“Enɛ Ji Migbɔmɔtso Lɛ”
“NYƐHEA nyɛyea! Enɛ ji migbɔmɔtso lɛ.” (Mateo 26:26)
Nɛkɛ wiemɔi nɛɛ amli Yesu Kristo kɛ aboloo akpiti ha ebɔfoi lɛ yɛ yɛ be mli ni etoɔ Nuŋtsɔ lɛ Gbɛkɛnaashi Niyenii lɛ he gbɛjianɔ lɛ. Shi mɛni ekɛ wiemɔi, “Enɛ ji migbɔmɔtso lɛ” tsɔɔ?
NƐKƐ sanebimɔ nɛɛ hetoohamɔ he hiaa Roma Katolekbii, ejaakɛ Yesu wiemɔi lɛ ji amɛtsɔɔmɔ akɛ aboloo lɛ tsɔ heloo diɛŋtsɛ lɛ shishitoo. Taakɛ hemɔkɛyeli nɛɛ tsɔɔ lɛ, kɛ Katolekbii miiye Mass lɛ ni amɛmi aboloo lɛ pɛ lɛ, etsɔɔ Kristo gbɔmɔtso loo heloo diɛŋtsɛ. No hewɔ lɛ amɛkɛ New World Translation of the Holy Scriptures lɛ ni tsɔɔ Yesu wiemɔi lɛ ashishi akɛ: “Nyɛhea nyɛyea. Enɛ tsɔɔ migbɔmɔtso lɛ” kpaŋ gbee kwraa. Shishitsɔɔmɔ nɛɛ tsɔɔ akɛ aboloo lɛ feɔ Yesu heloo lɛ he okadi, shi jeee heloo lɛ diɛŋtsɛ. Te shishitsɔɔmɔi nɛɛ ateŋ nɔ ni kɛ shishinumɔ ni ja haa hu?
Hela wiemɔ ni atsɔɔ shishi akɛ “ji” loo “tsɔɔ” lɛ ji e·stinʹ. Eshishinumɔ diɛŋtsɛ tsɔɔ “ji,” shi ebaanyɛ etsɔɔ “damɔ shi kɛha nɔ ko, etsɔɔ nɔ ko” hu. Mɛɛ Shishitsɔɔmɔ ja yɛ kuku nɛɛ mli?
Nɔ ni sa kadimɔ ji Marko 14:22 shishigbɛ niŋmaa ni yɔɔ Spanish-wiemɔ wolo, La Sagrada Escritura, Texto y comentario por Profesores de la Compañía de Jesús, Nuevo Testamento I (Ŋmalɛ Krɔŋkrɔŋ lɛ, Ŋmalɛ kɛ Ehe Wiemɔ, ni Professors of the Company of Jesus, New Testament fee). Wolo nɛɛ wie akɛ: ‘Yɛ wiemɔ he mla naa lɛ, abaanyɛ atsɔɔ shishitsɔɔmɔ lɛ shishi jogbaŋŋ hu akɛ etsɔɔ loo edamɔ shi kɛha tamɔ ji—ni miitsɔɔ nɔ ko diɛŋtsɛ. Akɛ nɔkwɛmɔ nii ni tsɔɔ bɔ ni shishinumɔ lɛ ji damɔ shi kɛha nɔ ko lɛ, abaanyɛ atsɛ 1 Mose 41:26: Ezekiel 5:5; Daniel 7:17; Luka 8:11; Mateo 13:38; 16:18; Galatabii 4:24; Kpojiemɔ 1:20. Ji lɛ shishinumɔ ([eshishinumɔ] nɔ ni akɛtoɔ he) atsɔɔ nɛɛ, taakɛ abaanyɛ ana yɛ tsɔɔmɔi ni abiii he saji ahe wolo, ni saji ni akɛtoɔ nii ahe, loo okadii bɛ mli lɛ amli, kɛ agbɛnɛ yɛ gbɛ ni Mra Be Mli Sɔlemɔ lɛ nu wiemɔ kuku lɛ shishi amɛha lɛ.
Taakɛ nɛkɛ Roma Katolek shishitsɔɔmɔ nɛɛ tsɔɔ yɛ faŋŋ mli lɛ, yɛ wiemɔi ahe mla naa lɛ, abaanyɛ anu Yesu wiemɔ lɛ shishi yɛ gbɛi sɔrɔtoi enyɔ lɛ fɛɛ nɔ. Yɛ anɔkwale mli lɛ, atsɔɔ Hela wiemɔ e·stinʹ shishi akɛ “ni eshishinumɔ tsɔɔ” yɛ hei krokomɛi yɛ Katolek New Jerusalem Bible lɛ mli. (Mateo 12:7) Mɛɛ wiemɔ esa akɛ shishitsɔɔlɔ ko ahala yɛ Mateo 26:26? Akɛni Yesu yɔɔ wala mli lolo yɛ gbɔmɔtso ni yeɔ emuu mli yɛ be mli ni ewie nakai wiemɔi lɛ hewɔ lɛ, aboloo ni ekɛha esɛɛnyiɛlɔi lɛ nyɛŋ afee eheloo diɛŋtsɛ. Agbɛnɛ hu, akɛ egbɔmɔtso ni yeɔ emuu lɛ fɛɛ ha akɛ kpɔmɔ afɔleshaa nɔ. (Kolosebii 1:21-23) No hewɔ lɛ, kuku nɛɛ shishitsɔɔmɔ ni ja ji: “Enɛ tsɔɔ migbɔmɔtso lɛ.” Aboloo akpiti lɛ damɔ shi kɛha Yesu gbɔmɔtso ni aahe akɛsha afɔle aha adesai lɛ.
Kɛji akɛ o-Biblia lɛ po kɛ wiemɔ, “Enɛ ji migbɔmɔtso” lɛ baa lɛ, enɛ akafutu ojwɛŋmɔ. Yesu kɛ wiemɔi ni tamɔ nakai fɔɔ nitsumɔ. Beni ekɛɛ, “Miji tooi lɛ ashinaa lɛ” kɛ “Miji anɔkwa weintso lɛ,” mɔ ko mɔ ko nuuu enɛ shishi akɛ eji shinaa diɛŋtsɛ loo weintso diɛŋtsɛ. (Yohane 10:7; 15:1) Ni beni taakɛ The New Jerusalem Bible lɛ tsɔɔ lɛ, ekɛ kpulu ni wein yɔɔ mli lɛ ha ekaselɔi ni ekɛɛ: “Kpulu nɛɛ ji kpaŋmɔ hee lɛ,” mɔ ko mɔ ko susuuu akɛ kpulu lɛ diɛŋtsɛ ji kpaŋmɔ hee lɛ. (Luka 22:20) Nakai nɔŋŋ hu beni ekɛɛ aboloo lɛ ‘ji’ egbɔmɔtso lɛ, esa akɛ wɔnu shishi akɛ aboloo lɛ ‘miitsɔɔ’ loo edamɔ shi kɛha egbɔmɔtso lɛ.