛ’ lɛ ji leebi ŋmɛlɛ 9:00 hewɔ lɛ, mɛi ni atsɛ yɛ ŋmɛlɛtswai ni ji 3, 6, 9, kɛ 11 lɛ kɛ ŋmɛlɛtswai 9, 6, 3, kɛ 1 pɛ baatsu nii taakɛ ato naa lɛ.