Yesu Shihilɛ Kɛ Esɔɔmɔ Nitsumɔ

Shiwoo Gbekɛ Lɛ

NI AMƐAAKU sɛɛ amɛya Nazaret lɛ, Yosef kɛ Maria hi shi yɛ Betlehem. Ni beni Yesu ye gbii kpaanyɔ lɛ, amɛha afo lɛ ketia taakɛ Nyɔŋmɔ Mla ni ekɛha Mose Iɛ fa lɛ. Nɔ ni afɔɔ feemɔ yɛ faŋŋ mli hu ji ni awo gbekɛ nuu lɛ gbɛi yɛ gbi ni ji kpaanyɔ lɛ nɔ. No hewɔ lɛ, amɛtsɛ amɛbi lɛ akɛ Yesu, taakɛ bɔfo Gabriel fã kɛtsɔ hiɛ akɛ amɛtsɛ lɛ lɛ.

Nɔ ni fe nyɔŋ kome ho, ni Yesu baye gbii 40. Nɛgbɛ ji he ni efɔlɔi lɛ kɛ lɛ tee agbɛnɛ? Amɛkɛ lɛ tee Yerusalem sɔlemɔwe lɛ, ni kɛ amɛteŋ jɛkɛmɔ aaafee shitooi fioo ko lɛ. Taakɛ Nyɔŋmɔ Mla ni ekɛha Mose lɛ tsɔɔ lɛ, kɛ yoo ko fɔ ni ebinuu ye gbii 40 lɛ, esa akɛ nyɛ lɛ kɛ hetsuumɔ afɔleshaa aba sɔlemɔwe lɛ.

Maria fee nakai. Ni ekɛ loofɔji bibii enyɔ ba akɛ efɔleshaa nii. Enɛ tsɔɔ akɛ Yosef kɛ Maria jeee niiatsɛmɛi tsɔ. Mose Mla lɛ tsɔɔ ákɛ akɛ toobi ni jara wa fe loofɔji aha. Shi kɛji akɛ nyɛ lɛ nyɛŋ ahe enɛ lɛ, okpoi bibii enyɔ baahi.

Beni amɛshɛɔ sɔlemɔwe lɛ pɛ kɛkɛ ni nuumo ko he Yesu ehiɛ lɛ. Atsɛɔ Iɛ Simon. Nyɔŋmɔ ejie lɛ kpo etsɔɔ lɛ akɛ egboŋ ja ena Yehowa shiwoo Kristo lɛ aloo Mesia lɛ dã. Beni Simon ba sɔlemɔtsu Iɛ mli yɛ nɛkɛ gbi nɛɛ nɔ lɛ, mumɔ krɔŋkrɔŋ lɛ kpala lɛ kɛtee gbekɛ Yesu ni Maria hiɛ lɛ lɛ masɛi.

Beni Simon he Yesu pɛ kɛkɛ ni eda Nyɔŋmɔ shi akɛ: ‘Oye oshiwoo lɛ nɔ, ejaakɛ mikɛ mihiŋmɛi ena nɔ ni abaatsɔ nɔ akɛ yiwalaheremɔ aba ni osaa oto lɛ. Efee Yosef kɛ Maria naakpɛɛ waa diɛŋtsɛ beni amɛnu enɛ. Kɛkɛ ni Simon jɔɔ amɛ ni ekɛɛ Maria akɛ “akɛ ebinuu lɛ edamɔ shi kɛha mɛi pii ashigbeemɔ kɛ shitee yɛ lsrael,” ni akɛ awerɛho baatsurɔ esusuma mli tamɔ tsi ni naa ba.

Mɔ ni yɔɔ jɛmɛ yɛ nɛkɛ be nɛɛ mli ji gbalɔyoo ni atsɛɔ lɛ Hana ni eye afii 84 lɛ. Yɛ anɔkwale mli lɛ, anaa lɛ yɛ sɔlemɔwe lɛ be fɛɛ be. Eba jɛmɛ yɛ nakai ŋmɛlɛtswaa lɛ mli nɔŋŋ ni eje shishi ekɛ shidaa ha Nyɔŋmɔ ni ewie Yesu he etsɔɔ mɛi fɛɛ ni baabo toi lɛ.

Kwɛ miishɛɛ ni nibii ni ba yɛ sɔlemɔwe lɛ kɛha Yosef kɛ Maria! Yɛ anɔkwale mli lɛ, emaa nɔ mi kɛhaa amɛ akɛ gbekɛ lɛ ji Mɔ ni Nyɔŋmɔ ewo shi yɛ ehe lɛ. Luka 2:​21-38; 3 Mose 12:​1-8.

◆ Mɛɛ be mli ebafeɔ faŋŋ akɛ esa akɛ awo Israel gbekɛ nuu gbɛi?

◆ Mɛni ataoɔ yɛ Israel yoo he yɛ be mli ni ebinuu eye gbii 40 lɛ, ni mɛɛ gbɛ nɔ enɛ he nitsumɔ tsɔɔ akɛ Maria lɛ ohiafo ji lɛ?

◆ Namɛi yoo mɔ ni Yesu ji yɛ nɛkɛ be nɛɛ mli lɛ, ni yɛ mɛɛ gbɛ nɔ?