2. Mɛɛ nɔ hee ko Yohane Baptisilɔ lɛ tswa adafi akɛ Yesu baafee, ni mɛni he nɛkɛ nii hee nɛɛ kɔɔ?

² Beni Yohane Baptisilɔ lɛ saa gbɛ kɛha Yesu lɛ, etswa adafi akɛ Yesu baafee nɔ ko hee. Sane ni aŋma afɔ̃ shi lɛ kɛɔ akɛ: “[Yohane] shiɛ akɛ: ‘Mɔ ni baa yɛ misɛɛ lɛ ehe wa fe mi, ni misaaa mɔ ni kotoɔ shi fɛneɔ etokotai anaa kpaa. Mi lɛ, nu mikɛbaptisiɔ nyɛ; shi lɛ lɛ ekɛ mumɔ krɔŋkrɔŋ aaabaptisi nyɛ.’ ” (Marko 1:7, 8) Dani nakai be lɛ aaashɛ lɛ, no mli lɛ akɛ mumɔ krɔŋkrɔŋ ebaptisiko mɔ ko. Enɛ fee gbɛjianɔtoo hee ko ni kɔɔ mumɔ krɔŋkrɔŋ he, ni ekɔɔ Yehowa yiŋtoo ni eheɔ ejie lɛ kpo, akɛ ebaasaa adesai kɛha ŋwɛi nɔyeli hegbɛ lɛ he.

5. Mɛɛ be akɛ mumɔ krɔŋkrɔŋ baptisi kaselɔi anɔkwafoi lɛ, ni mɛɛ mumɔ krɔŋkrɔŋ nifeemɔi komɛi ni kɔɔ he ba mli yɛ nakai beaŋ nɔŋŋ?

⁵ Beni Yesu kɛ Nikodemo wie lɛ, no mli lɛ mumɔ krɔŋkrɔŋ eba Yesu nɔ momo, ni afɔ lɛ mu kɛha ewɔsɛɛ maŋtsɛyeli yɛ Nyɔŋmɔ Maŋtsɛyeli lɛ mli, ni Nyɔŋmɔ ekpɛlɛ Yesu nɔ yɛ faŋŋ mli akɛ E-Bi. (Mateo 3:16, 17) Yehowa fɔ mumɔŋ bii krokomɛi babaoo yɛ Pentekoste afi 33 Ŋ.B. Akɛ mumɔ krɔŋkrɔŋ baptisi kaselɔi anɔkwafoi ni ebua amɛhe naa yɛ ŋwɛitsu ko nɔ yɛ Yerusalem lɛ. Nakai beaŋ nɔŋŋ hu lɛ, afɔ amɛ ehee kɛjɛ mumɔ krɔŋkrɔŋ lɛ mli koni amɛfee Nyɔŋmɔ mumɔŋ bii. (Bɔfoi lɛ Asaji 2:2-4, 38; Romabii 8:15) Kɛfata he lɛ, akɛ mumɔ krɔŋkrɔŋ fɔ amɛ mu kɛ yiŋtoo akɛ amɛnine baashɛ ŋwɛi gboshinii ko nɔ wɔsɛɛ, ni akɛ mumɔ krɔŋkrɔŋ sɔo amɛnaa kɛjɛ shishijee kwraa akɛ nɔmimaa ni yɔɔ nakai ŋwɛi hiɛnɔkamɔ lɛ he lɛ he okadi.—2 Korintobii 1:21, 22.