Ani Okaiɔ?
Ani ona akɛ Buu-Mɔɔ srɔtoi ni je kpo nyɛsɛɛ nɛɛ he yɛ sɛɛnamɔ kɛha bo? Kɛji nakai ni lɛ, mɛni hewɔ okɛ sanebimɔi ni nyiɛ sɛɛ nɛɛ ekaaa ojwɛŋmɔ okwɛɛɛ:
◻ Mɛɛ sanebimɔi enyɔ eye ebua Kristofoi babaoo ni kɛ nitsumɔ he yiŋkpɛi kpeɔ koni amɛkpɛ amɛyiŋ? Klɛŋklɛŋ sanebimɔ ni he hiaa waa lɛ ji: Ani abuɔ heloonaa nitsumɔ lɛ diɛŋtsɛ fɔ́ yɛ Biblia lɛ mli? Sanebimɔ ni ji enyɔ lɛ ji: Ani nii nɛɛ tsumɔ baaha mɔ lɛ afee mɔ ni fataa he yɛ nifeemɔ ni abu lɛ fɔ́ ko mli?—4/15, baafa 28.
◻ ‘Aŋɔ adesai bɔɔnii lɛ awo yakayakanii ashishi’ yɛ mɛɛ gbɛ nɔ? (Romabii 8:20) ‘Aŋɔ wɔ awo yakayakanii ashishi’ yɛ nɔ ni wɔ klɛŋklɛŋ fɔlɔi, Adam kɛ Hawa fee lɛ hewɔ. ‘Jeee wɔ diɛŋtsɛ wɔsuɔmɔ naa’ loo nɔ ni ejɛ nihalamɔ ni wɔfee akɛ aŋkroaŋkro lɛ mli eba hewɔ ni nii ni tamɔ nakai ba. Eji wɔ gboshinii. Eyɛ mli akɛ agbɛnɛ lɛ, wɔ klɛŋklɛŋ fɔlɔi lɛ nyɛ amɛkɛ emuu ni ayeee, esha, kɛ gbele pɛ ha moŋ, shi Yehowa jɛ mɔbɔnalɛ mli eŋmɛ amɛ gbɛ koni amɛfɔ́ bii. Gbele tsɛ̃ŋe gbɔmɛi fɛɛ, ni no hewɔ lɛ, yɛ nakai shishinumɔ naa lɛ, Nyɔŋmɔ ‘ŋɔ bɔɔnii lɛ ewo yakayakanii ashishi.’—5/1, baafa 5.
◻ Mɛni hewɔ nilee yɔɔ mli akɛ aaakɛɛ akɛ, “nihii nii lɛ” baaba ebama “hé krɔŋkrɔŋ lɛ” wɔsɛɛ lɛ? (Mateo 24:15) Yɛ blema nɔkwɛmɔnɔ lɛ naa lɛ, akɛ ‘nihii nii ni ma hé krɔŋkrɔŋ lɛ’ to tutuamɔ ní Romabii lɛ kɛba, yɛ Tatsɛ Gallus hiɛnyiɛmɔ shishi yɛ afi 66 Ŋ.B. lɛ he. Ŋmɛnɛŋmɛnɛ beaŋ nɔ̃ ni tamɔ nakai tutuamɔ lɛ pɛpɛɛpɛ—ni ji ‘amanehulu kpeteŋkpele’ lɛ fɛmɔ lɛ—kã wɔhiɛ lolo. (Mateo 24:21) No hewɔ lɛ, eka shi faŋŋ akɛ kpaako dani “amaŋfɔ nihii nii lɛ,” baaba ebama hé krɔŋkrɔŋ lɛ.—5/1, baafai 16, 17.
◻ Tsɛ kɛ nyɛ ni tsuɔ nii lɛ baanyɛ aná be amɛha amɛbii lɛ yɛ mɛɛ gbɛ nɔ? Nyɛ ni nuɔ he akɛ etɔ lɛ beni ekpa nitsumɔ lɛ baanyɛ atsɛ ebii lɛ koni amɛfata ehe kɛhoo niyenii lɛ. Tsɛ ni yɔɔ nibii babaoo diɛŋtsɛ ni ebaafee yɛ otsii lɛ anaagbee mli lɛ baanyɛ ekɛ ebii atsu nitsumɔi nɛɛ ekomɛi ahe nii.—5/15, baafa 6.
◻ Mɛni esa akɛ mɛi ni ‘nyiɛɔ Yehowa gbɛ lɛ nɔ’ lɛ afee? (Yeremia 7:23) Yehowa gbɛ lɛ nɔ nyiɛmɔ biɔ anɔkwayeli—faishitswaa akɛ aaasɔmɔ lɛ pɛ. Ebiɔ he ni akɛfɔ̃ɔ mɔ nɔ—hemɔkɛyeli ni yeɔ emuu ákɛ anyɛɔ akɛ he fɔ̃ɔ Yehowa shiwoi ní baaba mli anɔkwale lɛ anɔ. Yehowa gbɛ lɛ nɔ nyiɛmɔ biɔ toiboo—emlai asɛɛnyiɛmɔ ni agbaaa afã kɛ etaomɔ nii ni nɔ kwɔlɔ lɛ amlihiɛmɔ. (Lala 11:7)—5/15, baafa 14.
◻ Mɛɛ gbɛnaa nii ejwɛ ni he hiaa, ‘gbɔmɛi ateŋ nikeenii’ baanyɛ atsu? (Efesobii 4:8) Amɛbaanyɛ amɛkɛ mlihilɛ ajaje wɔ, ní amɛkɛ suɔmɔ atswa wɔ amɛma shi, ní amɛha wɔkɛ asafo lɛ afee ekome, ní amɛkɛ ekãa abu wɔhe. (Efesobii 4:12-14)—6/1, baafa 14.
◻ Mɛni wɔbaanyɛ wɔkase kɛjɛ naanyobɔɔ ni Paulo kɛ mɛi aŋkroaŋkroi aaafee oha ní atsĩ amɛ tã yɛ Bɔfoi lɛ Asaji lɛ kɛ ewoji lɛ amli lɛ? Esa akɛ wɔkɛ Nyɔŋmɔ gbɛjianɔtoo lɛ, kɛ wɔ asafo lɛ atsu nii be fɛɛ be, kɛ wɔnanemɛi heyelilɔi hu. Amɛyelikɛbuamɔ, sɛɛfimɔ, kɛ miishɛjemɔ yɛ bei ni hi kɛ jaramɔ bei amli lɛ he miihia wɔ.—6/1, baafa 31.
◻ Mɛɛ gbɛ̀i etɛ ni atsɔɔ nɔ asusuɔ nii ahe abaanyɛ akɛtsu nii koni akɛye abua mɛi krokomɛi ni amɛsusu Bɔlɔ lɛ he? Bɔ ni nibii yaa nɔ pɛpɛɛpɛ ni afee fɛɛ jogbaŋŋ yɛ jeŋ muu fɛɛ lɛ, shikpɔŋ nɔ wala shishijee, kɛ bɔ ni adesa ansɔ lɛ yɔɔ srɔto kwraa ha ni anyɛŋ aje he ŋwane lɛ kɛ enyɛmɔi srɔtoi ni eyɔɔ lɛ.—6/15, baafa 18.
◻ Mɛni hewɔ Bɔlɔ lɛ diɛŋtsɛ gbɛi lɛ shishinumɔ ni aaaná he hiaa waa lɛ? Nyɔŋmɔ gbɛi lɛ shishi ji “Ehaa Ebaa Mli,” ni emaa nɔ mi akɛ etoɔ eyiŋ ni etsuɔ he nii hu. Kɛtsɔ egbɛi lɛ ni wɔɔle kɛ ekɛ nitsumɔ nɔ lɛ, wɔbaanyɛ wɔyoo jogbaŋŋ akɛ ehaa eshiwoi baa mli ni ehaa eyiŋtoi hu baa mli diɛŋtsɛ.—6/15, baafa 21.
◻ Gbekɛbii baanyɛ amɛkɛ amɛhe awo weku Biblia nikasemɔ mli yɛ mɛɛ gbɛ nɔ? Kɛ́ eeehi lɛ, too gbɛjianɔ ni gbekɛ fɛɛ gbekɛ aná lɛ diɛŋtsɛ e-Biblia kɛ wolo ni akaseɔ lɛ eko. Abaanyɛ aha gbekɛ bibioo atsɔɔ mfonirii ní jeɔ kpo yɛ nɔ ni akaseɔ lɛ mli lɛ mli, ni abaanyɛ atsɔ hiɛ akɛ nitsumɔ awo gbekɛ dɛŋ ní ekane ŋmalɛ ko. Abaanyɛ akɛ nitsumɔ awo mɔ ni eda fioo fe nakai lɛ dɛŋ ní etsɔɔ hegbɛi ni abaanyɛ akɛ nɔ ni akaseɔ lɛ atsu nii diɛŋtsɛ lɛ mli.—7/1, baafa 15.
◻ Mɛɛ otii komɛi weku baanyɛ ekɛfata hesaamɔ kɛha asafoŋ kpeei ahe? (1) Mɔ fɛɛ mɔ ni yɔɔ weku lɛ mli lɛ afee klalo akɛ ebaaha sane hetoo yɛ kpeei ashishi; (2) mɔ fɛɛ mɔ abɔ mɔdɛŋ ní eha sane hetoo yɛ lɛ diɛŋtsɛ ewiemɔ mli; (3) akɛ ŋmalɛi awo hetoohamɔ lɛ mli; kɛ (4) asusu nɔ ni akaseɔ lɛ he, kɛ yiŋtoo akɛ mɔ lɛ diɛŋtsɛ kɛbaatsu nii.—7/1, baafa 20.
◻ Mɛni ji nɔ ni kɛ gbalashihilɛ kpakpa baa? Bɔni afee ni agbele gbalashihilɛ kpakpa mli miishɛɛ ni ŋɔɔ waa lɛ naa koni nine ashɛ nɔ lɛ, nɔ̃ kome ni he hiaa waa ji sanegbaa kpakpa. Nɔ ni yɔɔ enɛ mli ji henumɔi kɛ yiŋsusumɔi ni akɛ mɛi krokomɛi gbaa he sane. Ni sanegbaa kpakpa tsɔɔ nibii ni tswaa mɔ emaa shi, ní haa mɔ tsui nyɔɔ emli, ní ji jeŋba kpakpa, ní sa yijiemɔ, kɛ nɔ ni shɛjeɔ mɔ mii. (Efesobii 4:29-32; Filipibii 4:8)—7/15, baafa 21.
◻ Mɛni ji ‘Yehowa gbɛ lɛ’? (Lala 25:8, 9, 12) Nakai gbɛ lɛ ji suɔmɔ gbɛ lɛ. Edamɔ feemɔ ní aaafee nɔ ni ja yɛ tɛi ni Nyɔŋmɔ efolɔ eshwie shi lɛ anaa lɛ nɔ. Biblia lɛ tsɛ suɔmɔ ní damɔ mla kɛ nitsumɔ nɔ nɛɛ akɛ “gbɛ ni hi fe fɛɛ.” (1 Korintobii 12:31)—8/1, baafa 12.