Sanebimɔi ni Jɛ Kanelɔi Adɛŋ
Mɛɛ su esa akɛ ajie lɛ kpo yɛ Kristofoi abaptisimɔ shishi?
Sanebimɔ ni yɔɔ miishɛɛ waa nɛ, ejaakɛ eyɛ mli akɛ abaptisi wɔ kanelɔi lɛ ateŋ mɛi babaoo momo moŋ, shi ekɔɔ amɛhe, taakɛ ekɔɔ mɛi ni abaptisiɔ amɛ lɛ ahe lɛ. Klɛŋklɛŋ lɛ, nyɛhaa wɔwiea mɛi ni abaptisiɔ amɛ, ni amɛnaa numiimɔ diɛŋtsɛ lɛ ahe. Mɛni esa akɛ efee amɛsu?
Yesu kɛɛ esɛɛnyiɛlɔi lɛ yɛ Mateo 28:19, 20 akɛ amɛya ni amɛyafee gbɔmɛi ekaselɔi, ni amɛtsɔɔ amɛ nii ni amɛbaptisi amɛ. Ewieee baptisimɔ he akɛ niiashikpamɔ ko ni henumɔ yɔɔ mli waa, ákɛ nifeemɔ ko ni jɛɔ kanyamɔ ko mli kɛbaa trukaa. Eji gbɛ ni hiɛdɔɔ yɔɔ he, ni mɔ ko kɔɔ, taakɛ wɔnaa yɛ Yesu nɔkwɛmɔ nɔ lɛ mli lɛ. Luka 3:21 kɛɔ akɛ: “Abaptisi Yesu hu; ni beni esɔleɔ lɛ, ŋwɛi gbele.” Hɛɛ, wɔ Nɔkwɛmɔ Nɔ lɛ bu baptisimɔ akɛ hiɛdɔɔ sane, ni esɔle yɛ he. Wɔnyɛŋ wɔfee ehe mfoniri ni eefee kunimyeli okadi ko yɛ be mli ni awo enɔ kɛjɛ nu lɛ mli lɛ sɛɛ, ni ehole eniji anɔ kɛtee ŋwɛi, aloo ni eebolɔ kɛ oshebɔɔ wiemɔi, eyɛ mli akɛ mɛi komɛi efee nibii tamɔ enɛɛmɛi yɛ bei fioo ni eho nɛɛ amli. Dabi, Yohane Baptisilɔ lɛ pɛ fata ehe yɛ jɛmɛ, ni Yesu tsɔ ehe kɛtee e-Tsɛ lɛ ŋɔɔ yɛ sɔlemɔ mli.
Shi, Biblia lɛ etsɔɔɔ akɛ esa akɛ baptisimɔ afee nifeemɔ ko ni biɔ hiɛ-mɔbɔmɔbɔ feemɔ aloo hiɛ ni aaatũ kɛ hiɛdɔɔ, ni biɔ shidaamɔ pɔtɛɛ ko aloo wiemɔi komɛi ni abaakɛɛ yɛ naabu beni abaptisiɔ mɔ lɛ, taakɛ Kristendom sɔlemɔi komɛi biɔ ŋmɛnɛ lɛ. Bo lɛ, susumɔ Pentekoste gbi lɛ, beni Yudafoi kɛ mɛi ni etsake kɛtee Yuda jamɔ mli lɛ ateŋ mɛi akpei abɔ kɛ amɛhe ha kɛha Kristofoi abaptisimɔ lɛ he okwɛ. Amɛkase Nyɔŋmɔ Mla lɛ momo, ni amɛkɛ lɛ ebote wekukpaa ko mli. No hewɔ lɛ nɔ ni ehe hiaa ni amɛfee ji ni amɛbale Mesia lɛ, ni ji Yesu, ni amɛkpɛlɛ enɔ. Kɛ amɛfee nakai lɛ, abaanyɛ abaptisi amɛ.
Bɔfoi lɛ Asaji 2:41 bɔɔ amaniɛ akɛ: “Kɛkɛ ni mɛi ni hé ewiemɔ lɛ kpɛlɛ yɛ tsuijurɔ naa lɛ, abaptisi amɛ.” Biblia shishitsɔɔmɔ ni Weymouth fee lɛ kaneɔ akɛ: “No hewɔ lɛ, abaptisi mɛi ni kɛ miishɛɛ kpɛlɛ ewiemɔ lɛ nɔ lɛ.” Amɛmli fili amɛ yɛ Mesia lɛ he adafitswaa ni yɔɔ miishɛɛ lɛ he, ni eka shi faŋŋ akɛ nakai mlifilimɔ lɛ tsa nɔ kɛtee baptisimɔ, ni ji baptisimɔ ni ŋwanejee ko bɛ he akɛ afee yɛ mɛi ohai abɔ ni kɛ miishɛɛ miikwɛ lɛ ahiɛ lɛ mli diɛŋtsɛ. No mli lɛ ŋwɛibɔfoi ni yɔɔ ŋwɛi lɛ po miikwɛ ni amɛmli miifili amɛ yɛ he. Kaimɔ Yesu wiemɔi lɛ akɛ: “Nakai nɔŋŋ, miikɛɛ nyɛ akɛ, miishɛɛ baa yɛ Nyɔŋmɔ bɔfoi lɛ ahiɛ yɛ eshafeelɔ kome ni tsakeɔ etsui lɛ hewɔ.”—Luka 15:10.
Gbɛi sɔrɔtoi yɛ ni wɔteŋ mɔ fɛɛ mɔ baanyɛ atsɔ nɔ ajie hiɛdɔɔ kɛ miishɛɛ ni yɔɔ baptisimɔ mli lɛ kpo. Yɛ sɔlemɔi komɛi amli lɛ, mɛi ni abaptisiɔ amɛ lɛ woɔ atadei yɛji loo ediji kakadaji. Ŋmalɛ mli sɛɛfimɔ ko bɛ kɛha nɛkɛ taomɔ nii nɛɛ. Shi kɛlɛ, atadei ni mɔɔ mɔ kpɛŋŋ aloo etɛŋɔ mɔ kɛji akɛbote nu mli lɛ efeŋ nɔ ni sa kwraa, kɛha hii kɛ yei fɛɛ. Ni taakɛ wɔkadi lɛ, kɛji Kristofonyo hee lɛ je kpo kɛjɛ nu mli lɛ, esaaa akɛ efeɔ ninefɔɔ okadii krɛdɛɛi komɛi aloo efeɔ enii bɔ ni baaha mɛi ana lɛ tamɔ mɔ ko ni eye kunim kpele ko. Kristofoi anyɛmifeemɔ ni eshwɛ lɛ fɛɛ naa miishɛɛ waa akɛ abaptisi mɔ hee nɛɛ. Esa akɛ enu he akɛ nɛkɛ hemɔkɛyeli kpojiemɔ nɛɛ ji shishijee nanefaa kɛkɛ, yɛ gbɛ kakadaŋŋ ni ji anɔkwayeli ni eeehiɛ mli aahu koni ena Nyɔŋmɔ nɔkpɛlɛmɔ lɛ mli.—Mateo 16:24.
Wɔ mɛi ni wɔkwɛɔ baptisimɔ lɛ hu naa nifeemɔ lɛ he mlifilimɔ lɛ mli gbɛfaŋnɔ, titri lɛ kɛji mɔ ni abaptisiɔ lɛ lɛ ji wɔwekunyo aloo mɔ ko ni wɔkɛ lɛ kase Biblia lɛ. Shi, kɛji wɔɔna mli gbɛfaŋnɔ jogbaŋŋ kɛmɔ shi lɛ, no lɛ esa akɛ wɔkɛ mɛi ni abaabaptisi amɛ lɛ fɛɛ abo wiemɔ lɛ fɛɛ toi, ni wɔnu beni amɛhaa saji ni abiɔ amɛ lɛ ahetoo yɛ mɛi fɛɛ ahiɛ lɛ, ni wɔfata he hu yɛ sɔlemɔ lɛ mli. Nakai feemɔ baaye ebua wɔ ni wɔha nɔ ni baptisimɔ lɛ diɛŋtsɛ tsɔɔ lɛ ahi wɔjwɛŋmɔ mli; wɔbaasusu he tamɔ bɔ ni Nyɔŋmɔ susuɔ he. Yɛ baptisimɔ nifeemɔ lɛ diɛŋtsɛ sɛɛ lɛ, wɔ miishɛɛ lɛ biii ni aya kunimyeli ajabeŋ ko, aloo aha mɔ lɛ fɔfɔii ni afĩ, aloo aŋmɛ okpɔlɔ aha mɔ ni abaptisi lɛ lɛ ni akɛwo ehiɛ nyam. Shi moŋ wɔbaanyɛ wɔbɛŋkɛ wɔ nyɛminuu loo nyɛmiyoo hee nɛɛ ni wɔkɛɛ lɛ miishɛɛ ni wɔna yɛ gbɛ ni yɔɔ nyam waa ni ekɔ nɛɛ he, ni wɔkɛ miishɛɛ babaoo ahere lɛ atuu kɛba wɔ Kristofoi anyɛmifeemɔ lɛ mli.
Yɛ kukufoo mli lɛ, belɛ, esa akɛ wɔteŋ mɔ fɛɛ mɔ, kɛ mɛi ni amiiɔ amɛ nu lɛ hu, abu baptisimɔ akɛ eji hiɛdɔɔ sane. Ejeee be ni akɛaajie henumɔi akpo kɛ bolɔmɔ, kɛ okpɔlɔŋmɛɛ, aloo kɛ hoofeemɔ. Shi nakai nɔŋŋ hu ejeee be ni akɛaafee hiɛ mɔbɔmɔbɔ loo akɛaatũ hiɛ kɛ hiɛdɔɔ. Wɔmli baanyɛ afili wɔ yɛ gbɛ ni ja nɔ akɛ mɛi heei ebafata wɔhe yɛ gbɛ ni kɛ mɔ yaa naanɔ wala mli lɛ nɔ. Ni wɔbaanyɛ wɔkɛ mlifilimɔ ahere wɔnyɛmimɛi hii kɛ yei heei nɛɛ atuu.
[Baafa muu mfoniri ni yɔɔ baafa 31]