Yaa Nɔ Onyiɛ Yehowa Gbɛ Lɛ Nɔ
“Kwɛmɔ Yehowa gbɛ ni onyiɛ egbɛ lɛ nɔ, ni eeewo onɔ, koni shikpɔŋ lɛ atsɔ onɔ̃.”—LALA 37:34.
1, 2.Yehowa gbɛ ni Maŋtsɛ David nyiɛ nɔ lɛ bi mɛni yɛ edɛŋ, ni mɛni ebiɔ kɛhaa wɔ ŋmɛnɛ?
“HÃ MALE gbɛ ni sa akɛ manyiɛ nɔ; ejaakɛ bo miwóɔ misusuma nɔ mihaa.” (Lala 143:8) Kristofoi ni yɔɔ ŋmɛnɛ lɛ jɛɔ amɛsusuma muu fɛɛ mli amɛtiɔ nakai Maŋtsɛ David wiemɔi lɛ amli. Amɛmiisumɔ ni amɛkɛ anɔkwayeli asa Yehowa hiɛ ni amɛnyiɛ egbɛ lɛ nɔ. Mɛni yɔɔ enɛ feemɔ mli? Kɛha David lɛ, etsɔɔ Nyɔŋmɔ mla ni aaaye nɔ. Ekɔɔ Yehowa mli hekɛnɔfɔɔ ni aaaná fe jeŋmaji lɛ ni akɛ amɛ aaakpaŋ lɛ he. Hɛɛ, ni etsɔɔ anɔkwayeli mli ni aaasɔmɔ Yehowa yɛ, shi jeee gbɔmɛi ni bɛŋkɛ amɛ lɛ anyɔŋmɔi. Kɛha Kristofoi lɛ, Yehowa gbɛ lɛ nɔ nyiɛmɔ biɔ babaoo.
2 Nɔ kome ji akɛ, Yehowa gbɛ lɛ nɔ nyiɛmɔ ŋmɛnɛ lɛ tsɔɔ hemɔkɛyeli ni aaaná yɛ Yesu Kristo kpɔmɔ afɔleshaa lɛ mli, ni akpɛlɛ enɔ akɛ “gbɛ lɛ kɛ anɔkwale lɛ kɛ wala lɛ.” (Yohane 3:16; 14:6; Hebribii 5:9) Etsɔɔ hu akɛ, ni aaaye “Kristo mla,” ni suɔmɔ ni aaajie lɛ kpo atsɔɔ, titri lɛ kɛha Yesu nyɛmimɛi ni afɔ amɛ mu lɛ fata he lɛ nɔ. (Galatabii 6:2; Mateo 25:34-40) Mɛi ni nyiɛɔ Yehowa gbɛ lɛ nɔ lɛ sumɔɔ eshishitoo mlai kɛ efamɔi lɛ. (Lala 119:97; Abɛi 4:5, 6) Amɛbuɔ hegbɛ ni jara wa waa ni ámɛna akɛ amɛkɛ amɛhe aaawo Kristofoi asɔɔmɔ nitsumɔ lɛ mli lɛ waa. (Kolosebii 4:17; 2 Timoteo 4:5) Sɔlemɔ ji amɛ daa gbi nifeemɔ lɛ fã. (Romabii 12:12) Ni ‘amɛkwɛɔ gbɛ ni amɛtsɔɔ nɔ amɛnyiɛɔ lɛ jogbaŋŋ koni amɛkanyiɛ tamɔ mɛi ni leee nii shi moŋ akɛ nilelɔi.’ (Efesobii 5:15) Amɛkɛ mumɔŋ ninámɔ eshãaa afɔle kɛhãaa heloo naa sɛɛnamɔi ni sɛɛ etsɛɛɛ loo helooŋ akɔnɔi ni mla eŋmɛɛɛ gbɛ lɛ. (Mateo 6:19, 20; 1 Yohane 2:15-17) Agbɛnɛ hu, anɔkwayeli kɛha Yehowa kɛ emli hekɛnɔfɔɔ he miihia. (2 Korintobii 1:9; 10:5; Efesobii 4:24) Mɛni hewɔ? Ejaakɛ shihilɛ ni wɔyɔɔ mli lɛ tamɔ blema Israel nɔ lɛ.
Bɔ ni Hekɛnɔfɔɔ kɛ Anɔkwayeli He Hiaa Ha
3. Mɛni hewɔ anɔkwayeli, hemɔkɛyeli, kɛ hekɛnɔfɔɔ baaye abua ni eha wɔhi Yehowa gbɛ lɛ nɔ?
3 Israel ji maŋ bibioo ni maji ni sumɔɔɔ amɛ ni kɛ amɛhe woɔ nyenyeŋtswibɔɔ nifeemɔi yɛ amagai anyɔŋmɔi lɛ ajamɔ mli lɛ amli lɛ ebɔle amɛhe kɛkpe. (1 Kronika 16:26) Israel pɛ jáa anɔkwa Nyɔŋmɔ kome ni anaaa lɛ, ni ji Yehowa lɛ, ni efa amɛ ni amɛhiɛ jeŋba he tɛi ni nɔ kwɔlɔ lɛ amli. (5 Mose 6:4) Nakai nɔŋŋ hu ŋmɛnɛ, adesai akpekpei fioo ko pɛ jaa Yehowa, ni amɛhiɔ shi yɛ jeŋ ni emli bii shɛɔ akpekpei toi akpei ekpaa ni mlai ni amɛdiɔ sɛɛ kɛ amɛjamɔŋ nifeemɔi yɔɔ srɔto kwraa yɛ amɛnɔ̃ lɛ he lɛ ateŋ. Kɛji akɛ wɔfata akpekpei fioo nɛɛ ahe lɛ, belɛ esa akɛ wɔhiɛ ahi wɔhe nɔ koni akaná wɔnɔ hewalɛ yɛ gbɛ fɔŋ nɔ. Yɛ mɛɛ gbɛ nɔ? Anɔkwayeli kɛha Yehowa Nyɔŋmɔ, emli hemɔkɛyeli, kɛ hekɛnɔfɔɔ ni ma shi shiŋŋ akɛ ebaaha eshiwoi aba mli lɛ baaye abua. (Hebribii 11:6) Enɛ haŋ ni wɔkɛ wɔ hekɛnɔfɔɔ awo nibii ni je lɛ kɛ ehiɛ efɔ̃ nɔ lɛ mli.—Abɛi 20:22; 1 Timoteo 6:17.
4. Mɛni hewɔ jeŋmaji lɛ ‘ajwɛŋmɔ mli ewo duŋ’ lɛ?
4 Bɔfo Paulo tsɔɔ bɔ ni esa akɛ Kristofoi afee srɔto yɛ je lɛ mli aha beni eŋma akɛ: “No hewɔ lɛ miikɛɛ ni miima nɔ mi yɛ Nuntsɔ lɛ mli, akɛ nyɛkanyiɛ tamɔ bɔ ni jeŋmajiaŋbii krokomɛi lɛ hu nyiɛɔ yɛ amɛyaka jwɛŋmɔ lɛ mli lɛ dɔŋŋ, ejaakɛ amɛjwɛŋmɔ mli ewo duŋ ni mɛi kpɔji ji amɛ yɛ Nyɔŋmɔ wala gbɛfaŋ, akɛni nilee ekaaa amɛ ni amɛtsuii hu ekpiliŋ lɛ.” (Efesobii 4:17, 18) Yesu ji “anɔkwa la lɛ.” (Yohane 1:9) Mɔ fɛɛ mɔ ni kpoɔ lɛ loo ekɛɔ akɛ eheɔ lɛ eyeɔ shi ebooo “Kristo mla” lɛ toi lɛ “jwɛŋmɔ mli ewo duŋ.” Amɛkɛ Yehowa gbɛ lɛ nɔ nyiɛmɔ teŋ jɛkɛ, “ni mɛi kpɔji ji amɛ yɛ Nyɔŋmɔ wala lɛ gbɛfaŋ.” Bɔ fɛɛ bɔ ni amɛbaajwɛŋ akɛ amɛle nii yɛ je lɛ gbɛ nɔ ha lɛ, amɛji mɛi ni ‘leee nɔ ko nɔ ko’ yɛ nilee kome pɛ ni kɛ mɔ yaa wala mli, ni ji Yehowa Nyɔŋmɔ kɛ Yesu Kristo he nilee lɛ gbɛfaŋ.—Yohane 17:3; 1 Korintobii 3:19.
5. Eyɛ mli akɛ anɔkwale la lɛ miikpɛ yɛ je lɛ mli moŋ, shi mɛni hewɔ mɛi pii booo toi lɛ?
5 Kɛlɛ, anɔkwa la lɛ miikpɛ yɛ je lɛ mli! (Lala 43:3; Filipibii 2:15) “[Anɔkwa] nilee bolɔɔ yɛ blohuiaŋ, ewoɔ egbee yɛ jaji anɔ.” (Abɛi 1:20) Nyɛsɛɛ afi lɛ, Yehowa Odasefoi kɛ ŋmɛlɛtswai akpekpei toi akpei abɔ tsu nii amɛkɛgba Yehowa Nyɔŋmɔ kɛ Yesu Kristo he sane amɛtsɔɔ amɛ akutseiaŋbii. Akpei ohai abɔ kpɛlɛ nɔ. Shi, ani esa akɛ efee wɔ naakpɛɛ akɛ mɛi krokomɛi babaoo ekpɛlɛɛɛ nɔ? Dabi. Paulo wie “amɛtsuii [ni] ekpiliŋ” lɛ he. Mɛi komɛi yɛ tsuii ni nuuu nii ahe yɛ pɛsɛmkunya loo shika suɔmɔ hewɔ. Mɛi krokomɛi yɛ ni apasa jamɔ loo je lɛŋ shihilɛ ni egbɛ eshwã babaoo ŋmɛnɛ lɛ náa amɛnɔ hewalɛ. Jaramɔ shihilɛ mli niiashikpamɔi eha mɛi pii etsɔmɔ amɛsɛɛ ámɛha Nyɔŋmɔ. Mɛi krokomɛi ekpɛlɛɛɛ nɔ akɛ amɛaahi shi yɛ Yehowa jeŋba he tɛi ni nɔ kwɔlɔ lɛ anaa. (Yohane 3:20) Ani mɔ ko ni nyiɛɔ Yehowa gbɛ lɛ nɔ lɛ tsui baanyɛ afee nɔ ni nuuu nii ahe yɛ enɛɛmɛi amli?
6, 7. Eyɛ mli akɛ Israelbii lɛ ji Yehowa Nyɔŋmɔ jálɔi moŋ, shi mɛɛ bei amli amɛgbá afã lɛ, ni mɛni hewɔ?
6 Taakɛ Paulo tsɔɔ mli lɛ, enɛ ba blema Israel nɔ. Eŋma akɛ: “Akɛ enɛɛmɛi eto wɔ okadi, koni wɔkaha nibii fɔji miifee wɔ akɔnɔ, tamɔ bɔ ni efee amɛ lɛ. Asaŋ nyɛkatsɔmɔa amagajalɔi, tamɔ amɛteŋ mɛi komɛi fee lɛ, taakɛ bɔ ni aŋma lɛ akɛ: ‘Maŋ lɛ ho tara shi ni amɛyeyee nii ni amɛnunuu dãai, kɛkɛ ni amɛte shi amɛbɔi shwɛmɔ.’ Ni wɔsaa wɔkabɔ ajwamaŋ, tamɔ bɔ ni amɛteŋ mɛi komɛi bɔ, ni gbi kome nɔ lɛ mɛi akpei nyɔŋmai enyɔ kɛ etɛ nyɔnyɔi lɛ.”—1 Korintobii 10:6-8.
7 Klɛŋklɛŋ lɛ Paulo wie be mli ni Israel já shika tsinabi amaga yɛ Sinai Gɔŋ lɛ shishi lɛ he. (2 Mose 32:5, 6) Enɛ ji ŋwɛi kita ni amɛkpɛlɛ nɔ yɛ otsii fioo ni tsɔ hiɛ lɛ amli akɛ amɛbaabo toi lɛ nɔ toigbele diɛŋtsɛ. (2 Mose 20:4-6; 24:3) Kɛkɛ ni Paulo wie be mli ni Israel kɛ Moab biyei lɛ kula shi amɛha Baal lɛ he. (4 Mose 25:1-9) Nɔ ni kadi tsinabi jamɔ ji ŋɔɔmɔyeli ni akɛ he woɔ mli kɛtekeɔ nɔ, ‘shwɛmɔ ni akɛ he woɔ mli vii.’a Nɔ ni fata Baal jamɔ he ji bɔlɛnamɔ jeŋba shara ni ehiii kwraa ni akɛ he woɔ mli. (Kpojiemɔ 2:14) Mɛni hewɔ Israelbii lɛ fee eshai ni tamɔ nɛkɛ lɛ? Ejaakɛ amɛha ‘nibii fɔji fee amɛ akɔnɔ’—kɛji akɛ eji wɔŋjamɔ loo nyenyeŋtswibɔɔ mli nifeemɔi ni fata he lɛ jio.
8. Mɛni wɔbaanyɛ wɔkase kɛjɛ Israel niiashikpamɔi lɛ amli?
8 Paulo tsɔɔ akɛ esa akɛ wɔkase nii kɛjɛ nibii ni ba nɛɛ amli. Wɔkase mɛni? Anyɛŋ asusu he po akɛ Kristofonyo baakula shi aha shika tsinabi amaga loo blema Moabbii anyɔŋmɔ ko. Shi jeŋba shara loo akɔnɔi ni akɛ he woɔ mli ni atsĩii he naa lɛ hu? Asɛ̃ɛɛ enɛɛmɛi ahe ŋmɛnɛ, ni kɛji akɛ wɔŋmɛ gbɛ ni enɛɛmɛi ahe akɔnɔ te shi yɛ wɔtsuii amli lɛ, amɛbaagbala wɔ kɛjɛ Yehowa he. Nɔ ni baajɛ mli aba lɛ baatamɔ akɛ wɔkɛ wɔhe ewo wɔŋjamɔ mli nakai nɔŋŋ—ebaagbala wɔ kɛjɛ Nyɔŋmɔ he. (Okɛto Kolosebii 3:5; Filipibii 3:19 he.) Yɛ anɔkwale mli lɛ, Paulo kɛ nakai nibii ni ba lɛ ahe wiemɔ lɛ ba naagbee kɛtsɔ nanemɛi heyelilɔi lɛ aŋaawoo nɔ akɛ: “Nyɛjoa wɔŋjamɔ naa foi.”—1 Korintobii 10:14.
Yelikɛbuamɔ Koni Anyiɛ yɛ Nyɔŋmɔ Gbɛ lɛ Nɔ
9. (a) Mɛɛ yelikɛbuamɔ wɔnine shɛɔ nɔ koni wɔya nɔ wɔnyiɛ Yehowa gbɛ lɛ nɔ? (b) Mɛni ji gbɛ kome ni wɔtsɔɔ nɔ wɔnuɔ ‘wiemɔ ko yɛ wɔ sɛɛ’?
9 Kɛji akɛ wɔtswa wɔfai shi akɛ wɔbaaya nɔ wɔnyiɛ yɛ Yehowa gbɛ lɛ nɔ lɛ, ashiii wɔ efolo ni wɔbɛ yelikɛbuamɔ. Yesaia gba akɛ: “Otoii aaanu wiemɔ ko yɛ osɛɛ akɛ: Gbɛ lɛ nɛ! nyɛnyiɛa nɔ! ninejurɔgbɛ nyɛtsɔ jio, abɛkugbɛ nyɛtsɔ jio.” (Yesaia 30:21) Yɛ mɛɛ gbɛ nɔ ‘wɔ diɛŋtsɛ wɔtoii’ nuɔ nakai ‘wiemɔ lɛ yɛ wɔ sɛɛ’? Ojogbaŋŋ, mɔ ko nuuu gbee diɛŋtsɛ loo enine shɛɛɛ shɛɛ sane ko ni jɛ Nyɔŋmɔ ŋɔɔ nɔ ŋmɛnɛ. “Wiemɔ” ni anuɔ lɛ baa wɔ fɛɛ wɔŋɔɔ yɛ gbɛ kome lɛ nɔŋŋ nɔ. Klɛŋklɛŋ kɛ nɔ ni he hiaa fe fɛɛ lɛ, ebaa kɛtsɔɔ Ŋmalɛi ni jɛ mumɔŋ, ni ji Biblia lɛ, ni Nyɔŋmɔ susumɔi kɛ bɔ ni ekɛ adesai yeɔ haa lɛ he saji ni aŋmala ashwie shi yɔɔ mli lɛ nɔ. Akɛni wɔnuɔ lakamɔ wiemɔi ahe daa gbi kɛjɛɔ hei ni “mɛi kpɔji ji amɛ yɛ Nyɔŋmɔ wala gbɛfaŋ” lɛ aŋɔɔ hewɔ lɛ, kɛji akɛ wɔɔná mumɔŋ hewalɛ kpakpa lɛ, belɛ ehe hiaa ni wɔkane Biblia lɛ ni wɔjwɛŋ nɔ daa. Enɛ baaye abua wɔ ni wɔtsi wɔhe kɛjɛ “yakayakanii” ahe koni wɔfee mɔ ni “asaa lɛ pɛpɛɛpɛ aha nitsumɔ kpakpa fɛɛ nitsumɔ kpakpa.” (Bɔfoi lɛ Asaji 14:14, 15; 2 Timoteo 3:16, 17) Ebaawo wɔ hewalɛ, ebaawaje wɔ, ni eye ebua wɔ koni ‘wɔfee nɔbatsɛ kɛ hiɛshikalɔ.’ (Yoshua 1:7, 8) No hewɔ lɛ, Yehowa Wiemɔ lɛ woɔ hewalɛ akɛ: “No hewɔ lɛ, mibii, nyɛboa mi toi! Ejaakɛ ajɔɔ mɛi ni nyiɛɔ migbɛ̀i lɛ anɔ lɛ! Nyɛboa tsɔsemɔ toi ni nyɛle nii, ni nyɛkakwaa lɛ kwraa!”—Abɛi 8:32, 33.
10. Mɛni ji gbɛ ni ji enyɔ ni wɔtsɔɔ nɔ wɔnuɔ ‘wiemɔ ko yɛ wɔ sɛɛ’?
10 ‘Wiemɔ ni yɔɔ wɔ sɛɛ’ lɛ hu baa kɛtsɔɔ “tsulɔ anɔkwafo kɛ nilelɔ” lɛ ni haa wɔ “ŋmãa yɛ be ni sa nɔ lɛ” nɔ. (Mateo 24:45-47) Gbɛ kome ni atsɔɔ nɔ akɛ niyenii nɛɛ haa lɛ baa yɛ woji ni adamɔ Biblia lɛ nɔ aŋmala lɛ amli, ni nɛkɛ niyenii ni akɛhaa nɛɛ efa babaoo yɛ nyɛsɛɛ afii nɛɛ amli. Ákɛ nɔkwɛmɔnɔ lɛ, gbalɛ he shishinumɔ ni wɔyɔɔ lɛ mli efee faŋŋ kɛtsɔ Buu-Mɔɔ woji tɛtrɛbii lɛ anɔ. Yɛ wolo nɛɛ mli lɛ, áwo wɔ hewalɛ koni wɔmia wɔhiɛ yɛ shiɛmɔ kɛ kaselɔ feemɔ nitsumɔ lɛ mli yɛ shikpilikpiifeemɔ ni yaa nɔ lɛ fɛɛ sɛɛ, áye abua wɔ koni wɔtsi wɔhe kɛjɛ nibii ni kaa mɔ lɛ ahe, ni ákanya wɔ koni wɔná Kristofoi asubaŋi kpakpai. Kwɛ bɔ ni wɔbuɔ niyenii ni baa yɛ be ni sa mli nɛɛ waa wɔhaa!
11. Tsɔɔmɔ gbɛ ni ji etɛ ni wɔbaanyɛ wɔtsɔ nɔ wɔnu ‘wiemɔ ko yɛ wɔ sɛɛ’ lɛ mli.
11 Tsulɔ anɔkwafo kɛ nilelɔ lɛ hu kɛ niyenii haa kɛtsɔɔ wɔ kpeei ni wɔfeɔ daa lɛ anɔ. Nɔ ni fata enɛɛmɛi ahe ji asafoŋ kpeei, nyɔji ekpaa kpokpaa nɔ kpeei, kɛ daa afi kpeei ni dara. Mɛɛ Kristofonyo anɔkwafo yɔɔ ni ebuŋ henaabuamɔi ni tamɔ nɛkɛ lɛ akɛ amɛhe hiaa? Amɛji yelikɛbuamɔ nii ni he hiaa ni yeɔ ebuaa wɔ koni wɔnyiɛ Yehowa gbɛ lɛ nɔ. Akɛni amɛteŋ mɛi pii kɛ mɛi ni bɛ amɛhemɔkɛyeli lɛ mli lɛ efite bei pii yɛ nitsumɔhe loo yɛ skul hewɔ lɛ, daa Kristofoi anaanyobɔɔ hereɔ mɔ yiwala diɛŋtsɛ. Kpeei haa wɔnaa hegbɛ ni nɔ bɛ koni ‘wɔwowoo wɔhe hewalɛ kɛya suɔmɔ kɛ nitsumɔi kpakpai ahe.’ (Hebribii 10:24) Wɔsumɔɔ wɔnyɛmimɛi lɛ, ni wɔsumɔɔ ni wɔkɛ amɛ abɔ.—Lala 133:1.
12. Mɛɛ faishitswaa Yehowa Odasefoi yɔɔ, ni amɛtsɔɔ enɛ nyɛsɛɛ nɛɛ yɛ mɛɛ gbɛ nɔ?
12 Akɛni mumɔŋ niyenii ni tamɔ nɛkɛ ewo amɛ hewalɛ hewɔ lɛ, gbɔmɛi aaafee akpekpei ekpaa nyiɛ Yehowa gbɛ lɛ nɔ ŋmɛnɛ, ni akpekpei krokomɛi hu miikase Biblia lɛ koni amɛkase bɔ ni amɛaafee enɛ amɛha. Ani anɔkwale ni eji akɛ amɛyi faaa kɛ́ akɛ amɛ to shikpɔŋ nɔ gbɔmɛi akpekpei toi akpei abɔ lɛ ahe lɛ haa amɛnijiaŋ jeɔ wui loo egbɔjɔɔ amɛ? Dabi kwraa! Amɛtswa amɛfai shi akɛ amɛbaaya nɔ amɛbo ‘wiemɔ ni yɔɔ amɛ sɛɛ’ lɛ toi, ni amɛkɛ anɔkwayeli afee Yehowa suɔmɔnaa nii. Bɔni afee ni amɛjie faishitswaa nɛɛ kpo yɛ faŋŋ mli lɛ, mɛi ni tee 1998 kɛ 1999 “Nyɔŋmɔ Shihilɛ Gbɛ” Kpokpaa Wuji kɛ Majimaji Ateŋ Kpeei lɛ kpɛlɛ yiŋkpɛɛ ko ni tsɔɔ amɛ shidaamɔ ni jɛ amɛtsuiŋ lɛ nɔ. Nɔ ni nyiɛ sɛɛ nɛɛ ji bɔ ni amɛkpɛ amɛyiŋ amɛha.
Yiŋkpɛɛ
13, 14. Te Yehowa Odasefoi naa shihilɛ diɛŋtsɛ ni je lɛ yɔɔ mli lɛ amɛhaa tɛŋŋ?
13 “Wɔ, ákɛ Yehowa Odasefoi ni wɔbua wɔhe naa yɛ ‘Nyɔŋmɔ Shihilɛ Gbɛ’ Kpokpaa Wulu nɔ Kpee nɛɛ shishi lɛ, jɛɔ wɔtsui muu fɛɛ mli wɔkpɛlɛɔ nɔ akɛ, Nyɔŋmɔ gbɛ lɛ ji shihilɛ gbɛ ni hi fe fɛɛ. Shi wɔyɔseɔ akɛ, adesai ateŋ mɛi ni fa ŋmɛnɛ nuɔ he yɛ gbɛ ni yɔɔ srɔto nɔ. Adesa weku lɛ eka susumɔi, jeŋ nileei, kɛ jamɔ mli jwɛŋmɔi srɔtoi yɛ nɔ ni ji shihilɛ gbɛ ni hi fe fɛɛ lɛ amɛkwɛ. Adesa yinɔsane kɛ jeŋ shihilɛi ŋmɛnɛ ni akɛ anɔkwayeli aaakwɛ lɛ yeɔ anɔkwale ni ŋwɛi sane jajemɔ ni aŋma afɔ̃ shi yɛ Yeremia 10:23 ji lɛ he odase akɛ: ‘Adesa ni nyiɛ nɛɛ, bɔ ni eeetsɔ ejaje enajifaamɔi eha lɛ, ebɛ edɛŋ.’
14 “Wɔnaa odaseyelii babaoo daa gbi ni maa anɔkwale ni nakai wiemɔi lɛ ji lɛ nɔ mi. Titri lɛ adesa weku lɛ bɛ bulɛ ko kɛha Nyɔŋmɔ shihilɛ gbɛ lɛ. Gbɔmɛi diɔ nɔ ni ja yɛ amɛ diɛŋtsɛ amɛhiɛ lɛ sɛɛ. Nɔ ni ejɛ mli eba lɛ efee oshara—weku shihilɛ ni fiteɔ, ni ashiɔ gbekɛbii ni amɛbɛ gbɛtsɔɔmɔ; heloo gbɛfaŋ nibii ni mɔ fɛɛ mɔ diɔ sɛɛ, ni baa naagbee kɛ shwɛm ni afeɔ kɛ nijiaŋwujee; awuiyeli kɛ basabasafeemɔ ni jwɛŋmɔ bɛ mli, ni gbeɔ gbɔmɛi babaoo ni anyɛŋ akane; weku mli béi kɛ tawuu ni gbeɔ gbɔmɛi babaoo; jeŋba shara ni egbɛ eshwã babaoo ni teeɔ bɔlɛnamɔ mli helai ni tsɛŋeɔ mɛi ashi. Enɛɛmɛi ji naagbai babaoo ni yɔɔ hwanyaŋŋ ni gbaa miishɛɛ, toiŋjɔlɛ, kɛ shweshweeshwe shihilɛ ni adiɔ sɛɛ lɛ naa lɛ ateŋ fioo ko.
15, 16. Yɛ Nyɔŋmɔ shihilɛ gbɛ lɛ he lɛ, mɛɛ faishitswaa amɛjaje yɛ yiŋkpɛɛ lɛ mli?
15 “Yɛ adesai ashihilɛ ni yɔɔ mɔbɔ lɛ kɛ bɔ ni ‘Nyɔŋmɔ Ofe lɛ gbi wulu lɛ nɔ ta’ ni atsɛɔ lɛ Harmagedon (Kpojiemɔ 16:14, 16) lɛ ebɛŋkɛ eha hewɔ lɛ, wɔ, ákɛ Yehowa Odasefoi lɛ wɔkpɛ wɔyiŋ akɛ:
16 “Klɛŋklɛŋ lɛ: Wɔbuɔ wɔhe akɛ Yehowa Nyɔŋmɔ nii ji wɔ, ejaakɛ ákɛ aŋkroaŋkroi lɛ, wɔjɔɔ wɔhe nɔ wɔha lɛ ni nɔ ko kwraa bɛ sɛɛ, ni wɔbaahiɛ hemɔkɛyeli ni hosooo yɛ Yehowa gbɛjianɔtoo ni ji kpɔmɔnɔ ni ekɛha kɛtsɔ e-Bi Yesu Kristo nɔ lɛ mli. Wɔtswa wɔfai shi akɛ wɔbaanyiɛ Nyɔŋmɔ shihilɛ gbɛ lɛ nɔ, ni wɔsɔmɔ akɛ e-Dasefoi ni wɔba wɔhe shi wɔha maŋtsɛ ni eji taakɛ ejeɔ kpo yɛ Yesu Kristo nɔyeli lɛ mli lɛ.
17, 18. Mɛɛ shidaamɔ Yehowa Odasefoi baaya nɔ ahiɛ mli yɛ jeŋba he tɛi ni afolɔ ashwie lɛ kɛ Kristofoi anyɛmifeemɔ gbɛfaŋ?
17 “Nɔ ni ji enyɔ lɛ: Wɔbaaya nɔ ni wɔkɛ wɔhe akpɛtɛ Biblia mli jeŋba kɛ mumɔŋ taomɔ nii ni nɔ kwɔlɔ lɛ ahe. Wɔtswa wɔfai shi akɛ wɔnyiɛŋ tamɔ bɔ ni jeŋmaji lɛ nyiɛɔ yɛ amɛyaka jwɛŋmɔi amli lɛ. (Efesobii 4:17-19) Wɔyiŋkpɛɛ ji akɛ, wɔbaahi shi akɛ mɛi ni he tse yɛ Yehowa hiɛ ni je lɛ woko wɔhe muji.—Yakobo 1:27.
18 “Nɔ ni ji etɛ lɛ: Wɔbaahiɛ wɔ Ŋmalɛ naa gbɛhe lɛ mli kpɛŋŋ akɛ jeŋ muu fɛɛ nyɛmimɛi Kristofoi. Wɔbaahiɛ wɔhe ni wɔkɛwooo maŋ saji amli akɛ Kristofoi lɛ mli yɛ jeŋmaji lɛ ateŋ, ni wɔŋmɛŋ gbɛ koni weku, maŋ, loo wiemɔ mli hetsɛ̃ loo mligbalamɔ atsɔ̃ wɔ tsɔne.
19, 20. (a) Mɛni fɔlɔi ni ji Kristofoi baafee? (b) Mɛɛ gbɛ anɔkwa Kristofoi fɛɛ baatsɔ nɔ aya nɔ ajie amɛhe kpo akɛ Kristo kaselɔi?
19 “Nɔ ni ji ejwɛ lɛ: Wɔ, mɛi ni wɔji fɔlɔi lɛ baatɛo Nyɔŋmɔ gbɛ lɛ yɛ wɔbii lɛ amli. Wɔbaato okadi yɛ Kristofoi ashihilɛ mli, ni nɔ ni fata he ji daa Biblia kanemɔ, weku nikasemɔ, kɛ wɔsusuma muu fɛɛ mli ni wɔɔjɛ wɔkɛ wɔhe awo Kristofoi asafo lɛ nifeemɔi amli kɛ sɔɔmɔ nitsumɔ lɛ mli.
20 “Nɔ ni ji enumɔ lɛ: Wɔ fɛɛ wɔbaabɔ mɔdɛŋ ni wɔná Nyɔŋmɔ gbeyeishemɔ sui ni wɔ-Bɔlɔ lɛ toɔ he okadi lɛ, ni wɔbaabɔ mɔdɛŋ ni wɔkase esu kɛ baŋ kɛ egbɛ̀i, taakɛ Yesu fee lɛ. (Efesobii 5:1) Wɔtswa wɔfai shi akɛ wɔbaaha wɔnibii fɛɛ aya nɔ yɛ suɔmɔ mli, koni wɔkɛjie wɔhe kpo akɛ Kristo kaselɔi.—Yohane 13:35.
21-23. Mɛni Yehowa Odasefoi baaya nɔ amɛfee, ni amɛyɛ nɔmimaa yɛ mɛni he?
21 “Nɔ ni ji ekpaa lɛ: Wɔbaaya nɔ wɔshiɛ Nyɔŋmɔ Maŋtsɛyeli lɛ he sanekpakpa lɛ, wɔfee mɛi kaselɔi, ni wɔbaatsɔɔ amɛ Nyɔŋmɔ shihilɛ gbɛ lɛ ni wɔwo amɛ hewalɛ ni amɛnine ashɛ tsɔsemɔ nɔ lolo yɛ asafoŋ kpeei ashishi ni wɔkpaŋ.—Mateo 24:14; 28:19, 20; Hebribii 10:24, 25.
22 “Nɔ ni ji kpawo lɛ: Ákɛ aŋkroaŋkroi kɛ jamɔ gbɛjianɔtoo lɛ, wɔbaaya nɔ ni wɔha Nyɔŋmɔ suɔmɔnaa nii afee klɛŋklɛŋ nii yɛ wɔshihilɛ mli. Akɛni wɔkɛ e-Wiemɔ ni ji Biblia lɛ tsuɔ nii akɛ wɔ gbɛtsɔɔlɔ hewɔ lɛ, wɔgbaŋ kɛyaŋ ninejurɔgbɛ loo abɛkugbɛ, koni wɔkɛma nɔ mi akɛ Nyɔŋmɔ gbɛ lɛ nɔ kwɔ kwraa fe je lɛ gbɛ̀i lɛ. Wɔtswa wɔfai shi akɛ wɔbaadi Nyɔŋmɔ shihilɛ gbɛ lɛ sɛɛ—kpɛŋŋ yɛ anɔkwayeli mli, bianɛ ni agbɛnɛ kɛmiiya naanɔ!
23 “Wɔmiikpɛ wɔyiŋ nɛkɛ, ejaakɛ wɔyɛ hekɛnɔfɔɔ ni yeɔ emuu yɛ Yehowa shiwoo ni suɔmɔ yɔɔ mli ákɛ, mɔ ni feɔ Nyɔŋmɔ suɔmɔnaa nii lɛ hiɔ shi kɛyaa naanɔ lɛ mli. Wɔmiikpɛ wɔyiŋ nɛkɛ, ejaakɛ wɔheɔ wɔyeɔ akɛ Ŋmalɛ naa shishitoo mlai, ŋaawoo, kɛ kɔkɔbɔɔ ni wɔhiɔ shi yɛ naa lɛ haa wɔnáa shihilɛ gbɛ ni hi fe fɛɛ ŋmɛnɛ, ni ekɛ shishitoo kpakpa fɔ̃ɔ shi kɛhaa wɔsɛɛ be, koni wɔmɔ wala diɛŋtsɛ lɛ mli kpɛŋŋ. (1 Timoteo 6:19; 2 Timoteo 4:7b, 8) Nɔ ni fe fɛɛ lɛ, wɔmiikpɛ wɔyiŋ nɛkɛ, ejaakɛ wɔsumɔɔ Yehowa Nyɔŋmɔ kɛ wɔtsui, susuma, jwɛŋmɔ, kɛ hewalɛ fɛɛ!
24, 25. Te ahere yiŋkpɛɛ ni akɛha lɛ nɔ aha tɛŋŋ, ni mɛni ji mɛi ni nyiɛɔ Yehowa gbɛ lɛ nɔ lɛ afaishitswaa?
24 “Nyɛ mɛi fɛɛ ni eba nɛkɛ kpokpaa wulu nɔ kpee nɛɛ shishi, ní sumɔɔ akɛ amɛkpɛlɛ yiŋkpɛɛ nɛɛ nɔ lɛ akɛɛ akɛ HƐƐ!”
25 Kpeehei kɛ shwɛmɔhei ohai abɔ ni yɔɔ jeŋ fɛɛ lɛ jije beni mɛi fɛɛ ni eba kpee lɛ shishi lɛ kɛ gbee ni tamɔ nugbɔshimɔ ha hetoo akɛ “HƐƐ!” lɛ. Yehowa Odasefoi ayiŋ efeee amɛ kɔshikɔshi yɛ ya ni amɛbaaya nɔ amɛnyiɛ Yehowa gbɛ lɛ nɔ lɛ he. Amɛyɛ hekɛnɔfɔɔ ni yeɔ emuu yɛ Yehowa mli kɛ hemɔkɛyeli akɛ ebaaha eshiwoi aba mli. Amɛyaa nɔ amɛyeɔ lɛ anɔkwa, ní nɔ fɛɛ nɔ ni baaba lɛ kɔɔɔ he eko. Ni amɛtswa amɛfai shi akɛ amɛbaafee esuɔmɔnaa nii.
“Nyɔŋmɔ Yɛ Wɔ Sɛɛ”
26. Mɛɛ miishɛɛ shihilɛ mɛi ni nyiɛɔ Yehowa gbɛ lɛ nɔ lɛ yɔɔ mli?
26 Yehowa Odasefoi kaiɔ lalatsɛ lɛ ŋaawoo lɛ: “Kwɛmɔ Yehowa gbɛ ni onyiɛ egbɛ lɛ nɔ, ni eeewo onɔ, koni shikpɔŋ lɛ atsɔ onɔ̃.” (Lala 37:34) Amɛhiɛ kpaaa Paulo hewalɛwoo wiemɔi lɛ anɔ: “Kɛ Nyɔŋmɔ yɛ wɔ sɛɛ lɛ, namɔ aaate shi awo wɔ? Mɔ nɔŋŋ ni kamaaa wɔ lɛ diɛŋtsɛ ebi lɛ, shi moŋ eŋɔ lɛ eha yɛ wɔ fɛɛ wɔnajiaŋ lɛ; ani eŋɔŋ nibii fiaa efataŋ ehe ekeŋ wɔ?” (Romabii 8:31, 32) Hɛɛ, kɛji akɛ wɔtee nɔ wɔnyiɛ Yehowa gbɛ lɛ nɔ lɛ, ‘ebaaŋɔ nibii fɛɛ eha wɔ ni wɔye mli ŋɔɔmɔ.’ (1 Timoteo 6:17) Nɛgbɛ yɔɔ ni baanyɛ afee nɔ ni hi fe he ni wɔyɔɔ nɛɛ—ni wɔnyiɛ Yehowa gbɛ lɛ nɔ, kɛ wɔnyɛmimɛi hii kɛ wɔnyɛmimɛi yei ni wɔsumɔɔ amɛ lɛ. Akɛni Yehowa yɛ wɔmasɛi hewɔ lɛ, nyɛhaa wɔtswaa wɔfai shi akɛ wɔbaahi jɛmɛ ni wɔŋmɛ wɔtsui shi kɛyashi naagbee, kɛ hekɛnɔfɔɔ ni yeɔ emuu akɛ, yɛ ebe ni sa mli lɛ, wɔbaana ni eha eshiwoi lɛ ateŋ naagbee nɔ kwraa lɛ eba mli.—Tito 1:2.
[Shishigbɛ niŋmai]
a Beni saji ahe wielɔ ko wieɔ Hela wiemɔ ni atsɔɔ shishi akɛ ‘amɛshwɛ’ lɛ he lɛ, ekɛɛ akɛ ekɔɔ jooi ni yaa nɔ yɛ wɔŋjalɔi agbijurɔyelii ashishi lɛ he, ni ekɛfata he akɛ: “Taakɛ ale lɛ, aje gbɛ ato jooi nɛɛ pii ahe gbɛjianɔ koni etee nyenyeŋtswibɔɔ he akɔnɔi ni naa wa fe fɛɛ lɛ ashi.”
Ani Okaiɔ?
◻ Mɛni ebiɔ koni Kristofonyo anyiɛ Yehowa gbɛ lɛ nɔ?
◻ Mɛni hewɔ ehe hiaa ni wɔná hekɛnɔfɔɔ yɛ Yehowa mli ni wɔye lɛ anɔkwale lɛ?
◻ Mɛɛ yelikɛbuamɔ yɔɔ yɛ be mli ni wɔnyiɛɔ Yehowa gbɛ lɛ nɔ lɛ?
◻ Tsĩi yiŋkpɛɛ ni akpɛlɛ nɔ yɛ “Nyɔŋmɔ Shihilɛ Gbɛ” Kpokpaa Wuji anɔ Kpeei lɛ ashishi lɛ mli agugui lɛ ekomɛi atã.
[Mfonirii ni yɔɔ baafa 18]
Akpɛlɛ yiŋkpɛɛ ko ni he hiaa waa nɔ yɛ “Nyɔŋmɔ Shihilɛ Gbɛ” Kpokpaa Wuji kɛ Majimaji Ateŋ Kpeei lɛ ashishi