Hefɛɔ ko ni Kwaaa kɔkɔɔkɔ

“HEFƐO laajeɔ; hefɛo hoɔ eyaa,” nɛkɛ ji bɔ ni lalafolɔ Walter De la Mare wie. Eka shi faŋŋ akɛ nɛkɛ ji bɔ ni ebaalɛ yɛ aklate fɔfɔii fɛfɛji ni yɔɔ mfoniri nɛɛ mli lɛ agbɛfaŋ. Amɛ anuyam lɛ kwaa oya nɔŋŋ.

Kristofonyo kaselɔ Yakobo ŋma akɛ: “[Niiatsɛ lɛ] ebaaŋala tamɔ jwɛiaŋ fɔfɔi. Ejaakɛ hulu teɔ shi kɛ latsaa ni egbiɔ jwɛi lɛ, ni efɔfɔi lɛ kpalaa shwieɔ shi ni efɛo lɛ fiteɔ; nakai nɔŋŋ niiatsɛ lɛ hu hiɛ baakpata yɛ egbɛi lɛ anɔ.”​—Yakobo 1:​10, 11.

Lɛlɛŋ, ninamɔ baanyɛ alaaje kwraa jenamɔ, yɛ nɛkɛ jeŋ ni nɔ ko kwraa bɛ shiŋŋ yɛ mli nɛɛ mli. Kɛfata he lɛ, niiatsɛ​—tamɔ mɛi krokomɛi fɛɛ ji lɛ​—‘hiɔ shi be kukuoo kɛkɛ, tamɔ fɔfɔi.’ ( Hiob 14:​1, 2) Yesu gba abɛbua ko ni kɔɔ nuu ko ni bɛ deka kwraa ni eebua nii babaoo naa bɔni afee ni enyɛ eta shi ni ejɔɔ ehe ni eye ŋɔɔmɔ lɛ he. Shi beni esusu akɛ agbɛnɛ ena nɔ fɛɛ nɔ ni he hiaa kɛha shihilɛ mli miishɛɛnamɔ lɛ, nɔŋŋ kɛkɛ ni egbo. Yesu bɔ kɔkɔ akɛ: “Nakai mɔ ni bɔɔ jwetri ehaa lɛ diɛŋtsɛ ehe, shi ejeee niiatsɛ yɛ Nyɔŋmɔ gbɛfaŋ lɛ yɔɔ.”​—Luka 12:​16-21.

“Niiatsɛ yɛ Nyɔŋmɔ gbɛfaŋ.” Mɛni Yesu kɛ nakai wiemɔ lɛ tsɔɔ? Gbɔmɔ ni yɔɔ nii yɛ nɛkɛ gbɛ nɔ lɛ yɛ “jwetri . . . yɛ ŋwɛi”​—ni ji gbɛi kpakpa yɛ Nyɔŋmɔ hiɛ. Nɛkɛ jwetri nɛɛ nyɛɛɛ ekwa kɔkɔɔkɔ. (Mateo 6:​20; Hebribii 6:10) Yɛ nɔ najiaŋ ni eeefee tamɔ fɔfɔi ni gbiɔ lɛ, akɛ nuu ni tamɔ nɛkɛ toɔ tso he yɛ Biblia lɛ mli, tso ni yi baai gbiii. Ni amaa nɔ mi ahaa wɔ akɛ, “nɔ fɛɛ nɔ ni efeɔ lɛ shwereɔ.”​—Lala 1:​1-3, 6.