Nyɔŋmɔ Nɔkeenɔ Ni Fe Fɛɛ Lɛ​—Mɛni Hewɔ Ejara Wa Waa Nakai Lɛ?

NAMƆ KƐ HÃ?

Kɛ́ mɔ ko ni yɔɔ hegbɛ loo mɔ ko ni wɔbuɔ lɛ waa lɛ ke wɔ nɔ ko lɛ, wɔbuɔ nii lɛ akɛ nɔ ko ni jara wa waa. Ni nibii komɛi hu yɛ ni eyɛ mli akɛ shika fioo ko pɛ akɛhé moŋ, shi akɛni wɔwekunyo loo wɔnaanyo ko ni wɔmuɔ wɔfɔ̃ɔ enɔ lɛ ji mɔ ni kɛke wɔ hewɔ lɛ, wɔhiɛ sɔɔ waa. Nakai eji yɛ nɔ ni Russell kɛke Jordan, ni atsĩ etã yɛ sane ni tsɔ hiɛ lɛ mli lɛ gbɛfaŋ. Te enɛ kɔɔ kpɔmɔnɔ lɛ ni akɛhã wɔ akɛ nɔkeenɔ lɛ he ehãa tɛŋŋ?

Klɛŋklɛŋ lɛ, Biblia lɛ kɛɔ akɛ “Nyɔŋmɔ tsu e-Bi koome lɛ kɛba je lɛ mli koni wɔtsɔ enɔ wɔná wala.” (1 Yohane 4:9) Anɔkwa sane nɛɛ hãa nɔkeenɔ nɛɛ bafeɔ nɔ ko ni jara wa waa. Hegbɛ ni Nyɔŋmɔ yɔɔ lɛ nɔ kwɔ fe hegbɛi fɛɛ. Hebri lalatsɛ ko wie yɛ ehe akɛ: “Bo, ni okome too ogbɛi ji Yehowa lɛ, bo ji mɔ ni kwɔ fe fɛɛ yɛ shikpɔŋ lɛ nɔ fɛɛ.” (Lala 83:19) Mɛɛ hegbɛ kpele po eji nɛkɛ akɛ mɔ ko ni nɔ kwɔ tamɔ nɛkɛ baake wɔ nɔ ko!

Nɔ ni ji enyɔ lɛ, Nyɔŋmɔ ji “wɔtsɛ.” (Yesaia 63:16) Mɛni hewɔ wɔkɛɔ nakai? Ejaakɛ lɛ ehã wɔ wala. Kɛfata he lɛ, ekwɛɔ wɔ jogbaŋŋ be fɛɛ be, tamɔ bɔ ni tsɛ ko ni yɔɔ suɔmɔ kwɛɔ ebii lɛ. Be ni Nyɔŋmɔ wieɔ ewebii ni hi shi yɛ blema lɛ ateŋ mɛi komɛi ahe lɛ, ewie akɛ: “Israel ji mibinuu kpakpa lɛ. Lɛ ji misuɔmɔ bi lɛ . . . Mitsui shweɔ lɛ. Bɔ fɛɛ bɔ ni fee lɛ mana lɛ mɔbɔ.” (Yeremia 31:20, Ga Biblia hee) Nakai nɔŋŋ Nyɔŋmɔ nuɔ he ehãa ejálɔi ŋmɛnɛ. Jeee akɛ eji wɔ-Bɔlɔ kɛkɛ, shi moŋ lɛ, eji wɔ-Tsɛ ni yeɔ anɔkwa kɛ wɔ-Naanyo fɛɛ. Ani enɛ hãaa wɔna akɛ, nɔ fɛɛ nɔ ni ekɛbaake wɔ lɛ ji nɔ ko ni jara wa waa?

MƐNI HEWƆ AKƐHÃ?

Wɔbuɔ nibii komɛi ni akɛkeɔ wɔ lɛ akɛ amɛhe hiaa waa, akɛni nikelɔ lɛ jɛ suɔmɔ krɔŋŋ mli efee nakai, shi jeee akɛni eji esɔ̃ lɛ hewɔ. Nikelɔ ni jɛɔ suɔmɔ mli ekeɔ nii lɛ kpaaa gbɛ akɛ abaato lɛ najiaŋ yɛ ejurɔ ni efee lɛ hewɔ.

Akɛni Nyɔŋmɔ sumɔɔ wɔ hewɔ lɛ, ekɛ e-Bi lɛ hã yɛ wɔ hewɔ. Biblia lɛ kɛɔ akɛ: “Enɛ nɔ atsɔ ajie Nyɔŋmɔ suɔmɔ lɛ kpo yɛ wɔgbɛfaŋ, no ji akɛ Nyɔŋmɔ tsu e-Bi koome lɛ kɛba.” Mɛni hewɔ efee nakai? “Koni wɔtsɔ enɔ wɔná wala.” (1 Yohane 4:9) Ani eji Nyɔŋmɔ sɔ̃ akɛ efee nakai? Dabi kwraa! “Kpɔmɔnɔ ni Kristo Yesu wo lɛ” ji Nyɔŋmɔ ‘duromɔ’ lɛ kpojiemɔ.​—Romabii 3:24.

Mɛni hewɔ Nyɔŋmɔ nɔkeenɔ lɛ ji “eduromɔ” lɛ kpojiemɔ lɛ? Biblia lɛ tsɔɔ mli akɛ: “Nyɔŋmɔ jieɔ lɛ diɛŋtsɛ esuɔmɔ lɛ yi ehãa wɔ, akɛ be ni wɔkã he wɔji eshafeelɔi lɛ, Kristo gbo ehã wɔ.” (Romabii 5:8) Suɔmɔ krɔŋŋ ni Nyɔŋmɔ yɔɔ lɛ tsirɛ lɛ ni eye ebua adesai eshafeelɔi ni nii yɔɔ mɔbɔ lɛ. Jeee nɔ ko ni wɔfee wɔhã lɛ lɛ hewɔ ejie suɔmɔ nɛɛ kpo etsɔɔ wɔ lɛ, ni asaŋ wɔnyɛŋ wɔto lɛ najiaŋ hu. Enɔkeenɔ lɛ ji suɔmɔ kpojiemɔ ni fe fɛɛ yɛ yinɔsane mli.

MƐNI MƆ LƐ KƐSHÃ AFƆLE?

Wɔbuɔ nibii komɛi ni akɛkeɔ wɔ lɛ akɛ amɛhe hiaa waa, ejaakɛ ebi ni nikelɔ lɛ kɛ nɔ ko ni jara wa ashã afɔle dã. Kɛ́ mɔ ko hã enɔ ko ni jara wa waa ŋmɛɛ lɛ ni ekɛhã wɔ akɛ nɔkeenɔ lɛ, wɔhiɛ sɔɔ nakai nɔkeenɔ lɛ waa yɛ nɔ ni mɔ lɛ kɛshã afɔle lɛ hewɔ.

Nyɔŋmɔ ‘ŋɔ e-Bi koome lɛ ehã.’ (Yohane 3:16) Mɔ ni ekɛhã wɔ lɛ ji etsui naa bi ni esumɔɔ lɛ waa fe mɔ fɛɛ mɔ. Ehe Nyɔŋmɔ afii babaoo kɛbɔ je lɛ, no mli lɛ, Yesu fata ehe, ni enáa Yesu ‘he miishɛɛ waa daa gbi.’ (Abɛi 8:30, NWT) Yesu ji Nyɔŋmɔ ‘Bi ni esumɔɔ,’ ni ‘eji Nyɔŋmɔ ní anaaa lɛ lɛ henɔ.’ (Kolosebii 1:13-15) Wekukpaa ni yɔɔ gbagbalii ni tamɔ nɛkɛ ehiko nilelɔi enyɔ ateŋ nɛkɛ pɛŋ.

Kɛ̃lɛ, Nyɔŋmɔ ‘kamaaa wɔ lɛ diɛŋtsɛ e-Bi lɛ.’ (Romabii 8:32) Yehowa kɛ enii ni hi fe fɛɛ lɛ hã wɔ. Nɔ ko nɔ ko bɛ ni ekɛke wɔ ni fe enɛ.

ETSU NƆ KO NI HE HIAA WAA HE NII

Wɔbuɔ nibii komɛi ni akɛkeɔ wɔ lɛ akɛ amɛhe hiaa waa, ejaakɛ amɛtsuɔ hiamɔ pɔtɛɛ ko he nii. Akɛ nɔkwɛmɔnɔ lɛ, kɛ́ mɔ ko wo nyɔmɔ ko ehã bo koni anyɛ atsa hela ko ni kulɛ ebaagbe bo lɛ, ekã shi faŋŋ akɛ ohiɛ baasɔ waa diɛŋtsɛ, ejaakɛ kulɛ onyɛŋ owo nakai nyɔmɔ lɛ! Ŋwanejee ko bɛ he akɛ, nikeenii ni tamɔ nɛkɛ lɛ baafee nɔ ko ni jara wa waa, aloo jeee nakai?

“Tamɔ bɔ ni Adam mli ni mɛi fɛɛ gboiɔ yɛ lɛ, nakai nɔŋŋ hu Kristo lɛ mli lɛ, abaahã mɛi fɛɛ hiɛ akamɔ.” (1 Korintobii 15:22) Akɛni wɔji Adam shwiei hewɔ lɛ, wɔ fɛɛ ‘wɔgboiɔ,’ ni wɔnyɛɛɛ wɔjo hela kɛ gbele naa foi, ni asaŋ wɔnyɛɛɛ wɔkpãtã wɔ kɛ Nyɔŋmɔ teŋ koni wɔhenilee akɛbu wɔ fɔ. Ni akɛni wɔyeee emuu hewɔ lɛ, wɔnyɛŋ wɔhã wɔ diɛŋtsɛ loo mɔ ko mɔ ko hiɛ ‘akã.’ Biblia lɛ kɛɔ akɛ: “Mɔ ko mɔ ko nyɛŋ enyɛmi ekpɔ̃, loo ní eeehã Nyɔŋmɔ eyi nii, (ejaakɛ amɛsusuma kpɔ̃mɔnii lɛ jara wa tsɔ̃).” (Lala 49:8, 9) Yelikɛbuamɔ he miihia wɔ waa, ejaakɛ wɔnyɛŋ kpɔmɔnɔ lɛ he jara lɛ wɔwo. Kɛ́ ayeee abuaaa wɔ lɛ, wɔnii baafee mɔbɔ.

Suɔmɔ kpele ni Yehowa yɔɔ lɛ hewɔ lɛ, ewo nyɔmɔ lɛ koni “anyɛ atsa” nakai hela ni kulɛ ebaagbe wɔ lɛ, bɔ ni afee ni kɛtsɔ Yesu nɔ lɛ, “mɛi fɛɛ hiɛ akamɔ.” Mɛɛ gbɛ nɔ kpɔmɔnɔ lɛ tsuɔ yiŋtoo nɛɛ he nii? Biblia lɛ kɛɔ akɛ, “Yesu lá lɛ tsuɔ wɔhe kɛjɛɔ esha fɛɛ esha mli.” Hɛɛ, hemɔkɛyeli ni wɔɔná yɛ Yesu lá ni efɔse eshwie shi lɛ mli lɛ hãa akɛ wɔhe eshai keɔ wɔ, ni egbeleɔ gbɛ kɛhãa wɔ koni wɔná naanɔ wala. (1 Yohane 1:7; 5:13) Ni mɛni kpɔmɔnɔ lɛ baatsu ahã wɔsuɔlɔi ni egboi lɛ? “Akɛni gbele tsɔ gbɔmɔ nɔ kɛba hewɔ lɛ, gbohiiashitee hu baatsɔ gbɔmɔ [Yesu] nɔ kɛba.”​—1 Korintobii 15:21.a

Yesu afɔleshaa lɛ ji nikeenii ko ni mɔ ko ni nɔ kwɔ fe fɛɛ kɛhã, loo nɔ ni ajɛ suɔmɔ kpele mli akɛhã. Mɔ ko kwraa bɛ ni kɛ nɔ ko ni jara wa fe nɔ ni Yehowa Nyɔŋmɔ kɛke wɔ lɛ eke wɔ dã. Ni nikeenii ko bɛ ni tsuɔ hiamɔ wulu ko he nii fe Yesu afɔleshaa ni hãa wɔyeɔ wɔhe kɛjɛɔ esha kɛ gbele mli lɛ. Hɛɛ, nikeenii ko kwraa bɛ ni abaanyɛ akɛto kpɔmɔnɔ lɛ he.