Yitso 95

Gbalamlitsemɔ kɛ Suɔmɔ Kɛha Gbekɛbii Ahe Nikasemɔi

YESU kɛ ekaselɔi lɛ nyiɛ gbɛ kɛmiiya Yerusalem ni amɛyaye afi 33 Ŋ.B. Hehoo lɛ. Amɛfo Yordan Faa lɛ ni amɛtsɔ gbɛ ni tsɔɔ Perea kpokpaa lɛ nɔ lɛ nɔ. Otsii fioo ni eho lɛ, no mli lɛ Yesu yɛ Perea, shi atsɛ lɛ kɛbaho Yudea ejaakɛ enaanyo Lazaro bɛ hewalɛ. Beni eyɔɔ Perea lɛ, Yesu kɛ Farisifoi lɛ wie gbalamlitsemɔ he, ni agbɛnɛ amɛyawo nakai sane lɛ nɔ ekoŋŋ.

Farisifoi lɛ hiɛ jwɛŋmɔi sɔrɔtoi yɛ gbalamlitsemɔ he. Mose kɛɛ akɛ abaanyɛ ashwie yoo kɛji “hiɛgbejianii ko yɛ ehe.” Mɛi komɛi heɔ yeɔ akɛ enɛ kɔɔ jeŋba ni he tseee pɛ he. Shi mɛi krokomɛi susuɔ akɛ tɔmɔi bibii fata “hiɛgbejianii ko” lɛ he. No hewɔ lɛ Farisifoi lɛ ba koni amɛbaka Yesu, ni amɛbi lɛ akɛ: “Ani eja akɛ nuu shwieɔ eŋa yɛ sane fɛɛ sane hewɔ?” Amɛhiɛ ka nɔ akɛ nɔ fɛɛ nɔ ni Yesu baakɛɛ lɛ baaha ena sane yɛ Farisifoi ni hiɛ jwɛŋmɔ kroko yɛ he lɛ ahiɛ.

Yesu kɛ nilee tsu sanebimɔ lɛ he nii, ni etsɔɔɔ adesa ko jwɛŋmɔ yɛ he, shi moŋ etsɛ bɔ ni ato gbalashihilɛ shishi kwraa kɛjɛ shishijee lɛ sɛɛ. Ebi akɛ: “Ani nyɛkaneko akɛ mɔ ni bɔ gbɔmɔ kɛjɛ shishijee lɛŋ lɛ, nuu kɛ yoo ebɔ amɛ? Ni ekɛɛ: ‘Enɛ hewɔ ni nuu aaashi etsɛ kɛ enyɛ ni eeekpɛtɛ eŋa he, ni amɛyi enyɔ lɛ fɛɛ amɛaatsɔ heloo kome.’ Belɛ agbɛnɛ amɛjeee mɛi enyɔ dɔŋŋ, shi moŋ heloo kome; no hewɔ lɛ, nɔ ni Nyɔŋmɔ eŋɔtsa lɛ, akaha gbɔmɔ miigbala mli.”

Yesu tsɔɔ akɛ, Nyɔŋmɔ shishijee yiŋtoo ji ni gbalashihilɛ mli hefatalɔi lɛ kɛ amɛhe akpɛtɛ amɛhe gbagbalii ni amɛkatse gbala mli. Ni Farisifoi lɛ here nɔ akɛ, kɛji nakai ni lɛ, “mɛɛ hewɔ ni Mose wo kita akɛ aha yooshwiemɔ wolo ni ashwie lɛ lɛ mɔ?”

Ni Yesu ha amɛ hetoo akɛ: “Nyɛtsuiwalɛ hewɔ ni Mose ha nyɛ hegbɛ akɛ nyɛshwie nyɛŋamɛi lɛ; shi shishijee lɛŋ lɛ, ebɛ nakai.” Hɛɛ, beni Nyɔŋmɔ to anɔkwa shishitoo tɛ kɛha gbalashihilɛ lɛ shishi yɛ Eden trom lɛ mli lɛ, etooo gbalamlitsemɔ he gbɛjianɔ ko.

Yesu tee nɔ ni ekɛɛ Farisifoi lɛ akɛ: “Shi miikɛɛ nyɛ akɛ: Mɔ fɛɛ mɔ ni jeee ajwamaŋbɔɔ [kɛjɛ Hela, por·neiʹa mli] hewɔ jɛ ni eeeshwie eŋa ni eyawɛ yoo kroko lɛ, efite gbala.” Enɛ hewɔ lɛ etsɔɔ akɛ por·neiʹa, ni ji bɔlɛnamɔ mli jeŋba shara pɛ ji nɔdaamɔ nɔ ni Nyɔŋmɔ kpɛlɛɔ nɔ kɛhaa gbalamlitsemɔ.

Akɛni ekaselɔi lɛ yoo akɛ gbalashihilɛ ji wekukpaa ko ni esa akɛ ehi shi kɛya naanɔ ni enɛ pɛ nɔ adamɔɔ atseɔ gbala mli hewɔ lɛ, no tsirɛ amɛ ni amɛkɛɛ: “Kɛji nɛkɛ nuu kɛ eŋa sane yɔɔ lɛ, belɛ ehiii akɛ aaawɛ yoo mɔ.” Ŋwanejee ko bɛ he akɛ esa akɛ mɔ ko ni miisusu gbalashihilɛ he lɛ asusu bɔ ni gbalashihilɛ ekomefeemɔ lɛ hiɔ shi kɛyaa naanɔ lɛ hu he!

Yesu tee nɔ ni ewie oshijayeli he. Etsɔɔ mli akɛ afɔɔ gbekɛbii hii komɛi osaii, ni amɛnyɛɛɛ amɛbote gbalashihilɛ mli akɛni amɛdaraaa yɛ bɔlɛnamɔ mli lɛ hewɔ. Mɛi krokomɛi hu yɛ ni gbɔmɛi feɔ amɛ osaii, ni akɛ yitsoŋwalɛ gbeɔ amɛbɔlɛnamɔ hewalɛ. Yɛ naagbee lɛ, mɛi komɛi yeɔ henumɔ ni amɛnaa akɛ amɛaabote gbalashihilɛ mli ni amɛna bɔlɛnamɔ mli ŋɔɔmɔ lɛ nɔ bɔni afee ni amɛnyɛ amɛtuu amɛhe amɛha nibii ni kɔɔ ŋwɛi Maŋtsɛyeli lɛ he lɛ jogbaŋŋ. Yesu mu naa akɛ: “Mɔ ni aaanyɛ [oshijayeli] mli amɔ lɛ, ha emɔ mli.”

Agbɛnɛ gbɔmɛi bɔi amɛbii bibii lɛ kɛ Yesu ŋɔɔ baa. Shi, kaselɔi lɛ famɔ gbekɛbii lɛ ayii ni amɛbɔi amɛ shwiemɔ, ni ŋwanejee ko bɛ he akɛ akɛni amɛmiitao ni amɛbu Yesu he ni amɛkagba enaa lɛ hewɔ. Shi Yesu kɛɛ: “Nyɛhaa gbekɛbii lɛ abaa miŋɔɔ, ni nyɛkatsia amɛ gbɛ; ejaakɛ mɛnɛɛmɛi anɔ ji Nyɔŋmɔ maŋtsɛyeli lɛ. Lɛlɛŋ, miikɛɛ nyɛ akɛ: Mɔ fɛɛ mɔ ni heee Nyɔŋmɔ maŋtsɛyeli lɛ tamɔ gbekɛ bibioo ko lɛ, eboteŋ mli kwraa.”

Mɛɛ nikasemɔi kpakpai Yesu kɛhaa yɛ biɛ nɛkɛ! Kɛ wɔnine baashɛ Nyɔŋmɔ Maŋtsɛyeli lɛ nɔ lɛ, belɛ esa akɛ wɔkase heshibaa kɛ nikasemɔ su ni gbekɛbii yɔɔ lɛ. Shi Yesu nɔkwɛmɔ nɔ lɛ hu feɔ bɔ ni ehe hiaa waa, titri lɛ kɛha fɔlɔi, akɛ amɛaana be amɛha amɛbii lɛ he nɔkwɛmɔ nɔ. Agbɛnɛ Yesu hole gbekɛbii lɛ ni ejɔɔ amɛ ni ekɛtsɔɔ suɔmɔ ni eyɔɔ kɛha amɛ. Mateo 19:1-15; 5 Mose 24:1; Luka 16:18; Marko 10:1-16; Luka 18:15-17.

▪ Mɛɛ shishinumɔi sɔrɔtoi Farisifoi lɛ hiɛ yɛ gbalamlitsemɔ he, no hewɔ lɛ mɛɛ gbɛ nɔ amɛka Yesu yɛ?

▪ Mɛɛ gbɛ nɔ Yesu tsɔ etsu mɔdɛŋ ni Farisifoi lɛ bɔ ni amɛkɛka lɛ lɛ he nii yɛ, ni mɛni ekɛɛ akɛ no pɛ nɔ adamɔɔ ni anyɛɔ atseɔ gbala mli?

▪ Mɛni hewɔ ni Yesu kaselɔi lɛ kɛɛ akɛ ehiii akɛ mɔ ko aaabote gbalashihilɛ mli lɛ, ni mɛni Yesu jie yi eha amɛ?

▪ Mɛni Yesu tsɔɔ wɔ yɛ bɔ ni ekɛ gbekɛbii bibii lɛ ye ha lɛ mli?