Yitso 20

Naakpɛɛ Nii ni ji Enyɔ Beni Eyɔɔ Kana Lɛ

BENI Yesu ku esɛɛ kɛba lɛ diɛŋtsɛ emaŋ shikpɔŋ nɔ yɛ be mli ni ekɛ be babaoo etsu shiɛmɔ he tafaa nitsumɔ yɛ Yudea lɛ sɛɛ lɛ, ebaaa ni ebajɔɔ ehe. Shi moŋ, eje sɔɔmɔ nitsumɔ kpele ko shishi yɛ Galilea, yɛ maŋ nɔ he ni eda yɛ lɛ. Shi, ni ekaselɔi lɛ kɛ lɛ aaahi shi moŋ lɛ, amɛku amɛsɛɛ amɛtee amɛwekumɛi aŋɔɔ koni amɛyatsu nitsumɔi ni amɛtsuɔ tsutsu lɛ ekoŋŋ.

Mɛɛ shɛɛ sane Yesu je shishi ebɔi shiɛmɔ? Enɛ: “Be lɛ eshɛ, ni Nyɔŋmɔ maŋtsɛyeli lɛ enina nyɛ: Nyɛtsakea nyɛtsuiaŋ, ni nyɛhea sanekpakpa lɛ nyɛyea.” Ni te amɛhere nɔ amɛha tɛŋŋ? Galileabii lɛ bo Yesu toi. Mɛi fɛɛ kɛ woo ha lɛ. Shi kɛlɛ, jeee eshɛɛ sane lɛ hewɔ titri ni amɛfee nakai lɛ, shi moŋ, akɛni mɛi pii eba Hehoo gbijurɔ lɛ yeli yɛ Yerusalem nyɔji babaoo dani gbijurɔ lɛ shɛ ni amɛna naakpɛɛ nibii ni efee lɛ hewɔ.

Eka shi faŋŋ akɛ Yesu je esɔɔmɔ kpele yɛ Galilea lɛ shishi yɛ Kana. Ekolɛ obaakai akɛ, mra be ko ni tsɔ hiɛ, beni eku esɛɛ kɛjɛ Yudea lɛ, eha nu tsɔ wein yɛ yookpeemɔ okpɔlɔŋmɛɛ ko ni afee yɛ jɛmɛ lɛ shishi. Yɛ nɔ ni ji shii enyɔ nɔ nɛɛ mli lɛ, Maŋtsɛ Herode Antipa sɔɔlɔ nukpa ko bi he miiye. Beni enu akɛ Yesu ejɛ Yudea eba Kana lɛ, sɔɔlɔ nukpa nɛɛ fa gbɛ kɛjɛ eshia yɛ Kapernaum tɔɔ kɛba koni ebatao Yesu. Ni nuu lɛ kɛ awerɛho kpa Yesu fai akɛ: ‘Ofainɛ ba amrɔ nɔŋŋ, dani mibi lɛ agbo.’

Ni Yesu here lɛ nɔ akɛ: ‘Kuu osɛɛ oya shia. Obi lɛ ena hewalɛ!’ Herode sɔɔlɔ nukpa lɛ he ye ni eje egbɛfaa kakadaŋŋ lɛ shishi ekoŋŋ kɛmiiba shia. Beni enyiɛ gbɛ lɛ nɔ lɛ, etsuji kɛ lɛ bakpe, ni amɛkɛ oyaiyeli miiba amɛbakɛɛ lɛ akɛ nɔ fɛɛ nɔ ehi—ebinuu lɛ ena hewalɛ! Ni ebi amɛ akɛ: ‘Mɛɛ be mli ena hewalɛ?’

Ni amɛha lɛ hetoo akɛ: ‘Nyɛ shwane ŋmɛlɛ 1:00.’

Tsulɔ nukpa lɛ kadi akɛ nakai be lɛ nɔ nɔŋŋ mli ni Yesu kɛɛ, ‘Obi lɛ ena hewalɛ!’ lɛ. Yɛ no sɛɛ lɛ, nuu lɛ kɛ ewe lɛ fɛɛ batsɔmɔ Kristo kaselɔi.

No hewɔ lɛ Kana bafee he ko ni aduro waa, ni Yesu fee naakpɛɛ nii yɛ jɛmɛ shii enyɔ, ni ekɛkadi esɛɛkuu kɛmiijɛ Yudea. Shi eji anɔkwale akɛ, jeee enɛɛmɛi pɛ ji naakpɛɛ nibii ni efee kɛbashi nɛkɛ be nɛɛ mli, shi amɛsa kadimɔ waa diɛŋtsɛ ejaakɛ amɛkadiɔ be mli ni eku esɛɛ kɛba Galilea lɛ.

Agbɛnɛ Yesu ku esɛɛ kɛmiiba shia gbɛ yɛ Nazaret. Mɛni mɛɔ lɛ yɛ jɛmɛ? Yohane 4:43-54; Marko 1:14, 15; Luka 4:14, 15.

▪ Beni Yesu ku esɛɛ kɛtee Galilea lɛ, mɛni ba ekaselɔi lɛ anɔ, ni te gbɔmɛi lɛ here lɛ amɛha tɛŋŋ?

▪ Mɛɛ naakpɛɛ nɔ ko Yesu fee, ni te esa mɛi ni ekɔɔ amɛhe lɛ ahe eha tɛŋŋ?

▪ Mɛɛ gbɛ nɔ Yesu na Kana he miishɛɛ waa yɛ?