Namɛi Afɔɔ Amɛ Ehee Lɛ?

ANI gbɔmɛi kpakpai fɛɛ yaa ŋwɛi? Mɛi pii susuɔ nakai, shi Yesu Kristo ekpɛlɛɛɛ nɔ. Yɛ be mli ni ewieɔ etsɔɔ Yudafoi lɛ anukpa Nikodemo, ni ba eŋɔɔ nyɔɔŋ yɛ teemɔŋ lɛ, Yesu kɛɛ lɛ akɛ: “Mɔ ko ekwɔko kɛyako ŋwɛi.”​—Yohane 3:⁠13.

Kɛlɛ, Yesu kɛɛ Nikodemo akɛ be ko baashɛ ni mɛi komɛi baana hegbɛ ni amɛbote ŋwɛi Maŋtsɛyeli lɛ mli. Yesu wie yɛ mɛnɛɛmɛi ahe akɛ: “Kɛji ajɛɛɛ nu kɛ mumɔ mli afɔɔɔ mɔ ko lɛ, enyɛŋ Nyɔŋmɔ maŋtsɛyeli lɛ mli ebote. Nɔ ni ajɛ heloo mli afɔ lɛ, heloo ni; ni nɔ ni ajɛ mumɔ mli afɔ lɛ, mumɔ ni. Ohiɛ akafeeo yaa akɛ mikɛɛo akɛ: Ja ajɛ ŋwɛi afɔ nyɛ lɛ.” Shi Nikodemo naa kpɛ ehe yɛ bɔ ni aaafee afɔ mɔ ko ekoŋŋ lɛ he.​—Yohane 3:​1-9.

Ekolɛ bo hu osusuɔ nɔ ni Yesu taoɔ atsɔɔ nɛɛ he. Ani ewiemɔi lɛ aaanyɛ akɔ tsakemɔi ni baa trukaa ni mɛi ni nuɔ he akɛ Nyɔŋmɔ mumɔ krɔŋkrɔŋ eyimɔ amɛ obɔ lɛ kɛɔ lɛ ahe?

Henumɔi kɛ Jwɛŋmɔ Lɛ

Mɛi komɛi kɛɔ akɛ, kɛ aaanyɛ ale akɛ afɔ mɔ ko ehee lɛ, belɛ nɔ ni he hiaa titri ji ni aaanu mumɔ lɛ hewalɛ he. Shi wɔtsui kɛ wɔjwɛŋmɔ baanyɛ alaka wɔ, titri lɛ kɛji akɛ henumɔ ni mli wa naa wɔ nɔ hewalɛ​—Yeremia 17:⁠9.

William Sargant, mɔ ni pɛiɔ hewalɛ ni henumɔ naa yɛ jwɛŋmɔ lɛ nɔ lɛ mli lɛ tsi bɔ ni ehe hiaa ni “akwɛ he nɔ jogbaŋŋ yɛ hemɔkɛyelii ni anaa yɛ be mli ni henumɔi ete shi, ni eko lɛ wɔ ansɔ lɛ baanyɛ alaka wɔ lɛ” ta. Taakɛ Sargant tsɔɔ lɛ, nɔkwɛmɔ nɔ kome ji shiɛlɔ ni miishiɛ kɛ hɛl-la toigbalamɔ he gbeyeiwoo. Namɔ sumɔŋ akɛ aaafɔ lɛ ehee koni eya ŋwɛi kɛji akɛ kɛ no bɛ mli lɛ belɛ naanɔ piŋmɔ pɛ yɔɔ lɛ? Sargant kɛɔ akɛ yɛ henumɔŋ nɔnyɛɛ ni tamɔ nɛkɛ shishi lɛ, “atsiɔ jwɛŋmɔ kpakpa atoɔ afa, ansɔ lɛ ni buɔ nibii ahe akɔntaa jogbaŋŋ lɛ kpaa nitsumɔ fioo, ni akpɛlɛɔ susumɔi kɛ hemɔkɛyelii heei anɔ ni abiii he sane ko.”​—The Mind Possessed.

No hewɔ lɛ, te mɔ ko aaafee tɛŋŋ ele kɛji akɛ ‘ekpɛlɛ’ sane ni kɔɔ fɔmɔ hee he lɛ nɔ “ni abiii he sane ko”? Anɔkwa nilee gbɛ ji ni wɔha nɔ fɛɛ nɔ ni Nyɔŋmɔ mumɔ krɔŋkrɔŋ lɛ ha Biblia ŋmalalɔi ŋma lɛ akudɔ wɔ. Awoɔ Kristofoi ahewalɛ ni amɛkɛ ‘amɛjwɛŋmɔŋ nyɛmɔ’ aja Nyɔŋmɔ, ni ehe miihia ni amɛna nɔmimaa akɛ nɔ ni amɛheɔ amɛyeɔ lɛ ji anɔkwale.​—Romabii 12:​1, 2; 1 Tesalonikabii 5:⁠21.

Ní aaafɔ mɔ ko ehee lɛ gbeleɔ hegbɛi ni he hiaa fe fɛɛ ni akpa mli aha adesai lɛ ekome naa. Ekɔɔ nibii heei komɛi ni baa ni yɔɔ naakpɛɛ diɛŋtsɛ yɛ Nyɔŋmɔ yiŋtoi ahe nitsumɔ mli lɛ he. Yɛ be mli ni enɛɛmɛi fɛɛ ji anɔkwale lɛ, sanebimɔi komɛi teɔ shi, tamɔ enɛɛmɛi: Namɛi afɔɔ amɛ ehee? Te enɛ baa mli ehaa tɛŋŋ? Mɛɛ gbɛkpamɔi akɛmamɔɔ aŋkroaŋkroi ni tamɔ nɛkɛ lɛ ahiɛ? Ni ani amɛ pɛ abaahere amɛyiwala?

[Mfoniri ni yɔɔ baafa 3]

Nikodemo naa kpɛ ehe yɛ bɔ ni aaafee ni afɔ mɔ ko ehee lɛ he