SANEBIMƆI NI JƐ KANELƆI ADƐŊ
Taakɛ Yohane 11:35 lɛ tsɔɔ lɛ, mɛni hewɔ Yesu fó dani etee Lazaro shi lɛ?
Kɛ́ wɔsuɔlɔ ko gbo lɛ wɔfoɔ, ejaakɛ wɔbaashwe lɛ. Eyɛ mli akɛ Yesu sumɔɔ Lazaro sane moŋ, shi jeee gbo ni Lazaro gbo lɛ hewɔ Yesu fó lɛ. Taakɛ amaniɛ ni Yohane bɔ lɛ tsɔɔ lɛ, nɔ hewɔ ni efó lɛ ji akɛ, emusuŋ tsɔ lɛ yɛ mɛi ni agbo yɛ amɛnɔ lɛ ahewɔ.—Yoh. 11:36.
Beni ni ababɔ Yesu amaniɛ akɛ Lazaro bɛ hewalɛ lɛ, ehe etswaaa shi akɛ eeya ni eyatsa lɛ. Ŋmalɛ lɛ kɛɔ akɛ: “Beni [Yesu nu] akɛ [Lazaro he] miiye lɛ, no sɛɛ lɛ ehĩ shi yɛ he ni eyɔɔ lɛ nɔŋŋ gbii enyɔ.” (Yoh. 11:6) Mɛni hewɔ Yesu eyaaa amrɔ nɔŋŋ lɛ? Yiŋtoo ko hewɔ efee nakai. Ekɛɛ akɛ: “Nɛkɛ hela nɛɛ jeee gbele hela ni, shi moŋ Nyɔŋmɔ anunyam lɛ hewɔ ni, beni afee ni awo Nyɔŋmɔ bi lɛ hiɛ nyam.” (Yoh. 11:4) Kulɛ, esaaa ni Lazaro hela lɛ yagbeɔ naa yɛ gbele mli. Yesu to eyiŋ akɛ ebaatsɔ Lazaro gbele lɛ nɔ ‘ewo Nyɔŋmɔ hiɛ nyam.’ Yɛ mɛɛ gbɛ nɔ? Yesu baatee enaanyo lɛ shi kɛjɛ gbonyo bu lɛ mli yɛ naakpɛɛ gbɛ nɔ.
Beni Yesu kɛ ekaselɔi lɛ wieɔ sane nɛɛ he lɛ, ekɛ gbele to wɔ he. No hewɔ ni ekɛɛ amɛ akɛ eeya ni ‘eyatsĩɛ Lazaro yɛ wɔ lɛ mli’ lɛ. (Yoh. 11:11) Yɛ Yesu hiɛ lɛ, Lazaro shi ni ebaatee kɛjɛ gbele mli lɛ tamɔ fɔlɔ ko ni miitsĩɛ ebi kɛmiijɛ wɔ mli lɛ nɔŋŋ. No hewɔ lɛ, ehe ehiaaa ni eye awerɛho yɛ Lazaro gbele lɛ hewɔ.
Belɛ, mɛni ha Yesu fó lɛ mɔ? Shi kome ekoŋŋ lɛ, hetoo lɛ yɛ amaniɛbɔɔ lɛ mli. Beni Yesu kɛ Lazaro nyɛmi yoo Maria kpe, ni ena akɛ lɛ kɛ mɛi ni fata ehe lɛ miifó lɛ, “ehuŋ yɛ emumɔ mli ni ekpokpo.” Awerɛho ni amɛyeɔ lɛ sɔŋŋ ta Yesu mli aahu akɛ “ehuŋ yɛ emumɔ mli.” No hewɔ ni “Yesu fó” lɛ. Edɔ Yesu waa akɛ enanemɛi ni esumɔɔ amɛsane waa lɛ miiye awerɛho.—Yoh. 11:33, 35.
Sane nɛɛ haa wɔnaa akɛ, Yesu yɛ hewalɛ ni ekɛaatee wɔsuɔlɔi ni egboi lɛ ashi, ni eha amɛná gbɔmɔtsoŋ hewalɛ kpakpa yɛ jeŋ hee lɛ mli. Eyeɔ ebuaa wɔ ni wɔnaa hu akɛ, Yesu nuɔ he ehaa mɛi ni amɛsuɔlɔi egboi yɛ esha ni Adam fee lɛ hewɔ lɛ. Nɔ kroko ni wɔbaanyɛ wɔkase kɛjɛ sane nɛɛ mli ji akɛ, esa akɛ wɔnu he wɔha mɛi ni miiye awerɛho yɛ amɛsuɔlɔi ni egboi lɛ ahewɔ lɛ.
Yesu le akɛ ebaatee Lazaro shi, kɛlɛ, efó yɛ suɔmɔ ni mli wa ni eyɔɔ kɛha enanemɛi lɛ kɛ emusuŋ ni tsɔ lɛ yɛ amɛhe lɛ hewɔ. Nakai nɔŋŋ hu musuŋtsɔlɛ baanyɛ atsirɛ wɔ ni ‘wɔkɛ mɛi ni foɔ lɛ afó.’ (Rom. 12:15) Kɛ́ mɔ ko miiye awerɛho lɛ, no etsɔɔɔ akɛ mɔ lɛ heee eyeee akɛ abaatee gbohii ashi. No hewɔ lɛ, Yesu fee nɔkwɛmɔnɔ eha wɔ kɛtsɔ fó ni efó yɛ shi ni ebaatee Lazaro lɛ fɛɛ sɛɛ lɛ nɔ, ni ekɛtsɔɔ akɛ esa akɛ wɔ hu wɔnu he wɔha mɛi ni amɛsuɔlɔ ko egbo lɛ.