Ha Tsalɔi ni Akɛtsuɔ Nii lɛ Aye Abua Bo

Ani okpɛlɛɛɛ nɔ akɛ Yesu ji Tsɔɔlɔ ni fe fɛɛ ni ehi shi pɛŋ? Ekolɛ oka akɛ okɛ gbɛi ni etsɔ nɔ etsɔɔ nii, tamɔ bɔ ni ekɛ sanebimɔi kɛ nɔkwɛmɔnii tsu nii lɛ baatsu nii. Shi ani okadi akɛ bei pii kɛ́ eetsɔɔ nii lɛ, ekɛ tsalɔi tsuɔ nii?

Wɔ fɛɛ wɔkɛ tsalɔi tsuɔ nii yɛ wɔwiemɔ mli daa gbi. Wɔfeɔ nakai ni wɔhiɛ bɛ wɔhe nɔ. Akɛ nɔkwɛmɔnɔ lɛ, mɔ ko baanyɛ akɛɛ akɛ, “Amɛkɛɛ aduawai lɛ fɛɛ etsu; kɛlɛ enɛɛmɛi wala lolo.” Aloo, “Beni eji gbekɛ lɛ ehiɛ gboɔ, shi amrɔ nɛɛ ebɛŋkɛɔ mɔ waa.”

Yɛ saji ni tamɔ nɛkɛ amli lɛ, otsɔɔ hiɛ owieɔ oti lɛ loo anɔkwa sane lɛ diɛŋtsɛ; kɛkɛ lɛ okɛ tsalɔi tamɔ shi, kɛlɛ, tsɛbelɛ, loo moŋ eje nɔ ni obaawie kɛtsa nɔ lɛ shishi. Aloo ekolɛ wɔbaawie nɔ kroko kɛfata nɔ ni wɔtsɔ hiɛ wɔwie lɛ he koni no aha nɔ ni wɔtaoɔ wɔtsɔɔ lɛ afee faŋŋ. Kɛ́ wɔwie yɛ gbɛ ni tamɔ nakai nɔ lɛ, ehaa mɛi nuɔ oti ni wɔwieɔ he lɛ shishi jogbaŋŋ.

Kɛ́ akɛ enɛ efɔɔɔ nitsumɔ yɛ wiemɔi komɛi mli po lɛ, ehe miihia ni wɔle bɔ ni ehe yɔɔ sɛɛnamɔ ha. Mɛni hewɔ? Ejaakɛ babaoo yɛ Nyɔŋmɔ Wiemɔ ni jɛ mumɔŋ lɛ mli. Yesu kɛ tsalɔi tsu nii shii abɔ. Ekomɛi ji: “Asaŋ asuuu kane amaaa tsese shishi: shi moŋ aŋɔmaa kanetso nɔ.” “Mibaaa [Mla lɛ] guu, shi moŋ naagbee miba.” “Nyɛnu akɛ akɛɛ blemabii lɛ akɛ: ‘Kaafite gbala!’ Shi mi lɛ, miikɛɛ nyɛ akɛ: Mɔ fɛɛ mɔ ni kwɛɔ yoo . . . ” “Akɛɛ: ‘Akɛ hiŋmɛi ato hiŋmɛi najiaŋ, ni akɛ nyanyɔŋ ato nyanyɔŋ najiaŋ.’ Shi mi lɛ, miikɛɛ nyɛ akɛ: Nyɛkakũa efɔŋ lɛ naa; shi moŋ mɔ fɛɛ mɔ ni aaagbá oninejurɔ toiŋ lɛ, tsɔ eko lɛ hu.”—Mat. 5:15, 17, 27, 28, 38, 39.

Akɛ tsalɔi etsu nii yɛ gbɛ ni tamɔ nakai nɔŋŋ nɔ yɛ Biblia mli woji krokomɛi amli. Amɛbaanyɛ amɛha onu oti ko shishi loo ona gbɛ kpakpa ni oootsɔ nɔ otsu sane ko he nii. Kɛ́ oji fɔlɔ lɛ, susumɔ tsalɔ ni akɛtsu nii yɛ sane mli lɛ he okwɛ: “Nyɛ tsɛmɛi lɛ, nyɛkawoa nyɛbii amlifu, shi moŋ nyɛlɛa amɛ yɛ Nuŋtsɔ [Yehowa] tsɔsemɔ kɛ ŋaawoo lɛ mli.” (Efe. 6:4) Eji bɔfo Paulo ŋma kɛkɛ akɛ, tsɛ (loo nyɛ) atsɔse ebi yɛ gbɛ ni saa Nyɔŋmɔ hiɛ lɛ nɔ kulɛ, ebaafee ŋaawoo ni nilee yɔɔ mli ni ja hu. Fɛɛ sɛɛ lɛ, nɔ ni etaoɔ ewie he lɛ fee faŋŋ beni ekɛshi sɛɛ akɛ, “nyɛkawoa nyɛbii amlifu, shi moŋ nyɛlɛa amɛ yɛ Nuŋtsɔ [Yehowa] tsɔsemɔ kɛ ŋaawoo lɛ mli” lɛ.

Sɛɛ mli yɛ nakai yitso lɛ nɔŋŋ mli lɛ, Paulo ŋma akɛ: “Jeee heloo kɛ lá wɔkɛna nɔmɔ lɛ, shi moŋ wɔkɛ . . . mumɔi fɔji asafo ni yɔɔ ŋwɛiniiaŋ lɛ.” (Efe. 6:12) Tsalɔ ni ekɛtsu nii yɛ biɛ lɛ haa onaa akɛ mɛi ni okɛnɔɔ lɛ ahe wala diɛŋtsɛ. Jeee gbɔmɛi foji okɛnɔɔ lɛ; shi moŋ, mumɔi fɔji asafo.

BƆ NI OOOFEE ONÁ TSALƆI AHE SƐƐ

Yɛ Efesobii awolo lɛ mli nɔŋŋ lɛ, obaana akɛ Paulo kɛ tsalɔi tsu nii yɛ hei babaoo. Kɛ́ wɔsusu enɛɛmɛi ahe lɛ, ebaaha wɔnu nɔ ni Paulo tsɔɔ lɛ shishi jogbaŋŋ, ni ebaaha wɔna nɔ ni esa akɛ wɔfee lɛ faŋŋ.

Kɛ́ osusu akrabatsa ni fata he lɛ he lɛ, obaanu tsalɔi ni akɛtsu nii yɛ Efesobii yitso 4 kɛ yitso 5 lɛ mli lɛ ashishi jogbaŋŋ, ni obaaná he miishɛɛ diɛŋtsɛ. Beni okaneɔ amɛteŋ eko fɛɛ eko lɛ, kɛto bo diɛŋtsɛ oshihilɛ he okwɛ. Bi ohe akɛ: ‘Yɛ anɔkwale mli lɛ, te mibaa mijeŋ mihaa tɛŋŋ? Te mifeɔ minii yɛ shihilɛ nɛɛ loo shihilɛ kroko ni tamɔ nakai lɛ mli mihaa tɛŋŋ? Te saji enyɔ ni awie he lɛ ateŋ nɔ ni kɔɔ mihe lɛ?’ Kɛ́ saji lɛ eko ha oyɔse akɛ esa akɛ ofee tsakemɔi komɛi yɛ oshihilɛ mli lɛ, bɔɔ mɔdɛŋ ni ofee nakai. Ha nakai sane lɛ aye abua bo.

Aloo nyɛbaanyɛ nyɛsusu akrabatsa lɛ he kɛfata nibii ni nyɛkaseɔ akɛ weku lɛ ahe. Klɛŋklɛŋ lɛ, weku lɛ mli bii lɛ fɛɛ baanyɛ akane saji ni akɛ tsalɔi lɛ etsu nii yɛ mli lɛ. Kɛkɛ lɛ, nyɛteŋ mɔ kome baanyɛ awie sane lɛ klɛŋklɛŋ fã lɛ he, koni weku lɛ mli bii krokomɛi lɛ akwɛ akɛ amɛbaakai oti ni yɔɔ fã ni ji enyɔ lɛ mli lɛ lo. Enɛ baaha nyɛkɛ miishɛɛ asusu bɔ ni nyɛbaanyɛ nyɛkɛ fã ni ji enyɔ lɛ atsu nii jogbaŋŋ lɛ he. Kɛ́ nyɛsusu wiemɔi ni tsalɔi yɔɔ mli lɛ ahe yɛ nɛkɛ gbɛ nɔ lɛ, ebaaye ebua gbekɛbii kɛ onukpai fɛɛ koni amɛba amɛjeŋ akɛ Kristofoi yɛ weku lɛ mli kɛ shihilɛi krokomɛi amli hu.

Ani okaiɔ sane ni tsalɔ lɛ yɔɔ mli lɛ fã ni ji enyɔ lɛ?

Beni be shwieɔ mli lɛ, obaanu bɔ ni tsalɔi ahe yɔɔ sɛɛnamɔ ha lɛ shishi jogbaŋŋ, ni ewaŋ kwraa akɛ obaana babaoo yɛ Biblia lɛ mli, ni amɛbaaye amɛbua bo waa yɛ Kristofoi asɔɔmɔ nitsumɔ lɛ mli. Akɛ nɔkwɛmɔnɔ lɛ, obaanyɛ okɛɛ shĩatsɛ ko akɛ: “Mɛi babaoo kɛɔ akɛ kɛ́ gbɔmɔ gbo lɛ, esusuma yaa nɔ ehiɔ shi, shi kwɛmɔ nɔ ni Nyɔŋmɔ Wiemɔ lɛ kɛɔ yɛ biɛ.” Aloo kɛ́ okɛ mɔ ko miikase Biblia lɛ, obaanyɛ obi lɛ akɛ: “Mɛi ni yɔɔ biɛ lɛ atɛŋ mɛi pii heɔ amɛyeɔ akɛ Nyɔŋmɔ lɛ, lɛ nɔŋŋ ji Yesu; shi mɛni Biblia lɛ kɛɔ yɛ enɛ he? Ni te bo hu osusuɔ tɛŋŋ?”

Hɛɛ, Ŋmalɛ lɛ kɛ tsalɔi babaoo tsuɔ nii kɛtsɔɔ wɔ nii, ni enɛ baanyɛ aye abua wɔ ni wɔnyiɛ Nyɔŋmɔ gbɛ lɛ nɔ. Ni wɔbaanyɛ wɔkɛ tsalɔi atsu nii kɛye wɔbua mɛi ni amɛbale Biblia mli anɔkwale lɛ.

Tsalɔi Komɛi ni Akɛtsu Nii yɛ Efesobii Yitso 4 kɛ Yitso 5 lɛ Mli

Obaanyɛ okɛ akrabatsa nɛɛ atsu nii beni nyɛmiikase nii akɛ weku lɛ!

“Wɔkakã he wɔfee [mɛi] ni tsɔɔmɔ kɔɔyɔɔ fɛɛ tsɔɔmɔ kɔɔyɔɔ hosoɔ amɛ . . . yɛ gbɔmɛi aŋaa fɔŋ too mli, yɛ shishiumɔ ŋaa lɛ mli kutumpɔo naa.”—4:14.

“Shi moŋ wɔfee anɔkwafoi yɛ suɔmɔ mli, ní wɔdara yɛ nibii fɛɛ gbɛfaŋ yɛ lɛ Kristo lɛ nɔŋŋ ni ji yitso lɛ he.”—4:15.

“[Jeŋmajiaŋbii lɛ ajwɛŋmɔ] mli ewo duŋ, . . . akɛni . . . amɛtsuii hu ekpiliŋ lɛ . . . hewɔ.”—4:18, 19.

“Shi nyɛ lɛ, jeee nakai nyɛkase Kristo lɛ, kɛji eyɛ mli akɛ nyɛnu ehe, ni atsɔ̃ɔ nyɛ yɛ emli hu.”—4:20, 21.

“Nyɛshɛ nyɛsá jeŋba lɛ naa gbɔmɔ momo . . . lɛ nyɛfɔ.”—4:22.

“Ni nyɛtsɔmɔ mɛi hei yɛ nyɛjwɛŋmɔ mumɔ lɛ mli, ni nyɛwo gbɔmɔ hee.”—4:23, 24.

“Julɔ lɛ ekaju dɔŋŋ.”—4:28.

“Shi moŋ ebɔ mɔdɛŋ ni ekɛ eniji atsu nitsumɔ kpakpa.”—4:28.

“Wiemɔ sha ko wiemɔ sha ko akaje nyɛnaa kwraa.”—4:29.

“Shi moŋ wiemɔ ni hi ni ehia, koni eha mɔ nane amɔ shi.”—4:29.

“Nyɛhaa mlijoomɔ kɛ mlila kɛ mlifu kɛ bolɔmɔ kɛ musubɔɔ fɛɛ sɛɛ afoa yɛ nyɛteŋ, kɛ efɔŋ fɛɛ efɔŋ.”—4:31.

“Shi nyɛmli ahia ahaa nyɛhe, nyɛmusuŋ atsɔa nyɛ yɛ nyɛhe, nyɛŋɔfafaa nyɛhe.”—4:32.

“Ajwamaŋbɔɔ kɛ nyaŋemɔ nitsumɔ fɛɛ aloo hiɛjoomɔ lɛ akatsĩ tã tete yɛ nyɛteŋ.”—5:3.

“Shi moŋ shidaa.”—5:4.

“Sá lɛ duŋ ji nyɛ.”—5:8.

“Shi agbɛnɛ lɛ nyɛtsɔmɔ la yɛ Nuŋtsɔ lɛ mli.”—5:8.

“Nyɛkɛ duŋ nitsumɔi lɛ ní wooo yibii lɛ akabɔa.”—5:11.

“Shi moŋ nyɛkãa amɛ.”—5:11.

“No hewɔ lɛ nyɛkwɛa bɔ ni nyɛaafee ní nyɛkɛ hiɛtɛjemɔ anyiɛ, jeee tamɔ mɛi ni leee nii.”—5:15.

“Shi moŋ tamɔ nilelɔi, mɛi ni tsuɔ amɛdekã he nii.”—5:15, 16.

“No hewɔ lɛ nyɛkafea nyɛhe mɛi ni bɛ yitseiaŋ.”—5:17.

“Shi moŋ nyɛyoa nii ni ji Nuŋtsɔ [Yehowa] suɔmɔnaa nii lɛ.”—5:17.

“Nyɛkatɔrɔa dãa, nɔ̃ mli ni sakasakafeemɔ yɔɔ lɛ.”—5:18.

“Shi moŋ nyɛyimɔa obɔ kɛ mumɔ lɛ.”—5:18.

“Koni [Kristo aŋɔ] lɛ edamɔ shi eha lɛ diɛŋtsɛ ehe akɛ anunyam asafo ni he bɛ kpa ko aloo hiɛkuamɔ ko aloo nakai nɔ ko.”—5:27.

“Shi moŋ efee krɔŋkrɔŋ ni shwamɔ ko akahi ehe.”—5:27.

“Mɔ ko enyɛko lɛ diɛŋtsɛ eheloo dã.”—5:29.

“Shi moŋ elɛ̀ɔ lɛ ni ehiɛɔ lɛ dɔdɔɔdɔ, taakɛ bɔ ni Nuŋtsɔ lɛ hiɛɔ asafo lɛ.”—5:29.