NIKASEMƆ 15
Namɔ Ji Yesu?
Yesu ji mɛi ni ehe gbɛ́i fe fɛɛ lɛ ateŋ mɔ kome. Shi mɛi pii lɛ, Yesu gbɛ́i pɛ amɛle, amɛleee ehe nɔ ko tsɔ, ni mɛi pii hu hiɛ susumɔi srɔtoisrɔtoi yɛ mɔ tuuntu ni eji lɛ he. Mɛni Biblia lɛ kɛɔ yɛ ehe?
1. Namɔ ji Yesu?
Yesu ji ŋwɛibɔfo ko ni yɔɔ hewalɛ waa. Yehowa Nyɔŋmɔ bɔ lɛ, dani ebɔ nibii krokomɛi fɛɛ. Enɛ hewɔ lɛ, atsɛɔ lɛ “bɔɔ nii fɛɛ ateŋ kromɔbi.” (Kolosebii 1:15) Biblia lɛ tsɛɔ Yesu akɛ Nyɔŋmɔ ‘Bi koome,’ ejaakɛ Yehowa kome too pɛ ni bɔ lɛ. (Yohane 3:16) Yesu kɛ e-Tsɛ Yehowa fee ekome kɛtsu nii, ni ewa e-Tsɛ lɛ ni ebɔ nibii krokomɛi fɛɛ. (Kanemɔ Abɛi 8:30.) Ekomefeemɔ ni mli wa yɛ Yesu kɛ Yehowa teŋ lolo. Atsɛɔ lɛ “Wiemɔ lɛ,” ejaakɛ ekɛ anɔkwayeli sɔmɔɔ akɛ Nyɔŋmɔ naawielɔ, ni ekɛ saji kɛ gbɛtsɔɔmɔi ni jɛ Nyɔŋmɔ ŋɔɔ hãa.—Yohane 1:14.
2. Mɛni hewɔ Yesu ba shikpɔŋ lɛ nɔ?
Aaafee afii 2,000 ni eho nɛ lɛ, Yehowa fee naakpɛɛ nɔ ko; etsɔ emumɔ krɔŋkrɔŋ lɛ nɔ ejie Yesu wala kɛjɛ ŋwɛi kɛbawo oblayoo fro ko ni atsɛɔ lɛ Maria lɛ musuŋ. Nɛkɛ gbɛ nɔ atsɔ afɔ Yesu akɛ gbɔmɔ. (Kanemɔ Luka 1:34, 35.) Yesu ba shikpɔŋ lɛ nɔ akɛ Mesia, loo Kristo ni awo ehe shi lɛ, koni ebahere adesai.a Biblia lɛ mli gbalɛi fɛɛ ni kɔɔ Mesia lɛ he lɛ ba mli yɛ Yesu nɔ, ni no hã mɛi na akɛ, lɛ ji “Kristo lɛ, Nyɔŋmɔ hiɛkãalɔ lɛ Bi lɛ.”—Mateo 16:16.
3. Nɛgbɛ Yesu yɔɔ bianɛ?
Be ni Yesu gbo lɛ, atee lɛ shi akɛ mumɔ, ni eku esɛɛ etee ŋwɛi. “Nyɔŋmɔ wó enɔ ni ehã lɛ gbɛhe ni nɔ kwɔ” yɛ jɛmɛ. (Filipibii 2:9) Amrɔ nɛɛ, Yesu yɛ gbɛhe ni nɔ kwɔ waa; Yehowa pɛ nɔ kwɔ fe lɛ.
KASEMƆ PII OFATA HE
Obaana saji krokomɛi ni tsɔɔ mɔ tuuntu ni Yesu ji, kɛ nɔ hewɔ ni ehe hiaa ni okase ehe nii lɛ.
4. Jeee Yesu ji Nyɔŋmɔ Ofe lɛ
Biblia lɛ tsɔɔ akɛ, Yesu ji ŋwɛibɔfo ko ni yɔɔ hewalɛ waa, ni akɛ, eyɛ e-Nyɔŋmɔ kɛ e-Tsɛ Yehowa shishi. Mɛni hewɔ wɔkɛɔ nakai? Jiemɔ VIDIO lɛ koni ona bɔ ni Biblia lɛ tsɔɔ akɛ esoro Yesu yɛ Nyɔŋmɔ Ofe lɛ he.
Ŋmalɛi ni nyiɛ sɛɛ nɛɛ baawa wɔ ni wɔnu wekukpãa ni yɔɔ Yehowa kɛ Yesu teŋ lɛ shishi. Nyɛkanea ŋmalɛi lɛ eko fɛɛ eko, ni nyɛsusua sanebimɔi ni nyiɛ sɛɛ nɛɛ ahe.
Nyɛkanea Luka 1:30-32 lɛ.
Te ŋwɛibɔfo lɛ wie wekukpãa ni yɔɔ Yesu kɛ Yehowa Nyɔŋmɔ, “Mɔ Ni Nɔ Kwɔ Fe Fɛɛ lɛ” teŋ lɛ he ehã tɛŋŋ?
Nyɛkanea Mateo 3:16, 17 lɛ.
Be ni abaptisiɔ Yesu lɛ, mɛni gbee ni jɛ ŋwɛi lɛ kɛɛ?
Kɛ́ okwɛ lɛ, namɔ gbee ni?
Nyɛkanea Yohane 14:28 lɛ.
Yɛ tsɛ kɛ bi teŋ lɛ, namɔ ji onukpa? Namɔ yɔɔ hegbɛ fe enyɛmi?
Yesu tsɛ Yehowa akɛ e-Tsɛ. Mɛni no tsɔɔ wɔ?
Nyɛkanea Yohane 12:49 lɛ.
Kɛ́ okwɛ lɛ, Yesu susuɔ akɛ lɛ nɔŋŋ ji e-Tsɛ lɛ? Te osusuɔ tɛŋŋ?
5. Mɛni tsɔɔ akɛ Yesu ji Mesia lɛ?
Mesia lɛ ji mɔ ni Nyɔŋmɔ ehala ni ehere adesai. Gbalɛi pii yɛ Biblia lɛ mli ni baawa wɔ ni wɔna mɔ ni ji Mesia lɛ. Jiemɔ VIDIO lɛ koni ona gbalɛi komɛi ni ba mli yɛ Yesu nɔ, be ni eba shikpɔŋ lɛ nɔ lɛ.
Nyɛkanea Biblia mli gbalɛi nɛɛ, ni nyɛsusua sanebimɔi ni nyiɛ sɛɛ nɛɛ ahe:
Nyɛkanea Mika 5:2 lɛ kɛna he ni akɛɛ abaafɔ Mesia lɛ yɛ.b
Ani he ni afɔ Yesu yɛ lɛ hã gbalɛ nɛɛ ba mli?—Mateo 2:1.
Nyɛkanea Lala 34:20 kɛ Zakaria 12:10 lɛ kɛna nɔ ni agba yɛ Mesia lɛ gbele lɛ he.
Ani gbalɛi nɛɛ ba mli?—Yohane 19:33-37.
Kɛ́ okwɛ lɛ, Yesu diɛŋtsɛ baanyɛ ehã gbalɛi nɛɛ aba mli?
Mɛni enɛ tsɔɔ bo yɛ Yesu he?
6. Kɛ́ wɔkase Yesu he nii lɛ, wɔbaaná he sɛɛ
Biblia lɛ kɛɛ ehe hiaa waa akɛ wɔbaakase Yesu kɛ nɔ ni Nyɔŋmɔ sumɔɔ ni etsu lɛ he nii. Nyɛkanea Yohane 14:6 kɛ 17:3 lɛ, ni nyɛsusua sanebimɔ nɛɛ he:
Mɛni hewɔ ehe hiaa waa akɛ wɔbaakase Yesu he nii lɛ?
Yesu hã ana gbɛ ni wɔbaanyɛ wɔtsɔ nɔ wɔtsɔ Nyɔŋmɔ naanyo. Etsɔɔ anɔkwale ni kɔɔ Yehowa he lɛ, ni wɔbaanyɛ wɔtsɔ enɔ wɔná naanɔ wala
MƐI KOMƐI KƐƆ AKƐ: “Yehowa Odasefoi heee Yesu nɔ amɛyeee.”
Kɛ́ mɔ ko kɛɛ nakai lɛ, mɛni obaakɛɛ lɛ?
EMLI OTI
Yesu ji ŋwɛibɔfo ko ni yɔɔ hewalɛ waa. Eji Nyɔŋmɔ Bi kɛ Mesia lɛ.
Mɛni Okase?
Mɛni hewɔ atsɛɔ Yesu “bɔɔ nii fɛɛ ateŋ kromɔbi lɛ”?
Mɛni Yesu tsu dani eba shikpɔŋ lɛ nɔ?
Mɛni hewɔ wɔbaanyɛ wɔkɛɛ akɛ Yesu ji Mesia lɛ?
EHE SAJI KROKOMƐI
Obaana saji krokomɛi ni hãa wɔnaa akɛ Yesu ji Mesia lɛ.
“Ani Mesia Lɛ He Gbalɛi Lɛ Tsɔɔ Akɛ Yesu Ji Mesia Lɛ?” (jw.org lɛ nɔ sane)
Obaana kɛji Biblia lɛ tsɔɔ akɛ, Nyɔŋmɔ wo hɔ ni afɔ Yesu tamɔ bɔ ni gbɔmɛi woɔ hɔ ni afɔɔ bii lɛ.
“Mɛni Hewɔ Atsɛɔ Yesu Akɛ Nyɔŋmɔ Bi Lɛ?” (jw.org lɛ nɔ sane)
Obaana nɔ hewɔ ni Triniti tsɔɔmɔ lɛ jeee Biblia tsɔɔmɔ lɛ.
Obaana bɔ ni yoo ko shihilɛ tsake kwraa be ni ená ele nɔ ni Biblia lɛ kɛɔ yɛ Yesu he lɛ.
“Yuda Yoo Ko Tsɔɔ Nɔ Hewɔ Ni Etsake Ejamɔ Lɛ” (Awake!, May 2013)
a Wɔbaana nɔ hewɔ ni ehe hiaa ni ahere adesai, kɛ nɔ ni Yesu fee koni anyɛ ahere wɔ lɛ yɛ nikasemɔ 26 kɛ 27 lɛ mli.
b Kwɛmɔ Saji Krokomɛi 2 lɛ kɛhã gbalɛ ko ni tsɔɔ be tuuntu ni Yesu baajie ehe kpo akɛ Mesia yɛ shikpɔŋ lɛ nɔ.