Ejaakɛ Esɔle

PAULO kɛɛ yɛ 1 Tesalonikabii 5:​17, 18 akɛ: “Nyɛsɔlea ni nyɛkafɔa. Nyɛdaa shi yɛ nɔ fɛɛ nɔ mli: Ejaakɛ no ji Nyɔŋmɔ suɔmɔnaa nii yɛ Kristo Yesu mli yɛ nyɛgbɛfaŋ.” Shi, yɛ bei komɛi amli lɛ, onaa akɛ efeee bo akɛ oda shi kɛ ooye nii yɛ gbɔmɛi ateŋ, tamɔ yɛ niyeli he ko nɛkɛ? Yɛ kɔkɔ ni Yesu bɔ yɛ sɔlemɔ ni asɔleɔ koni mɔ fɛɛ mɔ ana mɔ lɛ hewɔ lɛ, shishinumɔ yɛ he akɛ mɔ ko baasumɔ ni ekagbala jwɛŋmɔ ni esaaa kɛmiiba enɔ yɛ enɛ he. (Mateo 6:​5, 6) Ni kɛlɛ, sɔlemɔ ni afeɔ yɛ nilee mli lɛ baanyɛ agbala jwɛŋmɔ kɛba mɔ ko nɔ yɛ gbɛ kpakpa nɔ.

Enɛ ji sɔɔlɔ obalaŋta ko ni miisɔmɔ yɛ Brooklyn Betel, yɛ Yehowa Odasefoi asafo lɛ nitsumɔ he yitso lɛ niiashikpamɔ. Eeye eleebi niyenii yɛ niyeli he ko, ni eto gbɛjianɔ akɛ ebaajɛ jɛmɛ ni ekɛ esafo lɛ mli kuu ni ekɛ amɛ kpeɔ lɛ ayakpe ni ekɛ ehe awo Maŋtsɛyeli shiɛmɔ nitsumɔ lɛ mli. Beni akɛ eleebi niyenii lɛ ba lɛ, esɔle, taakɛ efɔɔ feemɔ lɛ. Beni egbele ehiŋmɛi lɛ, ena ni obalayei ni tsuɔ nii yɛ jɛmɛ lɛ ateŋ mɔ kome damɔ shi ni eekwɛ lɛ.

Obalayoo lɛ bi lɛ akɛ: “Oosɔle, aloo jeee nakai?” Beni ekpɛlɛ nɔ akɛ nakai ni lɛ, obalayoo lɛ kɛɛ: “Belɛ Yehowa Odasefoi lɛ ateŋ mɔ ko jio. Mifɔlɔi ji Odasefoi. Mikɛ mihe wooo amɛjamɔ lɛ mli, shi mile akɛ esa akɛ mafee nakai. Ekolɛ esa akɛ mashɛ Buu-Mɔɔ lɛ kɛ Awake! lɛ eko. Ani obaanyɛ oshɛ eko oha mi?”

Nyɛminuu obalanyo lɛ kaiɔ akɛ, “shwɛ fioo kulɛ niyenii lɛ nyɔ misɛŋ.” Kɛlɛ enyɛ eha eshɛ woji tɛtrɛbii lɛ enyɔ ni eha lɛ woji tɛtrɛbii heei lɛ enyɔ ni eto gbɛjianɔ koni eku esɛɛ eba eŋɔɔ​—fɛɛ jɛ akɛ esɔle.