Enine Shɛ nɔ ni Etsui Shweɔ lɛ Nɔ
ANI otsui shweɔ akɛ ooona ni Mesia Maŋtsɛyeli lɛ miiye shikpɔŋ muu lɛ fɛɛ nɔ? Kɛ nakai lɛ, no lɛ oshweɔ ni osɔleɔ kɛha shikpɔŋ nɔ jɔɔmɔi ni awo shi yɛ he yɛ nakai ŋwɛi Maŋtsɛyeli lɛ shishi lɛ. Ni no lɛ, too otsui shi, ejaakɛ “kɛ nɔ ni ashweɔ lɛ ba lɛ, wala tso ni.”—Abɛi 13:12; Yakobo 5:7, 8.
Aaafee afii 2,000 ni eho nɛ lɛ, nuu ko hi shi yɛ Yerusalem, ni “jalɔ ji lɛ ni esheɔ Nyɔŋmɔ gbeyei” ni atsɛɔ lɛ Simeon. Ená Mesia gbalɛi lɛ amli hemɔkɛyeli, ni “eekwɛ Israel miishɛjemɔ lɛ gbɛ” kɛ tsuishitoo.—Luka 2:25.
Mesia Gbalɛi lɛ Haa Hiɛnɔkamɔ
Yehowa ji mɔ ni kɛ Mesia lɛ he klɛŋklɛŋ gbalɛ lɛ ha—nɔ ni kɛ hiɛnɔkamɔ ha adesai eshafeelɔi ni gboiɔ lɛ. Nyɔŋmɔ tsɔ hiɛ egba “[e]yoo,” loo jeŋ muu fɛɛ gbɛjianɔtoo lɛ, Seshi ni baa he sane efɔ shi.—1 Mose 3:15.
Abale nakai Mɔ lɛ akɛ Abraham seshi, ni Yakob gba ebaa he sane efɔ shi. (1 Mose 22:17, 18; 49:10) Ajie Mesia Maŋtsɛyeli lɛ anunyam lɛ yi waa yɛ lalai lɛ amli. (Lala 72:1-20) Yesaia gba efɔ shi akɛ obalayoo fóro ko baafɔ Seshi lɛ, ni Mika hu gba akɛ abaafɔ lɛ yɛ Betlehem. (Yesaia 7:14; Mika 5:1) Enɛɛmɛi ji Mesia gbalɛi babaoo lɛ fioo komɛi kɛkɛ.
Mesia ko Baaa Lolo!
Agbɛnɛ susumɔ be ni eho lɛ he, ni ofee he mfoniri akɛ Ŋ.B. klɛŋklɛŋ afii oha lɛ miibɛŋkɛ. Mesia lɛ he klɛŋklɛŋ gbalɛ ni Nyɔŋmɔ kɛha lɛ eye afii 4,000 amrɔ nɛɛ. Yudafoi lɛ ena Yehowa sɔlemɔ we lɛ hiɛkpatamɔ, kɛ amɛmaŋ lɛ amaŋfɔ feemɔ, kɛ nom ni aŋɔ amɛ kɛtee Babilon afii 70, kɛ afii 500 kroko hu ni akɛba amɛ shi awo Jeŋmajiaŋbii anɔyelɔi ashishi. Shi kɛlɛ Mesia ko baaa lolo!
Kwɛ bɔ ni Yudafoi Nyɔŋmɔ gbeyeishelɔi lɛ shweɔ Mesia baa lɛ amɛhaa! Jɔɔmɔi baajɛ eŋɔɔ kɛaaba amɛ kɛ majimaji fɛɛ nɔ.
Nuu ni Sheɔ Nyɔŋmɔ Gbeyei
Yudafoi ni sheɔ Nyɔŋmɔ gbeyei ni shweɔ ni amɛsɔleɔ kɛha Mesia lɛ baa lɛ ateŋ mɔ kome ji Simeon, Yehowa anɔkwa tsulɔ ni egbɔ ni yɔɔ Yudea maŋtiase lɛ. Nɔ krɛdɛɛ ko eba Simeon nɔ.
Nyɔŋmɔ efɔse emumɔ krɔŋkrɔŋ lɛ eshwie Simeon nɔ ni ekɛ kpojiemɔ ko duro lɛ. Simeon gboŋ, ja ena Mɔ ni baatsɔ Mesia lɛ dã. Shi gbii kɛ nyɔji abɔ miiho. Simeon miigbɔ, ni enyɛŋ ekpa gbɛ akɛ ebaahi shi be kakadaŋŋ ko dɔŋŋ. Ani Nyɔŋmɔ shi ni ewo lɛ lɛ baaba mli?
Gbi ko (yɛ afii 2 D.Ŋ.B.) lɛ, obalaŋtai ni ji gbalashihilɛ mli hefatalɔi ni hiɛ abifao, jɛ Betlehem amɛba sɔlemɔ we lɛ. Mumɔ krɔŋkrɔŋ lɛ jie kpo etsɔɔ Simeon akɛ, gbi ni emɛ aahu lɛ nɛ. Etee sɔlemɔ we lɛ, he ni ebaana mɔ ni gbalɔi lɛ eŋmala ehe saji lɛ yɛ lɛ. Beni ekɛ oyaiyeli feɔ enii yɛ bɔ ni egbɔmɔtso ni egbɔjɔ lɛ aaanyɛ naa lɛ, ena Yosef, Maria, kɛ gbekɛ lɛ.
Kwɛ miishɛɛ ni Simeon kɛwo gbekɛ Yesu lɛ ehiɛ edɛ! Mɔnɛ baafee Mesia ni awo shi yɛ ehe lɛ—“Yehowa Kristo lɛ.” Simeon hiɛ kaaa nɔ akɛ eeena ni Yesu miitsu E-shikpɔŋ nɔ nitsumɔ lɛ yɛ egbɔlɛ babaoo nɛɛ mli. Kɛlɛ, eŋɔɔ enaa waa akɛ ena lɛ akɛ abifao. Mesia gbalɛi lɛ ebɔi mlibaa. Kwɛ bɔ ni Simeon mii eshɛ ehe eha! Agbɛnɛ etsui baanyɔ emli akɛ eeewɔ yɛ gbele mli kɛyashi gbohiiashitee lɛ aaaba.—Luka 2:25-28, New World Translation.
Simeon Gbalɛ Wiemɔi
Beni Simeon woɔ egbee nɔ ejieɔ Yehowa yi lɛ, wɔnuɔ ni eekɛɛ akɛ: “Agbɛnɛ ha otsulɔ aya, Owura, yɛ owiemɔ lɛ naa, yɛ hejɔlɛ mli; ejaakɛ mihiŋmɛii ena owalaheremɔ lɛ, nɔ ni osaa oma maji fɛɛ ahiɛ lɛ, la ni aaatɛje jeŋmaji lɛ ahiɛ ni eeewo omaŋ Israel hiɛ nyam lɛ.” Yesu tsɛ ni kwɛ lɛ, ni ji Yosef, kɛ E-nyɛ Maria tee nɔ amɛsusu nɛkɛ wiemɔi nɛɛ ahe waa.—Luka 2:29-33.
Simeon hiɛ kpɛ́ beni ejɔɔ Yosef kɛ Maria lɛ, eka shi faŋŋ akɛ eebi Yehowa jɔɔmɔ eeha amɛ yɛ gbekɛ lɛ he gbɛnaa nii ni ka amɛnɔ lɛ he nitsumɔ mli. Kɛkɛ ni nuumo lɛ hiɛ badɔ. Ni ekɛ Maria kome wie ni ekɛfata he akɛ: “Naa, akɛ mɔnɛ edamɔ shi eha mɛi pii ashigbeemɔ kɛ shitee yɛ Israel, kɛ okadi ni awieɔ ashiɔ; ni bo diɛŋtsɛ hu tsi aaagbu osusuma mli, ni ajie tsuii pii asusumɔi akpo.”—Luka 2:34, 35.
Nɔ ni Simeon Kɛɛ Maria
Bo lɛ susumɔ bɔ ni Maria nu he eha lɛ he okwɛ. Te Simeon tsɔɔ tɛŋŋ? Mɛi komɛi baakpɛlɛ Kristo nɔ ni abaahole amɛnɔ kɛaajɛ amɛshihilɛ ni eba shi momo lɛ mli. Shi, mɛi krokomɛi baakpoo lɛ, ni amɛnaji aaatɔtɔ yɛ ehewɔ ni amɛaagbee shi. Taakɛ atsɔ hiɛ agba afɔ shi lɛ, Yesu batsɔ tɛmɔtɛ kɛha Yudafoi babaoo. (Yesaia 8:14; 28:16) Simeon wiemɔi lɛ etsɔɔɔ akɛ klɛŋklɛŋ lɛ, Israelbii aŋkroaŋkroi lɛ baagbee shi yɛ hemɔkɛyeli ni amɛbɛ lɛ hewɔ, ni no sɛɛ lɛ amɛaate shi ekoŋŋ yɛ hemɔkɛyeli mli kɛtsɔ Yesu nɔkpɛlɛmɔ nɔ. Shi moŋ, bɔ ni mɛi baafee amɛnii yɛ ehe lɛ baafee sɔrɔto yɛ aŋkroaŋkroi fɛɛ agbɛfaŋ, ni eeejie tsuii pii asusumɔi akpo ni no kɛ Nyɔŋmɔ kojomɔ baaba amɛnɔ kɛha ekpakpa loo efɔŋ. Ebaatsɔ okadi, loo hegbuɔgbee nɔ̃ eha mɛi ni heee yeee lɛ. Abaahole mɛi krokomɛi anɔ kɛjɛ gboimɔ ni amɛgboi yɛ tɔmɔi kɛ eshai amli lɛ mli kɛtsɔ hemɔkɛyeli ni amɛaana yɛ emli lɛ nɔ, koni amɛna jalɛ shidaamɔ kpakpa yɛ Nyɔŋmɔ hiɛ. Bɔ ni mɛi baafee amɛnii amɛha yɛ Mesia lɛ he lɛ baatsɔɔ nɔ ni yɔɔ amɛtsuii amli.
Ni nɔ ni Simeon wie akɛ: “Ni bo diɛŋtsɛ hu tsi aaagbu osusuma mli” lɛ hu? Ŋmalɛ ko kwraa bɛ ni tsɔɔ akɛ akɛ tsi diɛŋtsɛ gbu Maria mli. Kɛlɛ, mɛi babaoo ni baakpoo Yesu lɛ baahao lɛ. Ni kwɛ bɔ ni Maria baapiŋ eha akɛ eeena ni akala Yesu akpɛtɛ tso nɔ! Enɛ tamɔ nɔ ni akɛ tsi egbu emli.
Simeon kɛ Mesia Gbalɛi Tsu Nii
Nyɔŋmɔ mumɔ lɛ tsirɛ Simeon ni ekɛ Mesia gbalɛi lɛ ato Yesu he. Simeon baanyɛ egbo yɛ toiŋjɔlɛ, loo hejɔlɛ mli, ‘ejaakɛ ehiŋmɛii ena Nyɔŋmɔ yiwalaheremɔ ni E-saa ema maji fɛɛ ahiɛ lɛ, la ni aaatɛje jeŋmaji lɛ ahiɛ ni eeewo E-maŋ Israel hiɛ nyam lɛ.’ (Luka 2:30-32) Kwɛ bɔ ni enɛ kɔɔ Yesaia gbalɛ wiemɔi lɛ ahe jogbaŋŋ ehaa!
Nakai gbalɔ lɛ gba efɔ shi akɛ: “Ajie Yehowa anunyam lɛ kpo, ni heloo fɛɛ tswɛm ana.” “Shi moŋ mi [Yehowa] ŋɔo [Mesia lɛ] mifee jeŋmaji lɛ hu ala, koni otsɔ miyiwalaheremɔ kɛyashi shikpɔŋ lɛ naagbee he lɛ.” (Yesaia 40:5; 42:6; 49:6; 52:10) Kristofoi a-Hela Ŋmalɛi lɛ kɛ anɔkwa saji diɛŋtsɛ eye he odase kɛjɛ nakai beaŋ kɛbaa akɛ Mesia, Yesu Kristo, ji anɔkwa la kɛha jeŋmaji lɛ, Mɔ ni baajie mumɔŋ hiɛhaa nɔ, ni ji mumɔŋ duŋ lɛ ni ekɛ yiwalaheremɔ abaha gbɔmɛi lɛ.
Nyɔŋmɔ Wiemɔ lɛ ewieee nɔ ko yɛ nuumo Simeon he dɔŋŋ. Eka shi faŋŋ akɛ egbo dani Kristo gbéle gbɛ kɛha ŋwɛi shihilɛ. No hewɔ lɛ, etsɛŋ ni abaatee Simeon shi kɛba wala mli yɛ shikpɔŋ nɛɛ nɔ. Mɛɛ miishɛɛ, lɛ—kɛ bo—baanyɛ ana nɛkɛ yɛ jeŋ hee lɛ mli yɛ Nyɔŋmɔ Mesia Maŋtsɛyeli lɛ shishi!