Beni eshiɔ bɔfoi lɛ ateŋ mɛi kpaanyɔ—ekolɛ yɛ abɔɔ lɛ shinaa lɛ naa gbɛ lɛ—kɛkɛ ni efa amɛ akɛ: “Nyɛtaraa shi yɛ biɛ, koni maya mayasɔle yɛ jɛi.” Kɛkɛ ni etsɛ mɛi krokomɛi etɛ lɛ efata ehe—Petro, Yakobo, kɛ Yohane—ni amɛyi mli kɛtee abɔɔ lɛ mli shɔŋŋ. Yesu werɛ eho ehe ni ehao waa diɛŋtsɛ. Ni ekɛɛ amɛ akɛ: “Misusuma miihao kɛyashi gbele mli po; nyɛhia shi yɛ biɛ ni nyɛkɛ mi ashia kpe.”

Dabi kwraa! Yesu kpaaa fai ni ajie lɛ kɛjɛ gbele lɛ mli. Be ko beni Petro wo lɛ ŋaa akɛ ejo afɔleshaa gbele lɛ naa foi po lɛ, etsɔɔ akɛ enyaaa nakai susumɔ lɛ he. Shi moŋ, ewerɛ eho ehe ejaakɛ esusuɔ akɛ gbɛ ni etsɛŋ ni eeetsɔ nɔ egbo—tamɔ awuiyelɔ ni ehe guɔ egbo—lɛ kɛ heguɔgbee baaba e-Tsɛ lɛ gbɛi nɔ. Agbɛnɛ eenu he akɛ yɛ ŋmɛlɛtswai fioo komɛi asɛɛ lɛ abaasɛŋ lɛ yɛ sɛŋmɔtso nɔ tamɔ afeɔ mɛi fɔji fe fɛɛ lɛ—musubɔlɔ ni teɔ shi woɔ Nyɔŋmɔ! Enɛ ji nɔ ni ha ehao waa nakai lɛ.