Nyɔŋmɔ Jwɛŋɔ Ohe

MARY, ni ji Kristofonyo yoo ko ni eye afii 40 kɛyaa lɛ, ena amanehulu babaoo yɛ eshihilɛ mli. Ewu gbalafitemɔ lɛ kɛ amɛgbala lɛ mlitsemɔ ba, nɔ ni fe afii nyɔŋma ni eho nɛ. Kɛjɛ no sɛɛ kɛbaa lɛ, Mary epele ehe aahu koni enyɛ etsu sɔ̃ ni kã enɔ akɛ fɔlɔ kome lɛ he nii kɛha ebii ejwɛ lɛ. Shi ekome pɛ eyɔɔ lolo, ni bei komɛi lɛ ehe shoofeemɔ lɛ mli waa fe bɔ ni ebaanyɛ edamɔ naa. Mary susuɔ akɛ, ‘Ani enɛ tsɔɔ akɛ Nyɔŋmɔ susuuu mihe, aloo mibii ni bɛ tsɛ lɛ hu ahe?’

Kɛji okɛ jaramɔ shihilɛ ni tamɔ nɛkɛ ekpe dã jio, okɛkpeko dã jio, eka shi faŋŋ akɛ okɛ Mary henumɔi nɛɛ kpaa gbee. Wɔteŋ mɔ fɛɛ mɔ ekpee jaramɔ shihilɛi anaa dã, ni ekolɛ wɔsusu be mli kɛ bɔ ni Yehowa baafee etsu he nii eha wɔ lɛ he. Nɛkɛ niiashikpamɔi nɛɛ ekomɛi jɛ wɔhe ni wɔkɛkpɛtɛɔ Nyɔŋmɔ mlai ahe tɛɛ lɛ hewɔ. (Mateo 10:16-18; Bɔfoi lɛ Asaji 5:29) Ekrokomɛi hu jɛ adesai ni yeee emuu ni wɔji, ni wɔyɔɔ jeŋ ni Satan yeɔ nɔ nɛɛ mli lɛ hewɔ. (1 Yohane 5:19) Bɔfo Paulo ŋma akɛ: “Bɔɔ nii lɛ fɛɛ kɛ wɔ dɔmɔɔ ŋtsɔi ni amɛkɛ wɔ kɔmɔɔ.”—Romabii 8:22.

Shi kɛlɛ, anɔkwale ni eji akɛ okɛ kaa ni mli wa waa kpeɔ lɛ etsɔɔɔ akɛ Yehowa ekwa bo, aloo ebɛ ohilɛ-kɛhamɔ he miishɛɛ. Te ooofee tɛŋŋ ona enɛ he nɔmimaa? Mɛni tsɔɔ akɛ Nyɔŋmɔ jwɛŋɔ ohe?

Blema Nɔkwɛmɔ nɔ Ko

Biblia lɛ kɛ bɔ ni Yehowa jwɛŋɔ gbɔmɛi ahe aŋkroaŋkro lɛ he odaseyeli ni yɔɔ faŋŋ haa. Susumɔ David he okwɛ. Yehowa ná nɛkɛ gbekɛ nuu tookwɛlɔ nɛɛ he miishɛɛ waa, ni ebana lɛ akɛ “lɛ diɛŋtsɛ etsui naa nuu.” (1 Samuel 13:14) Sɛɛ mli, beni David ye nɔ akɛ maŋtsɛ lɛ, Yehowa wo lɛ shi akɛ: “He fɛɛ he ni oyaa lɛ mifata ohe.”—2 Samuel 7:9.

Ani enɛ tsɔɔ akɛ David hi “hebuu” shihilɛ mli, ni eye ehe kɛjɛ jaramɔ shihilɛi fɛɛ mli? Dabi, David kɛ kaai ni mli wa waa kpe dani eje enɔyeli lɛ shishi, kɛ agbɛnɛ enɔyeli lɛ mli hu. Dani eeetsɔ maŋtsɛ lɛ, Maŋtsɛ Saul gbɔmɔgbelɔ lɛ kɛ afii babaoo nyiɛ esɛɛ aahu ni eetao lɛ be fɛɛ be. David ŋma, yɛ eshihilɛ mli be nɛɛ mli akɛ: “Misusuma yɛ jatai ateŋ . . . gbɔmɛi abii ni amɛnyanyɔji tamɔ akpɔlɔi kɛ gaimlibii.”—Lala 57:5.

Ni kɛlɛ, yɛ nɛkɛ jaramɔ be nɛɛ mli fɛɛ lɛ, David ná nɔmimaa akɛ Yehowa jwɛŋɔ ehe diɛŋtsɛ. Ekɛɛ Yehowa yɛ sɔlemɔ mli akɛ: “Okaneɔ mitsomlomɔi lɛ.” Hɛɛ, kɛha David lɛ, efee tamɔ nɔ ni Yehowa eŋmala amanehului ni etsɔ mli lɛ fɛɛ ewo wolo mli. Kɛkɛ ni David kɛfata he akɛ: “Okɛ mihiɛ yaafonui awo otɔ lɛ mli! Ani amɛbɛ owolo lɛ mli?”a (Lala 56:9) David kɛ nɛkɛ mfoniri feemɔ nɛɛ tsɔɔ hekɛnɔfɔɔ ni eyɔɔ akɛ, jeee shihilɛ lɛ pɛ kɛkɛ Yehowa le, shi moŋ ele bɔ ni esaa ehe ehaa yɛ henumɔŋ hu.

Kɛbaa eshihilɛ naagbee gbɛ lɛ, David nyɛ eŋma kɛjɛ lɛ diɛŋtsɛ eniiashikpamɔ mli akɛ: “Yehowa haa gbɔmɔ nane maa shi shiŋŋ, ni enáa egbɛ lɛ he miishɛɛ. Kɛ egbee shi tete lɛ, ekãŋ shi kwraa, ejaakɛ Yehowa hiɛ enine mli.” (Lala 37:23, 24) Bo hu obaanyɛ ona hekɛnɔfɔɔ akɛ kɛ okaai lɛ kã he, ní amɛmiiya nɔ daa po lɛ, Yehowa naa otsuishiŋmɛɛ lɛ ni ejara wa waa kɛha lɛ. Paulo ŋma akɛ: “Nyɔŋmɔ jeee mɔ ni yeɔ sane ni ejaaa ni ehiɛ aaakpa nyɛ nitsumɔ lɛ nɔ kɛ suɔmɔ deŋme ni nyɛgbo yɛ egbɛi lɛ ahewɔ, ni nyɛkɛsɔmɔ mɛi krɔŋkrɔŋi lɛ, ni nyɛsaa nyɛsɔmɔɔ amɛ lolo lɛ.”—Hebribii 6:10.

Kɛfata he lɛ, Yehowa baanyɛ afee nii yɛ ogbɛfaŋ kɛtsɔ hewalɛ ni eeeha bo ni okɛŋmɛ otsui shi yɛ gbɛtsii nii fɛɛ ni akɛaama ogbɛ nɔ lɛ mli lɛ nɔ. David ŋma akɛ: “Jalɔ amanehului fa babaoo, shi Yehowa jieɔ lɛ kɛjɛɔ fɛɛ mli.” (Lala 34:20) Yɛ anɔkwale mli lɛ, Biblia lɛ kɛɔ wɔ akɛ Yehowa hiŋmɛii “kpaa shikpɔŋ muu lɛ fɛɛ nɔ, ni ejieɔ ehewalɛ kpo ehaa mɛi ni amɛtsuii ehi kɛwula shi yɛ egbɛfaŋ lɛ.”—2 Kronika 16:9.

Yehowa Egbala Bo Kɛba Emasɛi

Abaanyɛ ana odaseyeli kroko ni tsɔɔ bɔ ni Yehowa jwɛŋɔ wɔhe lɛ yɛ Yesu wiemɔi nɛɛ amli. Ekɛɛ: “Mɔ ko nyɛŋ aba miŋɔɔ, ja Tsɛ lɛ ni tsu mi lɛ egbala lɛ dã.” (Yohane 6:44) Hɛɛ, Yehowa yeɔ ebuaa gbɔmɛi aŋkroaŋkro koni amɛkɛ Kristo afɔleshaa lɛ mli sɛɛnamɔi lɛ atsu nii kɛmɔ shi. Yɛ mɛɛ gbɛ nɔ? Yɛ gbɛ titri nɔ lɛ, kɛtsɔ Maŋtsɛyeli shiɛmɔ nitsumɔ lɛ nɔ. Eji anɔkwale akɛ, nitsumɔ nɛɛ tsuɔ nii “[kɛyeɔ] jeŋmaji lɛ fɛɛ odase,” shi kɛlɛ eshɛɔ gbɔmɛi aŋɔɔ aŋkroaŋkro. Anɔkwale ni eji akɛ oobo sanekpakpa lɛ he shɛɛ sane lɛ toi ni ootsu he nii lɛ feɔ odaseyeli ni tsɔɔ akɛ Yehowa susuɔ ohe akɛ mɔ aŋkro.—Mateo 24:14.

Yehowa tsɔɔ mumɔ krɔŋkrɔŋ lɛ nɔ egbalaa aŋkroaŋkroi kɛbaa e-Bi lɛ kɛ hiɛnɔkamɔ kɛha naanɔ wala namɔ hu he. Enɛ haa amɛteŋ mɔ fɛɛ mɔ nuɔ mumɔŋ anɔkwalei ashishi ni ekɛtsuɔ nii, yɛ gbɔjɔmɔi ni yɔɔ amɛhe kɛ emuu ni amɛyeee lɛ fɛɛ sɛɛ. Yɛ anɔkwale mli lɛ, anyɛŋ anu Nyɔŋmɔ yiŋtoi ashishi kɛji Nyɔŋmɔ mumɔ lɛ yelikɛbuamɔ fataaa he. (1 Korintobii 2:11, 12) Taakɛ Paulo ŋma eyaha Tesalonikabii lɛ, “jeee mɛi fɛɛ yɔɔ hemɔkɛyeli.” (2 Tesalonikabii 3:2) Yehowa kɛ emumɔ lɛ haa mɛi ni sumɔɔ ni egbala amɛ kɛba emasɛi lɛ pɛ.

Yehowa gbalaa mɛi kɛbaa eŋɔɔ ejaakɛ esumɔɔ amɛ akɛ aŋkroaŋkroi, ni eesumɔ ni amɛshɛ yiwalaheremɔ he. Kwɛ bɔ ni eji odaseyeli ni yɔɔ shiŋŋ, ni tsɔɔ akɛ Yehowa jwɛŋɔ wɔhe! Yesu kɛɛ: “Nakai nɔŋŋ ni nyɛ-Tsɛ ni yɔɔ ŋwɛi lɛ sumɔɔɔ akɛ bibii nɛɛ ateŋ mɔ kome laajeɔ.” (Mateo 18:14) Hɛɛ, yɛ Nyɔŋmɔ hiɛ lɛ, mɔ fɛɛ mɔ he miihia akɛ mɔ aŋkro ni esoro lɛ kwraa yɛ mɛi krokomɛi fɛɛ he. No hewɔ ni Paulo nyɛ eŋma akɛ: “Ebaawo mɔ fɛɛ mɔ nyɔmɔ bɔ ni sa enitsumɔi lɛ.” (Romabii 2:6) Ni bɔfo Petro hu kɛɛ: “Nyɔŋmɔ jeee mɛi ahiɛaŋkwɛlɔ, shi moŋ maŋ fɛɛ maŋ mli lɛ, mɔ [aŋkro] ni sheɔ lɛ gbeyei ni etsuɔ jalɛ nii lɛ, lɛ ji mɔ ni saa ehiɛ.”—Bɔfoi lɛ Asaji 10:34, 35.

Yesu Naakpɛɛ Nii Lɛ

Bɔ ni Nyɔŋmɔ susuɔ adesai ahe waa lɛ je kpo yɛ gbɛ ni taa mɔ mli nɔ, yɛ naakpɛɛ nii ni e-Bi, Yesu fee lɛ mli. Nɔ ni fata nɛkɛ tsamɔi nɛɛ ahe hu ji henumɔ ni mli kwɔ. (Marko 1:40, 41) Akɛni Yesu “diɛŋtsɛ nyɛŋ eto eyiŋ efee nɔ ko, ja nɔ ni enaa akɛ Tsɛ lɛ feɔ lɛ” hewɔ lɛ, emusuŋtsɔlɛ lɛ feɔ bɔ ni Yehowa jɛɔ suɔmɔ mli esusuɔ etsuji fɛɛ ahe aŋkroaŋkro lɛ he mfoniri ni mli kã shi faŋŋ diɛŋtsɛ.—Yohane 5:19.

Susumɔ sane ni aŋma yɛ naakpɛɛ nii ni Yesu fee, ni aŋma afɔ̃ shi yɛ Marko 7:31-37 lɛ he okwɛ. Yesu tsa nuu ko ni emu toi ni eji mumui hu. “Ekɛ [nuu] lɛ je asafo lɛ teŋ kɛtee afã,” taakɛ Biblia lɛ gbaa wɔ lɛ. Kɛkɛ ni, “ekwɛ ŋwɛi, ni edɔmɔ ŋtsɔi yɛ emli ni ekɛɛ lɛ akɛ: ‘Hefata!’ eshishi ji, ‘Gbelemɔ!’ ”

Mɛni hewɔ Yesu kɛ nuu nɛɛ je asafo lɛ teŋ kɛtee afã lɛ? Ojogbaŋŋ, ekolɛ eeenyɛ eba lɛ akɛ gbɔmɔ ni emu toi ni enyɛɛɛ ewie jogbaŋŋ hu lɛ baana henumɔ akɛ mɔ fɛɛ mɔ jwɛŋmɔ eba enɔ, yɛ mɛi ni kwɛɔ nɔ ni yaa nɔ lɛ ahiɛ. Ekolɛ Yesu kadi bɔ ni nuu nɛɛ ehao lɛ, no hewɔ ni ehala akɛ ebaatsa lɛ yɛ teemɔŋ lɛ. Taakɛ Biblia he nilelɔ ko kɛɛ lɛ, “bɔ ni sane muu lɛ fɛɛ ba lɛ tsɔɔ wɔ faŋŋ akɛ Yesu susuuu nuu lɛ he akɛ helatsɛ ko kɛkɛ; shi moŋ esusu ehe akɛ mɔ aŋkro. Nuu lɛ yɛ hiamɔ nii krɛdɛɛ kɛ naagba krɛdɛɛ ko hu, ni Yesu kɛ lɛ ye yɛ mɔ hesusumɔ ni tsɔɔ suɔmɔ mli, yɛ gbɛ ni gbaaa ehenumɔi anaa kɛ gbɛ ni ebaanyɛ enu shishi hu nɔ.”

Sane ni aŋma nɛɛ tsɔɔ akɛ Yesu susuɔ mɛi ahe aŋkroaŋkro. Obaanyɛ ona nɔmimaa akɛ eyɛ ohe miishɛɛ nakai nɔŋŋ. Lɛlɛŋ, efɔleshaa gbele lɛ ji suɔmɔ ni eyɔɔ kɛhaa adesai ni abaanyɛ akpɔ̃ amɛ lɛ aje lɛ fɛɛ kpojiemɔ. Shi kɛlɛ, obaanyɛ osusu nakai nifeemɔ lɛ he akɛ ekɔɔ ohe akɛ mɔ aŋkro, taakɛ Paulo, mɔ ni ŋma enɛ lɛ wie lɛ: “Nyɔŋmɔ Bi lɛ . . . sumɔ mi ni eŋɔ ehe eha yɛ mi-hewɔ.” (Galatabii 2:20) Ni akɛni Yesu wie akɛ ‘mɔ ni ena mi lɛ, ena Tsɛ lɛ hu’ hewɔ lɛ, wɔbaanyɛ wɔna nɔmimaa akɛ Yehowa yɛ etsuji ateŋ mɔ fɛɛ mɔ he miishɛɛ aŋkroaŋkro nakai nɔŋŋ.—Yohane 14:9.

Yehowa Batsɔɔ Nyɔmɔwolɔ

Nyɔŋmɔ he nilee ni wɔɔna lɛ kɔɔ esui lɛ ahe nibii sɔrɔtoi fɛɛ ni wɔɔle, taakɛ ajie lɛ kpo yɛ Biblia lɛ mli lɛ he. Gbɛi Yehowa lɛ shishi diɛŋtsɛ ji “Ehaa Ebaa Shihilɛ Mli,” ni tsɔɔ akɛ Yehowa baanyɛ atsɔ nɔ fɛɛ nɔ ni ehalaa akɛ eeetsɔ, koni ekɛtsu eyiŋtoi ahe nii. Étsu gbɛhei sɔrɔtoi ahe nii yɛ yinɔsane be fɛɛ mli, ni ekomɛi ni fata he ji Bɔlɔ, Tsɛ, Nuntsɔ Maŋtsɛ, Tookwɛlɔ, Yehowa Zebaot, sɔlemɔ Toibolɔ, Kojolɔ, Tsɔɔlɔ Kpeteŋkpele, kɛ Kpɔlɔ.b

Kɛ wɔhiɛ aaasɔ bɔ ni Nyɔŋmɔ gbɛi lɛ shishinumɔ ji lɛ jogbaŋŋ lɛ, no lɛ esa akɛ wɔle Yehowa yɛ egbɛhe akɛ Nyɔmɔwolɔ lɛ hu mli. Paulo ŋma akɛ: “Kɛ hemɔkɛyeli bɛ lɛ, anyɛŋ Nyɔŋmɔ hiɛ asa; ejaakɛ mɔ ni baa Nyɔŋmɔ ŋɔɔ lɛ, ja ehe eye akɛ eyɛ, ni eji mɛi ni taoɔ esɛɛ gbɛ lɛ anyɔmɔwolɔ hu.”—Hebribii 11:6.

Yehowa kɛ naanɔ wala yɛ paradeiso shikpɔŋ nɔ he shiwoo eha mɛi ni halaa ŋmɛnɛ akɛ amɛaajɛ amɛtsui muu fɛɛ mli amɛsɔmɔ lɛ lɛ. Ejeee pɛsɛmkunya feemɔ akɛ aaakpa nakai shiwoo ni yɔɔ nyam lɛ mlibaa gbɛ, ni nakai nɔŋŋ hu ejeee henɔwomɔ akɛ mɔ ko aaasusu akɛ eyɛ nakai shihilɛ lɛ mli. Mose ‘kwɛ nyɔmɔwoo lɛ gbɛ jogbaŋŋ.’ (Hebribii 11:26) Nakai nɔŋŋ Paulo hu kɛ gbɛkpamɔ ni mli wa kwɛ Nyɔŋmɔ shiwoo ni ekɛha Kristofoi anɔkwafoi ni afɔ amɛ mu lɛ mlibaa gbɛ. Eŋma akɛ: “Miitiu oti lɛ kɛyashɛ Nyɔŋmɔ tsɛmɔ ni jɛ ŋwɛi yɛ Kristo Yesu mli lɛ he juromɔ nɔ lɛ he.”—Filipibii 3:14.

Bo hu obaanyɛ okpa nyɔmɔwoo ni Yehowa ewo shi yɛ he kɛha mɛi ni ŋmɛɔ amɛtsui shi lɛ gbɛ. Nakai nyɔmɔwoo lɛ gbɛkpamɔ lɛ ji Nyɔŋmɔ he nilee ni ooona kɛ otsui shi ni oooŋmɛ yɛ esɔɔmɔ mli lɛ fã. No hewɔ lɛ, jwɛŋmɔ jɔɔmɔi ni Yehowa esaa eto bo lɛ nɔ daa gbi. Mary, ni atsĩ etã yɛ sane nɛɛ shishijee nɔŋŋ lɛ, ebɔ mɔdɛŋ yɛ gbɛ krɛdɛɛ nɔ akɛ eeefee enɛ. Taakɛ ekɛɛ lɛ, “enɛ ji klɛŋklɛŋ be kwraa yɛ mishihilɛ mli, ni mikpɛlɛ nɔ nyɛsɛɛ nɛɛ akɛ Yesu kpɔmɔ afɔleshaa lɛ kɔɔ mihe. Mibɔi henumɔ akɛ Yehowa jwɛŋɔ mihe akɛ mɔ aŋkro. Mihi shi akɛ Kristofonyo aahu fe afii 20, shi nyɛsɛɛ nɛɛ nɔŋŋ mije shishi akɛ miihe enɛ miiye diɛŋtsɛ.”

Kɛtsɔ nikasemɔ kɛ Biblia lɛ nɔ jwɛŋmɔ ni jɛ tsuiŋ nɔ lɛ, Mary, kɛ mɛi krokomɛi akpekpei abɔ, miina amɛmiile akɛ Yehowa jwɛŋɔ ewebii ahe, jeee akɛ kuu kɛkɛ, shi moŋ akɛ aŋkroaŋkroi hu. Bɔfo Petro na nɔmimaa ni mli wa waa yɛ enɛ he, aahu akɛ eŋma akɛ: “Nyɛŋɔa nyɛhaomɔ fɛɛ nyɛfɔ̃a [Nyɔŋmɔ] nɔ, ejaakɛ lɛ ejwɛŋɔ nyɛnɔ.” (1 Petro 5:7) Hɛɛ, Nyɔŋmɔ jwɛŋɔ ohe!

[Shishigbɛ niŋmai]

[Akrabatsa ni yɔɔ baafa 6]

Gbohiiashitee Lɛ—Odaseyeli ni Tsɔɔ akɛ Nyɔŋmɔ Jwɛŋɔ Wɔhe

ANAA odaseyeli ni tsɔɔ mɔ yiŋ, ni tsɔɔ bɔ ni Nyɔŋmɔ yɔɔ mɔ fɛɛ mɔ he miishɛɛ aŋkroaŋkro lɛ yɛ Biblia lɛ mli yɛ Yohane 5:28, 29, (NW): “Ŋmɛlɛtswaa lɛ miiba, nɔ mli ni mɛi fɛɛ ni yɔɔ kaimɔ bui amli lɛ aaanu [Yesu] gbee, ni amɛaaje kpo.”

Nɔ ni yɔɔ miishɛɛ ji akɛ, akɛ Hela wiemɔ mne·meiʹon (kaimɔ bui) tsu nii yɛ biɛ, yɛ taʹphos (gbonyo bu) najiaŋ. Wiemɔ taʹphos hiɛ shishinumɔ ni tsɔɔ fũ ni afũɔ mɔ ko. Shi mne·meiʹon tsɔɔ akɛ akaiɔ gbɔmɔ ni egbo lɛ shihilɛ mli saji fɛɛ.

Yɛ enɛ gbɛfaŋ lɛ, bo lɛ susumɔ nɔ ni gbohiiashitee lɛ baabi yɛ Yehowa Nyɔŋmɔ gbɛfaŋ lɛ he okwɛ. Kɛji ekɛ mɔ ko baaba wala mli ekoŋŋ lɛ, esa akɛ ele nakai mɔ lɛ he nɔ fɛɛ nɔ—ni sui komɛi ni ena yɛ efɔmɔ mli kɛ eyitsoŋ saji ni ekaiɔ fɛɛ fata he. Ja nakai dani ebaanyɛ akɛ nakai mɔ aŋkro lɛ aba wala mli ekoŋŋ kɛ esui fɛɛ pɛpɛɛpɛ.

Yɛ anɔkwale mli lɛ, yɛ adesai agbɛfaŋ lɛ, anyɛŋ enɛ afee, shi “aaanyɛ nii fiaa afee yɛ Nyɔŋmɔ gbɛfaŋ.” (Marko 10:27) Ebaanyɛ etsɔɔ nɔ ni yɔɔ mɔ lɛ tsui mli po kɛ nɔmimaa. Kɛji mɔ lɛ egbo afii ohai babaoo po lɛ, bɔ ni Nyɔŋmɔ kaiɔ lɛ ehaa lɛ fiteee kɔkɔɔkɔ; ehiɛ kpaaa enɔ. (Hiob 14:13-15) Enɛ hewɔ lɛ, beni etsĩɔ Abraham, Isak, kɛ Yakob tã lɛ, Yesu nyɛ ewie, afii ohai abɔ ni eho yɛ amɛgbele sɛɛ lɛ akɛ Yehowa “Nyɔŋmɔ lɛ, ejeee gbohii a-Nyɔŋmɔ, shi moŋ hiɛkalɔi a-Nyɔŋmɔ ni, ejaakɛ ehiɛ lɛ mɛi fɛɛ hiɛ kamɔ.”—Luka 20:38.

Enɛ hewɔ lɛ, gbɔmɛi akpekpei akpei abɔ ni egboi lɛ yɛ Yehowa Nyɔŋmɔ kaimɔ mli jogbaŋŋ kɛmɔ shi. Kwɛ bɔ ni enɛ ji odaseyeli ni mli wa waa ni tsɔɔ akɛ Nyɔŋmɔ jwɛŋɔ adesai ahe aŋkroaŋkro!

[Mfoniri ni yɔɔ baafa 7]

Yesu ná mɛi ni etsa amɛ lɛ ahe miishɛɛ aŋkroaŋkro