YITSO 15
Efee E-Klɛŋklɛŋ Naakpɛɛ Nii
YOOKPEEMƆ NI TEE NƆ YƐ KANA LƐ
YESU HÃ NU TSƆ WEIN
Gbii etɛ nɛ ni Natanael batsɔ kaselɔi ni Yesu hala klɛŋklɛŋ lɛ ateŋ mɔ kome. Yesu kɛ e-klɛŋklɛŋ kaselɔi nɛɛ ateŋ mɛi komɛi wó amɛhiɛ amɛwo kooyigbɛ kɛmiiya Galilea kpokpaa lɛ nɔ, he ni amɛjɛ lɛ niiaŋ. Amɛmiiya Kana, he ni Natanael jɛ lɛ. Kana yɛ ŋmeŋmei lɛ anɔ yɛ Nazaret kooyi, he ni Yesu diɛŋtsɛ hu da yɛ lɛ. Afɔ̃ amɛ nine kɛhã yookpeemɔ okpɔlɔŋmɛɛ ko yɛ Kana.
Yesu nyɛ hu eba yookpeemɔ nɛɛ shishi. Akɛni Maria nanemɛi ji mɛi ni boteɔ gbalashihilɛ mli lɛ awekumɛi hewɔ lɛ, etamɔ nɔ ni efata mɛi ni yeɔ amɛbuaa kɛkwɛɔ gbɔi babaoo ni eba lɛ ahe. No hewɔ lɛ, be ni wein lɛ tã nɔŋŋ lɛ, ena ni eyakɛɛ Yesu akɛ: “Amɛbɛ wein.”—Yohane 2:3.
Yɛ gbɛ ko nɔ lɛ, Maria miikɛɛ Yesu akɛ efee wein ni etã lɛ he nɔ ko. Yesu kɛ fɔŋwiemɔ ko tsu nii kɛtsɔɔ akɛ ekpɛlɛɛɛ nɔ ni enyɛ biɔ ni efee lɛ nɔ. Ehere lɛ nɔ akɛ: “Yoo, mɛni no kɔɔ yɛ mihe kɛ bo hu ohe?” (Yohane 2:4) Akɛ Maŋtsɛ ni Nyɔŋmɔ ehala lɛ, Yesu Tsɛ ni yɔɔ ŋwɛi lɛ ji mɔ ni sa akɛ etsɔɔ lɛ nɔ ni sa akɛ efee, jeee ewekumɛi loo enanemɛi. Maria kɛ hiɛshikamɔ tsu nii, ni eshi sane lɛ ewo ebinuu lɛ dɛŋ, ni ekɛɛ mɛi ni sɔmɔɔ lɛ kɛkɛ akɛ: “Nɔ fɛɛ nɔ ni ebaakɛɛ nyɛ lɛ, nyɛfea.”—Yohane 2:5.
No mli lɛ, nugbɛ́i ekpaa ni akɛ tɛ fee mamɔ jɛmɛ, ni eko fɛɛ eko yeɔ fe galɔŋi nyɔŋma. Yesu fã sɔɔlɔi lɛ akɛ: “Nyɛwoa gbɛ́i lɛ amli nu obɔbɔ.” Kɛkɛ ni Yesu kɛɛ: “Agbɛnɛ, nyɛyɛa eko ni nyɛkɛyahãa okpɔlɔŋmɛɛ lɛ nɔkwɛlɔ lɛ.”—Yohane 2:7, 8.
Okpɔlɔŋmɛɛ lɛ nɔkwɛlɔ lɛ nya bɔ ni wein nɛɛ ji ekpakpa lɛ he waa, shi eleee akɛ atsɔ naakpɛɛ gbɛ nɔ afee. Etsɛ ayemforo wu lɛ ni ekɛɛ lɛ akɛ: “Mɔ fɛɛ mɔ kɛ wein kpakpa lɛ maa shi klɛŋklɛŋ, ni be ni mɛi lɛ etɔrɔ lɛ, ekɛ nɔ ni eŋɔɔɔ lɛ baa. Bo lɛ, okɛ wein kpakpa lɛ eto kɛbashi amrɔ nɛɛ.”—Yohane 2:10.
Enɛ ji klɛŋklɛŋ naakpɛɛ nii ni Yesu fee. Be ni Yesu kaselɔi hei lɛ na naakpɛɛ nii nɛɛ, ewaje hemɔkɛyeli ni amɛyɔɔ yɛ emli lɛ. No sɛɛ lɛ, Yesu kɛ enyɛ kɛ enyɛmimɛi hii lɛ yiŋ amɛtee Kapernaum, ni ji maŋ ní yɔɔ Galilea Ŋshɔ lɛ kooyi-anai lɛ.