Yitso 52

Yesu lɛ Mɛi Akpei Abɔ yɛ Naakpɛɛ Gbɛ Nɔ

BƆFOI 12 lɛ ena shiɛmɔ he gbɛfaa yɛ Galilea niiaŋ fɛɛ lɛ he miishɛɛ. Agbɛnɛ, yɛ Yohane gbele sɛɛ etsɛɛɛ lɛ, amɛku amɛsɛɛ amɛba Yesu ŋɔɔ ni amɛbagba lɛ amɛniiashikpamɔi ni yɔɔ naakpɛɛ lɛ. Akɛni Yesu na akɛ etɔ amɛ ni mɛi babaoo miiya kɛmiiba lolo ni no hewɔ lɛ amɛnaŋ be amɛkɛye nii hewɔ lɛ, ekɛɛ amɛ akɛ: ‘Nyɛhaa wɔyaa ŋa nɔ he ko banee he ni nyɛbaanyɛ nyɛjɔɔ nyɛhe yɛ.’

Kɛkɛ ni amɛkwɔ amɛ lɛlɛ lɛ, ekolɛ yɛ Kapernaum masɛi, ni amɛyiŋ kɛtee he ko ni yɔɔ banee, eka shi faŋŋ akɛ yɛ Yordan bokagbɛ yɛ Betsaida sɛɛ. Shi kɛlɛ, mɛi pii na amɛ beni amɛshiɔ lɛ, ni mɛi krokomɛi hu na amɛnu he. Mɛnɛɛmɛi fɛɛ jo foi kɛtsɔ ŋshɔ lɛ naa kɛtsɔ amɛhiɛ, ni beni amɛ lɛlɛ lɛ bakpeleke lɛ, gbɔmɛi lɛ yɛ jɛmɛ momo ni amɛmiimɛ amɛ.

Beni Yesu yi shi kɛjɛ lɛlɛ lɛ mli ni ena mɛi babaoo lɛ, emusuŋ tsɔ lɛ waa ejaakɛ gbɔmɛi lɛ tamɔ tooi ni bɛ kwɛlɔ. No hewɔ lɛ etsa amɛhelatsɛmɛi lɛ ni ebɔi amɛ nibii pii tsɔɔmɔ.

Bei lɛ ho oya, ni Yesu kaselɔi lɛ ba eŋɔɔ amɛbakɛɛ lɛ akɛ: “Ŋa nɔ ji biɛ, ni je hu miina; wo amɛ gbɛ, koni amɛya akrowai kɛ maji ni jwere shi nɛɛ amli ni amɛyahe nii amɛye.”

Shi kɛlɛ, Yesu ha amɛ hetoo akɛ: “Nyɛ diɛŋtsɛ nyɛhaa amɛ nɔ ko amɛyea.” Kɛkɛ ni, akɛni Yesu le nɔ ni lɛ diɛŋtsɛ ebaafee momo hewɔ lɛ, ebi Filipo nii koni ekɛka lɛ ekwɛ: “Nɛgbɛ wɔɔyahe aboloo yɛ wɔha mɛnɛɛmɛi aye?”

Yɛ Filipo niiahesusumɔ naa lɛ, anyɛŋ nɔ ko afee yɛ shihilɛ lɛ he. Ejaakɛ hii aaafee 5,000 yɛ jɛmɛ, ni kɛ aakane yei kɛ gbekɛbii hu lɛ ekolɛ gbɔmɛi lɛ baafa fe 10,000! Filipo here nɔ akɛ “denarioi ohai enyɔ [yɛ nakai beaŋ lɛ denario ji gbi muu fɛɛ nyɔmɔwoo] naa aboloo shɛŋ amɛ, bɔ ni amɛteŋ mɔ fɛɛ mɔ aaana atroma atroma.”

Bɔni afee ni ekolɛ ekɛtsɔɔ akɛ anyɛŋ alɛ nɛkɛ mɛi babaoo nɛɛ fɛɛ lɛ, Andrea wie akɛ: “Gbekɛ nuu ko yɛ biɛ ni yɔɔ barle abolooi enumɔ kɛ looi bibii enyɔ,” ni ekɛfata he akɛ, “shi mɛi pii nɛɛ, amɛ nɛgbɛ enɛ shɛɔ?”

Akɛni eji nidumɔ be, yɛ be mli ni eshwɛ fioo ni afi 32 Ŋ.B. Hehoo lɛ baashɛ hewɔ lɛ, jwɛi fɔ babaoo yɛ. No hewɔ lɛ Yesu fa ekaselɔi lɛ ni amɛkɛɛ gbɔmɛi lɛ ni amɛbua amɛhe naa kui ni mɛi 50 loo 100 yɔɔ mli ni amɛtara jwɛi lɛ nɔ. Ni ekɔlɔ abolooi enumɔ lɛ kɛ looi enyɔ lɛ, ni ekwɛ ŋwɛi, ni ejɔɔ nɔ. Kɛkɛ ni ebɔi abolooi lɛ amli kuumɔ ni ejara looi lɛ hu mli. Ekɛha ekaselɔi lɛ, ni amɛ hu, amɛjara amɛha gbɔmɛi lɛ. Eyɛ naakpɛɛ akɛ, gbɔmɛi lɛ fɛɛ ye ni amɛtɔrɔ waa diɛŋtsɛ!

No sɛɛ lɛ Yesu kɛɛ ekaselɔi lɛ akɛ: “Nyɛbuaa fufuji ni eshwɛ lɛ anaa, koni nɔ ko akalaaje.” Beni amɛfee nakai lɛ, fufuji ni shwɛ yɛ niyenii ni amɛye lɛ shishi lɛ yimɔ kafui 12! Mateo 14:13-21; Marko 6:30-44; Luka 9:10-17; Yohane 6:1-13.

▪ Mɛni hewɔ ni Yesu taoɔ he ko ni yɔɔ banee kɛha ebɔfoi lɛ?

▪ Nɛgbɛ Yesu kɛ ekaselɔi lɛ tee, ni mɛni hewɔ ni amɛnaaa hejɔɔmɔ ni amɛtaoɔ lɛ?

▪ Beni je na lɛ, mɛni ekaselɔi lɛ bi ni efee, shi mɛɛ gbɛ nɔ Yesu tsu gbɔmɛi lɛ ahiamɔ nii ahe nii yɛ?