Ani Nyɔŋmɔ Miishashao Shi Yɛ Ekojomɔ Mli?

BO LƐ susumɔ he akɛ oomɛ gbɔ ko ni baajɛ maŋ kroko nɔ abasara bo, mɔ ni etsɔɔ bo gbi ni ebaashɛ shi lɛ, shi etsɔɔɔ bo nɔ̃ ŋmlɛtswaa lɛ. Beni be hoɔ, ni ebaaa lolo lɛ, ojeɔ shishi osusuɔ akɛ ani nɔ ko etsi enaa lo. Ani ŋmɛnɛ ji gbi ni ekɛɛ ebaaba lɛ lɛlɛŋ? Ani shishinumɔ yabaaa yɛ he ko? Fiofio lɛ, nɔ ni etamɔ tsuishitoo ni bɛ kɛjɛ shishijee lɛ batsɔɔ nɔ ni fiteɔ mɔ ko gbɛjianɔtoo, nɔ ni atsɛɔ lɛ yiŋkɔshikɔshifeemɔ.

Enɛ baanyɛ atsɔɔ bɔ ni mɛi komɛi nuɔ shiwoo ni kɔɔ Nyɔŋmɔ be ni baaba koni ebatsu fɔbuu kojomɔ he nii eshi efɔŋfeelɔi ahe lɛ he amɛhaa. Yɛ fɛɛ sɛɛ lɛ, ejalɔi lɛ emɛ aahu kɛha enɛ feemɔ. Okɛ Maŋtsɛ David enɔkwafo lɛ afee nɔkwɛmɔ nɔ. Ewie yɛ nɔ ni fe afii 3,000 ni eho nɛ akɛ: “Yehowa diɛŋtsɛ ni yɔɔ oninejurɔ nɔ lɛ baatswia maŋtsɛmɛi anii yɛ emlifu gbi lɛ nɔ. Ebaatsu kojomɔ he nii eshi jeŋmaji lɛ.” No hewɔ lɛ ani abaanyɛ ashwa mɔ ko ŋmɛnɛ akɛ mɔ lɛ miisusu, Mɛɛ be po lɛ he?​—Lala 110:​5, 6, NW.

Akɛni Biblia kaselɔi ni yɔɔ ekãa lɛ kɛ shihilɛ ni yɔɔ je lɛ mli lɛ eto Biblia mli gbalɛ he hewɔ lɛ, amɛna akɛ Nyɔŋmɔ kojomɔ gbi lɛ ebɛŋkɛ kwraa agbɛnɛ. Shi ani gbɔmɛi pii nuuu he nakai nɔŋŋ yɛ tsutsu, ni amɛyana yɛ naagbee lɛ akɛ nɔ ni amɛsusuɔ lɛ ejaaa? Ani gbɛ ni ji anɔkwale ko yɛ ni abaanyɛ atsɔ nɔ ale be pɔtɛɛ mli ni Nyɔŋmɔ baatsu ekojomɔ he nii yɛ?

Yɛ “Nyɛŋmɔ Be Ni Ato” Lɛ Mli

Yesu tsɔɔ akɛ kojomɔ baaje shishi yɛ be pɔtɛɛ ko mli. Shi beni ebɔɔ esɛɛnyiɛlɔi lɛ kɔkɔ lɛ, ekɛɛ: “Nyɛshia kpe ejaakɛ nyɛleee beyinɔ ni be ni ato lɛ shɛɔ.”​—Marko 13:​33, NW.

Habakuk ni Nyɔŋmɔ tsɔ hiɛ ekɛ nitsumɔ wo edɛŋ aaafee afii ohai ekpaa koni eŋma yɛ ŋwɛi fɔbuu kojomɔ he lɛ hu kɛɛ akɛ ebaaba mli yɛ “be ni ato lɛ mli.” Ni ewo shi yɛ Nyɔŋmɔ gbɛtsɔɔmɔ naa ákɛ kɔkɔbɔɔ ni ekɛshiɔ tsuishitoo ni bɛ kɛ yiŋkɔshikɔshifeemɔ akɛ: “Ni emaleŋ; kɛ eshashao shi hu jiŋŋ, mɛɛ lɛ kɛ̃; ejaakɛ ebaaba lɛlɛŋ, ekpeŋ sɛɛ!”​—Habakuk 2:​2, 3.

Shi kɛji akɛ Nyɔŋmɔ kojomɔ yɛ kɛha “be ni ato lɛ,” ni “ekpeŋ sɛɛ” hu lɛ, mɛni hewɔ Habakuk kɛɔ akɛ “kɛ eshashao shi hu jiŋŋ” lɛ? Eka shi faŋŋ akɛ bɔni afee ni ekɛtsɔɔ akɛ Nyɔŋmɔ tsuji lɛ ateŋ mɛi komɛi baakpa ebaa gbɛ mra tsɔ fe be ni ebaaba diɛŋtsɛ lɛ. Mɛni hewɔ? Ejaakɛ amɛleŋ be pɔtɛɛ ni ebaaba lɛ.

Beni Yesu yɔɔ shikpɔŋ nɔ lɛ no mli lɛ eleee be pɔtɛɛ lɛ, ejaakɛ ekɛɛ akɛ: “Shi no gbi lɛ sɛ no ŋmlɛtswaa lɛ mɔ ko leee; ŋwɛibɔfoi lɛ he leee, ni bi lɛ tete leee, ja tsɛlɛ kome kɛkɛ.” (Marko 13:32) Shi nɔ ni ele ji be kpalaŋŋ ko ni kojomɔ baaya nɔ yɛ mli lɛ. No hewɔ lɛ yɛ nɔ ni ekaselɔi lɛ bi hewɔ lɛ, eha amɛ okadi ko ni baaye abua amɛ ni amɛyoo nɛkɛ be nɛɛ sɛ eje shishi pɛ. Yesu kɛɛ akɛ eklɛŋklɛŋ odaseyeli lɛ baatamɔ “kɔɔmɔi abɔimɔ.” Agbɛnɛ yoo ni kɔmɔ̃ɔ kɛ fɔmɔ lɛ leee be pɔtɛɛ mli ni ebaafɔ ebi lɛ. Shi ele akɛ efɔmɔ ebɛŋkɛ.​—Mateo 24:​3-8, Today’s English Version.

“Nɛkɛ Yinɔ Nɛɛ Hoŋ Eyaŋ Kɔkɔɔkɔ”

Kɛfata le ni Yesu lè be kpalaŋŋ ni ŋwɛi kojomɔ baaba lɛ he lɛ, enyɛ efo husu ewo esɛɛkɛlɛ lɛ he. Yɛ be mli ni ekɛ agbamitso buɔ abɛ lɛ, ekɛɛ: “Beni eniji lɛ efrɔke ni ebɔi baai fumɔ lɛ, nyɛle akɛ latsaa be lɛ eshɛ eta. Nakai nɔŋŋ nyɛ hu beni nyɛaana nii nɛɛ fɛɛ lɛ, nyɛlea akɛ eshɛ agboi lɛ anaa eta. Lɛlɛŋ, miikɛɛnyɛ akɛ: Nɛkɛ yinɔ nɛɛ ho eyaŋ kɔkɔɔkɔ, ja nii nɛɛ fɛɛ eba mli da.”​—Mateo 24:​32-34, NW.

No hewɔ lɛ abaatsu kojomɔ he nii yɛ mɛi ni naa nakai be kpalaŋŋ ni Yesu gba fɔ shi lɛ mli klɛŋklɛŋ odaseyeli lɛ awala be mli. Nɛkɛ be kpalaŋŋ nɛɛ shishijee baakadi Satan je ni Nyɔŋmɔ Maŋtsɛyeli ni áto ama shi ehee yɛ ŋwɛi lɛ kɛ fɔbuu kojomɔ baaba enɔ lɛ naagbee lɛ shishijee. Biblia be he akɔntaabuu kɛ Biblia gbalɛ mlibaa kɛ odaseyelii babaoo haa ni tsɔɔ akɛ nɛkɛ be kpalaŋŋ nɛɛ je shishi yɛ 1914.a

No hewɔ lɛ esa akɛ atsu Nyɔŋmɔ fɔbuu kojomɔ he nii dani 1914 yinɔ lɛ fɛɛ ata kwraa yɛ gbele mli. Yinɔ nɛɛ yɛ wala mli lolo ni amɛyi fa hu. Akɛ nɔkwɛmɔ nɔ lɛ, beni shɛɔ 1980 lɛ no mli lɛ mɛi ni amɛyibɔ ji 1,597,700 yɛ wala mli yɛ Federal Republic of Germany ni afɔ amɛ yɛ 1900 aloo dani afi nɛɛ shɛ. Eji jeee trukaa gbele ni jeŋ tai enyɔ kɛba emlibii lɛ akpekpei anɔ kulɛ yibɔ nɛɛ baafa fe nakai.

Hemɔkɛyeli He Kaa

Habakuk kɔkɔbɔɔ wiemɔi lɛ tsɔɔ akɛ shishashaomɔ ko baanyɛ aba Yehowa kojomɔ be lɛ mli, ni enɛ baatsu nii akɛ hemɔkɛyeli he kaa. Yɛ sane naatsɔɔmɔ ni ja naa lɛ, nɛkɛ kaa nɛɛ eteŋ shi aahu kɛyashi yinɔ ni Yesu wie he lɛ naagbee be ni ekpe sɛɛ kwraa lɛ mli. Kɛ wɔɔsusu nɔkwɛmɔ nɔ ni wɔfee yɛ niŋmaa nɛɛ shishijee mli lɛ he lɛ: Mɛɛ be mli oyiŋ baaje shishi afeeo kɔshikɔshi waa yɛ ogbɔ lɛ baa lɛ he? Eka shi faŋŋ akɛ jeee leebi ŋmɛji nɛɛhu, ni asaŋ jeee shwane ŋmlɛ nyɔŋma kɛ enyɔ, ekolɛ jeee shwane hulutsoo be hu. Shi eka shi faŋŋ akɛ abaaka ohemɔkɛyeli lɛ akwɛ beni hulu enyɔ shi. Shi kaimɔ akɛ ogbɔ lɛ yɛ be babaoo lolo ni ebaanyɛ eba ni eha eshiwoo lɛ aba mli yɛ be mli ni jenamɔ eshɛ shɔŋŋ aaafee 11:30 p.m. po!

Nɔ ko bɛ ni wɔbaadamɔ nɔ wɔhao akɛ Nyɔŋmɔ Wiemɔ lɛ baŋ mli. Efeko yaka da. Yoshua wiemɔi ni ekɛha Israelbii lɛ nɔ ni fe afii 3,000 ni eho nɛ lɛ ka he eji anɔkwale ŋmɛnɛ taakɛ eji yɛ blema lɛ: “Nibii kpakpai fɛɛ ni Yehowa, nyɛ-Nyɔŋmɔ lɛ wie yɛ nyɛhewɔ lɛ, emli ekome folo ekaaa shi, fɛɛ eba mli ehanyɛ, emli ekome folo ekaaa shi.”​—Yoshua 23:⁠14.

Kɛ wɔɔku wɔsɛɛ wɔsusu nɔ ni wɔkase lɛ he ekoŋŋ lɛ. Kristofoi anɔkwafoi ni yɔɔ wala mli ŋmɛnɛ lɛ naa yiŋtoo kpakpa ko ni tsɔɔ nɔ hewɔ ni atsuko Nyɔŋmɔ fɔbuu kojomɔ he nii lolo lɛ. Yɛ anɔkwale mli lɛ amɛmli filiɔ amɛ yɛ ba ni ebako lolo lɛ he. Wo niŋmaa ni nyiɛ sɛɛ nɛɛ baatsɔɔ nɔ hewɔ ni etamɔ nakai lɛ mli.

[Shishigbɛ niŋmaa]

[Mfoniri ni yɔɔ baafa 4]

Afi 1914 yinɔ lɛ mlibii babaoo hiɛ ko nɔ okɛ “amɛbaana nii nɛɛ fɛɛ”