Sanebimɔi Ni Jɛ Kanelɔi Adɛŋ

Namɛi ji Yudafoi sɔlemɔ shĩa mli polisifoi lɛ? Ni mɛni amɛtsu?

Levibii ni jeee osɔfoi lɛ tsu nitsumɔi srɔtoisrɔtoi, ni ekome ji akɛ, amɛtsu polisi nitsumɔ. Polisifoi nɛɛ tsu nii yɛ sɔlemɔ shĩa lɛ nɔkwɛlɔ lɛ shishi. Yudanyo woloŋmalɔ ko ni atsɛɔ lɛ Philo lɛ tsɔɔ nɔ ni polisifoi nɛɛ tsuɔ. Eŋma akɛ: “Ahã amɛteŋ mɛi komɛi damɔ shinai lɛ anaa he ni atsɔɔ kɛboteɔ shĩa lɛ [ni ji sɔlemɔ shĩa lɛ] mli lɛ, ni ahã amɛteŋ mɛi komɛi hu damɔ shĩa lɛ mli yɛ jamɔhe lɛ hiɛ, koni amɛkwɛ ni mɔ ko ni bɛ hegbɛ akɛ eyaa jɛmɛ lɛ akabote jɛmɛ, mɔ lɛ je gbɛ jio, ejeee gbɛ jio. Ahã amɛteŋ mɛi komɛi hu bu. Bulɔi nɛɛ taaa he kome; amɛnyiɛɔ shĩa lɛ mli fɛɛ, ni ayɛ mɛi ni baa leebi kɛ mɛi ni baa gbɛkɛ.”

Sanhedrin lɛ nyɛɔ etsɛɔ polisifoi nɛɛ ni etsuɔ amɛ. Romabii lɛ ekpɛlɛɛɛ ni Yudafoi akuu ko kwraa hiɛɔ tawuu nii, akɛ ja polisifoi nɛɛ pɛ.

Nilelɔ kpanaa Joachim Jeremias wie akɛ: “Kɛ́ mɛi ni atsu ni amɛyamɔ Yesu lɛ ji Sɔlemɔ Shĩa mli polisifoi lɛ, belɛ, ebɛ naakpɛɛ mɔ akɛ Yesu bi amɛ nɔ hewɔ ni amɛmɔɔɔ lɛ be ni etsɔɔ nii daa gbi yɛ Sɔlemɔ Shĩa lɛ mli lɛ (Mat. 26:55).” Ni mɛi ni atsu koni amɛyamɔ Yesu be ko be ni eshiɛɔ lɛ hu? Nilelɔ Jeremias kɛɛ esusuɔ akɛ amɛ hu sɔlemɔ shĩa mli polisifoi ji amɛ. (Yoh. 7:32, 45, 46) Yesu gbele lɛ sɛɛ lɛ, Sanhedrin lɛ tsu sɔlemɔ shĩa lɛ nɔkwɛlɔ lɛ kɛ ebulɔi loo polisifoi lɛ ni amɛyamɔ kaselɔi lɛ kɛba, ni etamɔ nɔ ni amɛ nɔŋŋ amɛgbala Paulo kɛjɛ sɔlemɔ shĩa lɛ mli kɛje kpo lɛ.​—Bɔf. 4:1-3; 5:17-27; 21:27-30.