Yitso 18

Yohane Nɔ Gbɔ, Yesu Shwere

BENI aye afi 30 Ŋ.B. Hehoo lɛ yɛ agbiɛnaa be mli lɛ sɛɛ lɛ, Yesu kɛ ekaselɔi lɛ shi Yerusalem. Shi, amɛkuuu amɛsɛɛ amɛyaaa amɛshiai yɛ Galilea shi moŋ amɛtee Yudea kpokpai lɛ anɔ, yɛ he ni amɛbaptisi mɛi yɛ lɛ. Yohane Baptisilɔ lɛ kɛ nɔ ni miihe ashɛ afi sɔŋŋ etsu nakai nitsumɔ lɛ, ni eka he eyɛ kaselɔi ni kɛ lɛ nyiɛɔ lolo.

Yɛ anɔkwale mli lɛ, Yesu diɛŋtsɛ ebaptisiii mɛi, shi ekaselɔi lɛ feɔ yɛ egbɛtsɔɔmɔ shishi. Amɛbaptisimɔ lɛ he hiaa tamɔ nɔ ni Yohane feɔ lɛ nɔŋŋ, ni eji Yudafoi lɛ atsuitsakemɔ kɛmiijɛ eshai ni amɛfee amɛshi Nyɔŋmɔ Mla kpaŋmɔ lɛ ahe lɛ he okadi. Shi, yɛ Yesu shitee kɛmiijɛ gbohii ateŋ lɛ sɛɛ lɛ, efa ekaselɔi lɛ ni amɛtsu baptisimɔ ni he hiaa yɛ gbɛ kroko nɔ lɛ he nii. Kristofoi abaptisimɔ ŋmɛnɛ lɛ feɔ mɔ lɛ he nɔ ni ejɔɔ eha Yehowa Nyɔŋmɔ akɛ ebaasɔmɔ lɛ lɛ he okadi.

Shi, yɛ nɛkɛ mra be nɛɛ mli yɛ Yesu sɔɔmɔ nitsumɔ lɛ mli lɛ, eyɛ mli akɛ Yohane kɛ lɛ fɛɛ efeee ekome kɛtsuuu nii yɛ hekome moŋ, shi amɛmiitsɔɔ mɛi ni etsake amɛtsui lɛ anii ni amɛmiibaptisi amɛ. Shi Yohane kaselɔi lɛ ye awuŋa ni amɛyabɔ lɛ amaniɛ yɛ Yesu he akɛ: “Rabi, . . . naa, lɛ diɛŋtsɛ eebaptisi, ni mɛi fɛɛ miiya eŋɔɔ.”

Ni Yohane hu aaaye awuŋa moŋ lɛ, ena Yesu omanyeyeli lɛ he miishɛɛ ni eesumɔ ni ekaselɔi lɛ hu amii ashɛ amɛhe. Ekai amɛ akɛ: “Nyɛ diɛŋtsɛ nyɛmiiye mi odase akɛ mikɛɛ akɛ jeee mi ji Kristo lɛ, shi moŋ akɛ atsu mi kɛtsɔ ehiɛ.” Kɛkɛ ni ekɛ abɛbua fɛfɛo ko tsu nii: “Mɔ ni hiɛ ayemforo lɛ, lɛ ji ayemforowu; shi ayemforowu lɛ shieŋtsɛ ni damɔ shi boɔ lɛ toi lɛ, nya enyaa yɛ ayemforowu lɛ gbee hewɔ. No hewɔ lɛ nɛkɛ minyamɔ nɛɛ eba mli.”

Akɛ Ayemforowu lɛ shieŋtsɛ lɛ, Yohane nya yɛ nyɔji ekpaa ni eho nɛ beni ekɛ ekaselɔi lɛ tsɔɔ Yesu lɛ. Amɛteŋ mɛi komɛi baatsɔmɔ Kristo ŋwɛi ayemforo kuu ni Kristofoi ni akɛ mumɔ efɔ amɛ mu lɛ baafee yɛ wɔsɛɛ lɛ mlibii lɛ ekomɛi. Yohane miisumɔ ni kaselɔi ni eyɔɔ amrɔ nɛɛ anyiɛ Yesu sɛɛ, ejaakɛ oti ni ma ehiɛ ji ni esaa gbɛ eha Kristo ni esɔɔmɔ nitsumɔ lɛ aye omanye. Taakɛ Yohane Baptisilɔ lɛ tsɔɔ mli lɛ: “Lɛ lɛ ja eshwere, ni mi lɛ, minɔ gbɔ.”

Yesu kaselɔ hee, Yohane, ni tsutsu ko lɛ eji Yohane Baptisilɔ lɛ hu kaselɔ lɛ ŋma yɛ he ni Yesu jɛ lɛ kɛ E-gbɛhe ni he hiaa yɛ adesai ayiwalaheremɔ mli lɛ he, ni ekɛɛ: “Mɔ ni jɛ ŋwɛi eba lɛ, efe mɛi fɛɛ. . . . Tsɛ lɛ miisumɔ Bi lɛ, ni etuu nibii fɛɛ ewo edɛŋ. Mɔ ni heɔ Bi lɛ nɔ yeɔ lɛ, eyɛ naanɔ wala; shi mɔ ni booo Bi lɛ toi lɛ, enaŋ wala, shi moŋ Nyɔŋmɔ mlifu hiɔ enɔ.”

Beni Yohane Baptisilɔ lɛ wie bɔ ni enitsumɔ nɔ baagbɔ aha lɛ sɛɛ etsɛɛɛ kɛkɛ ni Maŋtsɛ Herode ha amɔ lɛ. Herode kɛ Herodias, ni ji enyɛminuu Filipo ŋa lɛ ehi shi akɛ lɛ diɛŋtsɛ eŋa, ni beni Yohane jie enifeemɔ nɛɛ kpo yɛ faŋŋ mli akɛ ejaaa lɛ, Herode ha ayawo lɛ tsuŋ. Beni Yesu nu akɛ amɔ Yohane lɛ, kɛkɛ ni ekɛ ekaselɔi lɛ shi Yudea kɛtee Galilea. Yohane 3:22–4:3; Bɔfoi lɛ Asaji 19:4; Mateo 28:19; 2 Korintobii 11:2; Marko 1:14; 6:17-20.

▪ Te baptisimɔ ni afee yɛ Yesu gbɛtsɔɔmɔ shishi dani egbohiiashitee lɛ ba lɛ he hiaa ha tɛŋŋ? Ni egbohiiashitee lɛ sɛɛ hu?

▪ Mɛɛ gbɛ nɔ Yohane tsɔɔ yɛ akɛ amaniɛbɔɔ ni ekaselɔi lɛ kɛba lɛ he ehiaaa?

▪ Mɛni hewɔ awo Yohane tsuŋ lɛ?