Mɛni Ashwishwɛ lɛ Jieɔ lɛ Kpo?

KWƐMƆ ashwishwɛ mli. Mɛni onaa? Ashwishwɛ mli kwɛmɔ yɛ bei komɛi amli lɛ jieɔ fatɔɔ ko ni yɔɔ hiɛgbele yɛ ohesaamɔ mli lɛ kpo, ni onaa miishɛɛ akɛ ooosaa enɛ dani mɛi krokomɛi ayoo.

Biblia lɛ tamɔ ashwishwɛ. Ebaanyɛ eye ebua wɔ ni wɔna bɔ ni wɔji diɛŋtsɛ, ni ehaŋ wɔsusu bɔ ni wɔsa lɛ he tuutu fe nine—loo bibioo tsɔ—yɛ Nyɔŋmɔ hiɛ. (Mateo 10:29-31; Romabii 12:3) Kɛfata he lɛ, Biblia lɛ baanyɛ ajie fatɔɔi ni yɔɔ wɔ wiemɔi, nifeemɔi, loo subaŋi amli ni ehe hiaa ni wɔjaje lɛ akpo. Kɛ eba lɛ nɛkɛ lɛ, ani obaaku ohiɛ oshwie nɔ ni ashwishwɛ lɛ jieɔ lɛ kpo lɛ nɔ?

Biblia ŋmalɔ Yakobo kɛɔ akɛ: “Kɛ mɔ ko ji wiemɔ lɛ nulɔ kɛkɛ, shi ejeee enɔyelɔ hu lɛ, nɛkɛ gbɔmɔ nɛɛ tamɔ nuu ko ni kwɛɔ ehiɛ su lɛ yɛ ashwishwɛ mli; ejaakɛ ekwɛɔ ehe, ni eyaa, ni amrɔmrɔ nɔŋŋ lɛ, ehiɛ kpaa bɔ ni eyɔɔ lɛ nɔ.”—Yakobo 1:23, 24.

Nɔ ni tamɔɔɔ nakai lɛ, Yakobo tsɔɔ nuu kroko, “mɔ ni maa eyi shi ekwɛɔ heyeli mla ni hi kɛwula shi lɛ mli, ni ekãa he” lɛ. (Yakobo 1:25) Hela wiemɔ ni atsɔɔ shishi “ekwɛɔ” lɛ tsɔɔ mɔ ni maa eyitso shi loo edɔɔ emli ekwɛɔ nii. Theological Dictionary of the New Testament lɛ kɛɔ akɛ, “sane lɛ fe nɔ ni tsɔɔ mɔ hiɛ kɛhoɔ kɛkɛ.” Wiemɔ lɛ tsɔɔ nɔ ko ni akɛtee ni ataoɔ jogbaŋŋ. Biblia mli saji ahe wielɔ, R. V. G. Tasker ŋma akɛ: “Nɔ ko yɛ ni he hiaa ni mɔ ni kwɛɔ lɛ miisumɔ ni ena, eyɛ mli akɛ ebaanyɛ ewa kɛha lɛ akɛ eeena ni enu fɛɛ shishi shikome.”

No hewɔ lɛ, ani obaapɛi omli yɛ Nyɔŋmɔ Wiemɔ lɛ mli ashwishwɛ lɛ hiɛ, ni ohi shi yɛ nɔ ni etaoɔ lɛ naa? Yakobo tee nɔ akɛ: “[Ni] ejeee mɔ ni nuɔ ni ehiɛ kpaa nɔ, shi moŋ eji nɔyelɔ ni tsuɔ he nii lɛ, nakai mɔ lɛ aaajɔɔ lɛ yɛ enɔyeli lɛ mli.”—Yakobo 1:25.