Nɔ Hewɔ ni Hemɔkɛyeli kɛ Nilee he Hiaa Wɔ
Yakobo Wolo lɛ Mli Saji Otii
TSUISHIŊMƐƐ he hiaa Yehowa tsuji yɛ be mli ni amɛbaje kaa shishi. Esa akɛ amɛkwa jeŋbai ni haŋ amɛna ŋwɛi nɔkpɛlɛmɔ Iɛ hu. Yakobo wolo lɛ maa otii nɛɛ anɔ mi, ni amɛhe nɔ ko feemɔ diɛŋtsɛ lɛ biɔ hemɔkɛyeli ni yɔɔ ekaa kɛ ŋwɛi nilee.
Mɔ ni ŋma wolo nɛɛ ejieee ehe kpo akɛ Yesu bɔfoi enyɔ ni atsɛɔ amɛ Yakobo lɛ ateŋ mɔkome, shi akɛ ‘Nyɔŋmɔ kɛ Kristo tsulɔ.’ Nakai nɔŋŋ hu Yesu nyɛ bi Yuda kɛɔ akɛ eji “Yuda, ni ji Yesu Kristo tsulɔ kɛ Yakobo nyɛmi.” (Yakobo 1:1; Yuda 1; Mateo 10:2, 3) No hewɔ lɛ eka shi faŋŋ akɛ Yesu nyɛ bi Yakobo ji mɔ ni ŋma wolo ni egbɛi ka nɔ lɛ.—Marko 6:3.
Wolo nɛɛ etsiii Yerusalem hiɛkpatamɔ yɛ afi 70 Ŋ.B. lɛ ta, ni yinɔsaneŋmalɔ Josephus kɛɔ akɛ agbe Yakobo akɛ Ia odasefonyo yɛ Roma amralo Festo gbele yɛ aaafee afi 62. Ŋ.B. lɛ sɛɛ nɔŋŋ. Eka shi faŋŋ akɛ belɛ aŋma wolo lɛ dani afi 62 Ŋ.B. shɛ. Aŋma ayaha mumɔŋ Israel “akututsei nyɔŋma kɛ enyɔ” lɛ, ejaakɛ aŋma ayaha mɛi ni hiɛ “wɔ Nuŋtsɔ Yesu Kristo . . . hemɔkeyeli lɛ.”—Yakobo 1:1; 2:1; Galatabii 6:16.
Yakobo kɛ nɔkwɛmɔ nii ni baanyɛ aye abua wɔ ni wɔkai eŋaawoo lɛ tsu nii. Akɛ nɔkwɛmɔ nɔ lɛ, etsɔɔ akɛ, gbɔmɔ ni biɔ nilee kɛjɛɔ Nyɔŋmɔ dɛŋ lɛ yiŋ akafee lɛ kɔshikɔshi “ejaakɛ ŋwanejelɔ lɛ, etamɔ ŋshɔke ni kɔɔyɔɔ tswaa kɛyaa kɛbaa.” (Yak 1:5-8) Esa akɛ wɔkudɔ wɔlilɛi lɛ, ejaakɛ ebaanyɛ ekudɔ wɔgbɛ tamɔ bɔ ni kudɔɔ tsɔɔ lɛlɛ gbɛ lɛ. (Yak 3:1, 4) Ni bɔni afee ni wɔnyɛ wɔdamɔ kaai anaa lɛ, esa akɛ wɔjie tsuishitoo kpo tamɔ bɔ ni okwaafonyo feɔ beni emɛɔ enibaanii lɛ.—Yak 5:7, 8.
Hemɔkɛyeli, Kaai, kɛ Nitsumɔi
Klɛŋklɛŋ lɛ, Yakobo tsɔɔ akɛ wɔbaanyɛ wɔna miishɛɛ akɛ Kristofoi yɛ wɔkaai lɛ fɛɛ sɛɛ. Yak 1:1-18 Kaai nɛɛ ekomɛi, tamɔ helai baa adesai fɛɛ nɔ, shi Kristofoi naa nɔ hu yɛ Nyɔŋmɔ kɛ Kristo tsuji ni amɛji hewɔ. Yehowa baaha wɔ nilee ni he hiaa ni baanyɛ aha wɔŋmɛ wɔtsui yɛ mli lɛ kɛ wɔtee nɔ wɔbi yɛ hemɔkɛyeli mli. Ekɛ efɔŋ ekaaa wɔ kɔkɔɔkɔ, ni wɔbaanyɛ ni wɔkɛ wɔhiɛ afɔ enɔ kɛha nibii ni hi.
Bɔni afee ni wɔnine ashɛ Nyɔŋmɔ yelikɛbuamɔ nɔ lɛ, esa akɛ wɔja lɛ kɛtsɔ nitsumɔi ni tsɔɔ akɛ wɔyɛ hemɔkɛyeli lɛ anɔ. (Yak 1:19–2:26) Enɛ biɔ ni “wɔfee wiemɔ lɛ nɔyelɔi,” jeee toibolɔi kɛkɛ. Esa akɛ wɔye wɔlilɛi nɔ, wɔkwɛ awusai kɛ okulafoi anɔ, ni wɔhi shi akɛ mɛi he bɛ kpa ko yɛ je lɛ mli. Kɛ wɔhiɛ shwieɔ niiatsɛmɛi ahiɛ ni wɔbuuu ohiafoi lɛ, wɔbaaku “mla lɛ mli otu” ni ji suɔmɔ lɛ mli. Esa akɛ wɔkai hu akɛ atsɔɔ nitsumɔi anɔ ajieɔ hemɔkɛyeli kpo, taakɛ Abraham kɛ Rahab nɔkwɛmɔ nii lɛ fɛɛ tsɔɔ lɛ. Lɛlɛŋ, “hemɔkɛyeli ni nitsumɔi bɛ he lɛ ji hemɔkɛyeli gbonyo.”
Ŋwɛi Nilee kɛ Sɔlemɔ
Hemɔkɛyeli kɛ nilee fɛɛ he hiaa tsɔɔlɔi koni amɛnyɛ amɛtsu amɛnitsumɔi. (Yak 3:1-18) Akɛ tsɔɔlɔi lɛ, amɛyɛ gbɛnaa nii ni tsii. Taakɛ amɛji lɛ, esa akɛ wɔ hu wɔye wɔlilɛi nɔ—nɔ ko ni ŋwɛi nilee yeɔ buaa wɔ koni wɔfee.
Nilee hu yeɔ ebuaa wɔ koni wɔyoo akɛ, kɛ wɔŋmɛɛ wɔhe wɔha je lɛŋ sui lɛ, ebaafite wekukpaa ni ka wɔkɛ Nyɔŋmɔ teŋ lɛ. (Yak 4:1–5:12) Kɛ wɔpele ni wɔnine eshɛ pɛsɛmkunya nibii komɛi anɔ aloo wɔwie wɔshi wɔnyɛmimɛi lɛ, belɛ ehe miihia ni wɔtsake wɔtsui. Ní kwɛ bɔ ni ehe hiaa akɛ wɔɔkwa je lɛ ni wɔkɛ lɛ aaabɔ lɛ, ejaakɛ enɛ baafee mumɔŋ gbalafitemɔ! Wɔkaku wɔhiɛ wɔshwie Nyɔŋmɔ suɔmɔnaa nifeemɔ nɔ kɔkɔɔkɔ kɛtsɔ heloo gbɛfaŋ nibii ahe gbɛjianɔtoo nɔ, ni wɔtsi wɔhe kɛjɛ su ni tsɔɔ tsuishitoo ni bɛ kɛ huhuuhu ni wɔɔwie wɔshi wɔhe lɛ he.
Esa akɛ mɔ fɛɛ mɔ ni he yeɔ yɛ mumɔŋ lɛ atao asafo lɛ mli onukpai lɛ ayelikɛbuamɔ (Yak 5:13-20) Kɛ afee eshai komɛi lɛ, amɛ sɔlemɔi kɛ ŋaawoo ni nilee yɔɔ mli lɛ baaye abua ni “mɔ ni kpaleɔ eshafeelɔ kɛjɛɔ egbɛduu mli lɛ, eehere [eshafeelɔ lɛ) susuma yiwala kɛmiijɛ [mumɔŋ kɛ naanɔ) gbele mli.”
[Akrabatsa ni yɔɔ baafa 23]
Wiemɔ lɛ Nɔyelɔi: Esa akɛ wɔfee “wiemɔ lɛ nɔyelɔi, ni jeee wiemɔ lɛ nulɔi kɛkɛ.”(Yakobo 1:22-25) Mɔ ni nuɔ kɛkɛ lɛ “tamɔ nuu ko ni kwɛɔ ehiɛ su lɛ yɛ ashwishwɛ mli.” Kɛ ekwɛ ehiɛ fioo lɛ, eshiɔ eyaa, “ni amrɔmrɔ nɔŋŋ lɛ ehiɛ kpaa bɔ ni eyɔɔ lɛ nɔ.” Shi ‘wiemɔ lɛ nɔyelɔ’ lɛ kwɛɔ Nyɔŋmɔ mla ni eye emuu ni sane ko bɛ he lɛ mli jogbaŋŋ ni ekpɛlɛɔ nɔ fɛɛ nɔ ni abiɔ yɛ Kristofonyo dɛŋ lɛ nɔ. “Ekaa he,” eyaa nɔ epɛiɔ mla lɛ mli bɔni afee ni ekɛjaje eshihilɛ mli ni enyiɛ sɛɛ pɛpɛɛpɛ. (Lala 119:16) “Wiemɔ lɛ nɔyelɔ” lɛ yɛ sɔrɔto yɛ mɔ ni kwɛɔ ehiɛ yɛ ashwishwɛ mli ni ehiɛ kpaa bɔ ni eji nɔ lɛ he yɛ mɛɛ gbɛ nɔ? Enɔyeli lɛ kɛ Yehowa wiemɔ lɛ tsuɔ nii ni enaa E-hiɛ duromɔ!—Lala 19:8-12.