‘Yehowa Ŋɔ Fa Nyɛ Tswaa’

“Mɔ ni nyɛɛɛ ekɛ mɛi krokomɛi ahe afa amɛ lɛ, efiteɔ nu hiɛ agba ni lɛ diɛŋtsɛ ebaatsɔ nɔ lɛ.” Britain yinɔsaneŋmalɔ Edward Herbert, ni hi shi yɛ aaafee afii 400 ni eho nɛ lɛ wiemɔi nɛɛ maa yiŋtoo kome hewɔ ni esa akɛ wɔkɛ mɛi ahe afa amɛ lɛ nɔ mi: Bɔ fɛɛ bɔ ni fee lɛ, be ko baaba ni wɔ hu wɔbaabi mɛi krokomɛi koni amɛkɛ wɔhe afa wɔ. (Mateo 7:12) Kɛlɛ, yiŋtoo ko ni he hiaa kwraa fe enɛ hewɔ ni esa akɛ wɔkɛ mɛi atɔmɔi afa amɛ lɛ. Akɛ mumɔ tsirɛ bɔfo Paulo ni eŋma akɛ: ‘Kɛji mɔ ko kɛ mɔ ko ná sane ko lɛ, nyɛnanaa nyɛhaa nyɛhe ni nyɛkɛfafaa nyɛhe tswaa. Taakɛ bɔ ni Yehowa hu ŋɔfa nyɛ tswaa lɛ, nakai nyɛ hu nyɛfea.’—Kolosebii 3:13.​

Akɛni wɔ fɛɛ wɔyeee emuu hewɔ lɛ, bei komɛi lɛ wɔbaafee nɔ ko ni baawo mɛi komɛi amli la loo wɔbaatɔ̃ amɛ nɔ, ni amɛ hu amɛbaanyɛ amɛfee nakai nɔŋŋ. (Romabii 3:23) Te wɔbaafee tɛŋŋ wɔha toiŋjɔlɛ ahi wɔkɛ mɛi krokomɛi ni yeee emuu lɛ ateŋ lɛ? Nyɔŋmɔ kɛ emumɔ lɛ tsirɛ Paulo ni ewo wɔ ŋaa akɛ wɔna mli wɔha wɔhe, ni wɔkɛfafaa wɔhe. Nakai ŋaawoo lɛ he miihia wɔ lolo ŋmɛnɛ taakɛ eji beni aŋma aaafee afii akpei enyɔ ni eho nɛɛ lɛ. Ha wɔpɛi Paulo wiemɔi lɛ amli jogbaŋŋ wɔkwɛ.

“Nyɛnanaa nyɛhaa nyɛhe.” Hela wiemɔ ni atsɔɔ shishi akɛ “nyɛnanaa nyɛhaa nyɛhe” lɛ shishi ji, ato tsui shi loo ami ŋɔɔ. Wolo ko wie akɛ, Kristofoi jieɔ su nɛɛ kpo kɛ́ “amɛjɛ amɛtsuiŋ amɛkɛ mɛi ni amɛfatɔi loo amɛsui komɛi woɔ amɛmli la lɛ hi shi yɛ toiŋjɔlɛ mli lɛ.” Wiemɔ ni ji “nyɛhaa nyɛhe” lɛ haa wɔnaa akɛ esa akɛ wɔtotoo wɔtsui shi wɔha wɔhe. No ji akɛ, kɛ́ wɔkai akɛ wɔyɛ sui komɛi ni baanyɛ agba mɛi komɛi anaa lɛ, no lɛ wɔhaŋ nibii ni mɛi krokomɛi feɔ ni wɔnyaaa he lɛ afite wɔ kɛ amɛteŋ toiŋjɔlɛ. Shi kɛ́ mɛi krokomɛi tɔ̃ wɔnɔ hu?

“Nyɛkɛfafaa nyɛhe tswaa.” Woloŋlelɔ ko wie akɛ Hela wiemɔ ni atsɔɔ shishi akɛ ‘nyɛkɛfaa tswaa’ lɛ “jeee wiemɔ folo kɛkɛ ni akɛdamɔɔ shi ahaa eshaifaa . . . moŋ lɛ eji wiemɔ ni mli tsii ni tsɔɔ tsuiŋ fɛɛ ni ajɛɔ ahaa mɔ ni etɔ̃ lɛ yeɔ ehe kwraa.” Mɔ ko hu tsɔɔ mli akɛ, wiemɔ nɛɛ baanyɛ atsɔɔ akɛ “aha mɔ ko nɔ ko ni baaha etsui anyɔ emli, afee lɛ ejurɔ, aha ená nɔ ko he sɛɛ.” Kɛ́ ‘wɔkɛ mɔ ko ná sane,’ ni ji mɔ ko tɔ̃ wɔnɔ ni wɔjɛ wɔtsuiŋ fɛɛ wɔkɛ mɔ lɛ he fa lɛ lɛ, no tsɔɔ akɛ wɔmli hi. Mɛni hewɔ mɔ esa akɛ wɔsumɔ akɛ wɔkɛ mɛi ahe baafa amɛ lɛ? Nɔ kome ji akɛ, etsɛŋ ni wɔ hu wɔbaatɔ̃ mɔ ni tɔ̃ wɔnɔ lɛ nɔ, ni wɔbaasumɔ ni lɛ hu ekɛ fa wɔ.

“Taakɛ bɔ ni Yehowa hu ŋɔfa nyɛ tswaa lɛ, nakai nyɛ hu nyɛfea.” Enɛ ji yiŋtoo titri hewɔ ni esa akɛ wɔkɛfa mɛi tswaa lɛ: Yehowa Nyɔŋmɔ kɛfaa wɔ tswaa. (Mika 7:18) Ŋɔɔ be fioo kɛsusu ejurɔ kpele ni Yehowa feɔ eshafeelɔi ni tsakeɔ amɛtsui lɛ he okwɛ. Yehowa tamɔɔɔ wɔ, efeee esha. Kɛlɛ, ejɛɔ etsuiŋ ekɛ eshafeelɔi ni tsakeɔ amɛtsui lɛ ahe faa amɛ kwraa, tsɛ ele akɛ ebaŋ lɛ kɔkɔɔkɔ akɛ ebaatɔ̃ nakai eshafeelɔi lɛ anɔ koni amɛ hu amɛkɛfa lɛ. Anɔkwa, Yehowa feɔ nɔkwɛmɔnɔ ni fe fɛɛ yɛ eshafeelɔi ni etsake amɛtsui lɛ ahe ni akɛfaa amɛ lɛ gbɛfaŋ!

Yehowa mɔbɔnalɛ lɛ gbalaa wɔ kɛbɛŋkɛɔ lɛ, ni no haa wɔsumɔɔ akɛ wɔkase lɛ. (Efesobii 4:32–5:1) Belɛ, ehi jogbaŋŋ akɛ wɔbaabi wɔhe akɛ, ‘Akɛni Yehowa kɛfaa mi tswaa hewɔ lɛ, mɛni hewɔ esaaa akɛ mihu mikɛ minaanyo adesa ni yeee emuu ni tɔ̃ minɔ shi etsake etsui lɛɛlɛŋ lɛ he faa lɛ?’—Luka 17:3, 4.