Nɔyelɔ Niiatsɛ ko Kpɛ Yiŋ Gbonyo
OBLANYO niiatsɛ lɛ ji gbɔmɔ kpakpa, eyeɔ mla nɔ, ni esumɔɔ nyɔŋmɔjamɔ. Eyakula Yesu hiɛ ni ebi lɛ akɛ: “Tsɔɔlɔ kpakpa, mɛni mafee ni maná naanɔ wala?”
Yesu ha lɛ hetoo akɛ kɛ́ eeená naanɔ wala lɛ, no lɛ esa akɛ eye Nyɔŋmɔ kitai lɛ anɔ. Beni ebi Yesu koni etsɔɔ lɛ nibii pɔtɛɛ ni esa akɛ efee lɛ, Yesu kɛɛ lɛ akɛ: “Kaagbe gbɔmɔ; kaafite gbala; kaaju; kaaye amale odase; wo otsɛ kɛ onyɛ; kɛ suɔmɔ onaanyo gbɔmɔ tamɔ bɔ ni osumɔɔ bo diɛŋtsɛ ohe lɛ.” Enɛɛmɛi fata mlai ni he hiaa waa ni yɔɔ mla ni akɛha Mose lɛ mli lɛ ahe. Kɛkɛ ni nuu lɛ kɛɛ akɛ: “Enɛɛmɛi fɛɛ lɛ miye nɔ kɛjɛ migbekɛbiiashi; mɛni shwɛɔ mi lolo?”—Mateo 19:16-20.
Yesu ‘sumɔ lɛ,’ ni ekɛɛ akɛ: “Eshwɛo nɔ kome: yaa ni oyahɔɔ nii fɛɛ ni oyɔɔ, ni oŋɔha ohiafoi, ni ooona jwetri yɛ ŋwɛi; . . . ni oba obanyiɛ misɛɛ.”—Marko 10:17-21.
Oona kɛ onaaa lɛ, ehe ebahia ní oblanyo nɔyelɔ lɛ akpɛ eyiŋ yɛ sane wulu ko he. Mɛni ebaafee? Ani ebaajɛ esuɔmɔ mli eha heloonaa nii babaoo ni eyɔɔ lɛ aŋmɛɛ lɛ koni enyiɛ Yesu sɛɛ, loo ebaasumɔ ni ebaa yi? Ani ebaabɔ jwetrii eha ehe yɛ shikpɔŋ lɛ nɔ loo ebaabɔ jwetrii eha ehe yɛ ŋwɛi? Eeenyɛ efee akɛ enɛ bafee yiŋkpɛɛ ni wa kɛha lɛ. Eji anɔkwale akɛ esumɔɔ ni wekukpaa kpakpa ahi ekɛ Nyɔŋmɔ teŋ, ejaakɛ eye Mla lɛ nɔ, ni ebi ní atsɔɔ lɛ nɔ kroko ni esa akɛ efee koni Nyɔŋmɔ akpɛlɛ enɔ. Mɛɛ yiŋ ekpɛ? “Eyiŋ etee kɛ dɔlɛ, ejaakɛ eyɛ nii babaoo.”—Marko 10:22.
Yiŋ ni oblanyo nɔyelɔ lɛ kpɛ lɛ ji yiŋkpɛɛ gbonyo. Eji enyiɛ Yesu sɛɛ ni eye lɛ anɔkwa kulɛ, enine baashɛ nɔ ni etaoɔ lɛ nɔ—naanɔ wala. Ahaaa wɔle nɔ ni ba oblanyo nɛɛ nɔ. Shi wɔle akɛ afii nyɔŋmai ejwɛ sɛɛ lɛ, Roma asraafoi lɛ kpata Yerusalem kɛ Yudea maŋ lɛ fã kpotoo hiɛ. Yudafoi babaoo ajwetrii kɛ amɛwala ŋmɛɛ amɛ.
Ákɛ mɛi ni tamɔɔɔ oblanyo nɔyelɔ lɛ, bɔfo Petro kɛ kaselɔi krokomɛi lɛ kpɛ yiŋ kpakpa. ‘Amɛshĩ amɛnii fɛɛ’ ni amɛnyiɛ Yesu sɛɛ. Amɛná yiŋkpɛɛ nɛɛ he sɛɛ waa! Yesu kɛɛ amɛ akɛ amɛbaaná nii babaoo ni fa kwraa fe nɔ ni amɛshi lɛ. Kɛfata he lɛ, amɛbaaná naanɔ wala. Amɛshwaaa amɛhe kɔkɔɔkɔ akɛ amɛkpɛ yiŋ ni tamɔ nɛkɛ.—Mateo 19:27-29.
Wɔ fɛɛ wɔkpɛɔ wɔyiŋ daa yɛ shihilɛ mli—ekomɛi yɛ hiɛdɔɔ ni ekomɛi hu bɛ hiɛdɔɔ. Mɛɛ ŋaa Yesu wo yɛ yiŋkpɛi nɛɛ ahe? Ani okɛ eŋaawoo lɛ baatsu nii? Kɛ́ ofee nakai lɛ, obaaná he sɛɛ babaoo. Agbɛnɛ nyɛhaa wɔsusua bɔ ni wɔɔfee wɔnyiɛ Yesu sɛɛ ní wɔná ewiemɔi lɛ ahe sɛɛ lɛ he.