Sɔɔmɔ Ni Ŋaa Shi Hi Kɛ Kaselɔi Babaoo Baa
“Enikeenii lɛ nɛ: ni mɛi komɛi atsɔmɔ . . . sanekpakpa jajelɔi, mɛi komɛi hu nɔkwɛlɔi kɛ tsɔɔlɔi, koni akɛwula Nyɔŋmɔ webii lɛ yɛ esɔɔmɔ lɛ mli.”—EFESOBII 4:11, 12, The New English Bible
1. Te Kristo nuɔ he ehaa tɛŋŋ kɛ ena gbɔmɛi?
1 KRISTO YESU jeee mɔ ni ekome ehiɔ shi. Esɔɔmɔ lɛ kɛ lɛ yaa gbɔmɛi aŋɔɔ. Kɛ okwɛ Sanekpakpai ejwɛ lɛ fɛɛ mli lɛ, onaa akɛ be fɛɛ be lɛ Yesu yɛ gbɔmɛi ateŋ. Ena shihilɛ mli ni gbɔmɛi yɔɔ lɛ diɛŋtsɛ yɛ egbɛfaai lɛ amli, ni amɛ nii fee lɛ mɔbɔ babaoo. Kɛ oji Kristofonyo sɔɔlɔ lɛ, ani mɛi ni okɛ amɛ kpeɔ lɛ anii feɔ bo mɔbɔ?—Mateo 9: 35, 36.
2. Yehowa Odasefoi kaseɔ Yesu nɔkwɛmɔ lɛ yɛ mɛɛ gbɛ nɔ?
2 Esa akɛ ŋmɛnɛ Kristofoi asɔɔmɔ lɛ hu afee nɔ ni kɔɔ gbɔmɛi ahe. Akɛni amɛhiɛ yɔɔ anɔkwasane nɛɛ nɔ hewɔ lɛ, Yehowa Odasefoi nyɛɔ amɛbɛŋkɛɔ gbɔmɛi sɔrɔtoi fɛɛ yɛ sɔɔmɔ ni amɛkɛhaa Nyɔŋmɔ lɛ mli. Anaa amɛ yɛ je lɛŋ he fɛɛ he ni amɛmiiwie kɛmiitsɔɔ gbɔmɛi yɛ gbɛjegbɛi anɔ—yɛ shiai, yɛ jarawoo hei, yɛ bɔs shidaamɔ hei, oketeke shidaamɔ hei, yɛ nitsumɔ hei, kɛ shwapoi sɔrɔtoi amli. He fɛɛ he ni anaa gbɔmɛi yɛ Iɛ, jɛmɛ ji he ni anaa Odasefoi yɛ ni amɛmiisɔmɔ akɛ sanekpakpa jajelɔi. Mɛni hewɔ? Ejaakɛ wiemɔ “evangel” lɛ jɛ Hela wiemɔ evaggelion, ni eshishi ji “sanekpakpa” mli. Esa akɛ Yehowa odasefonyo fɛɛ odasefonyo ni ji Kristofonyo afee sanekpakpa lɛ he sɔɔlɔ, sanekpakpa shiɛlɔ tamɔ Kristo. No hewɔ lɛ esa akɛ ana odasefonyo fɛɛ odasefonyo hu yɛ gbɔmɛi ateŋ.—2 Timoteo 4:5; Efesobii 4:11, 12.
3. Mɛni ji gbɛ ni mɔɔ shi loo sɛɛnamɔ yɔɔ he fɛɛ yɛ Kristofoi asɔɔmɔ nitsumɔ lɛ mli?
3 Mɛɛ gbɛ esa akɛ atsɔ ni atsu nɛkɛ sanekpakpa jajemɔ nɛɛ he nii yɛ koni emɔ shi? Ani radio kɛ TV ni jamɔi pii kɛtsuɔ nii lɛ ji hetoo lɛ diɛŋtsɛ? Ojogbaŋŋ, bi ohe akɛ, ani radio kɛ TV aaanyɛ aha osanebimɔi lɛ ahetoo amrɔ nɔŋŋ? Dabi—nibii nɛɛ jeee gbɔmɛi, eji tsɔnei ni atsɔɔ nɔ awieɔ kɛkɛ. Belɛ sɔɔmɔ ni mɔɔ shi lɛ ka he eji nɔ ni Yesu kɛ ekaselɔi lɛ kɛtsu nii, mɛi ni taoɔ anɔkwale lɛ ni akɛ amɛ aaakpɛ hiɛ kɛ hiɛ. Shi eheɔ be kɛ mɔdɛŋbɔɔ, ni enɛ ji nɔ ni Paulo tsɔɔ yɛ nɔkwɛmɔ nɔ ko ni ka shi faŋŋ mli lɛ: “Mitɛo; Apolo shwie nɔ nu; shi Nyɔŋmɔ ha eshwere. Belɛ agbɛnɛ jeee mɔ ni tɛo lɛ ji nɔ ko, ni jeee mɔ ni shwie nɔ nu lɛ hu, shi moŋ mɔ ni ha eshwere ni ji Nyɔŋmɔ lɛ.”—1 Korintobii 3:5-7.
4. Mɛɛ gbɛi sɔrɔtoi etɛ baa yɛ sɔɔmɔ ni mɔɔ shi lɛ mli?
4 Nɛkɛ wiemɔi nɛɛ tsɔɔ gbɛi sɔrɔtoi etɛ yɛ Kristofoi asɔɔmɔ lɛ mli—nitɛomɔ, enɔ nushwamɔ kɛ kwɛmɔ kɛ nikpamɔ. Yɛ mɛɛ gbɛ nɔ? Klɛŋklɛŋ nɔ ji tɛomɔ lɛ, klɛŋklɛŋ be mli ni akɛ Maŋtsɛyeli lɛ he sanekpakpa lɛ yahaa mɔ lɛ. Nɔ ni baa ji ekwɛmɔ, ni nɔ ni fata he ji nɔ ni atɛo lɛ nɔ nushwamɔ. Mɛɛ gbɛ atsɔɔ nɔ afeɔ enɛ yɛ? Kɛtsɔ sanegbaa lolo nɔ koni akɛha sanebimɔi kɛ yiŋkɔshikɔshifeemɔi komɛi ahetoo. Nɔ ni jɛɔ enɛ mli baa ji daa Biblia kasemɔ ni tɛoɔ Biblia mli anɔkwalei ewoɔ gbɔmɔ lɛ jwɛŋmɔ kɛ etsui mli diɛŋtsɛ; yɛ Nyɔŋmɔ jɔɔmɔ naa lɛ, shweremɔ baa. Nɔ ni jɛɔ mli baa yɛ naagbee ji Kristo Yesu kaselɔ kroko ni yɔɔ ekaa, sɔɔlɔ kroko. Agbɛnɛ te wɔ fɛɛ, akɛ sɔɔlɔi lɛ, wɔɔfee tɛŋŋ ni wɔna nakai jɔɔmɔi ni miishɛɛ yɔɔ mli ni ji kaselɔ ni wɔɔkpa tamɔ yibii lɛ eko?
5. Mɛni baaye abuu wɔ ni wɔfee sɔɔlɔi ni he esɛ?
5 Taakɛ wɔ klɛŋklɛŋ nikasemɔ lɛ tsɔɔ lɛ, Yesu tsɔɔ ekaselɔi lɛ gbɛ diɛŋtsɛ ni amɛaatsɔ nɔ amɛtsu amɛsɔɔmɔ lɛ he nii. Ni Paulo wie “egbɛi ni yɔɔ Kristo mli” lɛ he. (1 Korintobii 4:17, NW) Asafoi sɔrɔtoi babaoo ni eye ebua ni ato amamɔ shi yɛ Asia Bibioo Iɛ kɛ Hela ji omanye ni eye lɛ he odaseyeli ni ŋwanejee ko bɛ he. Wɔtsɔ hiɛ wɔsusu egbɛ̀i (kɛ Yesu hu gbɛ̀i) lɛ ekomɛi ahe momo, shi ani babaoo yɛ ni abaanyɛ akɛtsu nii ni emɔ shi jogbaŋŋ ŋmɛnɛ?
Mɛni Ji Nɔdaamɔ Nɔ lɛ? Ni Shɛɛ Sane lɛ Hu?
6. Mɛni esa akɛ efee wɔ sɔɔmɔ lɛ koŋtɛ?
6 Mɛni nɔ esa akɛ Kristofoi asane lɛ adamɔ? Esa akɛ edamɔ adesa nilee kɛ jeŋ nilee nɔ? Paulo wolo ni eŋma eyaha Timoteo lɛ kɛ hetoo ni mli ka shi faŋŋ haa: “Shi bo lɛ, hii shi yɛ nii ni okase ni oyɔɔ hewalɛ yɛ nɔ lɛ amli, ejaakɛ ogbekɛbiiashi oje ole ŋmalɛi krɔŋkrɔŋi lɛ ni aaanyɛ aha ole nii ni atsɔɔ Kristo Yesu nɔ hemɔkɛyeli nɔ akɛma yiwalaheremɔ mli lɛ. Ŋmalɛ fɛɛ ŋmalɛ ni jɛ Nyɔŋmɔ mumɔ lɛŋ lɛ, ehi ha nitsɔɔmɔ.” Eka shi faŋŋ akɛ, esa akɛ, Nyɔŋmɔ Wiemɔ lɛ afee wɔsɔɔmɔ lɛ koŋtɛ.—2 Timoteo 3:14-17.
7, 8. Te Yesu kɛ Paulo to ŋmalɛi ni akɛtsuɔ nii he okadi amɛha tɛŋŋ?
7 Kristo Yesu to okadi yɛ enɛ mli—etsɛ wiemɔi shii abɔ kɛjɛ Ŋmalɛi lɛ amli; bɔfo Paulo fee nakai nɔŋŋ. Akɛ nɔkwɛmɔ nɔ lɛ, ani eyapue yɛ Tesalonika akɛ mɔ ni miitsɔɔ Hela jeŋ nilee? Dabi, ejaakɛ taakɛ nɔ ni aŋma afɔ shi lɛ kɛɔ wɔ lɛ: “Ni Paulo tee amɛŋɔɔ taakɛ bɔ ni efɔɔ feemɔ lɛ, ni ekɛ amɛ yayiyii yɛ Ŋmalɛi lɛ ahe hejɔɔmɔ gbii etɛ sɔŋŋ, ni egbele ma etsɔɔ amɛ faŋŋ akɛ ja Kristo lɛ na amanehulu ni ete shi kɛjɛ gbohii ateŋ.”—Bɔfoi lɛ Asaji 17:1-3.
8 Mɛni jɛ mli ba? “Amɛteŋ mɛi komɛi batsɔmɔ heyelilɔi.” No hewɔ lɛ, yɛ Paulo gbɛ lɛ sɛɛnyiɛmɔ mli lɛ, esɔ akɛ wɔshiɛmɔ ŋmɛnɛ lɛ afee nɔ ni damɔ Nyɔŋmɔ Wiemɔ lɛ nɔ. No hewɔ ni wɔyɔɔ Biblia mli saneyitso ko ni wɔkɛ mɛi gbaa he sane yɛ wɔsɔɔmɔ lɛ mli lɛ. Nɛkɛ gbɛ nɔ Nyɔŋmɔ Wiemɔ lɛ jijeɔ yɛ gbɔmɛi ni amɛhiɛ yɔɔ amɛmumɔŋ hiamɔ nii anɔ lɛ amli.—Bɔfoi lɛ Asaji 17:4.
9, 10. Mɛni esa akɛ efee wɔshiɛmɔ wiemɔ lɛ sane yitso ŋmɛnɛ? (b) Okɛ nɔkwɛmɔ nii ni jɛ Paulo sɔɔmɔ nitsumɔ lɛ mli aha.
9 Agbɛnɛ sanebimɔ ni nyiɛ sɛɛ lɛ ji, Mɛɛ sane esa akɛ wɔshiɛ lɛ? Ojogbaŋŋ, mɛni ji Kristo sɔmɔɔ nitsumɔ lɛ yitsei Yesu le nitsumɔ ni ka enɔ lɛ jogbaŋŋ ejaakɛ ekɛɛ: “Esa akɛ miyajajeɔ Nyɔŋmɔ maŋtsɛyeli lɛ he sanekpakpa lɛ mitsɔɔ maji krokomɛi hu, ejaakɛ no hewɔ atsu mi.” Yɛ be mli ni ewieɔ wɔ nibii agbɛjianɔtoo nɛɛ naagbee gbii lɛ ahe lɛ, ekɛɛ: “Ni aaashiɛ maŋtsɛyeli lɛ he sanekpakpa nɛɛ atsɔɔ je nɛŋ fɛɛ, ni akɛye jeŋmaji lɛ fɛɛ odase; ni no dani naagbee lɛ aaaba.”—Luka 4:43; Mateo 24:14.
10 Anaa sane ni ama nɔ mi nɛɛ nɔŋŋ yɛ Paulo shiɛmɔ lɛ mli. Ákɛ nɔkwɛmɔ nɔ lɛ, “etee kpee he lɛ, eyawie ekãa naa, ni nyɔji etɛ sɔŋŋ etsɔɔ amɛ nii ni ema Nyɔŋmɔ maŋtsɛyeli lɛ he saji lɛ anɔ mi” etsɔɔ Yudafoi komɛi yɛ amɛkpee he lɛ. Kɛha mɛi ni yɔɔ Roma lɛ, “ejaje Nyɔŋmɔ maŋtsɛyeli lɛ he sane etsɔɔ amɛ, ni eye he odase faŋŋ.” No hewɔ lɛ esa akɛ “Nyɔŋmɔ maŋtsɛyeli” lɛ afee hewalɛ ni tsirɛɔ wɔ yɛ wɔ Kristofoi asɔɔmɔ lɛ mli ŋmɛnɛ.—Bɔfoi lɛ Asaji 19:8; 28:23, 31.
Ani Otutuaa Mɛi aloo Ogbalaa Amɛ Kɛbaa?
11. Yɛ be babaoo mli lɛ te gbɔmɛi feɔ amɛnii amɛhaa tɛŋŋ kɛ amɛkɛ Odasefonyo ko kpe ni te wɔɔfee tɛŋŋ wɔye enɛ nɔ kunim? (Bɔfoi ɛ Asaji 17:17, 18)
11 Nyɔŋmɔjamɔ, weku kɛ majianɔ wiemɔ gbála gbɔmɛi amli yɛ klɛŋklɛŋ afii’ oha lɛ mli tamɔ bɔ ni eji ŋmɛnɛ lɛ. (Bɔfoi lɛ Asaji 2:7-11) No tsɔɔ akɛ kɛ eba saji ni kɔɔ jamɔ he lɛ, mɛi pii yɛ ni amɛhiɛ amɛ diɛŋtsɛ amɛ yiŋsusumɔi sɔrɔtoi. Yɛ be babaoo mli lɛ, amɛnuɔ he akɛ aawo amɛhe gbeyei aloo aagba amɛnaa ni amɛbɔɔ mɔdɛŋ ni amɛta amɛhe kɛ amɛkɛ Odasefonyo ko kpe. Te wɔɔfee tɛŋŋ wɔtsake enɛ? Kɛtsɔ mlihilɛ, ŋaalee kɛ shihilɛ fɛɛ mli ni wɔkɛ wɔhe aaawo ni wɔkɛtsu nii lɛ nɔ.
12, 13. Mɛɛ gbɛ Paulo tsɔ nɔ ewie etsɔɔ mɛi ni jaa wɔji yɛ Ateene lɛ? Te amɛfee amɛnii amɛha tɛnŋ?
12 Kadimɔ bɔ ni Paulo tsu shihilɛ ni tamɔ nɛkɛ he nii yɛ Ateene ni ajaa wɔji pii yɛ jɛmɛ lɛ. Eklɛŋklɛŋ nifeemɔ yɛ be mli ni ena amagai babaoo lɛ ha ehao waa. Yɛ be mli ni etee eyadamɔ shi yɛ Areopago lɛ, ani etutua amɛ amagajamɔ lɛ amrɔ nɔŋŋ kɛ jɛmɔ? Ehiɛkpamɔ wiemɔ lɛ ji: “Ateenebii, miyoo akɛ nyɛsheɔ nyɔŋmɔi lɛ agbeyei waa fe bɔ ni mɛi krokomɛi feɔ. Ejaakɛ beni mihoɔ ni mikwɛ nii ni nyɛjea lɛ, mina afɔleshaa latɛ ko ni aŋma yɛ no akɛ, ‘Nyɔŋmɔ ni Aleee lɛ Nɔŋ.’ No hewɔ lɛ, mɔ ni nyɛkɛ hetuu-kɛ-hamɔ haa ni nyɛleee lɛ lɛ, lɛ nɔŋŋ ehe sane mijajeɔ mitsɔɔnyɛ nɛɛ.”—Bɔfoi lɛ Asaji 17:16-23.
13 Ani Paulo kɛ nakai wiemɔi ni ekɛje shishi lɛ tutua etoibolɔi lɛ aloo ekɛshwie amɛ kɛjɛ ehe? Dabi. Ekɛ ŋaa tsu nii, ebɛ keketee. Ebuuu amɛ fɔ, eyɛ mli akɛ sɛɛnamɔ bɛ amɛjamɔ lɛ he yɛ Nyɔŋmɔ hiɛ. Eyɛ jɛmɛ akɛ mɔ ni miiya ayashiɛ Maŋtsɛyeli lɛ he sane lɛ, jeee ni eyatutua amɛ kɛ jɛmɔ. Eyɔse jamɔŋ, henumɔ babaoo ni amɛyɔɔ lɛ, ni ekɛ enɛ tsu nii akɛ nɔ ni ebaadamɔ nɔ ni ekɛje anɔkwale Nyɔŋmɔ lɛ kɛ E-najiaŋdamɔlɔ Yesu ni átee lɛ shi lɛ he sane lɛ shishi. Mɛni jɛ nɛkɛ ŋaa gbɛ ni etsɔ nɔ ewie nɛɛ mli ba? Eyɛ mli akɛ mɛi komɛi ye ehe fɛo moŋ, shi “mɛi komɛi hu kɛɛ: ‘Wɔɔsaa wɔbo bo toi ekoŋŋ yɛ enɛ hewɔ.’” Hɛɛ afɔ nine atsɛ lɛ kɛha sɛɛsaramɔ!—Bɔfoi lɛ Asaji 17:22-32, NW.
14. Te wɔɔfee tɛŋŋ wɔkɛ Paulo nɔkwɛmɔ nɔ lɛ atsu nii yɛ wɔ sɔɔmɔ lɛ mli?
14 Te wɔɔfee tɛŋŋ ni wɔkɛ nɛkɛ gbɛ nɛɛ atsu nii yɛ wɔsɔɔmɔ lɛ mli ŋmɛnɛ? Klɛŋklɛŋ lɛ, esa akɛ wɔhiɛ ahi wɔhe nɔ ni wɔfee oya ni wɔyoo okadii ni jeee anɔkwale ni kɔɔ mɔ lɛ jamɔ he lɛ—kɛtsɔ jamɔ mli nɔ ko ni ewo aloo nɔ ko ni tsotsoro shinaa lɛ naa aloo shia lɛ mli lɛ kwɛmɔ nɔ. No hewɔ lɛ, taakɛ Paulo fee lɛ, wɔbaanyɛ wɔna mɔ kroko lɛ jamɔ ni eyɔɔ mli lɛ he jwɛŋmɔ ko. Enɛ baa wɔtsɔɔ hiɛ wɔjieɔ naanyobɔɔ su kpo wɔtsɔɔ, wɔteɔ mɔ lɛ miishɛɛ shi, shi wɔkɛ sane ni baatee béi shi kpaaa wiemɔ lɛ hiɛ. Kaimɔ akɛ wɔmiiya wɔyasara gbɔmɔ lɛ, titri lɛ ni wɔwie Nyɔŋmɔ Maŋtsɛyeli lɛ he wɔtsɔɔ lɛ—jeee ni wɔkɛ wɔhe ayawo tsɔɔmɔi ahe wiemɔ mli amrɔ nɔŋŋ. Wɔmiisumɔ ni wɔnine ashɛ gbɔmɛi anɔ, jeee ŋwanejee kɛkɛ.—Okɛto 2 Timoteo 2:23-26 he.
15. Mɛɛ nikasemɔi komɛi ni hi jogbaŋŋ wɔbaanyɛ wɔkase kɛjɛ Yesu sɔɔmɔ nitsumɔ lɛ mli? (Luka 10:38-42)
15 Mɛni hu wɔbaanyɛ wɔkase kɛjɛ Kristo nɔkwɛmɔ nɔ lɛ mli? Kɛ wɔsusu esɔɔmɔ lɛ he lɛ nɔ ni wɔbaayoo yɛ gbɛ fɛɛ gbɛ nɔ ji ehekɛnɔfɔɔ kɛ bɔ ni ewiemɔ mli ka shi faŋŋ lɛ. Ejooo shihilɛ ko naa foi, shi moŋ ewie Nyɔŋmɔ Maŋtsɛyeli lɛ he yɛ shihilɛi sɔrɔtoi fɛɛ mli, kɛ̃ shihilɛ lɛ hi aloo ehiii po. Enyɛɔ eshiɛɔ yɛ teemɔŋ yɛ mɔ ko shia, ni enyɛɔ edamɔɔ asafoi babaoo hiɛ ehaa maŋshiɛmɔ—ni ekwɛɛɛ wolo ko nɔ, ekwɛɛɛ Biblia lɛ mli, ni ewieee ewooo gbɛɛmɔ tsɔne ko hu mli! Ebɛŋkɛɔ gbɔmɛi sɔrɔtoi fɛɛ. Ohiafoi lɛ nu he akɛ amɛbaanyɛ amɛbɛŋkɛ lɛ. Ewieɔ nibii ni amɛnuɔ shishi ni kɔɔ abɔɔi, ŋmɔji, yai kɛ wuoyaa he. Enɔkwɛmɔ nii loo ebɛbua lɛ baa shi haa amɛ eyɛ mli akɛ amɛshishinumɔ mli kwɔlɔ. Ani wɔjieɔ nakai sui kpakpai lɛ nɔŋŋ kpo yɛ wɔsɔɔmɔ lɛ mli‘?—Mateo 4:18-25; 13:1-33; Luka 5:1-3.
Bɔ Ni Ooofee Obote Tsui Lɛ Mli
16. Mɛni hewɔ esa akɛ wɔfee tsɔɔlɔi ni he esa?
16 Taakɛ wɔle lɛ eheɔ be kɛ nikasemɔ kpakpa dani mɔ lɛ ahe Biblia mli sane ni kɔɔ Nyɔŋmɔ Maŋtsɛyeli lɛ he lɛ eye. No hewɔ ni wɔyɔɔ daa shia Biblia kasemɔ he gbɛjianɔtoo ni wɔkɛ mɔ fɛɛ mɔ ni sumɔɔ akɛ ele Nyɔŋmɔ shiwooi kɛtsɔ Kristo nɔ lɛ mli lɛ feɔ ni wɔheee shika ko yɛ he lɛ. Nikasemɔi nɛɛ heɔ be ni sɛɛ kɛ bɔ ni sa, ni asusuɔ saji kɛ sanebimɔi babaoo he. Enɛ tsɔɔ yɛ faŋŋ mli akɛ esa akɛ wɔfee tsɔɔlɔi ni he esa. Shi mɛni diɛŋtsɛ ji nɔ titri loo yiŋtoo ni yɔɔ nitsɔɔmɔ mli?—1 Timoteo 4:16.
17. Mɛni ji gbɛ kome ni Yesu tsɔ nɔ ni no ha enine shɛ tsui lɛ nɔ?
17 Wɔmiitsɔ wɔhiɛ wɔha Yesu ekoŋŋ kɛha hetoo lɛ. Te etsɔɔ nii eha tɛŋŋ? Ofainɛ bo lɛ taomɔ ŋmalɛi ni nyiɛ sɛɛ nɛɛ amli ni okwɛ akɛ obaayoo Yesu nitsɔɔmɔ gbɛ ni mli ka shi faŋŋ lɛ: Luka 6: 9, 32-34, 39-42. Mɛni ji no? Ebiɔ saji ni akɛyooɔ nibii. Mɛni hewɔ efee nakai? Koni eye ebua etoibolɔi lɛ ni amɛsusu saji ahe ni amɛdamɔ etsɔɔmɔi lɛ anɔ amɛka amɛ diɛŋtsɛ amɛhe amɛkwɛ. Ekɛ esanebimɔi lɛ tsu nii yɛ ŋaa mli ni no ha enine shɛ amɛtsui nɔ. Esa akɛ amɛtsɔɔ kɛji akɛ amɛmiisumɔ ni amɛtsɔmɔ esɛɛnyiɛlɔi diɛŋtsɛ aloo yiŋtoo ni yɔɔ amɛ toiboo lɛ sɛɛ lɛ ji hiɛaŋhiɛaŋ nɔ̃.—Mateo 13:10-17: Marko 8:34-38.
18. (a) Mɛni hewɔ Yehowa Odasefoi kɛ sanebimɔi tsuɔ nii yɛ bei babaoo mli yɛ amɛwoji amli lɛ? (b) Mɛɛ nifeemɔ esaaa akɛ wɔkɛtsuɔ nii pii yɛ be mli ni wɔtsɔɔ mɛi krokomɛi anii lɛ?
18 Eehe efee akɛ Biblia kasemɔ he woji ni Yehowa Odasefoi kɛtsuɔ nii yɛ amɛsɔɔmɔ le mli le fɛɛ yɛ sanebimɔi kɛha kuku fɛɛ kuku mlitsɔɔmɔ. Eji nii ni yeɔ buaa nitsɔɔmɔ, ni eyeɔ ebuaa mɛi ni kaseɔ Biblia lɛ koni amɛtsɔɔ amɛjwɛŋmɔ yɛ amɛ diɛŋtsɛ amɛwiemɔi amli. Enɛ haa ebafeɔ faŋŋ kɛji akɛ mɔ lɛ nuɔ nikasemɔ lɛ shishi aloo enuuu shishi. Shi kɛ̃lɛ eyɛ mli akɛ Yesu bi saji yɛ be babaoo mli moŋ, shi ehaaa enɛ afee tamɔ shwɛmɔ ko ni akaa yiŋ afeɔ ni akɛ hetoo lɛ he klɛŋklɛŋ wiemɔ ko haa koni atsa nɔ. Ani onaa ni okɛ ohe miiwo shihilɛi komɛi ni tamɔ nakai mli yɛ bei komɛi amli kɛ okɛ mɛi komɛi miikase Biblia lɛ? Mɛni hewɔ ejeee gbɛ kpakpa ni akɛaatsu nii yɛ be fɛɛ mli lɛ? Ejaakɛ esa akɛ Nyɔŋmɔ kɛ Kristo he nilee ni kɛ mɔ yaa yiwalaheremɔ mli lɛ adamɔ shishinumɔ kɛ sanenaatsɔɔmɔ ni ja naa, jeee yiŋsusumɔ ko ni he ehiaaa.—Yohane 17:3; 1 Yohane 5:20.
Namɔ Kaselɔi?
19, 20. Mɛɛ kɔkɔbɔɔ he hiaa yɛ biɛ? Mɛni hewɔ?
19 Shi kɔkɔbɔɔ wiemɔ loo henɔkwɛmɔ jogbaŋŋ ko he miihia yɛ he ni wɔshɛ nɛɛ. Kɛ wɔshiɛ ni wɔtsɔɔ nii yɛ gbɛ ni mɔɔ shi nɔ yɛ shikpɔŋkuku ni woɔ yibii mli lɛ, yɛ naagbee lɛ wɔwoɔ kaselɔi akɛ yibii. Shi namɔ kaselɔi amɛji? Ani esa akɛ wɔsusu akɛ amɛji “mitooi”? Ani esa akɛ wɔŋmɛ gbɛ ákɛ sɔɔlɔi lɛ ni awo wɔ nɔ kɛ yijiemɔ? Kadimɔ bɔ ni Paulo kɛ Barnaba tee amɛnii amɛha yɛ be mli ni gbɔmɛi ni yɔɔ Listra lɛ yasumɔ akɛ amɛaabu amɛ akɛ nyɔŋmɔi lɛ. Amɛbolɔ amɛwo asafoi lɛ akɛ: “Ataamɛi, mɛni nyɛfeɔ nɛɛ? Wɔ hu gbɔmɛi adesai ji wɔ tamɔ nyɛ nɔŋŋ, ni wɔmiijaje sanekpakpa wɔmiitsɔɔ nyɛ, koni nyɛku nyɛsɛɛ kɛjɛ nɛkɛ yakayaka nii nɛɛ ahe kɛba Nyɔŋmɔ hiɛkalɔ lɛ ŋɔɔ.”—Bɔfoi lɛ Asaji 14:14, 15.
20 Paulo kɛ Barnaba ebɔɔɔ mɔdɛŋ akɛ amɛaagbala jwɛŋmɔ kɛba amɛ diɛŋtsɛ amɛnɔ. Eyɛ mli akɛ Paulo wo Kristofoi aŋaa ni amɛkase lɛ tamɔ bɔ ni ekase Kristo lɛ moŋ, shi esumɔɔɔ ni amɛfeɔ esɛɛnyiɛlɔi. Esa akɛ sɔɔmɔ nitsumɔ lɛ ni wɔkɛ wɔhe ewo mli lɛ afee nɔ ni woɔ Nyɔŋmɔ hiɛ nyam yɛ be fɛɛ mli, shi jeee gbɔmɛi.—1 Korintobii 3:3, 7; 11:1.
21. Mɛni hewɔ kaselɔi hu batsɔɔ sɔɔlɔi lɛ?
21 Yɛ be ni sa mli lɛ, kaselɔi batsɔmɔɔ sɔɔlɔi. Mɛni hewɔ ebaa lɛ nakai? Ojogbaŋŋ, mɛni baa kɛji akɛ wɔyɛ sanekpakpa diɛŋtsɛ ko ni wɔbaagba? Ani wɔbaaha ehi wɔ pɛ wɔŋɔɔ? Nɔ ni tamɔɔɔ enɛ lɛ, wɔhe miitswa shi kɛkɛ akɛ wɔɔgba mɔ kroko. Taakɛ Yesu kɛɛ lɛ: “Gbɔmɔ kpakpa jieɔ nɔ kpakpa kɛjɛɔ etsui mli jwetri kpakpa lɛ mli, . . . ejaakɛ nɔ ni eyi tsui kɛteke nɔ lɛ, no enaabu wieɔ.” Nakai eji yɛ Maŋtsɛyeli lɛ he sanekpakpa lɛ gbɛfaŋ. Kaselɔ ni enɛ mɔɔ etsui lɛ miisumɔ ni etsɔɔ mɛi krokomɛi anii ni eesumɔ ni ekɛ ehe awo sɔɔmɔ lɛ mli daa, koni ejɛ etsui mli efee enɛ. Henɔjɔɔmɔ kɛha Nyɔŋmɔ kɛ baptisimɔ nyiɛɔ sɛɛ. No hewɔ lɛ sɔɔlɔi ni baa be fɛɛ be tamɔ kɔsɔŋkɔsɔ lɛ yaa nɔ, taakɛ shishitoo mla ni yɔɔ Paulo ŋaawoo ni ekɛha Timoteo lɛ mli lɛ ji lɛ: “Nii ni onu yɛ minaa yɛ odasefoi pii ahiɛ lɛ, no nɔŋŋ otu owo gbɔmɛi anɔkwafoi adɛŋ, mɛi ni yɔɔ hewalɛ ni amɛkɛaatsɔɔ mɛi krokomɛi anii lɛ.”—Luka 6:45; 2 Timoteo 2:2.
22. (a) Mɛni hewɔ Yehowa ená tsɔɔlɔi kɛ sanekpakpa jajelɔi agbɛjianɔtoo lɛ? (b) Mɛɛ wɔsɛɛ he nitsumɔ lolo yɔɔ ni esa akɛ atsu agbe naa?
22 Ŋmɛnɛ, Yehowa Nyɔŋmɔ yɛ tsɔselɔi, sanekpakpa jajelɔi kɛ sɔɔlɔi agbɛjianɔtoo ni átsɔse amɛ jogbaŋŋ fe fɛɛ yɛ wɔ afii ohai 20 nɛɛ mli. Amɛteŋ mɛi ni fe 2,600,000 kɛ amɛhe ewo naagbee odaseyeli ni akɛhaa dani naagbee lɛ aba gbɛjianɔtoo fɔŋ nɛɛ nɔ lɛ mli. Shi aasaa nɛkɛ kuu ni amɛyi faa yɛ be fɛɛ mli nɛɛ kɛha nitsumɔ kroko ni da—tsɔsemɔ ni akɛaaha akpekpei toi akpekpei abɔ ni baajɛ gbohiiashitee lɛ mli aba lɛ. Ani ófee klalo akɛ okɛ ohe baawo hegbɛ ni yɔɔ naakpɛɛ nɛɛ mli? Ani osɔɔmɔ lɛ miiwo yibii bianɛ? Nyɛhaa efea wɔsɔlemɔ akɛ wɔ la lɛ aaakpɛ kɛwo Nyɔŋmɔ hiɛ nyam, yɛ be mli ni wɔsɔmɔɔ akɛ sɔɔlɔi ni amɛ sɔɔmɔ mɔɔ shi lɛ.—Mateo 5:16; Yohane 5:28, 29.a
[Shishigbɛ niŋmaa]
a Ajie kɛjɛ August 16, 1984 Watchtower lɛ mli.
Saji Otii ni Osusu He Lɛ
◻ Mɛni ji gbɛ ni mɔɔ shi fe fɛɛ ni otsɔɔ nɔ ashiɛɔ sanekpakpa lɛ?
◻ Esa okɛ wɔtsɔɔmɔ Iɛ adamɔ mɛni nɔ? Mɛni ji shɛɛ sane lɛ?
◻ Mɛɛ sui he hiaa koni no aha gbɔmɛi abo wɔ toi?
◻ Te fee tɛŋŋ ni Yesu nine shɛ etoibolɔi lɛ atsui nɔ?
◻ Mɛɛ kɔkɔbɔɔ he hiaa beni wɔtsɔɔ mɛi anii lɛ?
[Mfoniri ni yɔɔ baafa 17]
Yehowa Odasefoi shiɛɔ yɛ he fɛɛ he ni amɛaana gbɔmɛi
[Mfoniri ni yɔɔ baafa 19]
Kɛ wɔmiiye odase lɛ, esa okɛ wɔkwɛ nibii ni tsɔɔ jamɔ ni mɔ Iɛ yɔɔ mli