Anɔkwa Nyɔŋmɔ Kome Pɛ Lɛ Jalɔi Ni Efee Ekome
“O Yehowa, . . . bo, okome too pɛ ji Nyɔŋmɔ.”—LALA 86:9, 10, NW
1. (a) Mɛni Yehowa ebɔi he nitsumɔ koni ekɛ ekomefeemɔ yɛ jamɔ mli aba? (b) Mɛni jɛ nakai “nɔkwɛmɔ gbɛjianɔtoo” lɛ mli ba nɔŋŋ?
1 EKOMEFEEMƆ yɛ jamɔ mli—kwɛ bɔ ni enɛ ŋɔɔ ha! Shi adesai ateŋ mɛi ni fa nako enɛ. Shi kɛlɛ, ekomefeemɔ yɛ jamɔ mli lɛ jeee lamɔ. Eji Nyɔŋmɔ yiŋtoo. Afii ohai nyɔŋma kɛ nɛɛhu ni eho nɛ ni Yehowa to “nɔkwɛmɔ he gbɛjianɔ;” ni yiŋtoo ni yɔɔ sɛɛ ji ekomefeemɔ—ekomefeemɔ ni tamɔ nɔ ni mɔ ko baana yɛ shia ni amɛkɛ amɛhe kpaa gbee ni suɔmɔ yɔɔ mli lɛ mli. Etsɛɛɛ ni ekomefeemɔ ni “nɔkwɛmɔ gbɛjianɔtoo” nɛɛ kɛba lɛ ha Kristofoi ni ji Yudafoi lɛ kɛ Samariabii fee ekome amɛja yɛ nyɛmi suɔmɔ mli; kɛkɛ ni ahere Jeŋmajiaŋbii ni ji foolɔi kɛba asafo lɛ mli. Nɔ ni he hiaa fe fɛɛ lɛ, aha amɛ fɛɛ amɛkɛ Yehowa Nyɔŋmɔ ba ekomefeemɔ mli yɛ amɛhemɔkɛyeli ni damɔ Yesu afɔleshaa lɛ jara ni kpataa esha lɛ nɔ lɛ hewɔ. Amɛbaná wekukpaa ni tamɔ nɔ ni ka bii kɛ Tsɛ ni yɔɔ suɔmɔ teŋ lɛ mli ŋɔɔmɔ.
2. (a) Mɛni ji “nɔkwɛmɔ gbɛjianɔtoo” lɛ, ni mɛɛ be mli ebɔi nitsumɔ? (b) Mɛni ji “nibii ni yɔɔ ŋwɛi” lɛ anaabuamɔ lɛ shishi?
2 Efesobii 1:9, 10 gbalaa jwɛŋmɔ kɛbaa nɛkɛ “nɔkwɛmɔ gbɛjianɔtoo” nɛɛ nɔ, akɛ: “Eji nɔ ni sa hiɛ ni eto yiŋ yɛ he yɛ lɛ diɛŋtsɛ emli kɛha nɔkwɛmɔ gbɛjianɔtoo [aloo, gbɛjianɔ ni atoɔ koni akwɛ weku saji anɔ] yɛ be ni ato lɛ naagbee [kɛjɛ Pentekoste afi 33 Ŋ.B.kɛyaa] koni ebua nibii anaa ekoŋŋ yɛ Kristo mli, nibii ni yɔɔ ŋwɛi kɛ [sɛɛ mli lɛ] nibii ni yɔɔ shikpɔŋ nɔ.” “Nibii ni yɔɔ ŋwɛi,” ni ji akɛ, aŋkroaŋkroi ni kɛ Kristo baahi ŋwɛi Maŋtsɛyeli lɛ mli lɛ anaabuamɔ, klɛŋklɛŋ lɛ kɛjɛ Yudafoi lɛ ateŋ, no sɛɛ lɛ Samariabii kɛ agbɛnɛ Jeŋmajiaŋbii lɛ.
3. Mɛni “nibii ni yɔɔ shikpɔŋ nɔ” lɛ anaabuamɔ lɛ kɛba?
3 Yɛ wɔgbii nɛɛ amli, titri lɛ kɛjɛ 1935 wɔna “nibii ni yɔɔ shikpɔŋ nɔ” ni ji, gbɔmɛi ni akɛ wala yɛ shikpɔŋ nɔ Paradeiso baaduro amɛ lɛ anaabuamɔ. Gbɔmɛi akpekpei abɔ ekpɛlɛ Nyɔŋmɔ “nɔkwɛmɔ gbɛjianɔtoo” ni suɔmɔ yɔɔ mli lɛ fa ni ji enyɔ nɛɛ nɔ momo. Amɛmiiba kɛmiijɛ jeŋmaji kɛ majianɔwiemɔi sɔrɔtoi fɛɛ mli. Ekomefeemɔ ni amɛnaa lɛ jeee gbɔmɛi komɛi ni anaa amɛ ni yaa nɔ amɛhiɛɔ amɛtsutsu hemɔkɛyelii kɛ nifeemɔi amli lolo lɛ anaabuamɔ. Shi moŋ, taakɛ Yesaia 2:3 gba fɔ shi lɛ, amɛmiikase Yehowa gbɛ̀i lɛ koni ‘amɛnyiɛ etempɔŋi lɛ anɔ.’
4. (a) Abaanyɛ aná ekomefeemɔ yɛ jamɔ mli kɛyashɛ nɛgbɛ, ni mɛɛ gbɛ nɔ Biblia lɛ tsɔɔ enɛ mli yɛ? (b) Yɛ naagbee kaa lɛ sɛɛ lɛ, mɛɛ wekukpaa adesai ni eye emuu Iɛ kɛ Yehowa baana mli ŋɔɔmɔ?
4 Shi nɔ ni wɔnaa ŋmɛnɛ lɛ jeee he ni abaana ekomefeemɔ lɛ kɛyashɛ lɛ fɛɛ. Nyɔŋmɔ yiŋtoo lɛ haa efeɔ faŋŋ akɛ bɔɔ nii ni yɔɔ jwɛŋmɔ lɛ fɛɛ baafee ekome yɛ anɔkwale jamɔ mli. Aha bɔfo Yohane tsɔ hiɛ ena bɔ ni shihilɛ ni yɔɔ naakpɛɛ nɛɛ baaji yɛ Kristo Afii Akpe Nɔyeli lɛ naagbee, ni etsɔɔ mli yɛ Kpojiemɔ 5:13 akɛ: “Ni minu akɛ bɔɔ nii fɛɛ ni yɔɔ ŋwɛi kɛ shikpɔŋ lɛ nɔ lɛ kɛ shikpɔŋ lɛ shishi kɛ ŋshɔ hiɛ kɛ nii fɛɛ ni yɔɔ amɛ mli lɛ kɛɛ akɛ: ‘Aŋɔ jɔɔmɔ kɛ agbojee kɛ anunyam kɛ nɔyeli lɛ aha mɔ ni ta maŋtsɛsɛi lɛ nɔ lɛ [ni ji Yehowa] kɛ toobi lɛ [Yesu Kristo] kɛjɛ naanɔ kɛya naanɔ!” Yohane na ni mɔ fɛɛ mɔ efee ekome yɛ Yesu Kristo shishi ni amɛmiija Yehowa. Ni yɛ no sɛɛ lɛ, kɛ naagbee kaa lɛ eho ni akpata mɛi fɛɛ ni tseɔ atua lɛ ahiɛ lɛ, Yehowa baajɛ suɔmɔ mli aŋɔ adesai fɛɛ ni eye emuu ni amɛjie amɛhe kpo akɛ anɔkwafoi lɛ akɛ ebii kɛtsɔ Kristo nɔ. Amɛbaafee Nyɔŋmɔ je muu fɛɛ ni efee ekome lɛ fa, ni Yehowa baaya nɔ afee amɛ-Nyɔŋmɔ kome, Je Muu Fɛɛ Maŋtsɛ kɛ Tsɛ ni yɔɔ suɔmɔ kɛya naanɔ. Mɛɛ gbɛkpamɔ ni shɛjeɔ mɔ mii nɛ! Ani ooshwe lɛlɛŋ akɛ ofata nakai jalɔi aweku ni yɔɔ miishɛɛ lɛ ahe?—Romabii 8:20, 21.
“Bo Okome Too Ji Nyɔŋmɔ”
5, 6. Mɛni ji nɔ ni David ŋma yɛ Mɔ ni wɔjaa lɛ lɛ he yɛ Lala 86?
5 Lala 86 mlitaomɔ baaye abua wɔ ni wɔyoo nɔ ni he hiaa ni wɔfee koni wɔna nakai jɔɔmɔ lɛ mli gbɛfaŋnɔ. David, ni ŋma lala ni jɛ mumɔŋ nɛɛ ji mɔ ni ale lɛ akɛ étu ehe eha anɔkwale jamɔ momo. Shi eyoo akɛ lɛ diɛŋtsɛ lɛ ehe miihia ni eya nɔ eshwere yɛ mumɔŋ, ni enɛ jeɔ kpo yɛ nɔ ni eŋma lɛ mli.
6 Egbalaa jwɛŋmɔ kɛyaa Mɔ ni ejaa lɛ lɛ nɔ, yɛ kukuji 8-10, akɛ: “Nuŋtsɔ, mɔ ko mɔ ko bɛ ni tamɔ bo yɛ nyɔŋmɔi lɛ ateŋ, ni asaŋ nɔ ko nɔ ko bɛ ni tamɔ onitsumɔi lɛ. Jeŋmajimaji fɛɛ ni ofee lɛ aaaba abajao, Nuŋtsɔ, ni amɛaawo ogbɛi lɛ hiɛ nyam. Ejaakɛ oda, ni ofeɔ naakpɛɛ nii, bo okome too ji Nyɔŋmɔ!”
7. Mɛni hewɔ ni wɔɔkpɛlɛ nɔ akɛ Yehowa pɛ ji Nyɔŋmɔ lɛ he hiaa waa lɛ?
7 Jeŋmaji lɛ yɛ nyɔŋmɔi pii yɛ David gbii lɛ amli, taakɛ eji ŋmɛnɛ hu lɛ. Shi yɛ hiɛsɔɔ diɛŋtsɛ ni eyɔɔ kɛha Yehowa hewɔ lɛ David kɛɛ akɛ: “Bo okome too ji Nyɔŋmɔ!” Yesu Kristo ma nakai anɔkwale lɛ nɔŋŋ nɔ mi. Yɛ gbɛkɛ ni ejetsɛremɔ agbe lɛ lɛ esɔle eha e-Tsɛ lɛ, ni ewie ehe akɛ “anɔkwa Nyɔŋmɔ kome pɛ lɛ.” (Yohane 17:3) Shi, Kristendom jaa Triniti ni akpekpei abɔ kulaa shi yɛ amagai ahiɛ; mɛi krokomɛi kɛ gbɔmɛi ni ehe gbɛi, shika, amɛ diɛŋtsɛ amɛhe kɛ bɔlɛnamɔ efee amɛnyɔŋmɔi. No hewɔ lɛ bo hu? Ani bo diɛŋtsɛ lɛ okpɛlɛɔ nɔ akɛ “mɔ ko mɔ ko bɛ ni tamɔ . . . Yehowa,” ni akɛ lɛ ji “anɔkwa Nyɔŋmɔ kome pɛ” lɛ?
8. Taakɛ atsɔɔ yɛ Lala 86:11 lɛ, mɛni ataoɔ yɛ mɛi fɛɛ ni sumɔɔ ni amɛja Yehowa lɛ ahe?
8 Kɛ David jɛ egbii lɛ amli ekwɛ wɔsɛɛ bei lɛ, enaa gbɔmɛi ni jɛ jeŋmaji fɛɛ mli ni miiba amɛbasɔmɔ Yehowa. Ŋwanejee ko bɛ he akɛ David yoo akɛ kɛji akɛ gbɔmɛi ni tamɔ nɛkɛ ba koni amɛbasɔmɔ Yehowa lɛ, babaoo yɛ ni amɛbaakase Ehe baahia ni amɛfee tsakemɔi yɛ amɛshihilɛi amli. Shi David hu yoo enɛ ni ekpɛlɛ. Ekɛɛ yɛ Lala 86:11 akɛ: “Yehowa, tsɔɔmɔ mi ogbɛ lɛ, manyiɛ onɔkwale lɛ mli; feemɔ mitsui ekome, ni mashe ogbɛi lɛ gbeyei!” Ani enɛ ji nɔ ni bo hu oshweɔ?
9. Mɛni hewɔ wɔji gbɔmɛi ni amɛfee ekome, ni mɛɛ gbɛnaa nii ka wɔ nɔ yɛ enɛ gbɛfaŋ?
9 Ekomefeemɔ ni yɔɔ Yehowa Odasefoi ateŋ momo lɛ ji nɔ ni ekaaa lɛlɛŋ. Nakai eji, ejaakɛ akɛ kuu lɛ, wɔnuɔ he yɛ anɔkwale mli taakɛ David nu he lɛ—wɔtao Yehowa gbɛtsɔɔmɔ ni wɔfeɔ wɔnii koni ekɛ enɛ akpa gbee. Esa akɛ wɔshwe akɛ wɔ hu wɔɔye wɔbua nakai ekomefeemɔ lɛ wɔ diɛŋtsɛ kɛtsɔ wɔsubaŋ kɛ wɔjeŋba nɔ. Nɔ ni fata he lɛ, wɔbaanyɛ wɔbaa wɔ ekomefeemɔ lɛ yi ni wɔye wɔbua mɛi krokomɛi ni amɛna mli gbɛfaŋnɔ kɛtsɔ mɔdɛŋ ni wɔɔbɔ ni wɔtɛo nibii sɔrɔtoi ni feɔ wɔ ekome lɛ ahe hiɛsɔɔ wɔwo mɛi ni yɔɔ wiemɔ lɛ he miishɛɛ lɛ amli lɛ nɔ.
Nibii Ni Yɔɔ Hewalɛ Ni Buaa Ekomefeemɔ
10. Mɛni ji nii ni yeɔ buaa ni feɔ wɔ ekome le ateŋ klɛŋklɛŋ nɔ?
10 Klɛŋklɛŋ nɔ ji anɔkwale ni eji akɛ wɔ fɛɛ wɔjaa Yehowa ni wɔkpɛlɛɔ hegbɛ ni eyɔɔ akɛ ekɛ mlai ni kɔɔ nɔ ni hi kɛ nɔ ni ehiii he aaama shi lɛ. (Kpojiemɔ 14:6, 7; 1 Mose 2:16, 17) Mɛɛ hewalɛ ni yɔɔ naakpɛɛ enɛ ena yɛ Yehowa webii ni yɔɔ jeŋ fɛɛ lɛ anɔ nɛkɛ! Taakɛ Biblia lɛ tsɔɔ lɛ, Yehowa ji “Mɔ ni Kwɔ ni Awo Enɔ, ni eyɔɔ daa, ni egbɛi ji mɔ krɔŋkrɔŋ.” (Yesaia 57:15, NW) Kɛ wɔja lɛ ni wɔhi shi yɛ tɛi ni efolɔ eshwie shi lɛ anaa lɛ enɛ saa wɔhe ejaakɛ ewóɔ wɔ nɔ. Ni akɛni akɛ nakai tɛi ni efolɔ eshwie shi lɛ tsuɔ nii yɛ shikpɔŋ lɛ nɔ he fɛɛ he hewɔ lɛ, enɛɛmɛi ni wɔkɛtsuɔ nii lɛ egbala wɔ ni efee wɔ ekome tamɔ gbɔmɛi kome.
11. Te wɔɔfee tɛŋŋ wɔye wɔbua mɛi heei ni amɛná ekomefeemɔ nɛɛ mli gbɛfaŋnɔ?
11 Shi yɛ bei komɛi amli lɛ aŋkroaŋkroi ni ‘kɛ wɔ bɔɔ lɛ kɛ amɛhe woɔ efɔŋfeemɔ ni hiɛdɔɔ yɔɔ mli lɛ mli. Mɛni hewɔ? Ni abi amɛ wekukpaa ni ka amɛ kɛ Nyɔŋmɔ teŋ lɛ he sane lɛ, mɛi komɛi ha hetoo akɛ, ‘Nyɔŋmɔ jeee mɔ ni yɔɔ diɛŋtsɛ kɛha mi.’ No hewɔ lɛ amɛbuuu etaomɔ nii lɛ akɛ hiɛdɔɔ yɛ mli hu. Ani wɔbaanyɛ wɔye wɔbua mɛi ni wɔkɛ amɛ kaseɔ nii lɛ koni Yehowa afee mɔ ni yɔɔ diɛŋtsɛ kɛha amɛ? Esa akɛ wɔma nɔ mi wɔha amɛ akɛ anɔkwale jamɔ lɛ jeee ni akpɛlɛ tsɔɔmɔi komɛi anɔ kɛkɛ, aya Maŋtsɛyeli Asa lɛ nɔ ni ekolɛ akɛ ŋmlɛtswaa fioo awo sɔɔmɔ nitsumɔ lɛ mli yɛ be kɛ bei amli. Mɔ kɛ mɔ teŋ wekukpaa diɛŋtsɛ ni mli wa he miihia mɛi ni sumɔɔ ni amɛsɔmɔ Yehowa lɛ. Esa akɛ amɛkase gbɛ ni amɛaatsɔ nɔ amɛsɔle amɛha lɛ daa amɛ diɛŋtsɛ, ni amɛtao egbɛtsɔɔmɔ yɛ nɔ fɛɛ nɔ ni amɛfeɔ lɛ mli. (Filipibii 4:6; Abɛi 3:5, 6) Kɛkɛ lɛ amɛbaaje shishi amɛna ekomefeemɔ ni nɔ bɛ ni wɔna mli ŋɔɔmɔ lɛ mli gbɛfaŋnɔ.
12, 13. (a) Yɛ mɛɛ gbɛ nɔ nɔ ni ji enyɔ ni yeɔ buaa ni atsi ta yɛ biɛ lɛ naa wɔ nɔ hewalɛ ko ni haa wɔfeɔ ekome? (b) Bɔni afee ni wɔna enɛ he sɛɛ kwraa lɛ, mɛni esa akɛ mɔ ko afee?
12 Nɔ ni ji enyɔ ji enɛ: Wɔfee ekome ejaakɛ, wɔyɛ Nyɔŋmɔ Wiemɔ lɛ, Biblia lɛ, ni baakudɔ wɔ yɛ he fɛɛ he ni wɔyɔɔ yɛ je lɛ mli. Wɔkpɛlɛɔ Biblia lɛ nɔ akɛ ejɛ mumɔ mli, ni nibii ni gbala wɔteŋ mɛi pii kɛbɛŋkɛ Yehowa Odasefoi ahe lɛ ateŋ ekome ji anɔkwale ni eji akɛ Odasefoi lɛ kɛ amɛhe kpɛtɛɔ Biblia lɛ he diɛŋtsɛ.—2 Timoteo 3:16, 17.
13 Kɛ wɔkɛɛ akɛ Biblia lɛ ji Nyɔŋmɔ Wiemɔ lɛ, mɛi ni wɔkɛ amɛ kaseɔ nii lɛ kɛ wɔ baakpa gbee. Shi nɛgbɛ amɛkane Biblia lɛ kɛyashɛ? Ebaafee nɔ ni sɛɛnamɔ yɔɔ he akɛ aaawo amɛteŋ mɔ fɛɛ mɔ hewalɛ ni amɛkane fɛɛ, ni yɛ be mli ni amɛfeɔ nakai lɛ ni amɛkwɛ bɔ ni esa akɛ Biblia lɛ ana amɛyiŋtooi ni amɛfeɔ daa gbi yɛ shihilɛ mli lɛ nɔ hewalɛ aha. Yesu le e-Tsɛ lɛ suɔmɔnaa nii jogbaŋŋ ni enɛ eka ejwɛŋmɔ kɛ etsui mli waa hu akɛ ebaanyɛ ekɛɛ akɛ, “nɔ ni sa ehiɛ mifeɔ daa.” (Yohane 8:29) Mɛɛ oti ni yɔɔ fɛo ni esa akɛ wɔ fɛɛ wɔshɛ he nɛ!
14. Mɛni hewɔ nɔ ni ji etɛ ni yeɔ buaa ni atsi ta yɛ biɛ lɛ he hiaa lɛ, ni mɛni wɔbaanyɛ wɔfee koni wɔha mɛi heei lɛ ahiɛ asɔ enɛ?
14 Anɔkwale ni yeɔ buaa ni ji etɛ ni feɔ wɔ ekome ji akɛ wɔ fɛɛ wɔnaa mumɔŋ niyeli he gbɛjianɔtoo kome too lɛ nɔŋŋ he sɛɛ. Wɔyoɔ akɛ “tsulɔ anɔkwafo kɛ nilelɔ” lɛ ji dɛŋdade ni Yehowa kɛmiitsu nii koni ekɛ mumɔŋ niyenii aha yɛ be ni sa mli. (Mateo 24:45-47) Ákɛ nɛkɛ “tsulɔ” nɛɛ ji ŋwɛi Maŋtsɛyeli lɛ mli niyelɔi ni akɛ mumɔ efɔ amɛ ni anaa amɛ ŋmɛnɛ yɛ Yehowa Odasefoi pɛ ateŋ ni ŋwanejee ko bɛ enɛ he yɛ wɔjwɛŋmɔ mli. Wɔhiɛ sɔɔ nɔ ni nakai “tsulɔ” lɛ kɛ e-Nɔyeli Kuu lɛ feɔ koni amɛkwɛ wɔmumɔŋ hiamɔ nii anɔ lɛ. Ni wɔmiida Nyɔŋmɔ shi yɛ mumɔŋ gbɛjianɔtoo ni ji niyenii babaoo ni wɔyɔɔ Iɛ hewɔ. (Yesaia 65:13, 14) Ani wɔ hu wɔkɛ be ni sa miitɛo hiɛsɔɔ kɛha nɛkɛ gbɛjianɔtoo nɛɛ yɛ gbɔmɛi heei ni kɛ asafo lɛ bɔɔ lɛ amli?
15, 16. (a) Namɔ ji mɔ ni wɔkwɛɔ akɛ wɔ-Hiɛnyiɛlɔ? (b) Yɛ mɛɛ gbɛ nɔ wɔhiɛ ni aaasɔ nɔ ni Yesu tsuɔ yɛ wɔjamɔ mli lɛ aaana hiɛsɔɔ ni wɔyɔɔ kɛha wɔhe lɛ nɔ hewalɛ?
15 Nɔ ni ji ejwɛ ni yeɔ buaa ni feɔ wɔ ekome, lɛlɛŋ nɔ ni he hiaa waa ji akɛ Yesu Kristo, ji wɔ-Hiɛnyiɛlɔ kɛ mɔ ni wɔtsɔɔ enɔ wɔbɛŋkɛɔ Yehowa yɛ jamɔ mli, shi jeee gbɔmɔ ko. Yɛ naagbee otsi ni eye yɛ shikpɔŋ nɛɛ nɔ akɛ adesa lɛ mli lɛ, Yesu ma bɔ ni enɛ he hiaa ha lɛ nɔ mi. Ekɛɛ yɛ Mateo 23:8, 10 akɛ: “Shi nyɛ lɛ akatsɛ nyɛ . . . ’hiɛnyiɛlɔ,’ ejaakɛ mɔ kome ji nyɛ Hiɛnyiɛlɔ, Kristo Iɛ.” Ŋmɛnɛ, kɛ mɔ ko bi Yehowa Odasefoi lɛ ateŋ mɔ kome akɛ, ‘Namɔ ji nyɛ hiɛnyiɛlɔ?’ yɛ je lɛŋ he fɛɛ he lɛ, ebaaha hetoo kome too lɛ nɔŋŋ akɛ: ‘Lɛ ji Nuŋtsɔ Yesu Kristo.’
16 Yesu nɔ pɛ wɔbaanyɛ wɔtsɔ wɔbɛŋkɛ Yehowa yɛ jamɔ mli. Mɛni hewɔ? Ejaakɛ afɔ wɔ fɛɛ yɛ esha mli, yɛ gbele fɔbuu shishi. Wɔteŋ mɔ ko bɛ ni esoro lɛ yɛ mɛi krokomɛi ahe yɛ enɛ mli. Gbɛ kome pɛ ni atsɔ nɔ akpɛlɛ wɔ nɔ akɛ Nyɔŋmɔ tsuji ji wɔhemɔkɛyeli ni damɔ Yesu Kristo afɔleshaa lɛ nɔ lɛ, ni lɛ enɔ pɛ wɔteŋ mɔ ko baanyɛ atsɔ ni wɔbɛŋkɛ Yehowa yɛ sɔlemɔ mli. Enɛ he hiɛsɔɔ ni jɛ tsuiŋ he miihia titri yɛ anɔkwale jamɔ mli.—Romabii 3:28; Yohane 14:6.
17. Yɛ mɛɛ gbɛ nɔ su ni wɔhiɛ yɛ Nyɔŋmɔ Maŋtsɛyeli lɛ he lɛ eha wɔfee gbɔmɛi sɔrɔtoi yɛ Kristendom he, shi kɛlɛ egbala wɔ efee wɔ ekome akɛ Yehowa Odasefoi?
17 Nɔ ni ji enumɔ ni yeɔ buaa ni gbalaa wɔ kɛbɛŋkɛɔ wɔhe ji akɛ wɔkwɛɔ Nyɔŋmɔ Maŋtsɛyeli lɛ akɛ adesai ahiɛnɔkamɔ kome, ni he ni wɔyɔɔ lɛ kɔɔɔ he eko. (Mateo 6:9, 10; Daniel 2:44) Kristendom osɔfoi lɛ efeko enɛ. Nɔ ni ejɛ mli eba ji akɛ amɛkɛ amɛhe ewo je lɛ maŋkwramɔ saji kɛ etai amli. Nɔ ni tamɔɔɔ enɛ kwraa lɛ, Yehowa Odasefoi ni yɔɔ shikpɔŋ lɛ nɔ he fɛɛ he lɛ kɛ anɔkwale ni eji akɛ Yesu Kristo kɛ ekaselɔi lɛ “jɛɛɛ je lɛŋ” lɛ eto amɛtsui mli. (Yohane 17:15, 16) Taakɛ ekɛ Nyɔŋmɔ Wiemɔ lɛ kpaa gbee lɛ wɔkɛ wɔklantei esɔ kɔii ni wɔkɛ wɔ akpɔlɔi fɛɛ hu esɔ adedai. Wɔwooo mɔgbee dade nɔ wɔshiii wɔnaanyo gbɔmɔ, ni asaŋ wɔkaseee tawuu hu dɔŋŋ. (Mika 4:8) Wɔheɔ wɔyeɔ jogbaŋŋ akɛ adesai anaagbai anaa tsabaa pɛ ji Nyɔŋmɔ Maŋtsɛyeli lɛ. Yɛ enɛ hewɔ lɛ, wɔkɛ wɔnanemɛi Odasefoi ni yɔɔ jeŋ fɛɛ lɛ efee ekome yɛ majimaji ateŋ nyɛmifeemɔ mli.
18. Mɛɛ gbɛ nɔ Nyɔŋmɔ mumɔ lɛ yibii lɛ feɔ wɔ ekome yɛ? Okɛ nɔkwɛmɔ nii aha.
18 Nɔ ni ji ekpaa ni yeɔ buaa yɛ wɔ ekomefeemɔ lɛ mli lɛ, wɔkɛ wɔnine miitsɔɔ yibii ni Nyɔŋmɔ mumɔ krɔŋkrɔŋ lɛ woɔ yɛ Yehowa jálɔi lɛ ashihilɛ mli lɛ. Ni mɛɛ yibii ni ŋɔɔ po ewoɔ nɛkɛ—nɔ ni haa wɔhiɔ shi yɛ he kome yɛ miishɛɛ mli! Yɛ hei ni esa akɛ wɔbɔ mɔdɛŋ wɔya hiɛ yɛ mli lɛ fɛɛ sɛɛ lɛ, eji anɔkwale taakɛ Yesu kɛɛ Iɛ akɛ: “Kɛji nyɛsumɔɔ nyɛhe lɛ, no mɛi fɛɛ kɛaale akɛ mikaselɔi ji nyɛ.”—Yohane 13:35; Galatabii 5:22, 23.
19. Namɔ wɔkɛ lɛ feɔ ekome yɛ Kristofoi asɔɔmɔ nitsumɔ lɛ ni wɔkɛ wɔhe woɔ mli lɛ hewɔ?
19 Nɔ ni akɛfataa nɔ ni wɔtsɔ hiɛ wɔwie he nɛɛ fɛɛ he ji nɔ̃ oti ni ji kpawo nɛɛ: Ákɛ Yehowa Odasefoi lɛ, gbɛnaa nii ka wɔ fɛɛ wɔnɔ akɛ wɔshiɛ Nyɔŋmɔ Maŋtsɛyeli lɛ he sanekpakpa lɛ. Eji gbɛnaa nii, shi eji hegbɛ hu. Taakɛ bɔfo Paulo tsɔɔ mli lɛ, kɛ wɔkɛ wɔhe wo Kristofoi asɔɔmɔ lɛ mli Iɛ wɔbatsɔmɔɔ Nyɔŋmɔ nanemɛi nitsulɔi. Yɛ be mli ni wɔteŋ mɔ ko tɛoɔ ni mɔ kroko shwaa nɔ nu lɛ, Yehowa ji Mɔ ni haa edaa ni ewoɔ kaselɔi heei.—Mateo 24:14; 1 Korintobii 3:6-9.
Shiŋŋ Yɛ Anɔkwale Jamɔ Gbɛfaŋ
20. (a) Yɛ mɛɛ gbɛ nɔ mɛi ni baa Maŋtsɛyeli Asa lɛ nɔ lɛ ateŋ mɛi komɛi naaa ekomefeemɔ yɛ jamɔ mli nɛɛ mli jɔɔmɔi lɛ amli gbɛfaŋnɔ? (b) Mɛni hewɔ ehe hiaa ni amɛto amɛyiŋ ni amɛŋɔ gbɛhe ni sa yɛ Yehowa masɛi bianɛ lɛ?
20 Yɛ be mli ni mɛi heei ni kɛ amɛhe bɔɔ Yehowa Odasefoi ahe lɛ kpɛlɛɔ nɛkɛ anɔkwalei ni gbalaa wɔ ni efeɔ wɔ ekome nɛɛ nɔ ni amɛtsuɔ nii koni ekɛ nɛkɛ anɔkwalei nɛɛ akpa gbee lɛ, amɛ hu amɛbaana miishɛɛ ni baa kɛjɛɔ anɔkwale Nyɔŋmɔ kome lɛ jamɔ yɛ ekomefeemɔ mli lɛ eko. Shi mɛi komɛi sumɔɔ ni amɛná anɔkwale lɛ he nilee ni ji hiɛaŋhiɛaŋ nɔ pɛ. Amɛkaseɔ nɔ ko ni kɔɔ Nyɔŋmɔ Maŋtsɛyeli lɛ mli jɔɔmɔi lɛ ahe, shi amɛhaaa anɔkwale lɛ ahe shi yɛ amɛtsuii amli. Amɛsumɔɔ ni amɛkɛ wɔ ahi shi, shi amɛsumɔɔɔ ni amɛkɛɛ, akɛ amɛbaafee nii yɛ Yehowa gbɛ nɔ yɛ be fɛɛ mli. Yɛ gbɛ ko nɔ lɛ, amɛtamɔ gbɔmɛi komɛi ni hi shi yɛ gbalɔ Elia gbii lɛ amli, mɛi ni Elia kɛ hewalɛ wie yɛ amɛhe akɛ: “Mɛɛ beyinɔ nɔŋŋ nyɛaadidaa yɛ saji enyɔ teŋ kɛyashi? Kɛji Yehowa ji Nyɔŋmɔ lɛ, nyɛnyiɛa esɛɛ; shi kɛji Baal ni lɛ, no lɛ nyɛnyiɛa esɛɛ” lɛ. (1 Maŋtsɛmɛi 18:21) Kɛji akɛ be ni Yehowa to koni ekpata gbɛjianɔtoo momo nɛɛ hiɛ lɛ shɛ lɛ eshashaoŋ shi. Etsiŋ nakai be lɛ etoŋ aloo ni eeetsake etɛi ni efolɔ eshwie shi lɛ koni eha mɛi ni miibɔ mɔdɛŋ ni amɛkɛ amɛhe akpɛtɛ je lɛ he lolo lɛ aba mli, mɛi ni hiɛ tsui ŋta yɛ Nyɔŋmɔ suɔmɔnaa nii ni amɛaakase ni amɛaafee he lɛ. Belɛ kwɛ bɔ ni ehe hiaa akɛ mɛi fɛɛ ni jieɔ miishɛɛ kpo yɛ anɔkwale lɛ he Iɛ aaatsu he nɔ ko bianɛ koni amɛkɛto naanɔ wekukpaa diɛŋtsɛ amɛma shi yɛ amɛ kɛ Yehowa teŋ!
21. Esa akɛ wɔye wɔbua mɛi ni wɔkɛ amɛ kaseɔ Biblia lɛ ni amɛna mɛɛ mumɔŋ nɔyaa?
21 Jeee wɔsuɔmɔnaa nii pɛ ji ni wɔkɛ mɛi ni kaseɔ nii kɛyaa amɛhiɛ kɛyashɛɔ baptisimɔ he lɛ akase shishijee anɔkwalei lɛ pɛ, shi moŋ ni wɔye wɔbua amɛ ni amɛya nɔ amɛyashɛ Kristofoi adalɛ he. Nɔ ni fata enɛ he ji hiɛsɔɔ ni amɛaana amɛha mumɔŋ niyenii ni wa. Ehe miihia ni amɛkase gbɛ ni amɛaatsɔ nɔ amɛna enɛ he miishɛɛ, amɛna hewalɛwoo kɛjɛ mli ni amɛyoo bɔ ni eeeye ebua amɛ ni amɛto amɛ diɛŋtsɛ amɛyiŋ yɛ gbɛ ni ja nɔ.—Hebribii 5:12-14.
22. Mɛni hewɔ wɔsɔɔmɔ lɛ ji hegbɛ ni yɔɔ nyam lɛlɛŋ lɛ?
22 Mɛɛ hegbɛ fɛfɛo ji wɔ nɔ akɛ wɔɔna Yehowa gbɛjianɔtoo kɛha gbɔmɛi fɛɛ ni afeɔ amɛ kɛ lɛ ekome kɛtsɔɔ Yesu Kristo nɔ lɛ he nitsumɔ yɛ gbeekpamɔ mli lɛ he sɛɛ! Anɔkwale Nyɔŋmɔ kome pɛ ni yɔɔ lɛ eha wɔ hegbɛ ni yɔɔ naakpɛɛ nɛɛ akɛ wɔfee egbɛi krɔŋkrɔŋ ni ji Yehowa lɛ he odasefoi. Lɛ diɛŋtsɛ esuɔmɔ Bi ni yeɔ nɔ bianɛ akɛ Maŋtsɛ lɛ ji wɔnɔkwɛmɔ nɔ yɛ jamɔ ni haa wɔnaa wɔ kɛ Yehowa teŋ naanyobɔɔ ni mli wa ni haa ekomefeemɔ baa wɔ kɛ wɔnyɛmimɛi ateŋ lɛ mli ŋɔɔmɔ. No hewɔ lɛ nyɛhaa wɔnaa Yehowa gbɛi lɛ nɔ womɔ kɛ mɛi krokomɛi ayelikɛbuamɔ ni amɛhiɛ asɔ bɔ ni amɛ hu amɛaana jɔɔmɔi ni ji mɛi pɛ ni amɛfee ekome yɛ anɔkwa Nyɔŋmɔ kome pɛ lɛ jamɔ mli lɛ eko lɛ mli gbɛfaŋnɔ kɛmɔ shi.a
[Shishigbɛ niŋmai]
a Ajie kɛjɛ February 1, 1984 Blɔfo Buu-Mɔɔ lɛ mli.
Kɛha Emlitii
□ Nɛgbɛ abaanyɛ ana ekomefeemɔ yɛ kamɔ mli kɛyashɛ, ni mɛni no baatsɔɔ aha bo?
□ Mɛɛ gbɛ nɔ wɔtsɔɔ yɛ akɛ wɔkɛ henumɔi ni ojie lɛ kpo yɛ Lala 86:11 lɛ feɔ ekome?
□ Mɛni ji nibii ni yeɔ buaa ni yɔɔ hewalɛ waa ni feɔ wɔ ekome lɛ ateŋ ekomɛi?
□ Yɛ be mli ni amɛkase Biblia mli shishijee anɔkwalei lɛ sɛɛ lɛ, mɛɛ nɔyaa kroko esa akɛ wɔye wɔbua Biblia kaselɔi fɛɛ ni amɛnɔ?
[Wiemɔ ni akɔ ni akɛmiitsu nii ni yɔɔ baafa 13]
“Kwɛ bɔ ni ehi, kɛ bɔ ni eyɔɔ fɛo, kɛ nyɛmimɛi fee ekome kɛhi shi lɛ! Etamɔ mu kpakpa ni yɔɔ yiteŋ ni tserɛɔ shwieɔ tsɛŋ mli, ni ji Aaron tsɛŋ lɛ, ekpelekeɔ shi kɛbashwieɔ etade yuu lɛ naamuu lɛ nɔ; etamɔ Hermon bɔ ni nyɔɔ Zion gɔji lɛ anɔ lɛ. Ejaakɛ Yehowa ewo jɔɔmɔ kɛ wala shi eha jɛi kɛaashi naanɔ.”—Lala 133:1-3.
[Mfoniri ni yɔɔ baafa 11]
‘Oo Yehowa, bo ji Nyɔŋmɔ, okome too’