Kristofoi a-Henɔjɔɔmɔ ni Wɔɔhi Shi yɛ Naa yɛ Heyeli Mli

“He ni Yehowa mumɔ lɛ yɔɔ lɛ, jɛmɛ heyeli yɔɔ.”

—2 KORINTOBII 3:17, NW.

1. Yehowa Odasefoi ejɔɔ amɛhe nɔ amɛha namɔ, ni mɛni hewɔ amɛkɛ mla naa gbɛjianɔtoi tsuɔ nii lɛ?

YEHOWA ODASEFOI heɔ yeɔ akɛ amɛjamɔ lɛ baahi shi kɛya naanɔ. No hewɔ lɛ amɛkpaa gbɛ akɛ amɛbaasɔmɔ Nyɔŋmɔ “yɛ mumɔ kɛ anɔkwale mli” kɛya naanɔ. (Yohane 4:23, 24) Ákɛ gbɔmɛi ni yeɔ amɛhe lɛ, nɛkɛ Kristofoi nɛɛ ejɔɔ amɛhe nɔ kwraa amɛha Yehowa Nyɔŋmɔ, ni amɛtswa amɛfai shi akɛ amɛbaahi shi yɛ naa. Yɛ enɛ hewɔ lɛ, amɛkɛ amɛhe fɔ̃ɔ Nyɔŋmɔ Wiemɔ lɛ kɛ emumɔ krɔŋkrɔŋ lɛ nɔ. Yɛ be mli ni amɛjɛɔ amɛtsui muu fɛɛ mli amɛdiɔ amɛ Kristofoi ahenɔjɔɔmɔ gbɛ lɛ sɛɛ yɛ heyeli ni Nyɔŋmɔ kɛha lɛ mli lɛ, Odasefoi lɛ jieɔ bulɛ ni sa kpo amɛtsɔɔ nitsumɔ ni nɔyeli “hegbɛi ni yeɔ nɔ” lɛ tsuɔ lɛ, ni amɛkɛ mla naa hegbɛi kɛ gbɛjianɔi ni ato lɛ tsuɔ nii yɛ gbɛ kpakpa nɔ. (Romabii 13:1; Yakobo 1:25) Akɛ nɔkwɛmɔnɔ lɛ, Odasefoi lɛ kɛ Buu Mɔɔ Asafo lɛ tsuɔ nii akɛ mla naa dɛŋdade—nɔ ni yɔɔ maji pii anɔ lɛ ekome—koni amɛnyɛ amɛtsu nitsumɔ ni akɛwo amɛdɛŋ akɛ amɛye amɛbua nanemɛi gbɔmɛi, titri lɛ yɛ mumɔŋ gbɛi anɔ lɛ ahe nii. Shi Odasefoi lɛ ejɔɔ amɛhe nɔ amɛha Nyɔŋmɔ, jeee kɛha mla naa gbɛjianɔtoo ko, ni amɛ henɔjɔɔmɔ kɛha Yehowa lɛ baahi shi kɛya naanɔ.

2. Mɛni hewɔ Yehowa Odasefoi ahiɛ sɔɔ Buu Mɔɔ Asafo lɛ kɛ mla naa gbɛjianɔtoi ni tamɔ nakai lɛ waa nakai lɛ?

² Ákɛ tsuji ni amɛjɔɔ amɛhe nɔ amɛha Nyɔŋmɔ lɛ, gbɛnaa nii kã Yehowa Odasefoi anɔ akɛ amɛnyiɛ fãmɔ ni Yesu kɛha akɛ “nyɛyafea jeŋmaji fɛɛ mikaselɔi, nyɛbaptisia amɛ nyɛwoa Tsɛ lɛ kɛ Bi lɛ kɛ Mumɔ krɔŋkrɔŋ lɛ gbɛi amli, ni nyɛtsɔɔ amɛ nii” lɛ sɛɛ. (Mateo 28:19, 20) Nitsumɔ nɛɛ baaya nɔ kɛyashi nibii agbɛjianɔtoo lɛ naagbee, ejaakɛ Yesu kɛɛ hu akɛ: “Aaashiɛ maŋtsɛyeli lɛ he sanekpakpa nɛɛ atsɔɔ je nɛŋ fɛɛ, ni akɛye jeŋmaji lɛ fɛ odase; ni no dani naagbee lɛ aaaba.” (Mateo 24:3, 14) Daa afi lɛ, Buu Mɔɔ Asafo lɛ woji akalamɔ nitsumɔhei kɛ mla naa gbɛjianɔtoi krokomɛi ni tamɔ nakai kɛ Bibliai, woji, woji bibii, kɛ woji tɛtrɛbii akpekpei abɔ haa Yehowa Odasefoi koni amɛkɛtsu nii yɛ amɛ jeŋ muu fɛɛ shiɛmɔ nitsumɔ lɛ mli. No hewɔ lɛ, nɛkɛ mla naa gbɛjianɔtoi nɛɛ ahe yɛ sɛɛnamɔ waa yɛ yelikɛbuamɔ ni ekɛhaa Nyɔŋmɔ tsuji ni amɛjɔɔ amɛhe nɔ lɛ koni amɛhi shi yɛ amɛ henɔjɔɔmɔ kɛha lɛ lɛ naa.

3. Mɛɛ shishinumɔ naa Yehowa Odasefoi kɛ wiemɔ ni ji “Asafo lɛ” tsu nii yɛ be ko ni eho?

³ Ekolɛ mɔ ko baatee naataomɔ shi akɛ, gbɛ ni Odasefoi lɛ tsɔɔ nɔ amɛwieɔ Buu Mɔɔ Asafo lɛ he—aloo yɛ bei babaoo mli lɛ akɛ “Asafo lɛ” kɛkɛ lɛ—tsɔɔ akɛ amɛbuɔ enɛ akɛ nɔ ni fe mla naa dɛŋdade ko. Ani amɛbuuu enɛ akɛ naagbee hegbɛ yɛ jamɔŋ saji ahe? Jehovah’s Witnesses—Proclaimers of God’s Kingdom wolo lɛ ha sane nɛɛ mli fee faŋŋ kɛtsɔ sanemlitsɔɔmɔ nɛɛ nɔ, akɛ: “Beni The Watchtower [June 1, 1938] lɛ wie ‘Asafo lɛ’ he lɛ, enɛ etsɔɔɔ mla naa dɛŋdade ko kɛkɛ, shi Kristofoi ni afɔ amɛ mu ni amɛbua amɛhe naa lɛ ni to nakai mla naa gbɛjianɔtoo lɛ shishi ni amɛkɛtsu nii lɛ.”a No hewɔ lɛ wiemɔ lɛ damɔ shi kɛha “tsulɔ anɔkwafo kɛ nilelɔ” lɛ. (Mateo 24:45) Shishinumɔ nɛɛ naa Odasefoi lɛ kɛ wiemɔ “Asafo lɛ” tsu nii yɛ. Yɛ anɔkwale mli lɛ mla naa gbɛjianɔtoo lɛ kɛ “tsulɔ anɔkwafo kɛ nilelɔ” lɛ jeee wiemɔi ni atsakeɔ akɛtoɔ ekroko najiaŋ. Ahalaa Buu Mɔɔ Asafo lɛ nɔkwɛlɔi lɛ, shi Yehowa mumɔ krɔŋkrɔŋ lɛ akɛfɔɔ mɛi ni feɔ “tsulɔ anɔkwafo” lɛ mu.

4. (a) Bɔni afee ni amɛkwa shishinumɔ ni yabaaa lɛ, te Odasefoi babaoo wieɔ amɛ diɛŋtsɛ amɛhe amɛtsɔɔ mɛi amɛhaa tɛŋŋ? (b) Mɛni hewɔ esa akɛ wɔŋmɛ pɛpɛɛpɛ yɛ bɔ ni wɔwieɔ wiemɔi komɛi wɔhaa lɛ he?

⁴ Bɔni afee ni amɛkwa shishinumɔi ni baŋ lɛ, Yehowa Odasefoi bɔɔ mɔdɛŋ ni amɛkwɛ jogbaŋŋ yɛ bɔ ni amɛtsɔɔ saji amli amɛhaa lɛ he. Yɛ nɔ najiaŋ ni amɛaakɛɛ akɛ, “Asafo lɛ tsɔɔ” lɛ, Odasefoi lɛ ateŋ mɛi babaoo sumɔɔ ni amɛkɛ wiemɔi tamɔ, “Biblia lɛ kɛɔ” loo “Minuɔ shishi akɛ Biblia lɛ tsɔɔ akɛ” tsuɔ nii. Yɛ nɛkɛ gbɛ nɔ lɛ, amɛmaa mɔ aŋkro lɛ yiŋkpɛɛ ni Odasefonyo fɛɛ Odasefonyo efee yɛ kpɛlɛmɔ ni ekpɛlɛ Biblia mli tsɔɔmɔi anɔ lɛ nɔ mi, ni amɛtsiɔ amɛhe kɛjɛɔ sane ni bɛ mli akɛ esa akɛ Odasefoi aye jamɔ kuu ko gbɛtsɔɔmɔi anɔ lɛ he. Shi, esaaa akɛ bɔ ni asusuɔ akɛ atsɛ wiemɔi aha lɛ feɔ nɔ ni naataomɔ yɔɔ he. Fɛɛ sɛɛ lɛ, bɔ ni atsɛɔ wiemɔ ko ahaa lɛ he bahiaa kɛyashɛɔ he ni etsiɔ shishinumɔ ni baaa pɛ gbɛ yɛ lɛ. Ebiɔ ni Kristofoi aŋmɛ pɛpɛɛpɛ. Biblia lɛ woɔ wɔ ŋaa akɛ ‘wɔkawuu naabu ta.’ (2 Timoteo 2:14, 15) Ŋmalɛi lɛ hu kɛ shishitoo mla nɛɛ haa: “Kɛji nyɛwieee wiemɔ ni shishi yɔɔ faŋŋ lɛ, te aaafee tɛŋŋ ni aaale nɔ ni akɛɔ lɛ?”—1 Korintobii 14:9.

Nyɔŋmɔ Mumɔ lɛ Baa Mlai Ahehiamɔ Shi

5. Te esa akɛ anu 1 Korintobii 10:23 shishi aha tɛŋŋ?

⁵ “Wɔyɛ nibii fɛɛ hegbɛ, shi jeee nibii fɛɛ hi,” taakɛ bɔfo Paulo kɛɛ lɛ. Ekɛfata he akɛ: “Wɔyɛ nibii fɛɛ hegbɛ, shi jeee nibii fɛɛ tswaa mɔ emaa shi.” (1 Korintobii 10:23, NW) Eka shi faŋŋ akɛ Paulo etsɔɔɔ akɛ ayɛ hegbɛ akɛ afeɔ nibii ni Nyɔŋmɔ Wiemɔ lɛ buɔ nomɛi fɔ yɛ faŋŋ mli lɛ. Kɛ akɛto mlai aaafee 600 ni akɛha blema Israel he lɛ, fãmɔi ni yɔɔ faŋŋ ni kudɔɔ Kristofoi ashihilɛ lɛ faaa. No hewɔ lɛ, ashiɔ saji pii ahaa mɔ aŋkro lɛ henilee. Gbɔmɔ ni ejɔɔ ehe nɔ eha Yehowa lɛ náa heyeli ni jɛɔ Nyɔŋmɔ mumɔ lɛ kudɔmɔ mli baa lɛ mli ŋɔɔmɔ. Akɛni ekɛ anɔkwale lɛ efee lɛ diɛŋtsɛ enɔ̃ hewɔ lɛ, Kristofonyo lɛ nyiɛɔ ehenilee ni Biblia etsɔse lɛ lɛ sɛɛ, ni ekɛ ehe fɔ̃ɔ Nyɔŋmɔ gbɛtsɔɔmɔ kɛtsɔ mumɔ krɔŋkrɔŋ lɛ nɔ lɛ nɔ. Enɛ yeɔ ebuaa Kristofonyo ni ejɔɔ ehe nɔ lɛ koni ele nɔ ni ‘baatswa mɔ ama shi’ ni he ‘baaba sɛɛnamɔ’ kɛha lɛ kɛ mɛi krokomɛi. Eyɔseɔ akɛ yiŋkpɛi ni efeɔ lɛ baasa wekukpaa ni kã ekɛ Nyɔŋmɔ, mɔ ni ejɔɔ ehe nɔ eha lɛ lɛ teŋ lɛ he.

6. Te wɔɔfee tɛŋŋ wɔtsɔɔ akɛ wɔkɛ anɔkwale lɛ efee wɔ diɛŋtsɛ wɔnɔ̃ yɛ Kristofoi akpeei ashishi?

⁶ Odasefonyo tsɔɔ akɛ efee anɔkwale lɛ lɛ diɛŋtsɛ enɔ̃ kɛtsɔɔ saji ahetoo ni ehaa yɛ Kristofoi akpeei ashishi lɛ nɔ. Klɛŋklɛŋ lɛ, ekolɛ ebaakane ehetoo lɛ kɛjɛ wolo ni akaseɔ lɛ mli. Shi be baashɛ, ni ebaaya ehiɛ kɛyashɛ he ni ebaatsɔɔ Biblia tsɔɔmɔi amli yɛ lɛ diɛŋtsɛ ewiemɔi amli. Ekɛ odaseyeli tsɔɔ nɛkɛ akɛ eeha ejwɛŋmɔŋ nyɛmɔ miiya hiɛ, shi jeee eeti nɔ ni mɛi krokomɛi ekɛɛ lɛ mli. Susumɔi ni etoɔ naa yɛ lɛ diɛŋtsɛ ewiemɔi amli, kɛ anɔkwale wiemɔi ni ja ni ejajeɔ kɛjɛɔ etsui mli lɛ baaha ena miishɛɛ ni ebaatsɔɔ akɛ eheɔ eyeɔ yɛ lɛ diɛŋtsɛ ejwɛŋmɔ mli.—Jajelɔ 12:10; okɛto Romabii 14:5b he.

7. Mɛɛ yiŋ Yehowa tsuji ekpɛ yɛ heyeli mli?

⁷ Suɔmɔ kɛha Nyɔŋmɔ kɛ amɛnanemɛi gbɔmɛi ji nɔ ni kanyãa Yehowa Odasefoi. (Mateo 22:36-40) Eji anɔkwale akɛ, amɛfee ekome waa, akɛ jeŋ muu fɛɛ nyɛmimɛi anaanyobɔɔ kɛtsɔ suɔmɔ kpãa ko ni tamɔ Kristo nɔ̃ lɛ nɔ. (Kolosebii 3:14; 1 Petro 5:9) Shi akɛ mɛi ni feɔ amɛsuɔmɔnaa nii lɛ, amɛteŋ mɔ fɛɛ mɔ ekpɛ lɛ diɛŋtsɛ eyiŋ akɛ ebaajaje Nyɔŋmɔ Maŋtsɛyeli lɛ he sanekpakpa lɛ, koni ehi shi akɛ mɔ ni kɛ ehe wooo maŋkwramɔŋ saji amli, ebaatsi ehe kɛjɛ lá he, ebaakpoo hiɛtserɛjiemɔi komɛi, ni ehi shi yɛ Biblia taomɔ nii anaa. Enɛɛmɛi jeee yiŋkpɛi ni ányɛ amɛnɔ ni amɛdi sɛɛ. Amɛji yiŋkpɛi ni ji heyeli shihilɛ gbɛ ni mɛi ni taoɔ amɛtsɔmɔ Odasefoi lɛ tsɔ hiɛ amɛhala kwraa dani amɛkɛ amɛhe wo Kristofoi ahenɔjɔɔmɔ mli lɛ fã.

Amɛbaabu Amɛhe Akɔntaa Amɛha Nɔyeli Kuu Ko?

8. Mɛɛ sanebimɔ ehe hiaa ni atsɔɔ mli faŋŋ?

⁸ Biblia lɛ tsɔɔ faŋŋ akɛ, anɔkwa Kristofoi sɔmɔɔɔ Nyɔŋmɔ yɛ nɔnyɛɛ shishi. Ekɛɔ akɛ: “Yehowa ji Mumɔ lɛ; ni he ni Yehowa mumɔ lɛ yɔɔ lɛ, jɛmɛ heyeli yɔɔ.” (2 Korintobii 3:17, NW) Shi te aaafee tɛŋŋ ni aaaha anɔkwa sane nɛɛ kɛ “tsulɔ anɔkwafo kɛ nilelɔ” kɛ e-Nɔyeli Kuu lɛ aaakpã gbee hu?—Mateo 24:45-47.

9, 10. (a) Te yitsoyeli he shishitoo mla lɛ kɔɔ Kristofoi asafo lɛ he ehaa tɛŋŋ? (b) Mɛni ehe bahia ni afee yɛ klɛŋklɛŋ afii oha lɛ mli yɛ yitsoyeli he shishitoo mla lɛ sɛɛnyiɛmɔ mli?

⁹ Kɛ wɔɔha sanebimɔ nɛɛ hetoo lɛ, esa akɛ wɔha Ŋmalɛ naa shishitoo taomɔ nii ni ji yitsoyeli lɛ ahi wɔjwɛŋmɔ mli. (1 Korintobii 11:3) Áyɔse Kristo yɛ Efesobii 5:21-24 akɛ “asafo lɛ yitso,” mɔ ni ‘ebaa ehe shi ehaa.’ Yehowa Odasefoi nuɔ shishi akɛ Yesu mumɔŋ nyɛmimɛi lɛ feɔ tsulɔ anɔkwafo kɛ nilelɔ lɛ. (Hebribii 2:10-13) Ahala nɛkɛ tsulɔ anɔkwafo kuu nɛɛ koni ekɛ mumɔŋ “niyenii yɛ be ni sa nɔ” aha Nyɔŋmɔ webii lɛ. Yɛ naagbee be nɛɛ mli lɛ, Kristo ehala nɛkɛ tsulɔ nɛɛ “eto enii fɛɛ kwa nɔ.” No hewɔ lɛ, esa akɛ mɔ fɛɛ mɔ ni kɛɔ akɛ Kristofonyo ji lɛ lɛ kɛ bulɛ aha egbɛhe lɛ.

¹⁰ Yiŋtoo ni yɔɔ yitsoyeli sɛɛ ji ni ebaa ekomefeemɔ yi, ni ekwɛ ni “afee nii fɛɛ bɔ ni yɔɔ fɛo kɛ gbɛnaa-gbɛnaa.” (1 Korintobii 14:40) Bɔni afee ni nine ashɛ enɛ nɔ yɛ klɛŋklɛŋ afii oha lɛ mli lɛ, ahala Kristofoi ni afɔ amɛ mu lɛ ateŋ mɛi komɛi kɛjɛ tsulɔ anɔkwafo kɛ nilelɔ lɛ kuu lɛ mli koni amɛdamɔ kuu muu lɛ fɛɛ najiaŋ. Taakɛ saji ni nyiɛ sɛɛ ba lɛ ye he odase lɛ, Yehowa nɔkpɛlɛmɔ kɛ ejɔɔmɔ yɛ nɔkwɛmɔ ni klɛŋklɛŋ afii oha lɛ mli nɔyeli kuu lɛ tsu he nii lɛ nɔ. Klɛŋklɛŋ afii oha lɛ mli Kristofoi lɛ kɛ miishɛɛ kpɛlɛ gbɛjianɔtoo lɛ nɔ. Hɛɛ, amɛhere enɛ nɔ diɛŋtsɛ ni amɛda shi yɛ yibii kpakpai ni ewo lɛ hewɔ.—Bɔfoi lɛ Asaji 15:1-32.

11. Te esa akɛ asusu ŋmɛnɛŋmɛnɛ beaŋ Nɔyeli Kuu lɛ he aha tɛŋŋ?

¹¹ Sɛɛnamɔ ni yɔɔ gbɛjianɔtoo ni tamɔ nɛkɛ he lɛ yɛ lolo. Amrɔ nɛɛ, mɛi ni feɔ Yehowa Odasefoi a-Nɔyeli Kuu lɛ ji Kristofoi nyɔŋma ni afɔ amɛ mu, ni amɛ fɛɛ amɛkɛ afii nyɔŋmai abɔ ená niiashikpamɔ akɛ Kristofoi. Amɛkɛ mumɔŋ gbɛtsɔɔmɔ haa Yehowa Odasefoi, taakɛ klɛŋklɛŋ afii oha lɛ mli nɔyeli kuu lɛ fee lɛ. (Bɔfoi lɛ Asaji 16:4) Taakɛ mra be mli Kristofoi lɛ ji lɛ, Odasefoi lɛ kɛ miishɛɛ kwɛɔ Nɔyeli Kuu lɛ mli nyɛmimɛi ni amɛdara yɛ mumɔŋ lɛ gbɛ kɛha Biblia mli gbɛtsɔɔmɔ kɛ kudɔmɔ yɛ jamɔ mli saji amli. Eyɛ mli akɛ Nɔyeli Kuu lɛ mli bii lɛ ji Yehowa kɛ Kristo tsuji, taakɛ amɛnanemɛi Kristofoi lɛ ji lɛ moŋ, shi Biblia lɛ woɔ wɔ ŋaa akɛ: “Nyɛboa nyɛ tsɔɔlɔi lɛ atoi, ni nyɛbaa nyɛhe shi nyɛhaa amɛ; ejaakɛ amɛ amɛbuɔ nyɛ susumai lɛ ahe akɛ mɛi ni baabu he akɔntaa, koni amɛkɛ miishɛɛ afee nii nɛɛ, shi jeee ŋtsɔidɔɔmɔ; ejaakɛ no ehiii haaa nyɛ.”—Hebribii 13:17.

12. Namɔ esa akɛ Kristofonyo aŋkro fɛɛ aŋkro abu ehe akɔntaa eha?

¹² Ani nɔkwɛmɔ gbɛhe ni Ŋmalɛi lɛ kɛhaa Nɔyeli Kuu lɛ tsɔɔ akɛ esa akɛ Yehowa Odasefoi lɛ ateŋ mɔ fɛɛ mɔ abu enitsumɔi ahe akɔntaa eha amɛ? Jeee yɛ Paulo wiemɔi ni ekɛha Kristofoi ni yɔɔ Roma lɛ naa, akɛ: “Mɛɛba okojoɔ onyɛmi? Aloo bo hu mɛɛba ogbeɔ onyɛmi he guɔ? Ejaakɛ wɔ fɛɛ wɔbaadamɔ [Nyɔŋmɔ, NW] kojomɔ sɛi lɛ hiɛ. . . . wɔteŋ mɔ fɛɛ mɔ baabu lɛ diɛŋtsɛ ehe akɔntaa eha Nyɔŋmɔ.”—Romabii 14:10-12.

13. Mɛni hewɔ Yehowa Odasefoi buɔ amɛ shiɛmɔ nitsumɔ lɛ he akɔntaa lɛ?

¹³ Shi, ani ejeee anɔkwale akɛ aakpa gbɛ akɛ Odasefoi aŋkroaŋkroi lɛ baabu amɛsɔɔmɔ nitsumɔ he akɔntaa? Hɛɛ, shi átsɔɔ yiŋtoo ni yɔɔ enɛ sɛɛ lɛ mli faŋŋ yɛ Odasefoi awolo ko mli, ni ekɛɔ akɛ: “Mra be mli Yesu Kristo sɛɛnyiɛlɔi lɛ yɛ amɛ nɔyaa yɛ shiɛmɔ nitsumɔ lɛ mli lɛ he amaniɛbɔi ahe miishɛɛ. (Marko 6:30) Beni nitsumɔ lɛ shwereɔ lɛ, abua akɔntaabui ahe amaniɛbɔi kɛ mɛi ni náa sanekpakpa shiɛmɔ nitsumɔ lɛ mli gbɛfaŋnɔ lɛ aniiashikpamɔi ni ŋɔɔ lɛ anaa. . . . (Bɔfoi lɛ Asaji 2:5-11, 41, 47; 6:7; 1:15; 4:4) . . . Kwɛ bɔ ni ewoɔ mɔ hewalɛ ehaa akɛ nakai nitsulɔi Kristofoi anɔkwafoi lɛ aaanu nɔ ni atsuɔ lɛ ahe amaniɛbɔi! . . . Yɛ nakai gbɛ nɔ nɔŋŋ Yehowa gbɛjianɔtoo ni yɔɔ ŋmɛnɛŋmɛnɛ beaŋ lɛ bɔɔ mɔdɛŋ koni ená nitsumɔ ni atsuɔ ni haa Mateo 24:14 baa mli lɛ ahe amaniɛbɔi ni ja.”

14, 15. (a) Te 2 Korintobii 1:24 kɔɔ Nɔyeli Kuu lɛ he ehaa tɛŋŋ? (b) Mɛni nɔ esa akɛ Kristofoi aŋkroaŋkroi adamɔ akpɛ amɛ diɛŋtsɛ amɛyiŋ, yɛ mɛɛ anɔkwa sane nɔkpɛlɛmɔ mli?

¹⁴ Nɔyeli Kuu lɛ ji gbɛjianɔtoo ni suɔmɔ yɔɔ mli kɛ hemɔkɛyeli ni sa kasemɔ he nɔkwɛmɔnɔ. (Filipibii 3:17; Hebribii 13:7) Kɛtsɔ amɛhe ni amɛkɛkpɛtɛ Kristo he kɛ esɛɛnyiɛmɔ akɛ nɔkwɛmɔnɔ lɛ nɔ lɛ, amɛbaanyɛ amɛjaje Paulo wiemɔi nɛɛ amɛtsɔɔ: “Jeee akɛ nyɛhemɔkɛyeli lɛ nyɔŋ wɔyeɔ, shi moŋ nyɛmiishɛɛ lɛ he nitsumɔ hefatalɔi ji wɔ, ejaakɛ nyɛhemɔkɛyeli mli nyɛdamɔ shi yɛ.” (2 Korintobii 1:24) Kɛ Nɔyeli Kuu lɛ na bɔ ni nibii yaa haa lɛ, amɛgbalaa jwɛŋmɔ kɛyaa sɛɛnamɔi ni yɔɔ Biblia ŋaawoo toiboo mli lɛ nɔ, amɛkɛ ŋaawoo ni tsɔɔ bɔ ni akɛ Biblia mlai kɛ shishitoo taomɔ nii aaatsu nii haa, amɛbɔɔ kɔkɔ yɛ osharai ni aŋɔtee lɛ ahe, ni amɛkɛ hewalɛwoo ni he hiaa haa “nanemɛi nitsulɔi.” Etsuɔ Kristofoi anitsumɔ ni akɛwo edɛŋ lɛ he nii yɛ nɛkɛ gbɛ nɔ, ni eyeɔ ebuaa amɛ koni amɛmɔ amɛmiishɛɛ lɛ mli, ni etswaa amɛ emaa shi yɛ hemɔkɛyeli mli koni amɛnyɛ amɛdamɔ shi shiŋŋ.—1 Korintobii 4:1, 2; Tito 1:7-9.

¹⁵ Kɛji akɛ Odasefonyo ko damɔ Biblia mli ŋaawoo ni Nɔyeli Kuu lɛ kɛha lɛ nɔ ekpɛ eyiŋ lɛ, lɛ diɛŋtsɛ esuɔmɔ mli ejɛɔ efeɔ nakai, ejaakɛ Biblia lɛ ni lɛ diɛŋtsɛ ekase lɛ etsɔ̃ eyiŋ akɛ enɛ ji gbɛ ni ja. Nyɔŋmɔ diɛŋtsɛ Wiemɔ lɛ náa Odasefonyo fɛɛ Odasefonyo nɔ hewalɛ koni ekɛ Ŋmalɛ mli ŋaawoo kpakpa ni Nɔyeli Kuu lɛ kɛhaa lɛ atsu nii, ni eyɔseɔ jogbaŋŋ akɛ eyiŋ ni ekpɛɔ lɛ baasa wekukpaa ni kã lɛ diɛŋtsɛ kɛ Nyɔŋmɔ, mɔ ni ejɔɔ ehe nɔ eha lɛ lɛ teŋ lɛ he.—1 Tesalonikabii 2:13.

Nikaselɔi kɛ Asraafoi

16. Eyɛ mli akɛ yiŋkpɛi ni kɔɔ jeŋba he lɛ ji mɔ diɛŋtsɛ teemɔŋ sane moŋ, shi mɛni hewɔ ashwieɔ mɛi komɛi kɛjɛɔ asafo lɛ mli lɛ?

¹⁶ Shi kɛji akɛ yiŋkpɛi ni kɔɔ jeŋba he lɛ ji mɔ diɛŋtsɛ teemɔŋ sane lɛ, mɛni hewɔ ashwieɔ Yehowa Odasefoi lɛ ateŋ mɛi komɛi mɔ? Mɔ ko mɔ ko bɛ ni kɛ ehewalɛ kɛɔ akɛ esha ko ni afeɔ lɛ sa shwiemɔ. Shi moŋ, nifeemɔ nɛɛ ji Ŋmalɛ naa taomɔ nii beni asafo lɛ mli nyo ko kɛ ehe ewo eshafeemɔ ni hiɛdɔɔ yɔɔ mli ni atsi ta yɛ Klɛŋklɛŋ Korintobii yitso 5 lɛ mli ni etsakeee etsui lɛ. No hewɔ lɛ yɛ be mli ni abaanyɛ ashwie Kristofonyo ko yɛ ajwamaŋbɔɔ hewɔ lɛ, enɛ baa yɛ be mli ni mɔ lɛ ekpoo akɛ eeekpɛlɛ mumɔŋ yelikɛbuamɔ ni tookwɛlɔi ni yɔɔ suɔmɔ lɛ kɛhaa lɛ lɛ nɔ lɛ. Jeee Yehowa Odasefoi pɛ kɛ amɛhe woɔ Kristofoi anifeemɔ nɛɛ mli. The Encyclopedia of Religion lɛ wie akɛ: “Kuu fɛɛ kuu kɛɔ akɛ amɛyɛ hegbɛ akɛ amɛbuɔ amɛhe kɛjɛɔ emli bii ni kɛ amɛ enyiɛɛɛ pɛpɛɛpɛ ni baanyɛ ni amɛkɛ amɛhilɛ-kɛhamɔ awo oshara mli lɛ ahe. Yɛ jamɔ gbɛfaŋ lɛ, nɔ ni aheɔ ayeɔ akɛ nifeemɔ ni saa mɔ lɛ shidaamɔ yɛ Nyɔŋmɔ hiɛ [ni ji shwiemɔ] lɛ he lɛ, fiɔ hegbɛ nɛɛ sɛɛ.”

17, 18. Te abaanyɛ afee ja ni shwiemɔ ja lɛ he nɔkwɛmɔnɔ aha tɛŋŋ?

¹⁷ Yehowa Odasefoi ji Biblia kaselɔi. (Yoshua 1:8; Lala 1:2; Bɔfoi lɛ Asaji 17:11) Abaanyɛ ni akɛ Biblia tsɔsemɔ he gbɛjianɔtoo ni Nɔyeli Kuu lɛ kɛha lɛ ato nikasemɔi ni wolo kasemɔ ajinafoi akuu ko kɛha koni akase lɛ he. Eyɛ mli akɛ ajinafoi akuu lɛ diɛŋtsɛ jeee mɛi ni ŋmala nibii ni atsɔɔ lɛ moŋ, shi amɛ amɛtoɔ nibii ni esa akɛ akase, kɛ gbɛ ni esa akɛ atsɔ nɔ atsɔɔ nii lɛ he gbɛjianɔ, ni amɛkɛ gbɛtsɔɔmɔi ni he hiaa haa. Kɛji akɛ mɔ ko je gbɛ ekpoo yɛ faŋŋ mli akɛ ehiii shi yɛ skul lɛ taomɔ nii anaa lɛ, ni ekɛ naagbai baa enanemɛi nikaselɔi lɛ ateŋ, aloo ekɛ hiɛshishwiemɔ baa skul lɛ nɔ lɛ, abaanyɛ ashwie lɛ. Skul nikasemɔ nɔkwɛlɔi lɛ yɛ hegbɛ akɛ amɛtsuɔ nii kɛhaa nikaselɔi lɛ fɛɛ asɛɛnamɔ.

¹⁸ Kɛfata nikaselɔi ni amɛji lɛ he lɛ, Yehowa Odasefoi ji Yesu Kristo asraafoi, afa amɛ ni “[amɛ]wuu hemɔkɛyeli he ta kpakpa lɛ.” (1 Timoteo 6:12; 2 Timoteo 2:3) Ale akɛ jeŋba ni esaaa Kristofonyo ni akãa he akɛhe woɔ mli lɛ kɛ ŋwɛi mlifu baa. Ákɛ mɔ aŋkro ni yɔɔ nihalamɔ mli heyeli lɛ, Kristofonyo asraafonyo baanyɛ akpɛ eyiŋ bɔ ni esumɔɔ, shi esa akɛ etere sɔ̃ ni baajɛ eyiŋkpɛɛ lɛ mli aba lɛ. Paulo wie akɛ: “Mɔ ko enyiɛɛɛ ta gbɛ ni ekɛ ehe wo shia saji amli, koni esa mɔ ni fã lɛ kɛtee ta lɛŋ lɛ hiɛ. Ni kɛji mɔ ko miishi mple hu lɛ, afiŋ lɛ kunimyeli akekre, akɛ ja eshi lɛ mla naa.” (2 Timoteo 2:4, 5) Kristofoi ni amɛdara yɛ mumɔŋ, ni Nɔyeli Kuu lɛ mli bii fata he lɛ, hiɔ shi akɛ mɛi ni kɛ amɛhe eha amɛ Hiɛnyiɛlɔ, Yesu Kristo kwraa, ni amɛyeɔ ‘mlai lɛ’ anɔ koni amɛnine ashɛ naanɔ wala akekre lɛ nɔ.—Yohane 17:3; Kpojiemɔ 2:10.

19. Akɛni wɔsusu anɔkwa saji ni kɔɔ Kristofoi ahenɔjɔɔmɔ he lɛ he hewɔ lɛ, wɔbaanyɛ wɔná nɔmimaa yɛ mɛni he?

¹⁹ Ani anɔkwa saji lɛ efeee lɛ faŋŋ akɛ Yehowa Odasefoi ji Nyɔŋmɔ tsuji, shi jeee gbɔmɛi anyɔ̃ji? Ákɛ Kristofoi ni amɛjɔɔ amɛhe nɔ ni miiná heyeli ni Kristo kɛha amɛye amɛhe lɛ mli ŋɔɔmɔ lɛ, amɛhaa Nyɔŋmɔ mumɔ lɛ kɛ e-Wiemɔ lɛ yeɔ amɛshihilɛ nɔ yɛ be mli ni amɛkɛ amɛ nyɛmimɛi sɔmɔɔ yɛ ekomefeemɔ mli yɛ Nyɔŋmɔ asafo lɛ mli lɛ. (Lala 133:1) Esa akɛ enɛ he odaseyelii lɛ hu ajie yiŋkɔshikɔshifeemɔ ni yɔɔ amɛhewalɛ jɛɛhe lɛ he lɛ kɛya kwraa. Amɛkɛ lalatsɛ lɛ baanyɛ alá akɛ: “Yehowa ji mihewalɛ kɛ mitsɛŋ; mikɛ mitsui fɔ̃ enɔ, ni eye ebua mi; no hewɔ lɛ mina tsuijurɔ ni mikɛ milala aaajie eyi.”—Lala 28:7.

[Shishigbɛ niŋmai]

Te Obaaha Hetoo Oha Tɛŋŋ?

◻ Te Buu Mɔɔ Asafo lɛ kɛ mla naa gbɛjianɔtoi krokomɛi yeɔ buaa Yehowa Odasefoi amɛhaa tɛŋŋ?

◻ Kristofoi náa Yehowa Odasefoi a-Nɔyeli Kuu lɛ nitsumɔ he sɛɛ yɛ mɛɛ gbɛ nɔ?

◻ Mɛni hewɔ Yehowa webii buɔ amɛ shiɛmɔ nitsumɔ lɛ he akɔntaa lɛ?

◻ Mɛɛ shihilɛi ashishi Kristofonyo ni ejɔɔ ehe nɔ lɛ shwiemɔ feɔ nɔ ni ja gbɛ yɛ lɛ?

[Mfoniri ni yɔɔ baafa 19]

Klɛŋklɛŋ afii oha lɛ mli nɔyeli kuu lɛ kwɛ koni ekomefeemɔ yɛ tsɔɔmɔ mli ahi shi

[Mfoniri ni yɔɔ baafa 23]

Yehowa Odasefoi naa heyeli ni Kristo kɛha amɛye amɛhe lɛ mli ŋɔɔmɔ yɛ jeŋ fɛɛ