Sanebimɔi Ni Jɛ Kanelɔi Adɛŋ
Ani sui ni atsĩ tã yɛ Galatiabii 5:22, 23 lɛ pɛ ni feɔ ‘mumɔ lɛ yibii lɛ’?
Galatiabii 5:22, 23 lɛ kɛɔ akɛ: “Yibii ni mumɔ lɛ woɔ lɛ ji suɔmɔ, miishɛɛ, toiŋjɔlɛ, tsuishitoo, mlihilɛ, ekpakpafeemɔ, hemɔkɛyeli, mlijɔlɛ, henɔyeli.” Shi enɛ etsɔɔɔ akɛ sui nɛɛhu ni atsĩ tã yɛ ŋmalɛ nɛɛ mli lɛ pɛ ji sui ni Nyɔŋmɔ mumɔ lɛ baanyɛ aye abua wɔ ni wɔjie kpo.
Nɔ hewɔ ni wɔkɛɔ nakai ji akɛ, yɛ kukuji ni tsɔ hiɛ lɛ amli lɛ, bɔfo Paulo wie akɛ: “Heloo lɛ nitsumɔi lɛ . . . ji ajwamaŋbɔɔ, muji nii, jeŋba gbonyo ni efeee mɔ hiɛgbele, amagajamɔ, mumɔi kɛshãramɔ, nyɛɛ, béi, awuŋayeli, mlifu, naataamɔi, mligbálamɔi, jamɔ kui, hetsɛ̃, dãatɔɔ, henaabuamɔi ni yɔɔ hoo, kɛ nibii ni tamɔ enɛɛmɛi.” (Gal. 5:19-21) Wiemɔ ni ji, “kɛ nibii ni tamɔ enɛɛmɛi” ni Paulo kɛmu esane lɛ naa lɛ tsɔɔ akɛ, sui krokomɛi hu yɛ ni abaanyɛ awie yɛ amɛhe akɛ amɛji “heloo lɛ nitsumɔi,” tamɔ sui ni atsĩ tã yɛ Kolosebii 3:5 lɛ nɛkɛ. Nakai nɔŋŋ bɔ ni emu kuku 23 lɛ naa ehã lɛ hãa wɔnaa akɛ, yɛ sui kpakpai nɛɛhu ni etsĩ tã lɛ asɛɛ lɛ, sui kpakpai krokomɛi yɛ ni mumɔ lɛ baanyɛ aye abua Kristofoi ni amɛjie kpo.
Yɛ Efesobii awolo lɛ mli lɛ, Paulo tsĩ yibii ni la lɛ woɔ lɛ atã. Ewie akɛ: “Yibii ni la lɛ woɔ ji ekpakpafeemɔ kɛ jalɛ kɛ anɔkwale fɛɛ.” (Efe. 5:8, 9) Ani okadi akɛ su ni ji “ekpakpafeemɔ” lɛ fata “yibii ni la lɛ woɔ” lɛ ahe, ni yɛ nakai beiaŋ nɔŋŋ, efata “yibii ni mumɔ lɛ woɔ” lɛ ahe? Ni tsɔɔ akɛ, sui krokomɛi ni Paulo tsĩ tã akɛ amɛji yibii ni la lɛ woɔ lɛ, ni ji, “jalɛ kɛ anɔkwale” lɛ, hu baanyɛ afee yibii ni mumɔ lɛ woɔ.
Paulo wo Timoteo hu hewalɛ ni etiu “jalɛ kɛ Nyɔŋmɔjamɔ kɛ hemɔkɛyeli kɛ suɔmɔ kɛ shifimɔ kɛ mlijɔlɛ” sɛɛ. (1 Tim. 6:11) Sui kpakpai ekpaa nɛɛ ateŋ etɛ pɛ, ni ji, hemɔkɛyeli, suɔmɔ, kɛ mlijɔlɛ, fata “yibii ni mumɔ lɛ woɔ” lɛ ahe. Ni kɛ̃lɛ, ja mumɔ krɔŋkrɔŋ lɛ eye ebua Timoteo dani ebaanyɛ ejie sui krokomɛi ni eshwɛ lɛ, ni ji, jalɛ, Nyɔŋmɔjamɔ, kɛ shifimɔ lɛ hu kpo.—Okɛto Kolosebii 3:12; 2 Petro 1:5-7 lɛ he.
No hewɔ lɛ, yɛ sui nɛɛhu ni atsĩ tã yɛ Galatiabii 5:22, 23 lɛ asɛɛ lɛ, sui krokomɛi hu yɛ ni Nyɔŋmɔ mumɔ lɛ baanyɛ aye abua wɔ ni wɔjie kpo, ni abaanyɛ awie yɛ sui nɛɛ ahe akɛ, amɛji “yibii ni mumɔ lɛ woɔ.” Kɛ́ wɔjie sui nɛɛ kpo lɛ, abaanyɛ awie yɛ wɔhe akɛ wɔji Kristofoi ni edara yɛ mumɔŋ ni wɔwo “subaŋ hee ni abɔ yɛ Nyɔŋmɔ suɔmɔ naa yɛ anɔkwa jalɛ kɛ anɔkwayeli krɔŋŋ mli lɛ.”—Efe. 4:24.