“Ŋa nɔ Fɔfɔii Lɛ”

NITSUMƆ NI ANAAA. Nibii ajara ni yaa ŋwɛi. Ohia. Shika gbɛfaŋ naagbai. Nɛkɛ wiemɔi nɛɛ jeɔ kpo nɔtonɔto yɛ adafitswaa wiemɔi amli be fɛɛ be. Ni amɛtsɔɔ naagbai ni mɛi akpekpei abɔ kɛkpeɔ beni amɛbɔɔ mɔdɛŋ ni amɛlɛ amɛwekui, ni amɛha amɛ hehaanɔ kɛ wɔɔhe hu lɛ. Esaa heyelilɔi kɛ mɛi ni heee yeee fɛɛ he.

Shi ashiko heyelilɔi lɛ ni amɛ kome kɛkɛ amɛkpee nakai naagbai lɛ anaa. Beni Yesu kɛ klɛŋklɛŋ afii oha lɛ mli heshibalɔi komɛi wieɔ lɛ, ekɛɛ: “Nyɛkwɛa ŋwɛi loofɔji lɛ: amɛdũuu nii, asaŋ amɛkuuu, asaŋ amɛbuaaa naa amɛwooo aboŋoi amli; shi nyɛ-Tsɛ ni yɔɔ ŋwɛi lɛ lɛɔ amɛ kɛ̃. Ani nyɛhiii aahu fe amɛ?”​—Mateo 6:⁠26.

Yesu wie hu akɛ: “Nyɛjwɛŋa ŋa nɔ fɔfɔii lɛ ahe, bɔ ni amɛkwɛ̃ɔ: amɛtsuuu nii, asaŋ amɛtsɛ̃ɛɛ kpaa; shi miikɛɛ nyɛ akɛ, Salomo kɛ enunyam lɛ fɛɛ tete, ewulaaa tamɔ enɛɛmɛi ateŋ ekome. Shi kɛji ŋa nɔ jwɛi ni . . . Nyɔŋmɔ wulaa nɛkɛ lɛ, efeŋ nɔ ni fe enɛ ehaŋ nyɛ ni nyɛhemɔkɛyeli faaa lɛ lo?”​—Mateo 6:​28-30.

Ani enɛ tsɔɔ akɛ ehe ehiaaa ni Kristofonyo tsuɔ nii kɛnaa edaaŋ ŋmaa? Dabi kwraa! Kristofonyo tsuɔ nii waa bɔ ni he hiaa koni enyɛ ekɛwo ehe nyɔji. Bɔfo Paulo kɛɛ akɛ: “Kɛ mɔ ko sumɔɔɔ akɛ etsuɔ nii lɛ, belɛ ekaye nii hu.” (2 Tesalonikabii 3:10) Shi kɛlɛ, Kristofonyo lɛ hiɛ yɛ ehe nɔ yɛ Nyɔŋmɔ suɔmɔ kwɛmɔ he, ni eyɛ hemɔkɛyeli akɛ eŋwɛi Tsɛ lɛ buɔ ehe. Enɛ hewɔ lɛ, shihilɛ mli yeyeeye-feemɔi ejieee lɛ kɛjɛɛɛ eŋɛlɛ nɔ. Yɛ jaramɔ bei amli po lɛ, ekɛ klɛŋklɛŋ nibii​—mumɔŋ nibii​—yeɔ klɛŋklɛŋ gbɛhe. Eheɔ Yesu wiemɔi nɛɛ eyeɔ: “Shi nyɛtaoa Nyɔŋmɔ maŋtsɛyeli lɛ kɛ ejalɛ lɛ tsutsu, ni akɛ nii nɛɛ fɛɛ aaafata he aha nyɛ.”​—Mateo 6:⁠33.