Tsi Obɛŋkɛ Nyɔŋmɔ

“Miishɛjemɔ Fɛɛ Nyɔŋmɔ Lɛ”

2 Korintobii 1:3, 4

SHIHILƐ mli nibii babaoo—nɔnaa, nijiaŋwujee, shoofeemɔ—baanyɛ eha wɔye awerɛho, loo wɔye wɔtsui babaoo po. Yɛ bei ni tamɔ nɛkɛ mli lɛ, ekolɛ obaabi ohe akɛ, ‘Nɛgbɛ ji he ni manyɛ maná yelikɛbuamɔ kɛjɛ?’ Wiemɔi ni bɔfo Paulo kɛtsu nii yɛ 2 Korintobii 1:3, 4 lɛ haa wɔnaa mɔ ni baanyɛ eshɛje wɔmii yɛ gbɛ ni hi fe fɛɛ nɔ—Yehowa Nyɔŋmɔ.

Yɛ kuku 3 lɛ mli lɛ, atsɛ Nyɔŋmɔ akɛ “musuŋtsɔlɛi atsɛ.” Mɛni no tsɔɔ? Hela wiemɔ ni atsɔɔ shishi akɛ “musuŋtsɔlɛi” lɛ baanyɛ akɔ mɔ ko ni nuɔ he ehaa mɛi ni miina nɔ̃ lɛ he.a Wolo ko ni akɛtaoɔ Biblia mli saji amli lɛ tsɔɔ mli akɛ, abaanyɛ atsɔɔ wiemɔ nɛɛ shishi akɛ “nuɔ he ehaa mɔ” loo “susuɔ mɔ he waa.” Nyɔŋmɔ “musuŋtsɔlɛi” lɛ haa eyeɔ ebuaa mɛi. Le ni wɔle akɛ Nyɔŋmɔ yɛ su ni tamɔ nɛkɛ lɛ haa wɔtsiɔ wɔbɛŋkɛɔ lɛ, aloo jeee nakai?

Agbɛnɛ hu, Paulo tsɛ Yehowa akɛ “miishɛjemɔ fɛɛ Nyɔŋmɔ.” Atsɔɔ mli akɛ wiemɔ ni Paulo kɛtsu nii lɛ kɔɔ “mɔ ko ni shɛjeɔ mɔ ko ni eyaje shihilɛ ko ni jaraa mli loo mɔ ko ni miiye awerɛho mii kɛ mɔ ko ni yeɔ ebuaa loo ewoɔ mɛi ni yɔɔ shihilɛi ni tamɔ nɛkɛ mli lɛ ahewalɛ” lɛ he. The Interpreter’s Bible lɛ tsɔɔ mli akɛ: “Kɛ́ wɔha mɔ ko ni miina nɔ̃ lɛ ná ekãa kɛdamɔ epiŋmɔ lɛ naa lɛ, no tsɔɔ akɛ wɔshɛje emii.”

Ekolɛ obaabi akɛ ‘Mɛɛ gbɛ nɔ Nyɔŋmɔ tsɔɔ eshɛjeɔ wɔmii ni ehaa wɔnáa ekãa kɛdamɔɔ wɔpiŋmɔi anaa?’ Etsɔɔ e-Wiemɔ ni ji Biblia lɛ kɛ hegbɛ ni ehaa wɔnáa kɛbɛŋkɛɔ lɛ yɛ sɔlemɔ mli lɛ nɔ efeɔ nakai. Paulo kɛɔ wɔ akɛ Nyɔŋmɔ jɛ suɔmɔŋ ekɛ E-Wiemɔ lɛ ha wɔ koni wɔkɛ “ŋmalɛi lɛ amli miishɛjemɔ lɛ aná hiɛnɔkamɔ.” Kɛfata he lɛ, kɛ́ wɔjɛ wɔtsuiiaŋ wɔtsi wɔbɛŋkɛ Nyɔŋmɔ yɛ sɔlemɔ mli lɛ wɔbaanyɛ wɔná “Nyɔŋmɔ hejɔlɛ ni fe jwɛŋmɔi fɛɛ” lɛ eko.—Romabii 15:4; Filipibii 4:7.

Te Yehowa shɛjeɔ ewebii lɛ amii ehaa tɛŋŋ? Paulo kɛɛ akɛ Nyɔŋmɔ “shɛjeɔ wɔmii yɛ wɔmanehului lɛ fɛɛ mli.” (2 Korintobii 1:4) Shihilɛ fɛɛ shihilɛ ni ekolɛ wɔkɛbaakpe, kɛ́ eji naagba ko jio, piŋmɔ ko jio, nɔnaa ko jio lɛ, Nyɔŋmɔ baanyɛ eha wɔna ekãa kɛ hewalɛ ni he hiaa koni wɔnyɛ wɔdamɔ naa. Ani enɛ haaa otsɛ́ otsui oŋmɛ omli?

Jeee mɔ ni Nyɔŋmɔ shɛjeɔ emii lɛ pɛ náa Nyɔŋmɔ miishɛjemɔ lɛ he sɛɛ. Paulo kɛshi sɛɛ akɛ, Nyɔŋmɔ shɛjeɔ wɔmii koni “wɔ hu wɔnyɛ wɔkɛ miishɛjemɔ, ni Nyɔŋmɔ ŋɔshɛjeɔ wɔ diɛŋtsɛ wɔmii lɛ, ashɛje mɛi ni naa amanehulu fɛɛ amanehulu lɛ amii.” Akɛni ashɛje wɔmii yɛ wɔmanehulu lɛ mli hewɔ lɛ, ehaa wɔhu wɔnuɔ he wɔhaa mɛi, ni no tsirɛɔ wɔ koni wɔye wɔbua mɛi ni ehia amɛ lɛ.

“Miishɛjemɔ fɛɛ Nyɔŋmɔ” ni Yehowa ji lɛ etsɔɔɔ doo akɛ ebaajie wɔnaagbai loo wɔpiŋmɔi lɛ kɛya kwraa. Shi wɔbaanyɛ wɔná nɔmimaa akɛ: Kɛ́ wɔtsi wɔbɛŋkɛ lɛ koni eshɛje wɔmii lɛ, ebaanyɛ eha wɔ hewalɛ koni wɔnyɛ wɔdamɔ awerɛhoyeli loo naagba ko ni ekolɛ wɔkɛbaakpe yɛ wɔshihilɛ mli lɛ naa. Nyɔŋmɔ ni jieɔ musuŋtsɔlɛ ni tamɔ nɛkɛ kpo lɛ sa wɔjamɔ kɛ yijiemɔ.

[Shishigbɛ niŋmaa]