Mɛni Baa Weku Shihilɛ Nɔ Lɛ?

“OFAINƐ ani obaanyɛ oye obua mi. Miwu feɔ mi niseniianii ni minyɛɛɛ madamɔ naa dɔŋŋ. Mibɛ mɔ ni mikɛ misane lɛ aaafɔ ehiɛ. Eshwɛ mikome too kɛ mibinuu ni eye afi pɛ lɛ. Miwu lɛ tsui ehiii kwraa, ni atswɛrɛ ni emamɔɔ mi lɛ eha miniji ahe fɛɛ edi. Ema migugɔ nɔ atswɛrɛ aaafee otsii enyɔ nɛ ni eha migugɔŋ ho lá aahu. Gbɛkɛ ko beni mika shi yɛ saa nɔ lɛ ebamɔ misɛ̃ ni emia mi aahu kɛyashi be mli ni nɔ̃ nyɔ minɔ dani eyoo nɔ ni efee lɛ. Mihi shi gbii babaoo ni minyɛɛ no ko mami kɛtsɔ misɛŋ. . . .

“Miwu lɛ bolɔɔ ni ejwaraa nibii yɛ shia lɛ mli ni ewoɔ wɔbi abifao lɛ he gbeyei. Be ko beni miwu lɛ etsi mi egbee shi gbɛkɛ ko lɛ, gbekɛ lɛ bolɔ waa kɛ gbeyeishemɔ, ni no mli lɛ mipila tsɔ ni miishe gbeyei hu ni minyɛɛɛ nɔ ko mafee. . . Mikɛɛ lɛ akɛ miisumɔ ni matse gbala lɛ mli. Amrɔ nɛɛ mibɛ hegbɛ akɛ mikɛɔ akɛ miishi shia, kɛkɛ lɛ eje shishi, ni miishe gbeyei miiha miwala kɛ mibinuu fioo lɛ wala.”​—Ejɛ wolo Scream Quietly or the Neighbors Will Hear, ni Erin Prizzey ŋma lɛ mli.

Ani sane ko ni efɔɔɔ kaa nɛ? Dabida! Kɛ abu naa lɛ, wumɛi yiɔ ŋamɛi ni naa shɛɔ akpekpei 1.8 daa afi yɛ U.S. Amerika pɛ, ni tsɔɔ akɛ, amɛshiɔ amɛ ŋtia, amɛkɔ̃ɔ amɛ, amɛmamɔɔ amɛ atswɛrɛ, amɛkɛ nɔ ko tswaa amɛ, akɛ kakla loo tũ woɔ amɛhe gbeyei. Okɛ bɔlɛnamɔ ni jeee nɔ ni afeɔ, gbekɛbii ni akwɛɛɛ amɛ ni ayeɔ amɛhenumɔŋ awui kɛ fɔlɔi kɛ niimɛi ni ayiɔ amɛ afata he ni obaana akɛ shihilɛ lɛ efite ni ehiii kwraa. No hewɔ lɛ sanebimɔ lɛ ji: Mɛni baa weku shihilɛ nɔ lɛ

Esa akɛ enɛ akɔ ohe. Shi obaabi akɛ, ‘Mɛni hewɔ, mi lo? Manyɛ mama no mi maha bo akɛ nibii ni tamɔ nakai bɛ miweku lɛ mli.’ Kɛji nakai po lɛ, esa akɛ osusu weku mli naagbai ni tamɔ nɛkɛ he. Mɛni hewɔ? Ejaakɛ jeeŋmɔ beebe Biblia lɛ gba fɔ shi akɛ weku mli naagbai ni tamɔ nɛkɛ ni baaba lɛ baafee odaseyeli ni mli ka shi faŋŋ ni tsɔɔ akɛ jeŋ fɛɛ nibii agbɛjianɔtooa nɛɛ “naagbee gbii” Iɛ amli wɔyɔɔ nɛɛ. Kadimɔ nɔ ni bɔfo Paulo gba fo shi nɛɛ: “Shi na enɛ ole akɛ naagbee gbii lɛ anɔ lɛ jaramɔ bei baaba. Ejaakɛ gbɔmɛi aaatsɔmɔ hesuɔloi, . . . fɔlɔi anɔ toigbolɔi, trumui, mɛi ni he tseee, mɛi ni edɔɔɔ mɔ he.”​—2 Timoteo 3:​1-3.

Ani Paulo wiemɔi nɛɛ miiba mli diɛŋtsɛ ŋmɛnɛ? Nɛgbɛ nɛkɛ weku mli bei nɛɛ efite kɛyashɛ? Ani ehaa Paulo gbalɛ ni tsɔɔ akɛ wɔyɛ “naagbee gbii” lɛ amli diɛŋtsɛ lɛ baa mli?

[Shishigbɛ niŋmai]