Sanebimɔi ni Jɛ Kanelɔi Adɛŋ
Bei komɛi lɛ wɔnuɔ ni nyɛmimɛi miiwie aloo amɛmiisɔle ni Nyɔŋmɔ Maŋtsɛyeli lɛ aba shikpɔŋ lɛ nɔ. Ani wiemɔ ni ja nɛ?
Kɛ wɔɔwie faŋŋ lɛ, ejeee Ŋmalɛ naa gbɛ ni atsɔɔ nɔ awieɔ sane nɛɛ he. Nyɔŋmɔ Maŋtsɛyeli lɛ, ŋwɛi eyɔɔ. Enɛ hewɔ lɛ, bɔfo Paulo nyɛ eŋma akɛ: “Jiemɔ kɛ̃ Nuntsɔ lɛ aaajie mi kɛaajɛ nifɔjianii fɛɛ mli, ni eeehere miyiwala kɛaatee eŋwɛi maŋtsɛyeli lɛ mli: lɛ aŋɔ anunyam aha kɛyashi naanɔi anaanɔ lɛ! Amen.”—2 Timoteo 4:18; Mateo 13:44; 1 Korintobii 15:50.
Ato Maŋtsɛyeli lɛ ama shi yɛ ŋwɛi yɛ afi 1914, ni ajieŋ kɛbaŋ shikpɔŋ nɔ Paradeiso ni akɛbaaba ekoŋŋ lɛ nɔ loo he kroko. Yesu Kristo ji Maŋtsɛyeli lɛ nɔ Maŋtsɛ. Akɛ Maŋtsɛ lɛ, Yesu yɛ hegbɛ yɛ ŋwɛibɔfoi anɔ. No hewɔ lɛ, enɔyeli gbɛhe ni sa lɛ ji Nyɔŋmɔ ninejurɔ nɔ yɛ ŋwɛi. Kristofoi ni afɔ amɛ mu lɛ baafata ehe akɛ maŋtsɛmɛi kɛ osɔfoi yɛ ŋwɛi.—Efesobii 1:19-21; Kpojiemɔ 5:9, 10; 20:6.
Belɛ, ani enɛ tsɔɔ akɛ esaaa ni wɔkɛ faikpamɔi ni yɔɔ Nuntsɔ lɛ Sɔlemɔ lɛ fã nɛɛ mli lɛ fɔ̃ɔ Nyɔŋmɔ hiɛ dɔŋŋ, akɛ: “Ha omaŋtsɛyeli lɛ aba. Ha afee osuɔmɔnaa nii yɛ shikpɔŋ nɔ hu, taakɛ afeɔ yɛ ŋwɛi lɛ”? (Mateo 6:10, NW) Nɔ ni tamɔɔɔ nakai lɛ, nakai sɔlemɔ lɛ sa, ni shishinumɔ babaoo yɛ he lolo.
Nyɔŋmɔ Maŋtsɛyeli lɛ baatsu nitsumɔ krɛdɛɛ ko yɛ shikpɔŋ nɛɛ gbɛfaŋ wɔsɛɛ, ni enɛ ji nɔ ni yɔɔ wɔjwɛŋmɔ mli beni wɔsɔleɔ ni wɔkɛ wiemɔi ni tamɔ nɔ ni yɔɔ Nuntsɔ lɛ Sɔlemɔ lɛ mli lɛ tsuɔ nii lɛ. Akɛ nɔkwɛmɔ nɔ lɛ, Daniel 2:44 egba efɔ̃ shi akɛ Maŋtsɛyeli lɛ ‘baaba’ ni ebakpata jeŋmaji lɛ fɛɛ ahiɛ ni ebaahe shikpɔŋ lɛ nɔyeli lɛ kwraa. Kpojiemɔ 21:2 wieɔ Yerusalem Hee ni jɛɔ ŋwɛi ekpelekeɔ shi lɛ he. Mɛi ni feɔ Yerusalem Hee lɛ ji Kristofoi 144,000 ni afɔ amɛ mu, ni baafee Kristo ayemforo lɛ. Amɛji Yesu hefatalɔi niyelɔi hu yɛ Maŋtsɛyeli lɛ mli. No hewɔ lɛ Kpojiemɔ 21:2 miiwie amɛjwɛŋmɔ ni amɛbaagbala kɛba shikpɔŋ lɛ nɔ, kɛ jɔɔmɔi wuji ni baajɛ mli aba kɛha adesai anɔkwafoi lɛ he.—Kpojiemɔ 21:3, 4.
Kɛyashi be mli ni gbalɛi nɛɛ kɛ gbalɛi krokomɛi ni yɔɔ nyam lɛ aaaba mli lɛ, ebaaya nɔ efee nɔ ni sa akɛ aaasɔle aha Yehowa Nyɔŋmɔ, yɛ Yesu wiemɔi nɛɛ kɛ gbeekpamɔ naa akɛ, “Ha omaŋtsɛyeli lɛ aba.” Shi esa akɛ wɔha ehi wɔjwɛŋmɔ mli akɛ Maŋtsɛyeli lɛ baŋ shibɔlemɔ ŋulami Shikpɔŋ nɛɛ nɔ yɛ shishinumɔ diɛŋtsɛ naa. Maŋtsɛyeli nɔyeli lɛ baahi ŋwɛi, jeee shikpɔŋ nɛɛ nɔ.
[He ni Mfoniri ni yɔɔ baafa 31 lɛ Jɛ]
Shikpɔŋ: Edamɔ NASA mfoniri nɔ