“Jaa Anɔkwale Wiemɔ lɛ Mli Pɛpɛɛpɛ”

NYƆŊMƆ Wiemɔ lɛ ji shishitoo mlai ni he hiaa kɛhaa shihilɛ ni yeɔ omanye lɛ atoohe. Ebaanyɛ eye ebua sɔɔlɔ ni etsɔɔ nii, ni ekã hiɛ, ni ejaje mɔ hu. (2 Timoteo 3:16, 17) Shi kɛlɛ, kɛ wɔɔna gbɛtsɔɔmɔ ni ajɛ ŋwɛi akɛha nɛɛ he sɛɛ kɛmɔ shi lɛ, no lɛ esa akɛ wɔnyiɛ bɔfo Paulo ŋaawoo ni ekɛha Timoteo lɛ sɛɛ, akɛ: “Bɔɔ mɔdɛŋ ni okɛ ohe adamɔ Nyɔŋmɔ hiɛ, akɛ mɔ ko ni sa, nitsulɔ ni hiɛ gbooo, ni jaa anɔkwale wiemɔ lɛ mli pɛpɛɛpɛ.”—2 Timoteo 2:15.

Kɛfata nibii krokomɛi ahe lɛ, akɛ Nyɔŋmɔ Wiemɔ lɛ toɔ fufɔ ni hewalɛ yɔɔ mli, niyenii kpakpa, nu ni haa mɔ he jɔɔ lɛ ni ehaa mɔ he tseɔ, ashwishwɛ, kɛ klante ni naa ba he. Nɔ ni wiemɔi nɛɛ tsɔɔ lɛ shishinumɔ yeɔ ebuaa sɔɔlɔ koni enyɛ ekɛ Biblia lɛ atsu nii kɛ hesaa.

Nyɔŋmɔ Wiemɔ lɛ Mli Fufɔ lɛ Kɛhamɔ

Fufɔ ji niyenii ni he hiaa abifabii ŋmɔji. Beni abifao lɛ daa lɛ, akɛ niyenii kpakpa bɔiɔ nii ni eyeɔ lɛ he fatamɔ fiofio, shi kɛjɛ shishijee lɛ, fufɔ pɛ emusu nyɛɔ egbɛlɛɔ. Yɛ shihilɛi pii amli lɛ, mɛi ni Nyɔŋmɔ Wiemɔ lɛ he nɔ ko bibioo pɛ amɛle lɛ tamɔ abifabii. Kɛ mɔ ko ji mɔ hee ni kpaako ena Nyɔŋmɔ Wiemɔ lɛ he miishɛɛ jio, ele he nɔ ko be saŋŋ jio, kɛ́ nɔ ni Biblia lɛ kɛɔ lɛ he shishijee nilee fioo pɛ eyɔɔ lɛ, no lɛ mumɔŋ abifao ji lɛ, ni ehe hiaa ni ena niyenii ni gbɛlɛmɔ waaa, ní hewalɛ yɛ mli—mumɔŋ “fufɔ.” Eshɛko mɔ ni baanyɛ agbɛlɛ “niyenii kpakpa,” ni ji Nyɔŋmɔ Wiemɔ lɛ mli nibii ni mli kwɔlɔ lɛ.—Hebribii 5:12.

Nɛkɛ ji shihilɛ ni hi asafo hee ni ato yɛ Korinto lɛ mli beni Paulo ŋma wolo eyaha amɛ lɛ, akɛ: “Fufɔ miha nyɛ, shi jeee ŋmaa ni, ejaakɛ nyɛnyɛɛɛ.” (1 Korintobii 3:2) Ehe miihia ni klɛŋklɛŋ lɛ Korintobii lɛ akase “Nyɔŋmɔ wiemɔi lɛ amli shishijee nibii lɛ.” (Hebribii 5:12) He ni amɛhiɛyaa lɛ eyashɛ lɛ hewɔ lɛ, amɛnyɛɛɛ amɛnu “Nyɔŋmɔ nibii ni mli kwɔlɔ” lɛ ashishi.—1 Korintobii 2:10.

Taakɛ Paulo ji lɛ, ŋmɛnɛ hu, Kristofoi sɔɔlɔi jieɔ bɔ ni amɛsusuɔ mumɔŋ abifabii ahe lɛ kpo kɛtsɔɔ “fufɔ” ni amɛhaa amɛ lɛ nɔ, ni no ji akɛ, kɛtsɔ yelikɛbuamɔ ni amɛkɛhaa amɛ koni amɛnane amɔ shi jogbaŋŋ yɛ Kristofoi atsɔɔmɔ mli lɛ nɔ. Amɛwoɔ mɛi heei loo mɛi ni darako yɛ mumɔŋ nɛɛ hewalɛ ni “[amɛshwe] wiemɔ lɛ mli fufɔ krɔŋŋ lɛ.” (1 Petro 2:2) Bɔfo Paulo tsɔɔ akɛ eyooɔ hesusumɔ krɛdɛɛ ni he hiaa mɛi heei lɛ beni eŋma akɛ: “Mɔ fɛɛ mɔ ni yeɔ fufɔ lɛ, ekpako jalɛ wiemɔ lɛ shi; ejaakɛ fufɔoo ji lɛ.” (Hebribii 5:13) Tsuishitoo, mɔ hesusumɔ, nii ashishinumɔ, kɛ mlijɔlɛ he miihia yɛ Nyɔŋmɔ sɔɔlɔi agbɛfaŋ beni amɛkɛ Wiemɔ lɛ mli fufɔ krɔŋŋ lɛ haa mɛi heei kɛ mɛi ni bɛ niiashikpamɔ lɛ kɛtsɔɔ shia Biblia mli nikasemɔ nɔ kɛ agbɛnɛ yɛ asafo lɛ mli hu lɛ.

Nyɔŋmɔ Wiemɔ Mli Niyenii Kpakpa lɛ He Nitsumɔ

Babaoo he hiaa Kristofonyo fe “fufɔ,” bɔni afee ni eda kɛshɛ yiwalaheremɔ mli. Kɛ ena enu Biblia mli shishijee anɔkwalei lɛ ashishi ni ekpɛlɛ nɔ nɔŋŋ pɛ lɛ, agbɛnɛ efee klalo akɛ ebaatsa nɔ kɛya ‘niyenii kpakpa ni ji mɛi ni edara lɛ anɔ̃’ lɛ nɔ. (Hebribii 5:14) Mɛɛ gbɛ nɔ eeetsɔ efee enɛ? Klɛŋklɛŋ lɛ, kɛtsɔ teemɔŋ nikasemɔ ni eeefee daa kɛ naanyobɔɔ ni eeená yɛ Kristofoi akpeei ashishi lɛ nɔ. Sui kpakpai ni tamɔ nɛkɛ baaye abua ni eha Kristofonyo lɛ he awa, ni eda yɛ mumɔŋ, ni enitsumɔ amɔ shi jogbaŋŋ yɛ sɔɔmɔ nitsumɔ lɛ mli. (2 Petro 1:8) Esaaa ni wɔhiɛ kpaa nɔ akɛ kɛfata nilee he lɛ, Yehowa suɔmɔnaa nifeemɔ hu ji niyenii kpakpa.—Yohane 4:34.

Ŋmɛnɛ, ahala “tsulɔ anɔkwafo kɛ nilelɔ” ko koni eha Nyɔŋmɔ tsuji niyenii yɛ be ni sa mli, ni eye ebua amɛ ni amɛnu “Nyɔŋmɔ nilee ni fá babaoo lɛ” shishi. Yehowa tsɔɔ emumɔ lɛ nɔ ejieɔ Ŋmalɛ mli anɔkwalei ni mli kwɔlɔ kpo kɛtsɔɔ nɛkɛ tsulɔ anɔkwafo, ni ŋmalaa mumɔŋ “ŋmaa yɛ be ni sa nɔ” ehaa nɛɛ nɔ. (Mateo 24:45-47; Efesobii 3:10, 11; okɛto Kpojiemɔ 1:1, 2 he.) Sɔ̃ kã Kristofoi fɛɛ anɔ aŋkroaŋkro akɛ amɛkɛ nɛkɛ nibii ni aŋmalaa ahaa nɛɛ atsu nii jogbaŋŋ kɛmɔ shi.—Kpojiemɔ 1:3.

Shi kɛlɛ, nibii ni yɔɔ Biblia lɛ mli lɛ ekomɛi “ashishinumɔ miijara,” kɛha Kristofoi ni edara yɛ mumɔŋ po. (2 Petro 3:16) Ayɛ wiemɔi ni yɔɔ naakpɛɛ, gbalɛi, kɛ abɛbuai ni shishinumɔ biɔ nikasemɔ kɛ nii anɔjwɛŋmɔ babaoo. No hewɔ lɛ, nɔ ni fata teemɔŋ nikasemɔ he hu ji Nyɔŋmɔ Wiemɔ lɛ mlibotemɔ vii. (Abɛi 1:5, 6; 2:1-5) Sɔ̃ kã onukpai lɛ anɔ titri yɛ enɛ gbɛfaŋ beni amɛtsɔɔ asafo lɛ nii lɛ. Kɛ amɛmiikwɛ Asafo Woloŋ Nikasemɔ loo Buu-Mɔɔ Nikasemɔ nɔ jio, amɛmiiha maŋshiɛmɔ, aloo amɛmiisɔmɔ yɛ nitsɔɔmɔ hegbɛ kroko mli jio, esa akɛ onukpai lɛ ale nɔ ni amɛtsuɔ he nii lɛ mli saji jogbaŋŋ ni amɛfee klalo akɛ amɛaaha amɛjwɛŋmɔ ahi amɛ “nitsɔɔmɔ” mli hesaa nɔ beni amɛkɛ mumɔŋ niyenii kpakpa haa asafo lɛ.—2 Timoteo 4:2.

Nu ni Haa Mɔ He Jɔɔ Lɛ ni Haa Mɔ He Tseɔ

Yesu kɛɛ Samaria yoo lɛ yɛ nu bu lɛ he akɛ ebaaha lɛ nu ko ni enu ni nakai nu lɛ baatsɔ “nu hiŋmɛi ni baa kɛyaa naanɔ wala mli” yɛ yoo lɛ mli. (Yohane 4:13, 14; 17:3) Nɔ ni fata nɛkɛ nu ni haa mɔ wala nɛɛ he ji gbɛjianɔi fɛɛ ni Nyɔŋmɔ eto kɛha naanɔ wala namɔ kɛtsɔ Nyɔŋmɔ Toobi lɛ nɔ lɛ, ni atsɔɔ nɛkɛ gbɛjianɔtoi nɛɛ amli yɛ Biblia lɛ mli. Ákɛ aŋkroaŋkroi ni nakai “nu” lɛ he kumai yeɔ wɔ lɛ, wɔkpɛlɛɔ ninefɔɔ ni mumɔ lɛ kɛ Kristo ayemforo lɛ kɛhaa wɔ akɛ “[wɔbayɛ] wala nu lɛ yaka” lɛ nɔ. (Kpojiemɔ 22:17) Nɛkɛ nu nɛɛ numɔ baanyɛ atsɔ naanɔ wala.

Kɛfata he lɛ, Biblia lɛ efolɔ jeŋba kpakpa kɛ mumɔ naa tɛi eshwie shi eha anɔkwa Kristofoi. Kɛ wɔkɛ tɛi ni ajɛ ŋwɛi afolɔ ashwie shi nɛɛ tsu nii lɛ, Yehowa Wiemɔ lɛ fɔɔ wɔhe, ni ‘ejuɔ wɔhe’ ni ejieɔ nifeemɔi ni Yehowa Nyɔŋmɔ nyɛɔ lɛ fɛɛ kɛjɛɔ wɔhe. (1 Korintobii 6:9-11) Enɛ hewɔ lɛ, atsɛɔ anɔkwale ni yɔɔ Wiemɔ ni jɛ mumɔŋ lɛ mli lɛ akɛ “nu hejuu.” (Efesobii 5:26) Kɛ wɔŋmɛɛɛ gbɛ ni Nyɔŋmɔ anɔkwale lɛ aju wɔhe yɛ nɛkɛ gbɛ nɔ lɛ, no lɛ wɔjamɔ lɛ esaŋ ehiɛ.

Nɔ ni yɔɔ miishɛɛ ji akɛ, akɛ onukpai ni ‘jaa anɔkwale wiemɔ lɛ mli pɛpɛɛpɛ’ lɛ hu toɔ nu he. Yesaia kɛɔ akɛ amɛ “tamɔ faai yɛ ŋa kpataa nɔ.” (Yesaia 32:1, 2) Onukpai ni yɔɔ suɔmɔ lɛ tsuɔ bɔ ni awieɔ amɛhe ahaa nɛɛ he nii kɛ amɛyasara amɛnyɛmimɛi lɛ akɛ mumɔŋ tookwɛlɔi, ni amɛkɛ Nyɔŋmɔ Wiemɔ ni haa mɔ hejɔɔmɔ lɛ tsu nii ni amɛkɛ mumɔŋ wiemɔi ni tswaa mɔ maa shi, ni eshɛjeɔ mɔ mii, ni ewoɔ mɔ hewalɛ ni ekanyaa mɔ hu lɛ ha amɛ lɛ.—Okɛto Mateo 11:28, 29 he.a

Asafo lɛ mli bii kwɛɔ saramɔ ni onukpai lɛ aaasara amɛ lɛ gbɛ. Bonnie wie akɛ: “Mile bɔ ni onukpai lɛ haa mɔ he jɔɔ lɛ haa, ni eŋɔɔ minaa waa akɛ Yehowa eto gbɛjianɔ nɛɛ eha wɔ.” Lynda, ni ji nyɛ kome ni kwɛɔ ebii lɛ, ŋma akɛ: “Onukpai lɛ tsɔɔ Ŋmalɛ mli hewalɛwoo nɔ amɛyeɔ amɛbuaa mi ni mikpeeɔ shihilɛ lɛ naa. Amɛboɔ mi toi ni amɛjieɔ mlihilɛ kpo.” Michael hu wie akɛ: “Amɛha minu he akɛ mifata gbɛjianɔtoo ko ni susuɔ mɔ he lɛ he.” “Onukpai lɛ asaramɔ ye ebua mi ni minyɛ miye jwɛŋmɔŋ nɔnyɛɛ ni mli wa ni mibote mli lɛ nɔ,” taakɛ mɔ kroko hu wie lɛ. Onukpa saramɔ ni woɔ mɔ hewalɛ yɛ mumɔŋ lɛ tamɔ numɔ nɔ̃ ni mli ejɔ, ni haa mɔ hejɔɔmɔ. Mɛi ni tamɔ gwantɛŋi lɛ amii shɛɔ amɛhe beni onukpai ni yɔɔ suɔmɔ lɛ yeɔ buaa amɛ ni amɛnaa bɔ ni Ŋmalɛ naa shishitoo mlai kɔɔ amɛshihilɛ he lɛ.—Romabii 1:11, 12; Yakobo 5:14.

Okɛ Nyɔŋmɔ Wiemɔ lɛ Atsu nii akɛ Ashwishwɛ

Kɛ mɔ aŋkro ko miiye niyenii kpakpa lɛ, yiŋtoo ni yɔɔ sɛɛ lɛ jeee ni eŋɔɔ enaa pɛ kɛkɛ. Shi moŋ, eekpa gbɛ akɛ ebaana hewalɛ kɛjɛ mli koni enyɛ ekɛtsu nii. Kɛ gbekɛ ji lɛ lɛ, ekpaa gbɛ akɛ niyenii lɛ baaye abua lɛ ni eda ni ebatsɔ onukpa. Nakai nɔŋŋ eji yɛ mumɔŋ niyenii hu gbɛfaŋ. Teemɔŋ Biblia mli nikasemɔ baanyɛ afee miishɛɛ waa, shi jeee no pɛ ji yiŋtoo ni yɔɔ sɛɛ. Esa akɛ mumɔŋ niyenii lɛ atsake wɔ. Eyeɔ ebuaa wɔ ni wɔyooɔ ni wɔwoɔ mumɔ lɛ yibii lɛ, ni eyeɔ ebuaa wɔ hu ni wɔwoɔ “gbɔmɔ hee ni tsɔɔ ehee ekoŋŋ kɛyaa nilee mli yɛ mɔ ni bɔ lɛ lɛ subaŋ lɛ naa.” (Kolosebii 3:10; Galatabii 5:22-24) Mumɔŋ niyenii yeɔ ebuaa wɔ ni wɔdaraa yɛ mumɔŋ hu, ni ehaa wɔnyɛɔ wɔkɛ Ŋmalɛ mli shishitoo mlai tsuɔ wɔ naagbai ahe nii ni wɔyeɔ wɔbuaa mɛi krokomɛi hu ni amɛkɛtsuɔ amɛ hu amɛnɔ he nii jogbaŋŋ.

Te wɔɔfee tɛŋŋ wɔna akɛ Biblia lɛ miina hewalɛ ni tamɔ nakai yɛ wɔ nɔ? Wɔkɛ Biblia tsuɔ nii tamɔ ashwishwɛ. Yakobo wie akɛ: “Nyɛtsɔmɔa wiemɔi lɛ nɔyelɔi, ni jeee wiemɔ lɛ nulɔi kɛkɛ . . . Kɛ mɔ ko ji wiemɔ lɛ nulɔ kɛkɛ shi ejeee enɔyelɔ hu lɛ, nɛkɛ gbɔmɔ nɛɛ tamɔ nuu ko ni kwɛɔ ehiɛ su lɛ yɛ ashwishwɛ mli; ejaakɛ ekwɛɔ ehe, ni eyaa, ni amrɔmrɔ nɔŋŋ lɛ ehiɛ kpaa bɔ ni eyɔɔ lɛ nɔ. Shi mɔ ni maa eyi shi ekwɛɔ heyeli mla ni hi kɛwula shi lɛ mli, ni ekãa he, ni jeee mɔ ni nuɔ ni ehiɛ kpaa nɔ, shi moŋ eji nɔyelɔ ni tsuɔ he nii lɛ, nakai mɔ lɛ aaajɔɔ lɛ yɛ enɔyeli lɛ mli.”—Yakobo 1:22-25.

‘Wɔmaa wɔyi shi wɔkwɛɔ’ Nyɔŋmɔ Wiemɔ lɛ mli kɛ wɔpɛi mli jogbaŋŋ ni wɔkɛ bɔ ni wɔji lɛ to bɔ ni esa akɛ wɔfee yɛ Nyɔŋmɔ shishitoo mlai anaa lɛ he. Kɛ wɔmiifee enɛ lɛ, wɔbaatsɔmɔ “wiemɔ lɛ nɔyelɔi, ni jeee wiemɔ lɛ nulɔi kɛkɛ.” Ni Biblia lɛ baana hewalɛ kpakpa yɛ wɔ nɔ.

Nyɔŋmɔ Wiemɔ lɛ akɛ Klante

Naagbee lɛ, bɔfo Paulo yeɔ ebuaa wɔ ni wɔnaa bɔ ni wɔbaanyɛ wɔkɛ Nyɔŋmɔ Wiemɔ lɛ atsu nii akɛ klante. Beni ebɔɔ kɔkɔ yɛ “onukpayelii kɛ hegbɛi kɛ je nɛŋ lumɛi ni yɔɔ benɛ be duŋ lɛ mli lɛ, kɛ mumɔi fɔji asafo ni yɔɔ ŋwɛiniiaŋ lɛ” ahe lɛ, ewo wɔ hewalɛ hu ni wɔkpɛlɛ “mumɔŋ klante ni ji Nyɔŋmɔ wiemɔ lɛ” nɔ. (Efesobii 6:12, 17) Nyɔŋmɔ Wiemɔ lɛ ji tawuu nii ko ni he hiaa waa ni wɔbaanyɛ wɔkɛtsu nii kɛfolɔ susumɔi fɛɛ ni akɛbaa “ni woɔ ehe nɔ eshiɔ Nyɔŋmɔ nilee lɛ.”—2 Korintobii 10:3-5.

Ŋwanejee ko bɛ he akɛ, “Nyɔŋmɔ wiemɔ hiɛ kã ni eyɛ hewalɛ.” (Hebribii 4:12) Yehowa kɛ adesai wieɔ kɛtsɔɔ e-Wiemɔ ni jɛ mumɔŋ lɛ mli baafai anɔ. Okɛtsu nii jogbaŋŋ kɛtsɔɔ mɛi krokomɛi anii ni okɛkpa apasa tsɔɔmɔi ahe mama. Okɛtsu nii ni okɛwo mɛi krokomɛi hewalɛ, ni otswa amɛ oma shi, ni eha amɛ hejɔɔmɔ, ni eshɛje amɛmii, ni ekanya amɛ, ni ewo amɛ ekaa yɛ mumɔŋ hu. Ni eba akɛ Yehowa ‘aaasaa bo aha nitsumɔ kpakpa fɛɛ nitsumɔ kpakpa, ni ofee esuɔmɔnaa nii,’ koni ofee “nɔ ni sa lɛ diɛŋtsɛ ehiɛ” be fɛɛ be.—Hebribii 13:21.

[Shishigbɛ niŋmaa]

[Mfoniri ni yɔɔ baafa 31]

Onukpai woɔ mɛi krokomɛi hewalɛ, “ni [amɛjaa] anɔkwale wiemɔ lɛ mli pɛpɛɛpɛ”