Anɔkwa Kristofoi ‘Ekuuu Hegbɛ Lɛ Naa’

3, 4. (a) Mɛɛ shishitoo mlai mɛi ni tsɛɔ amɛhe Kristofoi ni amɛwoɔ maŋ hiɛ atuatsemɔ he hewalɛ lɛ kuɔ mli? (b) Mɛni ji nɔ ni mɔ aŋkro ko kpa shi ena yɛ Yehowa Odasefoi ahe?

³ Yɛ klɛŋklɛŋ afii oha lɛ mli lɛ, Yesu wie esɛɛnyiɛlɔi lɛ ahe akɛ: “Amɛjɛɛɛ je lɛ mli, taakɛ bɔ ni mi hu mijɛɛɛ je lɛ mli lɛ.” (Yohane 17:14) Mɔ fɛɛ mɔ ni tsɛɔ ehe Kristofonyo ni woɔ maŋ hiɛ atuatsemɔ he hewalɛ lɛ ji je Iɛ fa jogbaŋŋ diɛŋtsɛ. Ejeee Yesu sɛɛnyiɛlɔ; ni nakai nɔŋŋ hu ejeee mɔ ni ‘baa ehe shi ehaa hegbɛi ni yeɔ nɔ lɛ.’ (Romabii 13:⁠1) Ebaahi jogbaŋŋ kɛha lɛ akɛ eeebo kɔkɔbɔɔ ni bɔfo Paulo kɛha akɛ “mɔ fɛɛ mɔ ni kuɔ hegbɛ lɛ naa lɛ, Nyɔŋmɔ gbɛjianɔtoo lɛ eteɔ shi ewoɔ; ni mɛi ni teɔ shi nakai lɛ aaana amɛ kojomɔ” lɛ toi.​—Romabii 13:⁠2.

⁴ Yehowa Odasefoi yɛ sɔrɔto kwraa yɛ mɛi babaoo ni yɔɔ Kristendom lɛ ahe ejaakɛ amɛkɛ tu kɛ awuiyeli bɛ nɔ ko feemɔ. Nuu ko ni yɔɔ Europa lɛ kpa enɛ shi. Eŋma akɛ: “Beni mina nɔ ni ejɛ jamɔ kɛ maŋkramɔ mli eba lɛ, mijɔɔ mihe nɔ kwraa akɛ mabutu maŋ shihilɛ gbɛjianɔtoo ni yɔɔ lɛ. Miyafata awuiyelɔi akuu ko he ni amɛtsɔse mi yɛ bɔ ni atswaa tui sɔrɔtoi fɛɛ mli; mikɛ mihe wo mli ni wɔkɛ tui tswa mɛi pii ojo. Miwala baje oshara mli yɛ be fɛɛ mli. Beni be shwieɔ mli lɛ, ebafee faŋŋ akɛ wɔnine miinyɛ shi yɛ ta ni wɔwuuɔ lɛ mli. Mibafee mɔ ko ni nijiaŋ eje wui, ni yiŋtoo ni bɛ mishihilɛ mli lɛ baye minɔ kwraa. Kɛkɛ ni Odasefonyo ko batswa wɔshinaa lɛ. Yoo nɛɛ kɛ mi wie Nyɔŋmɔ Maŋtsɛyeli lɛ he. Akɛni miiti nɔ doo akɛ eefite mibe hewɔ lɛ, mikɛɛ lɛ akɛ eha miŋa abo lɛ toi. Efee nakai, ni amɛje shia Biblia mli nikasemɔ shishi. Yɛ naagbee lɛ, mikpɛlɛ nɔ akɛ mafata he yɛ nikasemɔ lɛ mli. Wiemɔi nyɛŋ atsɔɔ hejɔlɛ ni minu he yɛ be mli ni minu hewalɛ ni tsirɛɔ adesai ni haa amɛfeɔ efɔŋ lɛ shishi jogbaŋŋ lɛ. Maŋtsɛyeli lɛ he shiwoo ni yɔɔ naakpɛɛ lɛ eha mi hiɛnɔkamɔ ni wajeɔ mi kɛ yiŋtoo hu yɛ shihilɛ mli.”

5. Mɛni hewɔ ni Kristofoi yaa nɔ amɛbaa amɛhe shi amɛhaa hegbɛi ni yeɔ nɔ lɛ yɛ toiŋjɔlɛ mli lɛ, ni enɛ baakã he nakai kɛyashi mɛɛ beyinɔ?

⁵ Kristofoi ji Nyɔŋmɔ kɛ Kristo bɔfoi loo najiaŋdamɔlɔi (Yesaia 61:​1, 2; 2 Korintobii 5:​20; Efesobii 6:​19, 20) Enɛ hewɔ lɛ, amɛhiɔ shi ni amɛkɛ amɛhe wooo je nɛŋ béi amli. Eyɛ mli akɛ maŋkwramɔŋ gbɛjianɔtoi lɛ ekomɛi tamɔ nɔ ni eye omanye yɛ shika gbɛfaŋ fe ekrokomɛi, ni amɛteŋ ekomɛi ŋmɛɔ heyeli gbɛ babaoo fe ekrokomɛi moŋ, shi Kristofoi fii eko sɛɛ ni amɛbuuu gbɛjianɔtoi nɛɛ eko akɛ amɛnɔ kwɔlɔ fe ekroko mɛi. Amɛle akɛ gbɛjianɔtoi nɛɛ eko fɛɛ eko yeee emuu. Eji “Nyɔŋmɔ gbɛjianɔtoo” akɛ amɛya nɔ amɛhi shi kɛyashi be mli ni e-Maŋtsɛyeli lɛ aaahe hegbɛ lɛ. (Daniel 2:44) No hewɔ lɛ, Kristofoi yaa nɔ amɛkɛ toiŋjɔlɛ baa amɛhe shi amɛhaa hegbɛi ni yeɔ nɔ lɛ yɛ be mli ni amɛyaa nɔ amɛtsuɔ mɛi krokomɛi anaanɔ hilɛ hu he nii kɛtsɔ Maŋtsɛyeli lɛ he sanekpakpa lɛ shiɛmɔ nɔ lɛ.​—Mateo 24:​14; 1 Petro 3:​11, 12.

7. Kɛji mɔ ko ku mla lɛ mli lɛ, namɔ yɔɔ hegbɛ akɛ egbalaa etoi, ni mɛni hewɔ?

⁷ Nɔyelii pii baakɛɛ akɛ yiŋtoo ni yɔɔ amɛmlai lɛ asɛɛ lɛ tamɔ nakai nɔŋŋ: koni amɛha maŋbii lɛ ashihilɛ aya hiɛ ni gbɛjianɔtoo kpakpa hu ahi mli. No hewɔ lɛ, amɛgbalaa mɛi ni feɔ nii ni teɔ shi woɔ adesai ashihilɛ gbɛi, tamɔ gbɔmɔgbee kɛ juu nɛkɛ lɛ atoi, ni amɛwoɔ mlai koni akɛkudɔ nibii tamɔ tsɔne foiwoo kɛ hei ni akɛ tsɔnei mamɔɔ nɛkɛ. Mɔ fɛɛ mɔ ni kuɔ amɛmlai nɛɛ amli lɛ ete shi ewo amɛhegbɛ lɛ, ni nɛkɛ mɛi nɛɛ “aaana kojomɔ.” Namɔ dɛŋ kojomɔ? Jeee doo akɛ kɛjɛ Nyɔŋmɔ ŋɔɔ. Hela wiemɔ ni atsɔɔ shishi yɛ biɛ akɛ kojomɔ lɛ baanyɛ akɔ gbɛjianɔtoi ni akɛtsuɔ maŋbii ahe nii ahe fe bɔ ni eeenyɛ ekɔ kojomɔi ni jɛɔ Yehowa ŋɔɔ lɛ ahe. (Okɛto 1 Korintobii 6:7 he.) Kɛ mɔ ko fee nɔ ko ni kuɔ mla mli lɛ, hegbɛ ni yeɔ nɔ lɛ yɛ hegbɛ ni egbalaa etoi.