Yitso 23
Ha Yehowa Gbi lɛ Ahi Ojwɛŋmɔ Mli
1. (a) Beni okase yɛ klɛŋklɛŋ be mli akɛ kpɔmɔ kɛmiijɛ gbɛjianɔtoo momo nɛɛ mli haomɔi amli lɛ ebɛŋkɛ lɛ, te ofee onii yɛ he oha tɛŋŋ? (b) Mɛɛ sanebimɔi ni kɔɔ enɛ he esa akɛ wɔkɛ hiɛdɔɔ asusu he?
ŊWANEJEE ko bɛ he akɛ klɛŋklɛŋ nii ni okase kɛjɛ Biblia lɛ mli lɛ ateŋ ekome ji akɛ jiemɔ kɛmiijɛ ŋmɛnɛŋmɛnɛ nibii agbɛjianɔtoo nɛɛ mli nibii ni kumɔɔ mɔ tsui lɛ mli ebɛŋkɛ. (Luka 21:28) Obayoo akɛ Nyɔŋmɔ yiŋtoo ji ni shikpɔŋ lɛ fɛɛ atsɔ Paradeiso. Efɔŋfeemɔ, tawuu, hela kɛ gbele ehiŋ shi dɔŋŋ, ni suɔlɔi ni amɛgboi lɛ po baaba wala mli ekoŋŋ. Mɛɛ miishɛɛ gbɛkpamɔ ni taa mɔ tsuiŋ nɛ! Odaseyeli ni tsɔɔ akɛ Kristo eba ni anaaa lɛ ni eeye nɔ akɛ Maŋtsɛ, ni enɛ je shishi yɛ 1914 Ŋ.B. lɛ maa bɔ ni enɛɛmɛi fɛɛ ebɛŋkɛ eha lɛ nɔ mi, ni akɛ kɛjɛ nakai be lɛ mli kɛbaa nɛɛ wɔbote yiwalɛ je nɛɛ naagbee gbii lɛ amli. Ani nakai nilee lɛ efee tsakemɔi yɛ oshihilɛ mli? Ani oshihilɛ gbɛ yeɔ odase diɛŋtsɛ akɛ oheɔ oyeɔ akɛ “Yehowa gbi” lɛ ebɛŋkɛ?
2. (a) Mɛɛ be mli “Yehowa gbi” lɛ baaba? (b) Yɛ mɛɛ gbɛ nɔ anɔkwale ni eji akɛ Yehowa ejieee “no gbi lɛ kɛ no ŋmɛlɛtswaa” lɛ kpo lɛ efee nɔ ni sɛɛnamɔ yɔɔ he?
2 Ŋmalɛi lɛ tsɔɔ yɛ faŋŋ mli akɛ “yinɔ” ni na ba ni Kristo eba lɛ shishijee lɛ hu baana “Yehowa gbi wulu lɛ” ni ekɛ fɔbuu kojomɔ baaba mɛi fɛɛ ni feɔ nii ni ejaaa lɛ anɔ lɛ. (Mat. 24:34; Zef. 1:14–2:3) Nakai “yinɔ” lɛ eshɛ shɔŋŋ yɛ afii amli. Shi Biblia lɛ etsɔɔɔ be pɔtɛɛ ni Yesu Kristo baaba akɛ Yehowa blafo ni ete shi eshi Satan nibii agbɛjianɔtoo ni yɔɔ shikpɔŋ nɔ lɛ. Yesu kɛɛ, “Shi no gbi lɛ kɛ no ŋmɛlɛtswaa lɛ mɔ ko mɔ ko leee, ŋwɛibɔfoi lɛ hu leee, ni Bi lɛ tete leee, ja Tsɛ lɛ kome kɛkɛ.” (Mar. 13:32, NW) Enɛ efee nɔ ko ni sɛɛnamɔ yɔɔ he waa. Yɛ mɛɛ gbɛ nɔ? Eye ebua ni eha ana nɔ ni yɔɔ gbɔmɛi atsuii amli. Kɛ mɛi komɛi sumɔɔɔ Yehowa diɛŋtsɛ lɛ, amɛtsiɔ ‘egbi’ lɛ kɛyaa sɛɛ yɛ amɛjwɛŋmɔi amli ni amɛtsɔɔ amɛhe kɛyaa heloo gbɛfaŋ nibii ni amɛtsui shweɔ lɛ asɛɛdii nɔ. Yehowa kpɛlɛɔ etsuji ni sumɔɔ lɛ diɛŋtsɛ ni jieɔ enɛ kpo kɛtsɔɔ tsui muu fɛɛ mli ni amɛjɛɔ amɛsɔmɔɔ lɛ, ni be mli ni nibii agbɛjianɔtoo nɛɛ baaba enaagbee lɛ kɔɔɔ he eko lɛ pɛ nɔ. Nyɔŋmɔ kɛ e-Bi lɛ ekpɛlɛɛɛ mɛi ni yɔɔ kulɔkulɔ loo amɛhiɛ jwɛŋmɔi enyɔnyɔ lɛ anɔ.—Kpoj. 3:16; Lala 37:4; 1 Yoh. 5:3.
3. Mɛni Yesu kɛɛ, akɛ kɔkɔbɔɔ kɛha wɔ, yɛ nɛkɛ sane nɛɛ he?
3 Ákɛ kɔkɔbɔɔ wiemɔ kɛha mɛi ni sumɔɔ Yehowa lɛ, Yesu kɛɛ, “Nyɛkwɛa jogbaŋŋ, nyɛshia kpe ni nyɛsɔlea; ejaakɛ nyɛleee beyinɔ ni be ni ato lɛ shɛɔ.” (Mar. 13:33-37) Ewoɔ wɔ hewalɛ koni wɔkaŋmɛ gbɛ ni niyeli kɛ ninumɔ loo “shihilɛ mli naagbai” miihe wɔjwɛŋmɔ babaoo ni wɔhiɛ je bɔ ni be lɛ he hiaa waa lɛ nɔ.—Luka 21:34-36; Mat. 24:37-42.
4. Taakɛ Petro tsɔɔ mli lɛ, “Yehowa gbi” lɛ kɛ mɛni baaba?
4 Yɛ sɛɛ mli lɛ, bɔfo Petro wo mɛi fɛɛ ni yɔɔ anɔkwa hemɔkɛyeli lɛ ŋaa ni ‘amɛha ba ni Yehowa gbi lɛ eba lɛ ahi amɛjwɛŋmɔ mli diɛŋtsɛ, nɔ mli ni ŋwɛi baasere kɛtsɔ la mli, ni akɛni nibii lɛ fɛɛ edɔ hewɔ lɛ, fɛɛ baasere lɛ.’ Bɔ ni “Yehowa gbi” lɛ ebɛŋkɛ lɛ ji anɔkwa sane ni wɔteŋ mɔ ko nyɛŋ aba lɛ shi. Etsɛŋ ni akɛ “ŋwɛi hee kɛ shikpɔŋ hee” ni Nyɔŋmɔ baafee lɛ baato nɔyelii ni anaa ni tamɔ ŋwɛi kɛ adesa yiwalɛ gbɛjianɔtoo lɛ najiaŋ, ni “nibii” fɛɛ ni fata ŋmɛnɛŋmɛnɛ je lɛŋ gbɛjianɔtoo nɛɛ he—eheyeli su, ejeŋba shara kɛ heloo gbɛfaŋ nibii asɛɛdii shihilɛ—lɛ fɛɛ baaba amɛnaagbee yɛ “Yehowa gbi” lɛ hiɛkpatamɔ ni edɔ tamɔ la lɛ mli. (2 Pet. 3:10-13) Ehe miihia ni wɔha wɔhiɛ ahi wɔhe nɔ, ni wɔyoo akɛ nɛkɛ nibii ni baahoso je lɛ baanyɛ aje shishi be fɛɛ be.—Mat. 24:44.
HA OHIƐ AHI NIBII NI HAA OKADI LƐ BAA MLI LƐ ANƆ
5. (a) Yesu hetoo ni ekɛha sanebimɔ ni aŋma afɔ shi yɛ Mateo 24:3 lɛ kɔɔ Yudafoi anibii agbɛjianɔtoo lɛ naagbee he kɛyashi nɛgbɛ? (b) Ehetoo lɛ mli te nɔ ni gbalaa jwɛŋmɔ kɛyaa nibii ni je shishi kɛjɛ 1914 Ŋ.B. kɛbaa lɛ nɔ?
5 Titri, yɛ be ni wɔyɔɔ mli nɛɛ hewɔ lɛ, esa akɛ wɔle okadi lɛ mli nibii fɛɛ ni haa wɔyoɔ “naagbee gbii” nɛɛ aloo “nibii agbɛjianɔtoo lɛ naagbee” lɛ jogbaŋŋ. Bɔni afee ni wɔnu okadi lɛ shishi jogbaŋŋ lɛ, esa akɛ wɔha ahi wɔjwɛŋmɔ mli akɛ beni Yesu ha ekaselɔi lɛ asanebimɔ ni yɔɔ Mateo 24:3 lɛ hetoo lɛ, emli nibii ni etsi ta lɛ ekomɛi kɔɔ Yudafoi agbɛjianɔtoo ni hi shi yɛ klɛŋklɛŋ afii oha lɛ mli lɛ he, shi nɔ ni ekɔɔ he titri lɛ tekeɔ nakai gbɛjianɔtoo lɛ. Nɔ ni etsɔɔ mli yɛ kuku 4 kɛyashi 22 lɛ ba mli yɛ gbɛ bibioo nɔ yɛ afi 33 kɛyashi 70 Ŋ.B. Shi gbalɛ lɛ naa emlibaa ni da yɛ wɔgbii nɛɛ amli ni ehaa aleɔ be ni je shishi kɛjɛ 1914 Ŋ.B. lɛ akɛ Kristo “ba ni eba lɛ kɛ nibii agbɛjianɔtoo lɛ naagbee.” (Agbɛnɛ Marko 13:5-20 kɛ Luka 21:8-24 hu) Mateo 24:23-28 gbaa wɔ nɔ ni baaba mli kɛjɛ afi 70 Ŋ.B. kɛbashi beni Kristo eba nɛɛ. (Agbɛnɛ Marko 13:21-23 hu) Yɛ nibii ni atsɔɔ mli kɛjɛ Mateo 24:29 kɛbashi yitso 25 naagbee lɛ he lɛ, enɛɛmɛi fɛɛ tsɔɔ be ni je shishi kɛjɛ 1914 Ŋ.B.—Agbɛnɛ hu Marko 13:24-37 kɛ Luka 21:25-36.
6. (a) Mɛni hewɔ esa akɛ wɔ diɛŋtsɛ lɛ wɔhiɛ ahi wɔhe nɔ yɛ nibii ni baa amrɔ nɛɛ ni haa “okadi” lɛ baa mli lɛ ahe lɛ? (b) Ha sanebimɔi ni yɔɔ kuku nɛɛ naagbee lɛ hetoo ni okɛtsɔɔ bɔ ni “okadi” lɛ eba mli eha kɛjɛ 1914.
6 Ehe miihia ni wɔ diɛŋtsɛ lɛ wɔyoo nibii ni baa amrɔ nɛɛ ni haa “okadi” lɛ baa mli lɛ. Nɛkɛ nibii nɛɛ ni wɔkɛaato Biblia mli gbalɛ he lɛ baaye abua wɔ ni wɔha Yehowa gbi lɛ ‘ahi wɔjwɛŋmɔ mli.’ Agbɛnɛ ebaanyɛ eye ebua wɔ ni wɔnyɛ wɔtsɔ mɛi ayiŋ yɛ be mli ni wɔbɔɔ mɛi akɔkɔ yɛ bɔ ni “wɔ-Nyɔŋmɔ lɛ oweletɔɔ gbi” lɛ ebɛŋkɛ eha lɛ he lɛ. (Yes. 61:1, 2) Yɛ be mli ni enɛɛmɛi yɔɔ ojwɛŋmɔ mli lɛ, kuu osɛɛ osusu “okadi” lɛ mli nibii ni nyiɛ sɛɛ nɛɛ ahe.
Yɛ mɛɛ gbɛ nɔ ‘maŋ aaate shi awo maŋ ni maŋtsɛyeli aaate shi awo maŋtsɛyeli,’ ni agba afɔ shi lɛ eba mli yɛ gbɛ ni ekaaa nɔ kɛjɛ 1914 Ŋ.B. kɛbaa? Mɛni eba po yɛ nyɛsɛɛ nyɔji nɛɛ amli ni kɛ nɔ ko fataa emlibaa lɛ he?
Hɔmɔ eba shikpɔŋ lɛ nɔ kɛyashɛ nɛgbɛ, yɛ afii ohai 20 nɛɛ mli jeŋ nilee lɛ fɛɛ sɛɛ?
Ani sɔrɔto ko eba bɔ ni shikpɔŋhosomɔi baa hei sɔrɔtoi babaoo lɛ mli kɛjɛ 1914 Ŋ.B. kɛbaa nɛɛ?
Mɛɛ hela gbe gbɔmɛi babaoo fe jeŋ ta lɛ yɛ 1918 mli? Yɛ tsofafeemɔ mli nilee lɛ fɛɛ sɛɛ lɛ, mɛɛ helai ji nɔ ni miitsɛŋe mɛi lolo kɛmiiya?
Mɛɛ odaseyeli yɔɔ ni onaa ni tsɔɔ akɛ nɔ miinyɔnyɔɔ gbɔmɛi anɔ yɛ gbeyeishemɔ hewɔ, taakɛ agba afɔ shi yɛ Luka 21:26 lɛ?
Mɛni haa oheɔ oyeɔ akɛ shihilɛi ni atsɔɔ mli yɛ 2 Timoteo 3:1-5 lɛ jeee bɔ ni shihilɛ ehi shi yɛ be fɛɛ mli, shi moŋ amɛmiiya hiɛ kɛmiishɛ he ni mɔ he jɔ̃ɔ lɛ yɛ be mli ni wɔbɛŋkɛɔ naagbee gbii lɛ?
GBƆMƐI AMLIGBALAMƆ
7. (a) Mɛɛ sane kroko, ni atsɔɔ mli yɛ Mateo 13:36-43 Yesu kɛto nibii agbɛjianɔtoo lɛ naagbee lɛ he? (b) Mɛni nakai abɛbua lɛ tsɔɔ?
7 Nibii krokomɛi ni sa kadimɔ yɛ ni Yesu tsi ta waa kɛfata nibii agbɛjianɔtoo lɛ naagbee lɛ he. Enɛɛmɛi ateŋ ekome ji “maŋtsɛyeli lɛŋ bii lɛ” ni aaajie amɛ kɛaajɛ “mɔ fɔŋ lɛ bii lɛ” ateŋ lɛ. Yesu wie enɛ he yɛ ebɛbua ko ni kɔɔ abɔɔ ko ni adu ŋmaa yɛ mli ni henyɛlɔ ko hu yadu jwɛi ewo mli lɛ he. Yɛ abɛbua lɛ mli lɛ, “ŋmaa” lɛ damɔ shi kɛha anɔkwa Kristofoi ni afɔ amɛ mu lɛ. “Jwɛi” lɛ damɔ shi kɛha mɛi ni kwaa amɛfeɔ amɛhe Kristofoi lɛ. Yɛ nibii agbɛjianɔtoo lɛ naagbee mli lɛ, “jwɛi” lɛ—mɛi ni kwaa amɛfeɔ amɛhe Kristofoi shi amɛtsɔɔ faŋŋ akɛ amɛji “mɔ fɔŋ lɛ bii” diɛŋtsɛ akɛni amɛkɛ amɛhe kpɛtɛɔ jeŋ ni Abonsam ji enɔyelɔ lɛ he kpɛŋŋ lɛ—abuaa amɛnaa kɛjɛɔ “[Nyɔŋmɔ] maŋtsɛyeli lɛŋ bii lɛ” ateŋ ni akadiɔ amɛ kɛhaa hiɛkpatamɔ. (Mat. 13:36-43) Ani enɛ eba mli diɛŋtsɛ?
8. (a) Yɛ Jeŋ Ta I sɛɛ lɛ, mɛɛ mligbalamɔ kpele ni kɔɔ mɛi fɛɛ ni kɛɔ akɛ amɛji Kristofoi lɛ ahe tee nɔ? (b) Yɛ mɛɛ gbɛ nɔ anɔkwa Kristofoi ni afɔ amɛ mu lɛ ye odase akɛ lɛlɛŋ amɛji “maŋtsɛyeli lɛŋ bii” lɛ?
8 Yɛ anɔkwale mli lɛ, yɛ Jeŋ Ta I sɛɛ pɛ kɛkɛ ni mligbalamɔ nitsumɔ ko tee nɔ yɛ gbɔmɛi fɛɛ ni kɛɔ akɛ amɛji Kristofoi lɛ ateŋ ni akɛ amɛ wo kui enyɔ mli: (1) Kristendom osɔfoi lɛ kɛ amɛsɛɛnyiɛlɔi, ni fi Jeŋmaji Akpaŋmɔ lɛ (amrɔ nɛɛ Jeŋmaji Ekomefeemɔ lɛ) sɛɛ waa, yɛ be mli ni amɛkɛ amɛhe kpɛtɛɔ maŋhedɔɔ he lolo lɛ. (2) Anɔkwa Kristofoi fioo ko ni afɔ amɛ mu lɛ ni hi shi yɛ nakai ta be lɛ sɛɛ ni kɛ amɛsɛɛfimɔ fɛɛ ha Nyɔŋmɔ Mesia Maŋtsɛyeli lɛ. Akɛni klɛŋklɛŋ kuu lɛ kɛ amɛsɛɛfimɔ fɛɛ ha jeŋ nɔyelii lɛ akɛ nɔ ni abaatsɔ nɔ akɛ toiŋjɔlɛ kɛ shweshweeshwe shihilɛ aba hewɔ lɛ, amɛfee lɛ faŋŋ akɛ amɛjeee anɔkwa Kristofoi. (Yoh. 17:16) Nɔ ni tamɔɔɔ enɛ lɛ, Yehowa tsuji ha ayoo Jeŋmaji Akpaŋmɔ lɛ yɛ gbɛ ni ja nɔ akɛ ŋmɛnɛŋmɛnɛ beaŋ “amaŋfɔ nihii nii” ni awie he yɛ Mateo 24:15 lɛ. Akɛni amɛjie amɛhe kpo akɛ “[Nyɔŋmɔ] maŋtsɛyeli lɛŋ bii” diɛŋtsɛ hewɔ lɛ, amɛje “maŋtsɛyeli lɛ he sanekpakpa” lɛ shiɛmɔ “ni akɛye jeŋmaji lɛ fɛɛ odase” lɛ shishi. (Mat. 24:14) Mɛni jɛ mli ba?
9. Mɛni ji klɛŋklɛŋ nii ni jɛ nɛkɛ Maŋtsɛyeli shiɛmɔ nitsumɔ nɛɛ mli ba?
9 Klɛŋklɛŋ lɛ, abua “mɛi ni ahala” ni ji Kristofoi ni akɛ mumɔ efɔ amɛ mu lɛ ateŋ shwɛɛnii lɛ anaa. Eyɛ mli akɛ amɛgbɛ amɛshwa jeŋmaji lɛ fɛɛ ateŋ, tamɔ nɔ ni amɛyɛ “kɔɔyɔi ejwɛ lɛ nɔ” moŋ, shi atsɔ ŋwɛibɔfoi agbɛtsɔɔmɔ nɔ abua amɛnaa awo gbɛjianɔtoo ko ni efee ekome lɛ mli.—Mat. 24:31.
10. (a) Mligbala nitsumɔ kroko etee nɔ yɛ mɛɛ gbɛ nɔ, ni enɛ kɛ mɛɛ gbalɛ kpaa gbee? (b) Mɛni ji nɔ ni nɛkɛ gbalɛi nɛɛ amlibaa tsɔɔ?
10 Kɛkɛ ni, taakɛ Yesu gba efɔ shi lɛ, eje shishi akɛ eeegbala jeŋmaji lɛ fɛɛ amlibii lɛ ateŋ, “taakɛ bɔ ni tookwɛlɔ gbalaa gwantɛŋi kɛ abotiai amli lɛ.” Nɛkɛ nitsumɔ nɛɛ, ni Kristo jɛɔ eŋwɛi maŋtsɛsɛi lɛ nɔ ekudɔɔ lɛ miiya nɔ kɛbashi bianɛ, ni enɛ saa bo diɛŋtsɛ ohe. Adesai ateŋ mɛi ni fa kpooɔ Nyɔŋmɔ Maŋtsɛyeli lɛ kɛ ‘ebii’ ni akɛ mumɔ efɔ amɛ mu lɛ, no hewɔ lɛ abaabu amɛ akɛ mɛi ni sa “naanɔ hiɛkpatamɔ” yɛ gbele mli. Shi, Nuŋtsɔ lɛ fɔ̃ɔ mɛi krokomɛi anine ni amɛbana e-Maŋtsɛyeli lɛ nɔyeli he ni yɔɔ shikpɔŋ nɔ lɛ kɛ naanɔ wala mli hegbɛ. Mɛi ni tamɔ gwantɛŋi nɛɛ kɛ amɛhe bɔɔ “maŋtsɛyeli lɛŋ bii” ni afɔ amɛ mu lɛ ahe, eyɛ mli akɛ awaa mɛnɛɛmɛi ayi waa diɛŋtsɛ. (Mat. 25:31-46) Amɛkɛ anɔkwayeli yeɔ buaa amɛ koni amɛjaje Maŋtsɛyeli lɛ he sane ni he hiaa lɛ amɛtsɔɔ. Asafo babaoo ko ni amɛyifalɛ shɛɔ akpekpei abɔ kɛ amɛhe ewo nɛkɛ nitsumɔ nɛɛ mli. Aanu Maŋtsɛyeli lɛ he sane yɛ shikpɔŋ lɛ naagbee hei lɛ fɛɛ. Mɛni ji nɔ ni nɛkɛ nibii nɛɛ tsɔɔ? Akɛ “naagbee gbii” lɛ anaagbee kwraa lɛ mli wɔyɔɔ lɛ, ni akɛ “Yehowa gbi” lɛ ebɛŋkɛ kpaakpa.
MƐNI KA WƆHIƐ?
11. Ani shiɛmɔ nitsumɔ babaoo yɛ ni abaatsu dani “Yehowa gbi” lɛ aba?
11 Ani gbalɛi komɛi yɛ lolo ni baaba mli dani Yehowa gbi wulu ni he yɔɔ gbeyei lɛ aje shishi? Hɛɛ! Gbɔmɛi ni agbalaa amɛmli yɛ Maŋtsɛyeli lɛ he sane lɛ he lɛ bako naagbee. Hei komɛi yɛ ni tsutsu lɛ amɛte shi amɛwo anɔkwale lɛ waa afii pii, shi amrɔ nɛɛ kaselɔi heei babaoo miifa kpo kɛmiijɛ jɛmɛ. Ni yɛ he ni gbɔmɛi kpooɔ sanekpakpa lɛ yɛ lɛ po lɛ, Yehowa jalɛ kojomɔ kɛ mɔbɔnalɛ jeɔ kpo kɛtsɔɔ odase ni wɔyeɔ lɛ nɔ. No hewɔ lɛ, yaa nɔ yɛ nitsumɔ nɛɛ mli! Yesu maa nɔ mi ehaa wɔ akɛ, kɛ atsu agbe naa lɛ, “naagbee lɛ baaba.”—Mat. 24:14.
12. (a) Taakɛ atsɔɔ yɛ 1 Tesalonikabii 5:2, 3 lɛ, mɛɛ nifeemɔ ko ni sa kadimɔ waa yɔɔ ni baaba? (b) Mɛni ebaatsɔɔ kɛha wɔ?
12 Biblia mli gbalɛ kroko ni sa kadimɔ waa gba akɛ: “Be ni amɛaakɛɛ akɛ: ‘Hejɔlɛ yɛ ni wɔyɛ shweshweeshwe!’ lɛ, no mli nɔŋŋ hiɛkpatamɔ aaabatua amɛ trukaa, tamɔ kɔɔmɔ tuaa yoo ni musu eda lɛ, ni amɛjeŋ mli kɔkɔɔkɔ.” (1 Tes. 5:2, 3) Bɔ ni nakai ‘hejɔlɛ kɛ shweshweeshwe’ jajemɔ lɛ aaaba aha lɛ, be baatsɔɔ. Shi eka shi faŋŋ akɛ etsɔɔɔ akɛ je lɛŋ hiɛnyiɛlɔi lɛ ena tsabaa diɛŋtsɛ kɛha adesai anaagbai. Mɛi ni haa Yehowa gbi lɛ ‘hiɔ amɛjwɛŋmɔ mli’ lɛ efeŋ mɛi ni nakai sanejajemɔ lɛ baalaka amɛ. Amɛle akɛ, yɛ no sɛɛ nɔŋŋ lɛ, nɔ ni baaba ji “hiɛkpatamɔ [ni] aaabatua amɛ trukaa.”
13. Mɛɛ nibii baanyiɛ “hejɔlɛ yɛ ni wɔyɛ shweshweeshwe” ni abaajaje lɛ sɛɛ aba amrɔ nɔŋŋ, ni yɛ mɛɛ gbɛjianɔtoo naa?
13 Klɛŋklɛŋ lɛ, taakɛ Ŋmalɛi lɛ tsɔɔ lɛ, je lɛŋ maŋkwramɔŋ nɔyelɔi lɛ fɛɛ baate shi awo Babilon Kpeteŋkpele lɛ, jeŋ apasa jamɔ maŋtsɛyeli lɛ, ni amɛaakpata ehiɛ. (Kpoj. 17:15, 16) Eji nɔ ko ni sa kadimɔ diɛŋtsɛ akɛ hetsɛ aloo nyɛɛ sui ni ayɔɔ kɛha Kristendom jamɔi lɛ titri lɛ miije kpo bianɛ. Nɔyelii ni sumɔɔɔ jamɔ gbɛjianɔtoi lɛ yɛ hewalɛ waa diɛŋtsɛ yɛ Jeŋmaji Ekomefeemɔ gbɛjianɔtoo lɛ mli, ni gbɔmɛi babaoo ni yɔɔ maji ni sumɔɔ Nyɔŋmɔ jamɔ lɛ amli, ni tsutsu lɛ amɛyɔɔ amɛblema jamɔi amli lɛ miishi amɛblematsɛmɛi ajamɔ lɛ. Mɛni ji nɔ ni enɛɛmɛi fɛɛ tsɔɔ? Akɛ apasa jamɔi fɛɛ ni aaafee amɛ amaŋfɔ lɛ ebɛŋkɛ. Yɛ no sɛɛ lɛ, kɛ jeŋmaji lɛ bua amɛhewalɛ fɛɛ naa ni amɛkɛ atuatsemɔ te shi wo mɛi ni fiɔ Yehowa jeŋ muu fɛɛ maŋtsɛyeli lɛ sɛɛ lɛ, abaafɔse ŋwɛi mlifu ashwie maŋkwramɔŋ nɔyelii lɛ kɛ amɛsɛɛfilɔi lɛ anɔ, ni nɔ ni baajɛ mli aba ji amɛ fɛɛ amɛhiɛkpatamɔ. Yɛ naagbee lɛ, abaashɛrɛ Satan diɛŋtsɛ kɛ edaimonioi lɛ awo bu kwɔŋkwɔŋ lɛ mli ni abaatsi amɛnaa kwraa ni amɛnaŋ adesai anɔ hewalɛ dɔŋŋ. Enɛ baafee “Yehowa gbi” lɛ diɛŋtsɛ, gbi nɔ ni abaawo egbɛi lɛ nɔ gojoo lɛ.—Ezek. 38:18, 22, 23; Kpoj. 19:11–20:3.
14. Mɛni hewɔ jwɛŋmɔ bɛ mli akɛ wɔɔsusu akɛ Yehowa gbi lɛ yɛ shɔŋŋ lɛ?
14 Ebaaba yɛ ebe naa pɛpɛɛpɛ, yɛ be ni Nyɔŋmɔ eto lɛ naa. Ekpeŋ sɛɛ. (Hab. 2:3) Kaimɔ akɛ, Yerusalem hiɛkpatamɔ yɛ afi 70 Ŋ.B. lɛ ba oya, beni Yudafoi lɛ kpaaa gbɛ, yɛ be mli ni amɛsusu akɛ oshara lɛ eho lɛ. Ni blema Babilon hu? Ehe wa, ni eyɛ hekɛnɔfɔɔ, ni akɛ gbogboi ni wa ebɔle ehe. Shi egbee shi yɛ gbɛkɛ kome pɛ mli. Nakai nɔŋŋ hu “hiɛkpatamɔ [ni baa] trukaa” baaba ŋmɛnɛŋmɛnɛ yiwalɛ nibii agbɛjianɔtoo lɛ nɔ. Kɛ eba lɛ, eba akɛ eeebanina wɔ akɛ wɔfee ekome yɛ anɔkwa jamɔ mli, ni wɔha Yehowa gbi lɛ ‘ehi wɔjwɛŋmɔ mli.’
Sanegbaa Ni Akɛtiɔ Mli
● Mɛni hewɔ ehe hiaa waa akɛ wɔɔha Yehowa gbi lɛ ‘ahi wɔjwɛŋmɔ mli’ lɛ? Te wɔɔfee tɛŋŋ wɔfee nakai?
● Gbɔmɛi amli ni agbalaa ni yaa nɔ lɛ saa wɔ diɛŋtsɛ wɔhe yɛ mɛɛ gbɛ nɔ?
● Mɛni ka wɔhiɛ lolo dani Yehowa gbi lɛ aje shishi? No hewɔ lɛ mɛni ji nɔ ni esa akɛ wɔ diɛŋtsɛ lɛ wɔfee?